1 Kòríntì ŋa 6

Olí-Yèésù ŋa wà kpe ara-ŋa nɛ́dzɔ́

Afɔ̀-kã̀ gbo wà. Òŋu ní wà dzɛ́ ní ɛ̀ŋɛ olí-Yèésù ŋa, bí àrã̀-kã̀ wá náàŋírĩ-ŋɛ́#ɛ́, è náa nyáa gbódzú, tsí lɔ káà kpe ara-ŋɛ́ nɛ́dzɔ́ ńɖi-àkpɛ̀dzɔ́ yèé ŋa kò ma Ɔ̀ɖáyé#ɛ́. Ńɖi-ɛnɛ yèé ŋa dzɛ́ ti Ɔ̀ɖáyé#ɛ́ ní ó wà ní e lɔ káà kpe ara-ŋɛ́, tsí ká fɔ̀ɔ́ fú ŋɛ́#ɛ́ nɔ̀. 2 Nàmí è kè mà ní ɛnɛ yèé dzɛ́ ti Ɔ̀ɖáyé ŋa#á, à bòkó wáa ɖi àkpɛ̀dzɔ́, tsí à nákó kpɛdzɔ́ fú ɛnɛ yèé kò dzɛ́ ti Ɔ̀ɖáyé ŋa náyé gbaŋgba#áà? Tsí kíbí ó dzɛ́ ní è bòkó wáa kpɛdzɔ́ fú ayé gbaŋgba#á fe, è tóòsũ̀-e nyáa kpɛdzɔ́-afɔ̀ wíríwírí yèé wà náàŋírĩ-ŋɛ́ ŋa#á nɔ̀. 3 Àa bòkó wáa kpɛdzɔ́ fú adzítsɛ́-ɔ̀rɔ̃† ŋa, yèésí ni ti afɔ̀-ìtalɛ̀ bí ŋa. È kè mà bɛ́ɛ̀ɛ̀? 4 È mà si bɛ́ɛ̀ tã́ná, tsí bí afɔ̀-ìrɔ́-bɛ́ɛ̀ kã̀ŋa wá náàŋírĩ-ŋɛ́ gé ná, è náa kóo lɔ káà bá àkpɛ̀dzɔ́ yèé ŋa ɛgbɛ́-Kírísítò#ɛ́ kò tì wà rí si nɔ́ɔ̀nà-kã̀ kpókpó gìɖì#ɛ́. 5 Ó ɖi, èmi ǹ wà fɔ̀ɔ́ fú ŋɛ́ oo, anɔ́ tɛ̀ŋɛ ká-ŋɛ́ ni. Ni ɔ̀nyà-kã̀ kpókpó kò wà náàŋírĩ-ŋɛ́, tsí dzɛ́ olí-ifɛ̀ɛ́nɔ́, tsí kó kɔ afɔ̀ fú ɔ̀nyà méèdzì náàŋírĩ-ŋɛ́. 6 Tsí kà kàa bɛ́ɛ̀, ìnàbí-kã̀ náa ǹɖe, tsí lɔ káà kpe ìnàbí enìkéèdzì‐ɛ̀ ké nɛ́dzɔ́ ńɖi-ɛnɛ yèé kò gba Ɔ̀ɖáyé gbɔ́ ŋa#á. Afɔ̀ gbo kpɔ̀! 7 Ó ɖi, kíbí è ti wà kpe ara-ŋɛ́ ŋa nɛ́dzɔ́ ńɖi-àkpɛ̀dzɔ́ ŋa#á, ó wà nyà ɖíre ní ìlò yèé wà ní olí-Yèésù ŋa kó lò#ɛ́, è kũ̀ṹ ńnɛ̀ɛ́. È má dzɔ̀ɔ́, tsí ɔ̀nyà ŋa kó wà tse iŋɛ́-òkṹnù bá ŋɛ́, kàá sã̀ lárèè? È má dzɔ̀ɔ́ ŋa, tsí ká wáa tsole iŋɛ́-ŋɛ́ ŋa gbo lɔ, òŋu gbo kàá sã̀ lárèè? 8 Kà kàa bɛ́ɛ̀, ɛ̀ŋɛ ní wà tsòkṹnù, tsí wà tsolè gbo#ɛ́. Tsí ìnàbí-ŋɛ́ olí-Yèésù yèé ŋa wà nɛ́gbɛ́-Kírísítò#ɛ́ ké ní è wà tse bá bɛ́ɛ̀#ɛ́.

9 Nàmí è kè mà ní ɛnɛ yèé wà tse íbàɖí ŋa#á, ìɖì-kã̀ kpókpó kàkó wáa wà fú ŋa nóyè-Ɔ̀ɖáyéè? È máa wà rú ara-ŋɛ́, iŋɛ́ yèé tse#ɛ́, atsìtsekíìtse ŋa gbo, asɛ̃ŋɛ ŋa gbo, agbaya òŋu agbɔkɔ ŋa gbo, ɔnɔkɛ̃̀ɛ̃ yèé náa wà sũ̀ bá ɔnɔkɛ̃̀ɛ̃ ŋa#á gbo, 10 atsolè ŋa gbo, ɛnɛ yèé iŋɛ́ kpó náa kí nódzú si fú ŋa#á gbo, àmɔ̀tíŋɔ́ ŋa gbo, akpe ɛ́kɔ-nɛ ŋa gbo, atsole-iŋɛ́-nɛ ńkpá ŋa gbo, ɔ̀nyà-ìrɔ́ nyɛ̀ŋɛ̀ ŋa kpó#ɛ́, ìɖì-kã̀ kpókpó kàkó wáa wà fú ŋa nóyè-Ɔ̀ɖáyé†. 11 Dzɔ̀ɔ́ dzɔ̀ɔ́#ɛ́, bɛ́ɛ̀ ké ní ɔ̀nyà kã̀ŋa náàŋírĩ-ŋɛ́ gbo gbé gbà wáa lɔ#ɛ́ ńnɛ̀ɛ́. Ó ɖi, Ɔ̀ɖáyé wɛ àbi ǹɖe nára-ŋɛ́, tsí èérĩ́ kò wà nára-ŋɛ́ ró. Tsí ó tse tsí è ɖi tɛ̀ɛ̀ akpá akpá, ɛsɛ̀ ɛsɛ̀. Tsí ó gbà ŋɛ́ nɔ́ɔ̀nyà-atsòtítɔ́ gbo nódzú-ara‐ɛ̀. Ńǹtá-Yèésù Kírísítò Ɔlá-wa òŋu Mímí-Ɔ̀ɖáyé† ní ó gba, tsí tse iŋɛ́ nyɛ̀ŋɛ̀ ŋa kpó#ɛ́.

Olí-Yèésù, ilé-Mímí-Ɔ̀ɖáyé ní ó dzɛ́#ɛ́

12 È náa wà fɔ̀ ní: “Ɔ̀nà wà fú àŋa, tsí àŋa kó tse iŋɛ́ yèé ɖé fú àŋa#á.” Ó wà bɛ́ɛ̀. Ó ɖi, kò tsi iŋɛ́ kpó ní sã̀, tsí ɔ̀nyà kó tse#ɛ́. È wà fɔ̀ ní: “Ɔ̀nà wà fú àŋa, tsí àŋa kó tse iŋɛ́ yèé ɖé fú àŋa#á.” Ó ɖi, èmi ǹ kàkó kɔ ara-mi dzɔ̀ɔ́ fú iŋɛ́ kòdzɔkòdzɔ-kã̀ kpókpó, tsí kó nɛ́kpá si ńǹtá-mi. 13 Tsí è náa wà fɔ̀ gbo ní: “Dzídzɛ wà fú inɔ́, tsí inɔ́ gbo wà fú dzídzɛ ni.” Ó wà bɛ́ɛ̀. Ó ɖi, dzídzɛ#ɛ́ gbo, inɔ́#ɛ́ gbo, Ɔ̀ɖáyé nákó wáa ra ŋá kpó. Fee, ara yèé Ɔ̀ɖáyé tse fú ɔ̀nyà#á, kò tseé ní ɔ̀nyà kó ń si náàlòwá tsítse. Kà kàa bɛ́ɛ̀, ó tse ara#á ní kó dzɛ́ ti Ɔlá-wa ni. Ɔlá-wa#á ní wà rí ìtá-ara#á. 14 Ɔ̀ɖáyé dzí Ɔlá-wa ti náàŋírĩ-òkú ŋa wá náyé, tsí nákó dzí àwa gbo ti náàŋírĩ-òkú ŋa wá náyé òŋu ikpá‐ɛ̀.

15 Ó wà ní e tédzú ní kíbí è ɖi ɔ̀kã̀ntso bá Kírísítò si#ɛ́, ara-ŋɛ́ gbo ɖi ɔ̀kã̀ntso báa si. Kíbí ó dzɛ́ bɛ́ɛ̀#ɛ́ fe, màa nyáa kɛ́ ara-mi yèé ɖi ɔ̀kã̀ntso bá Kírísítò si#ɛ́, tsí lɔ káà ń sũ̀ bá àlòwá-kã̀ yáà? Láyé! 16 Nàmí è kè mà ní bí ɔ̀nyà-kã̀ lɔ káà sũ̀ bá àlòwá-kã̀, ni ɛnɛ nyɛ̀ŋɛ̀ òŋu àlòwá#á méèdzì ɖi ɔ̀kã̀ntso niì? Iŋɛ́ yèé tse#ɛ́, à kɔ si ńǸwé-Ɔ̀ɖáyé† si ní: “Ńǹwèrè nyɛ̀ŋɛ̀#ɛ́, à kò dzɛ́ ɔ̀nyà méèdzì ró. Ɔ̀nyà ɔ̀kã̀ntso ní à dzɛ́#ɛ́.”^* 17 Ó ɖi fee, bí ɔ̀nyà-kã̀ ɖi ɔ̀kã̀ntso bá Ɔlá-wa, Ɔlá-wa òŋu ɛnɛ nyɛ̀ŋɛ̀ méèdzì náa ɖi ɔ̀kã̀ntso akpá akpá, ɛsɛ̀ ɛsɛ̀.

18 È tsikpá, tsí e sá fú wérewère tsítse. Iŋɛ́ yèé tse#ɛ́, íbàɖí-òmírɛ̃̀ ɔ̀kã̀lɔ́ɔ̀kã̀ kpó yèé ɔ̀nyà náa tse#ɛ́, kà gbɛ̃ɛ̃́rĩ́ ara-ɛnɛ nyɛ̀ŋɛ̀. Ó ɖi, ɛnɛ yèé wà tse wérewère#ɛ́, ara-tòŋu ká‐ɛ̀ yèé ó kɛ́, tsí ń tse iŋɛ́ nyɛ̀ŋɛ̀#ɛ́, ara#á ní ó wà tse íbàɖí bá#á. 19 È mà si ní è wà kíbí ilé bɛ́, tsí Mímí-Ɔ̀ɖáyé† gbé ńnɔ́‐ɛ̀ si ni nɔ̀. Tsí Ɔ̀ɖáyé ní tse tsí Mímí‐ɛ̀ tì wɔ̀ ńǹtá-ŋɛ́ si#ɛ́. Ńbɛ̀ɛ́, è kè wà nɔ́wɔ́-ara-ŋɛ́ si ró. 20 Ɔ̀ɖáyé kɛ́ owó geregere, tsí ń rà ŋɛ́ ní ɛ̀ŋɛ kó dzɛ́ tòŋu ni. Kíbí ó dzɛ́ bɛ́ɛ̀#ɛ́, iŋɛ́ ɔ̀kã̀lɔ́ɔ̀kã̀ kpó yèé è wà mú ara-ŋɛ́, tsí wà ń tse#ɛ́, iŋɛ́#ɛ́ kó wà nyɛ Ɔ̀ɖáyé.