ꑱꌏꑸꌺꂶꌠꇁꉮꃤꇫꅐꇁꌠꌐꂷꐛ
3 ꊁꆏ，ꉢꉠꑮꃀꈿꀀꇈb，ꋌꃴꑌꄉꌹꍈꒆꀐ，ꑳꀊꊆꆹꉠꏯ：“ꀉꑳꋋꂷꄻꂷꉈꇓ.ꎭꇁꇍ.ꉳꏂ.ꀡꌦꂓꄉ， 4 ꑞꃅꆏ，ꀉꑳꋋꂷꀉꄉꀉꂿꇴꑲꀋꌧꌦꇬꇯꆐ，ꄊꂷꌧꇱꇓꈓꌋꆀꌒꂷꆀꑸꇓꈓꇬꎆꋚꈧꌠꃅꑸꎽꃰꃅꇱꇑꑣꌊꁧꌐꌠꉬ”ꄷ。
5 ꑳꀊꊆꉈꑴꉠꏯ： 6 “ꉹꁌꋋꈨꆹꑭꇊꑸꒈꌺꀅꌳꀅꌳꃅꒉꌠꆏꋀꇫꌁꑷ，ꀱꌊꆺꑪꌋꆀꆺꂷꆺꄰꌺꂶꌠꑋꆏꋀꇫꉌꃹ， 7 ꑠꅹ，ꇬꉚꄉ！ꌊꆹꀋꎪꃅꑸꎽꃰꃅꌋꆀꋍꊋꃤꀉꒉꑠꁳꒊꃀꒈꂃꒊꆱꄓꌠꌟꃅꇁꋀꄩꉱꎻ，ꒈꅐꅶꁉꍤꁆꏦꄉ，ꒉꈫꒉꇤꈀꐥꃅꋌꉱꇫꎭꌐ。 8 ꀋꎪꃅꅸꇁꒀꄊꃅꄷꊐꄉ，ꒀꄊꃅꄷꃅꒈꅐꃪꂡꀙꐯꀙ，ꅐꅷꊽꇵꆹꇬꑟꀐ。ꑱꂷꆺꆀꀋ！ꋌꅏꀑꍔꄉꅽꃅꄸꃅꋌꇱꉱꄉꌐꀐ”ꄷ。
9 ꉹꁌꈀꐥꌠꀋ！ꆍꊇꈁꏾꃅꄸꃅꅠꑽ，ꄽꂫꆏꀋꎪꃅꄉꈔꑍꁧꌠꉬ；
ꈜꎴꃅꄷꀀꌠꊈꀋ！ ꆍꊇꅳꀧꍔꄉꅲꄡꑟ！
ꆍꊇꈍꃅꐧꑭꉊꄉꄐꏤꄿꂿ，ꄽꂫꆏꀋꎪꃅꈔꑍꁧꌠꉬ；
ꆍꊇꈍꃅꐧꑭꍣꄉꊭꄎꄿꂿ，ꄽꂫꆏꀋꎪꃅꈔꑍꁧꌠꉬ。
10 ꆍꊇꏂꇐꇫꇐꑞꀕꏂꄿꂿ，ꇿꋌꍈꂯꇬꀋꐥ；
ꆍꊇꅇꂷꉐꂷꈍꑋꇕꄟꄿꂿ，ꈍꃅꑌꊋꐛꀋꄐ；
ꑞꃅꆏ，ꏃꃅꌋꉪꈽꐥ。
ꑳꀊꊆꋍꅇꄜꊿꏭꅇꈪꊐ
11 ꑳꀊꊆꆹꊋꃤꈀꇨꀕꌠꌊꉢꉗꉢꂘꄉ，ꉢꁳꉹꁌꈧꌠꈳꅉꈴꀋꎽ，ꋌꉠꏯ： 12 “ꉹꁌꋋꈨꇱꉜꌊꊾꏂꊿꇫꏡꁈꃅꄉꌠꆹ，ꆍꊇꉜꌊꊾꏂꊿꇫꏡꁈꃅꄡꄉ。ꋀꊇꇫꏦꌠꆹ，ꆍꊇꇫꏦꇬꃪꌋꀋꌸ； 13 ꄚꄙꀕꃪꀕꉬꉎꂽꑼꌊꁈ-ꑳꀊꊆꆏ，ꆍꊇꑴꌠꌌꌃꎔꃅꄉ，ꋌꑲꆀꆍꇫꏦꄡꑟ、ꇬꃪꄡꑟꂶꌠꌠꉬ！ 14 ꋋꆹꀋꎪꃅꇁꌃꎔꅉꑠꈚꐛ，ꄚꀱꌊꑱꌝꆀꄰꑍꁯꌠꑭꇹꇓꂵꐛ，ꊿꋌꑭꇹꇬꄚꌠꇓꆈꀋꃀꐛ；ꇁꊿꑳꇊꌒꇌꀀꌠꐱꂦꌋꆀꇓꄃꐛꌠꉬ。 15 ꋀꊇꈬꄔꇬꊿꈍꑋꋌꇱꑭꇹꇬꄚ，ꃪꐛꄉꂷꊂꌸ，ꄷꀋꁧꊰꇁꐱꂦꇬꃹꇈ，ꊿꇱꒃꅜꌠꉬ”ꄷ。
16 ꆏꄹꏦꄯꒉꋌꋐꇙꐯꇯꄉꑲꆀ，ꉠꌶꌺꈧꌠꈬꄔꄉ，ꉙꅇꂘꅇꋋꈨꇇꌒꍑꄉꈌꃖꄉ。 17 ꉡꆹꑓꏮꑸꇱꄰꉜꀋꅲꌠꑳꀊꊆꇁꉚꇬꎷ，ꉘꇉꇬꎷ。 18 ꇬꉚ！ꉡꌋꆀꉠꌳꃈꅮꑳꀊꊆꄻꉢꁳꈧꌠꆹꇁꑱꌝꆀꈬꄔꇬꌐꂷꌋꆀꂵꇖꀕꌠꐛꀐ，ꑠꆹꑭꉢꉘꁌꀀꌠꄙꀕꃪꀕꂽꑼꌊꁈ-ꑳꀊꊆꄷꄉꇁꌠꉬ。 19 ꌞꊿꆍꏭ：‘ꆍꊇꒌꈎꌠꌋꆀꅉꃅꌠꁧꇌꈨꅉꃅꈧꌠꏭꅲꒉꄡꑟ’ꄷꉉꌠꐥ。ꄚꑠꃅꑴꇬ，ꆍꊇꊨꏦꏃꃅꌋꄷꅲꄡꀋꑟꅀ？ ꐥꊿꌤꈨꈍꃅꄉꌌꌦꊿꏭꅲꉆꂯ？ 20 ꑳꀊꊆꉙꅇꂘꅇꌋꆀꄹꏦꑠꌌꎕꏦꃅꄉꄡꑟ；ꀋꄸꄷꊿꈁꉉꌠꅇꂷꆹꎕꏦꋋꈨꌋꆀꐯꀋꊒꑲꆏ，ꈍꃅꑌꃅꄜꐛꐎꇁꀋꉆꌠꉬ。