ꑱꌏꑸꄯꒉ 32

ꑖꉬꌠꃰꃅ

1 ꇬꉚ！ꀋꎪꃅꑖꉬꌊꏲꂠꌠꃰꃅꑠꂷꐥꇁ，

ꋍꇛꌺꈧꌠꑌꀋꎪꃅꊒꆽꀕꃅꄉꌅꈌꌬꇁ。

2 ꋀꊇꋍꂷꋑꀋꋒꀋꎪꃅꎰꆳꄡꅉꌡ，

ꏃꇔꉐꂷꁾꅉꌡ；

ꃅꃶꃅꌘꅉꇬꒈꌺꌡ，

ꅔꈋꃵꌣꀕꅉꇓꆈꀋꃀꌐꒉꌡ。

3 ꉜꌠꑓꋪꑌꂿꐚꀐ，

ꅲꌠꅳꀧꑌꈨꐚꀐ。

4 ꉌꊸꈧꌠꉪꐚꏡꐚꊨꄅꃱꉻꄎ，

ꈌꐚꌠꑌꅇꉉꉐꉇꉏꀑꄃꀋꅑ。

5 ꊾꇰꑴꅑꑠꌌꌳꉔꐤꒉꌠꃅꀋꄉꀐ，

ꆿꏓꆿꁖꑠꌌꌻꇭꌺꄿꌠꃅꀋꄉꀐ。

6 ꑞꃅꆏ，ꊾꇰꌠꆹꅇꇰꉉ，

ꋍꉌꂵꇬꄷꅠꌠꀉꄂꉪ，ꌤꆿꀋꎴꀋꈻꌠꀉꄂꃅ，

ꑳꀊꊆꏭꍍꋉꄸꄀꃆꂮꅇꂷꑠꀉꄂꄜꁊꐺ，

ꂮꐚꌠꁳꄡꇗꂮꐚꃴꀆꀕꎻ，

ꒉꌤꌠꁳꀆꐒꅝꅍꎷꀋꊌꎻ。

7 ꆿꏓꆿꁖꃄꄟꑽꄟꆹꄷꅠꆈꒉꀕ，

ꋌꏡꁈꄷꅠꌠꏂꇫ，

ꈱꅇꏅꅇꌊꊿꎬꅧꌠꈔꋏ，

ꌢꎭꌟꁧꌠꑗꇖꈨꂟꇁꇬꑌ，ꋌꑠꃅꀕꇬꎷ。

8 ꌳꉔꐤꒉꌠꆹꌤꆿꈁꂄꈁꎔꀕꌠꉪꏡ，

ꋌꀋꎪꃅꌤꆿꂄꎔꋍꑠꐛꅹꃅꉆꈬꉆꈈ。

ꀞꇽꌋꆀꀱꉈꑴꌄꆣꇁ

9 ꐥꌒꄻꌒꉌꂵꑳꌠꌋꅪꊈꀋ！ ꄓꉠꅇꂷꅲꇁ！

ꉪꅍꏡꅍꀋꐥꌠꅫꃀꌱꃀꊈꀋ！ꅳꀧꍔꄉꉠꅇꂷꅲ！

10 ꉪꅍꏡꅍꀋꐥꌠꅫꃀꌱꃀꊈꀋ！

ꀉꁁꋍꈓꐛꑲꆏ，ꆍꊇꀋꎪꃅꑑꃹꏾꌌꀕꇁꌠꉬ，

ꑞꃅꆏ，ꑌꃀꌧꊈꑣꅍꀋꊌꀐ，

ꌩꋚꇓꂷꑌꎳꏢꐯꇯꅍꀋꊌꀐ。

11 ꐥꌒꄻꌒꉌꂵꑳꌠꌋꅪꊈꀋ！ꑍꃹꏾꌌꀕꌶ，

ꉪꅍꏡꅍꀋꐥꌠꅫꃀꌱꃀꊈꀋ！ꏸꏦꃨꆰꌶ，

ꃢꈜꇔꇫꎭꇈꇭꀧꅩꀧꍓꃅꄉ，

ꏾꊏꃆꁁꉊꄉꈚ。

12 ꆍꊇꆹꆍꃄꅉꂄꎔꌠꌋꆀꑌꃀꌧꊈꂷꅑꀮꇗꀕꌠꎁꃅꄉꄸꈣꀋꃀꅥꄉꉩ。

13 ꍲꇓꌋꆀꁬꆰꆹꈍꃅꑌꉠꉹꁌꃄꅉꇬꅿꇁ，

ꈮꈜꌠꇓꈓꇬꌋꆀꉌꇿꌠꑷꈓꈀꐥꌠꇬꄉꅿꇁ。

14 ꃰꃅꑷꂿꆹꀋꎪꃅꊿꇤꇫꎭ，

ꌄꆣꌠꇓꈓꑌꊿꍞꇫꎭ，

ꁾꇓꌋꆀꄀꇊꑠꑌꐩꋊꐩꍂꃅꄉꇁꐫꇓꐛ，

ꇁꇈꈬꐥꌠꑾꃅꏷꀕꈩꅉꀛꅉꐛ，

ꑌꑿꆫꁍꐛꌠꉬ。

15 ꅑꅸꏃꃅꌋꒌꉬꉎꄉꇁꉪꌵꄮꑟꇬꆏ，

ꇈꈬꅔꈋꐈꇁꁍꑗꐛ，

ꁍꑗꇣꋦꌩꏪꆈꊉꀕ。

16 ꊒꆽꀕꌠꇁꇈꈬꅔꈋꀀ，

ꑖꉬꑌꇁꁍꑗꈬꄔꋦ。

17 ꑖꉬꈴꄉꃅꌠꋬꂻꊌ，

ꑖꉬꇬꄉꇗꄃꀕꌠꌋꆀꅡꊪꀕꌠꇫꅐꇁ，ꅑꅸꐩꋊꐩꍂꑟ。

18 ꉠꉹꁌꆹꋬꂻꐼꇉꇈꅉꀀ，

ꅡꊪꊩꅉꋦ，ꂱꇬꇫꅉꐥ。

19 ꌩꁧꋒꌦꉐꂷꌸꄉꐚꇬꅜꑴꇬ，

ꇓꈓꊿꐆꐦꀞꐾꑳꀕꌠꐛꑴꇬ，

20 ꄚꆍꊇꒉꋮꄉꋚꇕꇗ，

ꇂꁮꌋꆀꑾꃅꏷꀕꅸꈁꏾꅉꇬꆫꌠꆹꌒꃤꐥꀐ。