1 Kòríntì ŋa 5

Ɔ̀nyà-kã̀ lìlò wérewère nɛ́gbɛ́-Kírísítò ńKòríntì, tsí Kpɔ́lù wà bá ɛgbɛ́#ɛ́ fɔ̀

Afɔ̀-kã̀ gbo wà, tsí ɔ̀nyà kpó wà fɔ̀ afɔ̀#ɛ́ ní bɛ́ɛ̀ ní ìlò wérewère-kã̀ wà náàŋírĩ-ŋɛ́ si#ɛ́. Tsí kíbí ìlò#ɛ́ tsìíra tó gbà#á, ɛnɛ yèé ŋa wà, tsí à kò ma Ɔ̀ɖáyé gìɖì gbo#ɛ́, àŋa gbo, à kà gbà si ńǹtá-ìlò-ìrɔ́-nyɛ̀ŋɛ̀. Òŋu ní wà dzɛ́ ní ɔ̀nyà-kã̀ mú aya-boba‐ɛ̀ tse aya si. 2 Iŋɛ́-ìrɔ́-nyɛ̀ŋɛ̀ wà náàŋírĩ-ŋɛ́ si tã́ná, tsí è wà kɛ́ ara-ŋɛ́ ní àŋa ní màá tó bɛ́ɛ̀#ɛ́ɛ̀? Tsáyì! Kà kàa e wà kɛ́ ara-ŋɛ́#ɛ́, è má wà nɔ́kṹ si ni nɔ̀. È má nya ɛnɛ yèé lìlò-ìrɔ́-nyɛ̀ŋɛ̀#ɛ́ fùɖá nɛ́gbɛ́#ɛ́ ni. 3 Èmi ká-mi, ǹ kò wà ńɖi-ŋɛ́ bɛ̀. Ó ɖi, ìsérè-mi wà bɛ̀ si. Tsí kíbí ìsérè-mi wà bɛ̀ si#ɛ́, ǹ ti kpɛdzɔ́ nóŋù-ɛ̀tsɛ-Yèésù Ɔlá-wa, tsí ɖáàbi fú ɛnɛ yèé lìlò-ìrɔ́-nyɛ̀ŋɛ̀#ɛ́ ná kíbí ɛnɛ yèé fɔ̀ ní ǹ wà náàŋírĩ-ŋɛ́ bɛ̀ bɛ́. 4 Ó ɖi, è kpe ara-ŋɛ́ kpàɖé, tsí ńbí è nákó kpàɖé si#ɛ́, ìsérè tèmi gbo nákó wà bɛ̀ si, tsí ikpá-Yèésù Ɔlá-wa gbo nákó wà ńǹtá-ŋɛ́ si, 5 tsí e nya ɛnɛ yèé lìlò-ìrɔ́-nyɛ̀ŋɛ̀#ɛ́ fùɖá nɛ́gbɛ́#ɛ́, tsí e ń bɔwɔ́-Ètsù†. Ńbɛ̀ɛ́, ńǹrɔ́-kíbí ɛnɛ nyɛ̀ŋɛ̀ yà gbà#á, nákó tsɛ̀rá, àtsùgbée àyɛ̀ yèé wà ńnɔ́‐ɛ̀#ɛ́ kó rí ɔlà nɔ́dzɔ́ yèé Ɔlá-wa nákó wá#á.

6 Kíbí è wà kɛ́ ara-ŋɛ́ to#ɛ́, kò sã̀ nɛ́. È kè mà ní ɔ̀tsɛ̃̀ oɖé tsígíɖí-kã̀ gé ní à náa ń ro àkàmì-ɔkà-kpɔ̃́nɔ́, tsí náa kɛ́ kpó wùdzèè#ɛ́ɛ̀? 7 Ɛnɛ yèé dzàbi-ìrɔ́ nyɛ̀ŋɛ̀#ɛ́ wà kíbí ɔ̀tsɛ̃̀ hóhó bɛ́ ni. È nyàá ǹɖe náàŋírĩ-ŋɛ́, tsí e ɖi àkàmì titɔ̃ yèé à kò mú ɔ̀tsɛ̃̀ rò#ɛ́. Ó ɖi fee, kíbí è gba Kírísítò gbɔ́#ɛ́, è ti má si kpó, iŋɛ́ yèé tse#ɛ́, Kírísítò#ɛ́ ní wà kíbí ɔma-àgbò† yèé à ń tsɛbɔ fú Ɔ̀ɖáyé fú wa nɔ́ɖɔ̃́-Àɖádzɔ̀ɔ́†#ɛ́. 8 Ńbɛ̀ɛ́, bí àa wà dzɛ ɔɖɔ̃́-Àɖádzɔ̀ɔ́#ɛ́, àa kó wà dzɛɛ́ òŋu kpɔ̃́nɔ́ yèé ɔ̀tsɛ̃̀ kò wà ńnɛ̀#ɛ́. Òkpì‐ɛ̀ ní wà dzɛ́ ní fee, àa kó wà lìlò-ire, tsí wà tse òtítɔ́ gbo. Àa kó máa dzɛ ɔɖɔ̃́#ɛ́ òŋu kpɔ̃́nɔ́ yèé ɔ̀tsɛ̃̀ wà ńnɛ̀#ɛ́. Bí àa dzɛɛ́ bɛ́ɛ̀, ó wà kíbí àa wà lìlò wérewère ɔ̀kã̀lɔ́ɔ̀kã̀ kpó ńnɛ̀ɛ́.

9 Ó ɖi, ńǹwé-òmírɛ̃̀-kã̀ yèé ǹ ti kɔ wá fú ŋɛ́#ɛ́, ǹ fɔ̀ si ńnɛ̀ fú ŋɛ́ ní kò wà ní e wà ɖɔ́ɔ̀há-ɛnɛ yèé wà tse wérewère ŋa#á. 10 Afɔ̀ yèé ǹ fɔ̀ nyɛ̀ŋɛ̀#ɛ́, kò tsi afɔ̀-ɔ̀nyà kpó yèé wà tse wérewère ńǹtalɛ̀ bí ŋa#á nàmí ɛnɛ yèé ŋa náa wà ɖínɛ si, tsí à náa wà gba iŋɛ́ nɔ́wɔ́-nɛ ńkpá ŋa#á ní ǹ wà fɔ̀#ɛ́. Kò tsi afɔ̀-ɛnɛ yèé wà sɛ̃ iŋɛ ŋa#á gbo ní ǹ wà fɔ̀#ɛ́. Ó má dzɛ́ bɛ́ɛ̀ ní ǹ wà fɔ̀ ní e tse#ɛ́, nákó bèrè ní e máa gbé náyé#ɛ́ ró ńnɛ̀ɛ́ nɔ̀. 11 Ó ɖi, òkpì-afɔ̀ yèé ǹ fɔ̀ nyɛ̀ŋɛ̀#ɛ́ ní wà dzɛ́ ní fee, e máa ɖɔ́ɔ̀há-ɔ̀nyà-kã̀ yèé wà fɔ̀ ní òŋu wà tɛ̀ náànyì-Kírísítò tã́, tsí tɔ́ wà ńwérewère tsítse si ró, nàmí ó tɔ́ wà ɖínɛ gbo si ró#ɛ́. Ɛnɛ nyɛ̀ŋɛ̀ tɔ́ wà ńŋɛ ŋa sísɛ̃̀ gbo si ró niì, ó tɔ́ dzɛ́ abúnɛ gbo si ró niì, ó tɔ́ dzɛ́ àmɔ̀tíŋɔ́ gbo si ró niì, nàmí ó tɔ́ dzɛ́ agba iŋɛ́ nɔ́wɔ́-nɛ ńkpá gbo si ró niì, è máa ɖɔ́ɔ̀há‐ɛ̀. Kò wà gìɖì ní ɔ̀nyà-ìrɔ́ nyɛ̀ŋɛ̀ kó tɔ́ wà dzɛŋɛ́ bá ŋɛ́ ró.

12-13 Ǹ fɔ̀ bɛ́ɛ̀, iŋɛ́ yèé tse#ɛ́, afɔ̀-kã̀ kò tsɛdzɔ́-èmi-ɛnɛ yèé kò wà nɛ́gbɛ́-Kírísítò ŋa#á méèdzì, tsí n wà kpɛdzɔ́ bá ŋa nɛ́. Ɔ̀ɖáyé ní nákó kpɛdzɔ́ bá ŋa#á. Ó ɖi ɛ̀ŋɛ òŋu, ó wà ní e kpɛdzɔ́ bá ɛnɛ yèé wà nɛ́gbɛ́-Kírísítò ŋa#á nɔ̀. À kɔ si ńǸwé-Ɔ̀ɖáyé† si ní: “Ɛnɛ yèé dzɛ́ ɔ̀nyà-íbàɖí si ńnɔ́-ɛgbɛ́#ɛ́ fee, è nyàá fùɖá.”