ꉞꏹꉘꄡꇉꃅꏃꃅꌋꉘꇉ
31
1 ꊿꉞꏹꏭꋀꇇꀤꇁꄷꇖꂟꒉꈧꌠꆹꉮꃤꐥꀐ！ꋀꊇꃆꀞꉘꇉ，ꌉꈿꍮꊪꃷꁨꀉꑌꌠꉘꇉ，
ꃅꋩꂽꇷꄙꌠꉘꇉꁧ，
ꀱꌊꑱꌝꆀꃤꌃꎔꂶꌠꆏꉘꀋꇉ，
ꑳꀊꊆꏭꑌꀋꇖꀋꂟ。
2 ꑠꃅꑴꇬ，ꑳꀊꊆꆹꉪꑌꌧꋬ，
ꋌꀋꎪꃅꉮꃤꁳꇫꅐꇁꎻ，
ꋋꆹꉉꄉꑲꆏꃅꇫꑟꇬꎷ，
ꋌꀋꎪꃅꄓꌊꊿꄸꃅꅠꑽꌠꇇꇩꍈ，
ꄸꃅꅠꑽꌠꇇꀤꈧꌠꑌꇇꇩꍈ。
3 ꉞꏹꊿꆹꊾꈨꄹ，ꏃꃅꌋꀋꉬ，
ꋀꃆꀞꑌꇭꀧꎸꃤꈨꀉꄂ，ꒌꀋꉬ。
ꑳꀊꊆꆹꇇꋍꇅꎇꄷꌦꆏ，
ꊾꇇꀤꂶꌠꀋꎪꃅꃪꐛꇬꄚ，
ꊿꇇꀤꊌꂶꌠꑌꀋꎪꃅꐚꇬꅜ，
ꄷꀋꁧꐯꇯꄉꈔꑍ。
4 ꑳꀊꊆꉠꏯꑠꃅꉉ：
“ꆿꅪꀋꀮꂷꅀꆿꅪꌹꂷꑋꎸꉆꎸꈯꄉꏅ，
ꆫꊿꈍꑋꃅꄉꐮꇴꐮꍝꌊꇬꌉꇁꑴꇬ，
ꋋꆹꋀꇳꃚꉓꃚꈨꇬꃨꀋꆰ，
ꏞꃚꏇꃚꈨꇬꑌꉈꀋꎞ；
ꄙꀕꃪꀕꉬꉎꂽꑼꌊꁈꑳꀊꊆꑌꀋꎪꃅꄉꑠꃅꐙ，
ꋌꇁꌊꑭꉢꁧꇬꌋꆀꉘꁌꇬꄉꌉꈿ。
5 ꉌꊭꈍꃅꄉꅐꍔꂪꍒꌊꉌꊭꌺꀧꌋꃄꆏ，
ꄙꀕꃪꀕꉬꉎꂽꑼꌊꁈꑳꀊꊆꑌꀋꎪꃅꑠꃅꄉꑳꇊꌒꇌꀧꌋꃅ；
ꋌꀋꎪꃅꇫꐏꁇ，ꇫꈭꋏ，
ꋌꐂꁨꈴꁧꄉꀋꎪꃅꇫꈭꋏ。
8 ꑸꎽꊿꆹꀋꎪꃅꐚꇁꂗꍵꑱꃀꇂꃴꅞ，
ꑠꆹꊿꌌꐺꌠꂗꍵꑱꃀꀋꉬ；
ꂗꍵꑱꃀꀸꇁꌊꑸꎽꊿꋌꑍꅝꌠꉬ，
ꑠꆹꊿꌌꐺꌠꂗꍵꑱꃀꀋꉬ。
ꋀꊇꂗꍵꑱꃀꋌꀸꂾꆶ，
ꋀꈎꄜꀊꏀꈧꌠꀋꎪꃅꑘꎭꃣꇨꃅꁧꌠꉬ。
9 ꋀꇓꆈꀋꃀꁾꇓꂶꌠꆹꈍꃅꑌꏸꏦꄉꐘꀋꈨꁧ，
ꋀꏃꌋꂠꌋꈧꌠꑌꁈꁧꀉꒉꁬꌠꋀꊌꂿꄉꃨꆰꏸꈧꏽ”ꄷ。
ꋍꑠꆹꋍꃆꄔꑭꉢꇓꈓꐞ、ꋍꇤꄸꑳꇊꌒꇌꐛꌠꑳꀊꊆꉉꌠꉬ。