3
Napfagpfagto hini haad Hesus mu hi Moses
1 Hotti chaˈju an a-akhi an pinilin Apo Jos, ja enajakhana an midchum ay hija ad langit, nonomnomon ta-o hi Hesus an hennag Apo Jos an Apostol, ja Natakhay an Pachin tay pammati an khun ta-o tihtikhuwan. 2 Naˈna-unnud ay Apo Jos an nanghaad ay hija, an amat khu ay Moses an naˈna-unnud an nangpunoˈ ay ni pamiryan Apo Jos. 3 Muti hi Hesus chi napfagpfagto an medayaw mu hi Moses. Amat ay ni numpakhad hi pfalay an ot-ottong hini dayaw na mu hini pfalay. 4 Ma-id pfalay nu ma-id numpakhad, ja hi Apo Jos chi nangapja an amin hi nagwacha. 5 Umannung an mapagtarkan hi Moses an nunserbi hachi i-ibpfa na an pamiryan Apo Jos muti un takhalan Apo Jos hija. Ja hana enat na ja ipatikhaw na hay hana ipa-innilan Apo Jos hi uchum chi arkhaw. 6 Hi ayya Kristo, ja pfu-un pfaar Apo Jos ja angkhay an hija hini Empfalay na an mapagtarkan an mangpunoˈ ay ni pamiryan Ama na. Ja midchum ta-o ay tay pamiryan Apo Jos nu etortoloy ta-o an mange-ehchor ay Hesu Kristo ja munchochodcha hini otong an an-anla ta-o ay ni hahadchon ta-o an piˈtakhuwan an ma-id chi pogpogna.
Hini enhakhanan Apo Jos an pun-enanaan hana empfapfalay na
7 Hotti mahapor an unuchon ta-o chin intukhun ni Espiritu Santo hi nangarjana hi,
“Ad ugwani, ja chonglon ju hini tukhun Apo Jos.
8 ja achi ju ilukhangeh, an amat chin enat chin a-ammod ju an ngimmangannu ay Apo Jos chin i cha nanopngatopngan ay hija hichi let-ang.
9 Allon Apo Jos hi, ‘Anong un cha khun tikhan hachi milagro an ena-enat u hi apat chi polo hi tagwon, ja khunaˈ topngatopngan.
10 Hijaot un loˈtat ja impapfungotaˈ hay hachi tatakhu,
Ja khun u nomnomnomon hi, manahkhu niˈ hato tatakhu unaˈ chuˈkhon ay chicha hon inlukhalukhangeh cha hana tukhun u.
11 Impapfungotaˈ ja enhapataˈ ta achi cha meˈ-atam ay ni enhakhanaˈ an i pun-enanaan hana tatakhuˈ.’”a
12 Hotti pa-ennongan ju, a-akhi, ta alom ja ma-ichadniˈ chi oha ay chaˈju hi ngumangannu an achi mangunud ay ni tukhun Apo Jos. Ti unchani ja immachawwi aju ay ni pammati ju ay tay mamattakhu an Jos. 13 Ad ugwani gwot chi allon Apo Jos hi timpo an unuchon ta-o hini tukhuna ta ma-id malachaw. Hotti un aju gwot manghintitinnukhun hi a-arkha-arkhaw ta ma-id chi oha ay chaˈju hi mapfunggitan hi pfahor, ja ta achi pfumato hini nomnom ju. 14 Ti mimidchum ta-o ay Kristo nu khokhotan ta-o hini ente-a ta-o an pammati ta munchochodcha ja ingkhana.
15 Epanomnom u pay ay chaˈju hitay impatulaˈ Apo Jos an nangarjana hi,
“Ad ugwani, ja chonglon ju hini tukhun Apo Jos
ja achi ju ilukhangeh, an amat chin enat hachi a-ammod ju an ngimmangannu ay Apo Jos.”b
16 Ngachah tugwali hana nunchongor ay ni tukhun Apo Jos ja inlukhangeh cha chamchama? Chicha hana impanguluwan Moses an nakak ad Egypt. 17 Ja ngay ngachan hachi nangpapfungot ay Apo Jos hi apat chi polo hi tagwon? Chicha khu hana pfimmahor an nun-a-atoy hichi let-ang. 18 Ja ngay ngachah hay hachi nanghapataan Apo Jos an achi cha meˈ-atam ay ni enhakhana na an i pun-enanaan hana empfapfalay na? Chicha khu hana ngimmangannu ay hija. 19 Hotti hay ma-achar ta-o ay tay ja immannung an agkhuy cha neˈ-atam ay ni enhakhanan Apo Jos an i pun-enanaan hana empfapfalay na khapo hi agkhuy cha namatiyan ay hija.