4
1 Muti chin ingkarin Apo Jos an enhakhana na an i pun-enanaan ja mapfalin pay an mipa-annung ay chita-o. Hotti eta-ot ta-o ta ma-id chi oha hi machakngan an achi mipfilang an me-atam ay tay pun-enanaan. 2 Ti chengngor ta-o hitay maphod an ingkarin Apo Jos an amat chin a-ammod ta-o. Muti ay chicha ja ma-id inherpfin chin nunchongolan cha ti agkhuy cha inunud. 3 Chita-o an namati ja angkhay chi me-atam ay tay pun-enanaan, an hay panginnilaan ja hitay impatulaˈ Apo Jos hi nangarjana hi,
“Impapfungotaˈ ja enhapataˈ ta
Achi cha meˈ-atam ay ni enhakhanaˈ an i pun-enanaan hana tatakhuˈ.”a
Hay omaˈ-atana ja hitay pun-enanaan an ingkari na ja napfalin an nechachaag chin hunhunana an nun-enanaan Apo Jos chin nakhibpfohan chin nangapjaana ay tay lota. 4 Ti anila ta-o hitay allon tay Hapit Apo Jos an na-at chin me-apeto an arkhaw, an allona chi, “Chin me-apeto an arkhaw ja nun-enana hi Apo Jos, ti nakhibpfoh mahpay chin tamu na.”b 5 Ja inali na khu hi,
“Impapfungotaˈ ja enhapataˈ ta
Achi cha meˈ-atam ay ni enhakhanaˈ an i pun-enanaan hana tatakhuˈ.”
6 Hotti matikhaw ta-o an hachi nahhun an nangngor ay nuy maphod an ingkarin Apo Jos ja agkhuy cha neˈ-atam ti ngimmangannu cha. Muti gwacha hana uchumna an me-atam ay tay i pun-enanaan an enchachaag Apo Jos an michat hay hana tatakhu na. 7 Hotti chin timpon Ari David, anong un at hichi hi tagwon chi nalahin chin niˈtatagkhuwan hachi agkhuy neˈ-atam ay tay i pun-enanaan, ja gwa han impatulaˈ Apo Jos ay Ari David hi nangarjana hi,
“Ad ugwani ja chonglon ju hini tukhun Apo Jos
Ja achi ju ilukhangeh.”
Ja matikhaw ta-o an enchaag Apo Jos han ohan timpo an idchuman hana tatakhu ay tay pun-enanaan, ja ad ugwani chi inali na an timpo. 8 Anila ta-o khu an hitay pun-enanaan an ingkarin Apo Jos, ja pfu-un hichuy pfuglay ad Kana-an an nangedchongan Joshua hachi a-ammod ta-o. Ti nu ad Kana-an chi i pun-enanaan ja anagkha ta i khuh allon Apo Jos hi gway ohah timpo hi idchuman hana tatakhu ay tay pun-enanaan? 9 Hitay chi panginnilaan an gwacha pay chi pun-enanaan an nechachaag hay hana tatakhun Apo Jos an amat chin nun-enanaan Apo Jos chin me-apeto an arkhaw. 10 Ti hana me-atam ay tay an i pun-enanaan an enchachaag Apo Jos ja mun-enana cha hi tamu an amat ay Apo Jos an nun-enana hi nakhibpfohan chin nangapjaana ay tay lota.
11 Hotti peˈhehemad ta-o ta gway aton ta-o an meˈ-atam ay tay an pun-enanaan ay Apo Jos ta ma-id koma chi oha ay chita-o hi achi meˈ-atam, an amat chin a-ammod an nanglukhangeh chin inalin Apo Jos. 12 Ti hitay Hapit Apo Jos ja gway apfalinana ja cho-or chi ma-at na, ja matadtachom mu hay henalong an chugway tachom na an mepfogwoˈ ayya ja chakngana hini tungar. Hitay Hapit Apo Jos ja munchagchakhah ta pfu-ihana hana enhahaˈpfa ta-o heto nomnom ja puhu. 13 Achi miliˈ-uchan hi Apo Jos, ti titigkhana an amin. Ja hongpfatan ta-o ay hija an amin chi hay neˈneˈ-at ta-o ay tay an niˈtatagkhuwan.
Hi Hesus chi Natakhay an Pachi
14 Hotti khokhotan ta-o hini pammati an khun ta-o tihtikhuwan. Ti hi Hesus an Empfalay Apo Jos ja numpfalin hi Natakhay an Pachi ja immuy ad langit an mangtaˈchokhan ay chita-o an tatakhu ay Apo Jos. 15 Ja hitay Natakhay an Pachi ta-o ja meˈleˈna hay hana arngujan ta-o an tatakhu an khun matopngan. Ti penacha na an amin chi omaˈ-atan chi matopngan, muti hija ja agkhuy pfimmahpfahor. 16 Hotti achi ta-o mun-okhon an mehnot ay Apo Jos an magmakhohkhoh. Ja anila ta-o an nignikhaon chita-o ja ichat na hini mahapor ta-o ay ni timpo an mahapor ta-o hay tolong na.