ꑱꌏꑸꄯꒉ 46

ꌋꃶꐚꌠꌋꆀꃶꀋꐚꌠꐯꀋꌡ

1 ꀖꇍꁡꊭꃄꇴꄂꄉꀍꃈꄚ，ꆀꀧꐧꊭꈎ；

ꀠꀘꇍꌦꁱꌊꁱꋋꈨꆹꄻꑋꁮꉆꁮꌋꆀꎇꃀꍅꑓꄩꏦꄉ。

ꆍꊇꐔꌊꐺꌠꃣꁧꆹꀉꇖꇨꄉ，ꎇꃀꋌꍑꐙꄏꇧꁠꀐ。

2 ꌦꁱꌊꁱꈧꌠꐯꇯꐧꊭꈎ、ꁡꊭꃄꇴꄂꄉꀍꃈꄚ，

ꋀꊇꃅꏦꈧꌠꀧꌋꃅꄷꀋꁧ，

ꋀꊨꏦꂯꊿꇱꁮꌊꇫꈴꁧꀐ。

3 ꑸꇱꄰꑭꊂ，ꑱꌝꆀꊿꇬꈀꋒꇈꈧꌠꀋ！

ꆍꊇꒆꎼꇁꄷꌦꆏ，ꉢꄌꄉ，

ꀉꂿꒆꎼꇁꄷꌦꆏ，ꉢꁠꄉ，

ꆍꊇꐯꇯꉠꅇꃅꌐ。

4 ꅑꅸꆍꃀꌠꄮꑟꇬꑌ，ꉡꆹꄻꀋꀱ；

ꅑꅸꆍꀑꐎꏁꇖꀕꄮꑟꇬꑌ，ꉢꆍꄎꑣꇬꎷ。

ꆏꉢꄻꄉꀐ，ꉢꀋꎪꃅꆎꁠ；

ꉢꀋꎪꃅꆎꄌ，ꀋꎪꃅꆎꈭꋏ。

5 ꆍꊇꈀꄸꂷꌌꉢꌟꄉ，ꉡꌋꆀꐯꏡꎻꂯ？

ꈀꄸꂷꌌꉡꄉꀴꄉ，ꉣꑊꁳꐯꌟꎻꂯ？

6 ꋀꊇꆹꐣꁙꇬꄉꏂꂷꉷꎼꇁ，

ꐎꏡꌌꄉꐎꂷꏣ，

ꐍꋩꇔꇷꊋꃼꌊꌦꁱꌊꁱꑠꋩꄉ，

ꇇꑭꃃꇵꀕꃅꇬꏭꀍꃈꄚ。

7 ꌦꁱꌊꁱꂶꌠꋀꐔꆼꁠꏦꌊꄈꅉꑠꈚꇬꅞꇈ，

ꄻꀋꇙꀋꑐꃅꀊꄶꉆꄉꎻ。

ꊿꇫꇴꇬꑌꅇꀱꑲꀋꌧ，

ꊾꈭꋏꌊꉮꃤꑌꐞꀋꄐ。

8 ꆍꊇꏟꈯꀕꃅꌤꋌꐘꎺꄉꄡꑟ，

ꊿꆸꉈꆽꁁꈧꌠꀋ！ꉌꂵꋓꉪꁨꄉꉪꏡꇬꎷ。

9 ꌤꆿꀋꉊꂴꏭꇫꅐꀐꈧꌠꎺꄉꇬꎷ；

ꑞꃅꆏ，ꉡꆹꏃꃅꌋꉬ，ꏃꃅꌋꀉꁁꂷꀋꐥ；

ꉡꆹꏃꃅꌋꉬ，ꀉꁁꌌꉢꌟꉆꂷꀋꐥ。

10 ꉡꆹꀋꉊꂴꇯꆐꌤꆿꌐꂫꈍꃅꐙꌠꉢꄜꋊꄉꀐ，

ꀃꌋꀊꆨꇯꆐꌤꆿꇫꅐꀋꇁꑴꌦꈧꌠꉢꉉꄉꀐ。

ꉢ：“ ꉢꄐꉢꏤꈀꄉꈨꌠꃅꇫꅐꇁꌐ；

ꉠꉌꈀꃹꌠꃅꄉꉢꃅꐛꌐꌠꉬ”ꄷꉉꄉꀐ。

11 ꉡꆹꁭꅐꏭꄉꏨꆉꉢꐜꎼꇁ，

ꊿꉠꄐꇐꏤꇐꋌꃅꐛꑠꂷꈜꎴꃅꄷꄉꉢꇴꌊꇁ。

ꉢꉉꄉꁱꄉꑲꆏ，ꀋꎪꃅꄉꃅꐛ；

ꉢꄐꄉꏤꄉꑲꆏ，ꀋꎪꃅꀕꇫꑟ。

12 ꆍꉌꂵꆸꉂ、ꑖꉬꐞꌊꈜꎴꃅꁧꋋꈨ，

ꉠꅇꂷꅲ。

13 ꉠꑖꉬꇫꑟꇁꂯꄉꀐ，ꀊꎴꃅꀋꇢꀐ；

ꉠꈭꋏꑆꊋꆹꈍꃅꑌꄉꀋꈻꌠꉬ。

ꉡꆹꑱꌝꆀꐛꅹꃅꑭꉢꇓꈓꈭꋏꇁ，

ꉠꀑꒉꑊꒉꁳꇫꅐꇁꎻ。