ꎬꅧꈬꇬꄉꇖꂟ
33
1 ꌞꊿꆏꈔꋏꇫꎭꇈ，ꅽꊨꏦꆹꀋꈔꀋꑍꑴꌦꋋꂷꉮꃤꐥꀐ！ꌞꊿꀋꐈꀋꋓꃅꆎꊝ，ꄚꆎꆏꀱꌊꐈꋓꃅꌞꊿꊝꋋꂷꉮꃤꐥꀐ！
ꌞꊿꆏꈔꋏꇫꎭꌐꄮꇬꆏ，
ꅽꊨꏦꑌꀋꎪꃅꊿꇱꈔꋏꇫꎭꇁꌠꉬ；
ꆏꐈꋓꃅꄉꌞꊿꊝꈭꐨꆏ，
ꌞꊿꑌꀋꎪꃅꐈꋓꃅꆎꊝꇁꌠꉬ。
2 ꑳꀊꊆꀋ！ꆏꈀꎭꀕꃅꂄꎔꃅꄉꉪꊝ，
ꉪꊇꆹꆎꇁꉚ。
ꆏꈀꎭꀕꃅꋍꑍꋑꀋꋒꃅꄜꄮꇬꊋꃤꄻꉪꁳ，
ꉪꊇꎬꅧꄮꇬ，ꆏꑴꌠꉪꈭꋏꇁ。
3 ꅽꃚꋒꉼꏒꀕꑠꇅꇫꅐꇁꄷꌦꆏ，
ꃰꊿꈀꐥꌠꃅꆶꁧꌐ；
ꆏꄓꇁꄷꌦꆏ，
ꊿꋅꈀꐥꌠꃅꁗꏒꐯꀋꉜꌐ。
4 ꇩꏤꈧꌠꀋ！ꋚꁧꍈꀮꇱꏣꏑꈌꊎꌠꌟꃅ，ꆍꌉꈿꁮꅜꅍꑌꀋꎪꃅꊿꏓꐯꇯꌠꉬ；
ꊾꆹꍈꀮꀜꌠꌟꃅꌉꈿꁮꅜꅍꂅꑣꐺꌠꉬ。
5 ꑳꀊꊆꆹꐤꒉꋍꉎꀋꐥ，ꄩꀊꂥꅉꇬꀀ，
ꊒꆽꀕꌠꌋꆀꑖꉬꑠꁳꑭꉢꇓꈓꇬꃅꐛꌐꎻ。
6 ꋋꆹꅽꐥꍂꇬꈫꈈꌠꊫꅉꐛ，
ꋌꆏꁳꈭꋏꑆꊋꈀꄖꀕꌠ、
ꉪꑌꌧꋬꌋꆀꌧꇐꂿꇐꑠꊌꎻ；
ꑳꀊꊆꁌꒉꏦꃪꌠꆹꅽꁨꇐꄉꇐꋍꉎꀋꐥꌠꉬ。
7 ꇬꉚ！ꋀꌳꈄꀬꅑꈧꌠꉈꏭꄉꐒꉩꏽ，
ꄮꐽꇕꄟꌠꊩꌺꈧꌠꉌꂵꆅꄉꈨꃅꉩ。
8 ꄇꈜꈥꅐꀜꅐꄉꊾꂷꇬꀋꈴ，
ꏤꐪꊿꁏꇫꎭ，ꅇꊪꈧꌠꑌꊿꇤꇫꎭa，
ꊾꑌꐮꁌꀋꒉꀐ。
9 ꃄꅉꐒꊀꇈꈥꅐꀜꅐ，
ꆀꀠꇍꎲꄏꑊꏦꇈꀊꃶꀐ，
ꎭꇍꐦꀞꇁꅔꈋꂤꏂꀠꐛꀐ，
ꀠꎭꌋꆀꏦꂱꀋꎪꃅꈬꐙꏮꐙ。
ꏃꃅꌋꂴꇯꆐꋍꁮꐚꏭꏣꇤꄉ
10 ꑳꀊꊆꄹꇬ：
“ꉢꀋꃅꄓꇁ，ꀋꃅꉠꊨꏦꉢꐕꀊꂥꃅꄩꄉ，
ꉢꐕꌊꐤꒉꋍꉎꀋꐥꃅꄉꌠꉬ。
11 ꆍꊇꀃꃀꆹꀖꁌꑌ，
ꒆꎼꇁꌠꆹꏜꏾꀖꏾꉬ，
ꆍꌗꆹꃆꄔꌟꃅꀱꊨꏦꐗ。
12 ꐧꇁꃰꊿꆹꀋꎪꃅꃆꄔꐞꌠꉑꊖꌡ，
ꉈꑴꍲꇓꊿꋐꌊꃆꄔꐗꌠꑌꌡ”ꄷ。
13 ꆍꈜꎴꃅꄷꀀꋋꈨ，ꌤꆿꉢꈀꃅꈧꌠꅲꄉꄡꑟ，
ꆍꈛꑌꃅꄷꀀꌠꑌ，ꉠꊋꃤꈀꇨꀕꌠꌧꂿꄡꑟ。
14 ꑭꉢꑽꊿꈧꌠꉬꇮꏸꏦꃨꆰꌐ，
ꏃꃅꌋꍍꋉꄸꄀꌠꑑꃹꏾꌌꀕꇧꁠ。
ꉪꈬꄔꈀꄸꂷꊾꋠꊾꅝꌠꃆꄔꌋꆀꐯꈽꀀꄐ？
ꉪꈬꄔꈀꄸꂷꀋꑍꀋꈤꌠꃆꄔꌋꆀꐯꈽꐥꄎ？
15 ꋋꆹꑖꉬꈴꄉꌤꃅ、ꊒꆽꀕꃅꅇꉉ、
ꎆꋚꀋꎴꀋꈻꌠꌁꑷ、
ꇇꉈꄉꃴꎆꃴꇁꀋꊪ、
ꅳꀧꋍꄉꊿꌉꊾꆳꏡꁈꑠꀋꅲ，
ꑓꋪꂨꄉꌤꆿꄷꅠꑠꀋꉜꂶꌠꉬ。
16 ꊿꋋꂷꆹꀋꎪꃅꀊꂥꅉꇬꀀ，
ꈫꈈꌠꇓꆈꀋꃀꆹꋍꁾꇓꉬ，
ꀋꎪꃅꋠꅍꄻꋌꇲꌠꐥ，
ꀆꐒꀋꈘꃅꄻꋌꄎꌠꐥ。
ꐥꌒꄻꌒꌠꊁꇁꋍꑍ
17 ꆎꆹꀋꎪꃅꃰꃅꂷꂄꎔꐨꆏꊌꂿꇁ，
ꅔꈋꈀꐯꀕꌠꃅꄷꑌꆏꊌꂿꇁ。
18 ꅽꉌꂵꀋꎪꃅꉪꇁꌤꊽꐬꆠꈧꌠꄀꄉ：
“ꃷꁨꌗꏢꊿꂶꌠꇿꇬꐥ？
ꐎꏣꏂꏣꊿꂶꌠꇿꇬꐥb？
ꇓꈓꐏꑳꃷꁨꃷꂶꌠꇿꇬꐥ？”ꃅꌠꉬ。
19 ꊿꊾꇨꁴꍂꅿꑠꆹꆏꋋꂿꀋꇁꀐ，
ꋀꈁꉉꌠꅇꂷꌧꊋꂾꊋꇨ，ꊿꋋꐞꀋꉅ，
ꈌꄂꉏꄂꄉ，ꋀꅇꂷꊿꇫꅲꑲꀋꌧ。
20 ꆏꑓꌬꀕꃅꍻꉪꋩꑍꋨꏦꅉꑭꉢꇓꈓꉜꄉ！
ꑳꇊꌒꇌꇓꈓꇁꀀꅉꋬꂻꐼꇉꀕꑠꈚꐛꌠꀋꎪꃅꆏꊌꂿꌠꉬ，
ꇁꁁꑳꀋꇙꀋꑐꑠꂷꐛꌠꆏꊌꂿꌠꉬ，
ꌩꇺꐩꋊꐩꍂꃅꍠꎼꀋꇁ，
ꏦꀨꑌꋍꏢꂯꆽꀋꈘꌠꉬ。
21 ꀊꄶꇬꆏ，ꐤꒉꌠꑳꀊꊆꉪꈽꐥ，
ꋋꆹꃅꄷꒊꃀꒈꌺꒈꁱꀊꃏꃅꇫꈴꒉꑠꈚꌡ，
ꆳꂾꀄꊭꌠꇵꌊꇫꈴꀋꇁ，
ꄇꇉꀉꇨꌠꑌꏀꌌꇫꈴꀋꇁ。
22 ꑳꀊꊆꆹꉪꀞꇽꂶꌠꉬ，
ꑳꀊꊆꆹꉪꎁꃅꄹꏦꄻꂶꌠꉬ；
ꑳꀊꊆꆹꉪꃰꃅꉬ，
ꋌꀋꎪꃅꉪꊇꈭꋏ。
23 ꆳꂾꏦꀨꏯꇉꏭꇉꃅꐙꄉ，
ꆳꂾꌷꁧꉊꈬꃅꄉꀋꄐ，
ꆳꂾꂪꌦꁬꌠꑌꍔꄉꀋꄐꀐ。
ꀊꋨꄮꇬꆏ，ꎆꋚꆍꁮꅜꈧꌠꆍꁸꌊꁧꌐ，
ꐂꀜꌠꂯꇬꇏꇫꑣꄎ。
24 ꇓꈓꈐꏭꉹꁌ：
“ꉢꆅꀐ”ꃅꉉꑠꂷꀋꐥꀐ；
ꑞꃅꆏ，ꇓꈓꇬꀀꌠꉹꁌꈧꌠꑽꃤꆹꏆꃤꊌꌐꀐ。