ꉞꏹꌋꆀꏤꐪꂿꄐꀋꐥꌠꒃ
30
1 ꑳꀊꊆꑠꃅꉉ：“ꆸꉈꆽꁁꌠꌳꃈꅮꋋꈨꉮꃤꐥꀐ！
ꋀꊇꉠꉪꐨꀋꈴꃅꄉꏡꁈꏂ，
ꉠꒌꇇꄧꀋꈴꃅꐯꐉꏤꐪꒃꄉ，
ꑽꃤꐆꑽꃤꄩꄅꀐ。
2 ꋀꊇꉠꏯꀋꅲꃅ，ꄓꉞꏹꀁꋌꁧ，
ꉞꏹꃰꃅꉘꇉꄉꊨꏦꀧꌋꃅ，
ꉞꏹꇂꃴꁿꁧ。
3 ꄚꉞꏹꃰꃅꁿꌠꆹꀱꌊꆍꑊꏦꎲꄏꅍꐛ，
ꆍꉞꏹꇂꃴꁿꁧꑠꆹꇁꆍꎲꃤꄏꃤꐛ。
4 ꋀꌟꒉꌠꂾꌙꉢꇓꈓꐥꀐ，
ꋀꊩꌺꇁꌊꉳꆀꌦꇓꈓꑟꀐꑴꇬ，
5 ꋀꊇꆹꀋꎪꃅꉞꏹꉹꁌꋀꈲꏣꀋꐥꑠꐛꅹꃅꎲꅐꁁꅐ；
ꉹꁌꀊꋨꈨꋀꇇꀋꀤ，ꋀꈲꏣꑌꀋꐥ，
ꋀꁳꎲꄏꉈꏠꌠꀉꄂꊝꎻ”ꄷ。
6 ꆀꇱꃚꃅꄷꑋꁮꉆꁮꃆꂮꆏꑠꃅꉉ：
ꋀꊇꎆꋚꋀꄻꑾꃅꏷꀕꄩꏦꄉ，
ꁌꇐꈤꌠꋀꄻꁖꅖꉼꃀꄩꏦꄉ，
ꎭꇁꅦꈠꃅꄷꍀꉘꆿꅪ、ꁮꏂꅋꑌꌠ、ꂶꃶꏂꐤꅉꑠꇬꈴꁧ，
ꌞꊿꋀꈲꏣꀋꐥꑠꄷꉜꄉꁧ。
7 ꉞꏹꊿꋀꇇꀤꐨꑠꆹꂿꄐꀋꐥꌠꉬ，
ꑠꅹ，ꉡꆹꇬꏭ：“ꀋꇙꀋꑐꃅꇫꑌꌠꇁꉳꀨ”ꄷa。
ꆸꉈꆽꁁꌠꉹꁌ
8 ꆏꀋꃅꁨꒉ，
ꋀꂾꄉꅇꂷꋋꈨꁱꌩꀻꇬꄀꄉ，
ꁱꄯꒉꇬꄀꄉ，
ꄻꊁꇁꋍꑍꊫꄲꌐꂷꃅꎻ，ꅑꅸꐩꋊꐩꍂꑟ。
9 ꑞꃅꆏ，ꋀꊇꆹꆸꉈꆽꁁꌠꉹꁌ、ꈰꏅꌠꌳꃈꅮ，
ꑳꀊꊆꉙꅇꂘꅇꅲꀋꏾꌠꌺꇖꉬ。
10 ꋀꊇꊿꑓꂿꈧꌠꏭ：“ꆍꊇꐛꒌꇣꋲꑠꄡꉜꀐ”ꄷ；
ꋀꊇꌋꅇꄜꊿꏭ：“ꌤꆿꊒꆽꀕꑠꄜꉪꄡꇰꀐ，
ꅇꂷꅲꌒꌠꀉꄂꉉꉪꇰ，
ꌤꆿꃶꀋꐚꑠꀉꄂꄜ。
11 ꆍꊇꈛꊒꄡꍬ，ꑗꈜꄡꈴꃅꄉꐞꇁ！
ꉪꂾꄉꑱꌝꆀꃤꌃꎔꂶꌠꃆꂮꄡꉉꀐ”ꄷ。
12 ꑠꅹ，ꑱꌝꆀꃤꌃꎔꂶꌠꑠꃅꉉ：
“ꆍꊇꆹꉠꅇꂷꉜꄸ，
ꐈꋓꌠꌋꆀꆼꍅꆹꆋꌠꉈꊪ，ꋍꑠꌌꉘꇉꅍꃅꄉ。
13 ꑠꅹ，ꑽꃤꑠꇁꆍꇭꀧꇬꌸꀐ，
ꀋꇊꆏꊖꁋꀊꂥꑠꏮꀣꄉꍻꇁꇈ，
ꋋꇅꃅꐡꌠꌡ；
14 ꋌꊿꐷꋧꐛꃀꐛ，
ꀋꇊꆏꊗꑗꇔꇷꉌꂵꀋꈢꃅꄉꇤꀧꂷꋌꐷꇫꎭꌠꌡ，
ꐶꀜꈧꌠꈬꄔꌌꇤꄸꇬꃆꄔꋌꉆꑠꍈꎹꀋꊌ，
ꌌꒉꇸꇉꇬꀆꐒꄝꉆꑠꍈꑌꇬꀋꐊꀐ”ꄷ。
15 ꌋꑳꀊꊆ-ꑱꌝꆀꌃꎔꂶꌠꑠꃅꉉ：
“ꆍꊇꀱꉈꑴꉠꄹꄉꑬꆏꇁꑲꆏ，ꈭꋏꊌꄎ，
ꑖꈈꀕꃅꉡꉘꇉꑲꆏ，ꊋꃤꑌꇁ”ꄷ，
ꄚꑠꃅꑴꇬ，ꆍꊇꆹꇫꉬꀋꅲ。
16 ꆍꊇꆏ：“ꀋꇁ！ꉪꊇꃆꇭꋩꄉꀥ”ꃅꉉ，
ꑠꅹ，ꆍꊇꀋꎪꃅꆶꁧ。
ꆍꊇꉈꑴ：“ꉪꊇꃅꃨꋩ”ꃅꉉꐛꅹ，
ꊿꆍꈹꇁꈧꌠꑌꀋꎪꃅꐚꀥꏿꄉꇁꌠꉬ。
17 ꊾꄂꂷꆍꇷꇋꑲꆏ，ꆍꊇꊿꄙꃅꄉꈯꇫꈴꁧ，
ꉬꑻꋓꄉꆍꇷꇋꑲꆏ，ꆍꊇꈀꐥꃅꄉꆶꁧꌐ；
ꑠꃅꄉ，ꆍꊇꇫꋒꇈꌠꆹꁦꀍꂷꇬꁈꁧꄳꄿꏢꌡ，
ꉘꁌꇬꁈꁧꁬꀉꄂꌡ。
18 ꑠꃅꑴꇬ，ꑳꀊꊆꆹꀋꎪꃅꇁꉚꄉꂄꎔꃅꆍꊇꊝ；
ꀋꎪꃅꄓꌊꆍꎭꃅꉈꇁ。
ꑞꃅꆏ，ꑳꀊꊆꆹꊒꆽꀕꌠꏃꃅꌋꉬ；
ꊿꋋꈀꇁꉚꌠꃅꌒꃤꊌꌐꌠꉬ！”ꄷ。