ꑱꌏꑸꄯꒉ 9

1 ꄚꑠꃅꑴꇬ，ꊿꎭꇂꅦꈠꊝꋺꈧꌠꆹꀋꎪꃅꄉꆈꋧꋪꑠꊝꀋꇁꀐꌠꉬ。

ꀉꑳꌹꍈꉪꎁꃅꒆꄉꇁꃰꃅꄻ

ꀋꉊꂴꏭ，ꏃꃅꌋꆹꑭꀯꇍꌋꆀꇂꃛꄣꆀꃅꄷꁳꊿꇬꉚꄸꎻ，ꄚꊁꇁꋍꑍꆏ，ꎿꋮꈝꃀ-ꒀꄉꒊꃀꁭꅐꁆꏯꌋꆀꉇꉻꊿꀀꅉꏦꆀꀕꃅꄷꆹꀑꒉꑊꒉꊌꇁꌠꉬ。

2 ꉹꁌꆈꋧꋪꅉꇬꐺꀊꋨꈨꆹꁨꑭꁤꇅꀕꌠꋀꊌꂿꀐ；

ꊿꌦꈔꌐꒉꇂꃴꀀꈧꌠꆹꁨꑭꐝꇅꀕꌠꇁꋀꁦꀐ。

3 ꆏꇩꏤꋋꂷꉹꁌꁳꀉꑌꃅꁦꎆꎻ；

ꋀꁳꉌꂵꇿꅍꌐꀋꉆꎽ；

ꋀꊇꅽꂾꄉꉌꇿꑓꇿ，

ꀋꇊꆏꋙꎴꒈꏢꄮꇬꌟꃅꉌꇿꑓꇿ，

ꌉꈿꊋꐛꄉꁮꅜꇑꅜꅍꁸꌠꌟꃅꉌꈯꑓꈜ。

4 ꑞꃅꆏ，ꄻꋀꊀꄅꄉꌠꇁꄉꆹꆏꇔꇫꎭꀐ，

ꋀꆼꁠꇬꂷꏦꑌꆏꐷꇫꎭꀐ，

ꋀꆼꍅꌠꄯꁯꑌꆏꐔꇫꎭꀐ。

ꀋꇊꆏꀋꉊꂴꏭꂰꄆꊿꆏꇱꈔꋏꇫꎭꄮꇬꌡ。

5 ꑬꅮꍓꃯꂽꑼꌉꈿꄮꇬꅑꌠ，

ꉈꑴꃢꈜꌦꍀꌦꅑꌠ，

ꐯꇯꀋꎪꃅꌌꌩꃅꏦꄉꐗꇫꎭꌐ。

6 ꑞꃅꆏ，ꀉꑳꀿꏂꑠꍈꉪꎁꃅꄉꒆ；

ꀉꑳꌺꑠꍈꆹꄻꉪꊇꇖ。

ꏲꂠꌅꈌꀋꎪꃅꄉꋍꆼꁠꎍ；

ꋋꆹꊿꄻ：“ꂵꇖꀕꌠꇖꊩꄟꃀ、ꀋꄐꅍꀋꐥꌠꏃꃅꌋ、ꐩꋊꐩꍂꃅꇫꐥꌠꀉꄉ、ꄮꐽꌠꃰꃅ ”ꄷꑠꂓꄉ。

7 ꋍꌅꈌꌋꆀꋬꂻꆹꑞꅉꀋꐛꃅꄉꁦꎆꇬꎷ。

ꋌꀋꎪꃅꄊꃥꃰꃅꑋꅉꂶꌠꑌꄉꋍꇩꏤꏲꂠ，

ꊒꆽꀕꌠꌋꆀꑖꉬꌠꌊꋍꇩꏤꁳꋦꈬꋦꈈꎻ，

ꀃꑍꋋꄮꅑꅸꐩꋊꐩꍂꄮꇬꑟ。

ꄙꀕꃪꀕꂽꑼꌊꁈ-ꑳꀊꊆꆹꀋꎪꃅꉌꂵꁨꐞꄑꄉꌤꋌꐘꋌꃅꐛꌠꉬ。