2
Madusa hini achi mangunud ay ni tukhun Apo Hesus
1 Hijaot un mahapor an pa-ennongan ta-o hana umannung an chengngor ta-o ta achi ta-o mepfahhaw. 2 Nipa-innila an umannung chin urchin Apo Jos an inalin hachi angher na chin hopapna, ja nu gway mangtello ay tay an urchin wenno achi mangunud ja madusa, ti hijay ohong ni enat na. 3 Hotti nu amat hina chi na-at hachi nangtello chin urchin Apo Jos an impa-innilan hana angher ja achi mehalla an om-omochot an madusa ta-o nu inganuy ta-o hini napfalor an intudtuchun Apo Hesus an hija hini aton an miˈtakhu ay Apo Jos. Ti hi Apo Hesus hini nahhun an nangpa-innila ay tay an tudtuchu, ja hay hana nunchongor ay hija chi nanihtikhuwan ay chita-o an umannung hay hato. 4 Ja tinihtikhuwan khuh Apo Jos hi nangpatikhagwana hi numpfino-ob-on an milagro an ena-enat na ja hana uchumna an achi apfalinan chi takhu an aton. Ja eneˈcha-eˈcha na hana apfalinan an inchat ni Espiritu Santo ay ni penhod na an pangchatan.
Hi Hesu Kristo hini magpong an Manakhu
5 Hini khun mi allon an umali an pun-ap-apugwan ja pfu-un hana angher chi enhaad Apo Jos hi mun-ap-apo muti hay takhu. 6 Ti gwa han nitulaˈ an Hapit Apo Jos hi nangarjana hi,
“Anagkha agkhu niˈ chaˈmi an tatakhu an im nomnomnomon, Apo Jos, ja khun mu ekhohkhohan?
7 Ja enhaad mu khuy tatakhu an nababbabaan mu hana angher hi na-omtang,
Muti eneˈcham an machaknganto hini arkhaw an pangpapfagpfagtuwam ay chicha ta ichatam chicha hi otong an dayaw.
8 Ja nun-ap-apugwom hana tatakhu ta chichay mangpaptoˈ an amin hi nagwacha.”a
Nu amat heto, ja ma-id chi hay oha hi achi epaptoˈ chi takhu, muti achi ta-o pay matikhaw ad ugwani. 9 Muti ay Hesus ja nipa-annung. Ti numpfalin hi nababbaba mu hana angher Apo Jos chin immaliyana heto lota. Numpfalin hi takhu ta e-atoy nay pfahor chi tatakhu khapo hi khohkhoh Apo Jos. Ja anila ta-o an ad ugwani ja nipapfagpfagto ja nichatan hi otong an dayaw khapo chin enat na an nunlikhat ja hi i na natajan.
10 Magpong hitay an enat Apo Jos an Nampfu an amin hi nagwacha ta hijay medaydayaw. Ti eneˈcha na an munlikhat hi Hesus ta mumpfalin hi magpong an Manakhu an amin hi empfapfalay Apo Jos ta cho-or chi midchum an mipapfagpfagto ay hija ad langit. Ti hi Hesus chi arpugwan ni piˈtakhuwan ta-o ay Apo Jos. 11 Hi Hesus chi khun mangulahan hi pfahor ta-o. Ja chita-o an inulahana ja hija an nangulahan ay chita-o ja un oha hini Ama ta-o. Hijaot un chita-o achi ipfa-in ay Hesus an ipfilang hi a-akhi na. 12 Ti inali na ay Apo Jos hi,
“Ipa-innilaˈ he-a hana a-akhiˈ,
Ja ekantaˈ he-a hi agwachaan an amin hana ma-amung an mundaydayaw ay he-a.”b
13 Ja inali na khu hi,
“Munhocholaˈ ay Apo Jos.”
Ja unaot khu allon hi,
“Tojaˈ ja, ja hay hato empfapfalay Apo Jos an impulang na ay ha-in.”c
14 Hay hato empfapfalay Apo Jos an inali na ja tatakhu cha an gway achor cha an matoy. Hotti hi Hesus ja numpfalin hi takhu ta gway atona an matoy, ta khapo chin natajana ja enapfak na hi Satanas an hijay nanangchon hi apfalinan chi patoy. 15 Ti hay nangakhaˈ-utan hay hana tatakhu ja hini nihikhud an ta-ot cha hi patoy. Muti winayawaya-an Hesus chicha. 16 Umannung an pfu-un hana angher hana wayawaya-ana muti chita-o an tatakhu an mipfilang hi holag Abraham. 17 Hijaot un mahapor an numpfalin hija hi takhu ta amat ay chita-o an a-akhi na, ta gway atona an mumpfalin hi natakhay an pachi an gway nignikha na ja mapagtarkan an khun munserbi ay Apo Jos. Hijay nanaˈpfat hi ohong chi pfahor ta gway aton ta-o an mapakawan. 18 Ti khapo ta penacha nay likhat ja natopngan hot anila na an tomolong ay chita-o an tatakhu hi hay i ta-o atopngan.