1 Kòríntì ŋa 7

Kpɔ́lù wà dzɔ́ŋù-afɔ̀-aya òŋu ɔkɔ nínɛ́ fú ŋa

Báàyí#ɛ́, ǹ bòkó dzɔ́ŋù fú ŋɛ́ ti nára-ìwé yèé è tse wá fú mi#ɛ́. Fee, ɔnɔkɛ̃̀ɛ̃ kó gbé náàrì nɛ́ aya#á, iŋɛ́-ire ni. 2 Ó ɖi, ɔnɔkɛ̃̀ɛ̃ kó nɛ́ aya fú ara‐ɛ̀, àtsùgbée kó máa tse àlòwá. Tsí ɔnɔbɛ̃̀ɛ̃ gbo kó nɛ́ ɔkɔ fú ara‐ɛ̀, àtsùgbée òŋu gbo kó máa tse àlòwá. 3 Tsí ó wà gbo ní ɔkɔ kó wà tse iŋɛ́ yèé wo odzú‐ɛ̀#ɛ́, òŋu ní dzɛ́ ní kó wà sũ̀ bá aya‐ɛ̀#ɛ́. Tsí aya gbo kó wà tse iŋɛ́ yèé wo odzú‐ɛ̀#ɛ́, òŋu ní dzɛ́ ní òŋu gbo kó wà sũ̀ ńɖi-ɔkɔ‐ɛ̀#ɛ́. 4 Ara-aya kò dzɛ́ tòŋu níìkã̀ sɔ̃́ŋú gé. Ó ɖi, ó dzɛ́ ti ɔkɔ‐ɛ̀ si ni. Tsí ara-ɔkɔ gbo, kò dzɛ́ tòŋu níìkã̀ sɔ̃́ŋú gé. Ó dzɛ́ ti aya‐ɛ̀ gbo si ni. 5 Ɔ̀nyà-kã̀ kó máa tã́ enìkéèdzì‐ɛ̀ ní òŋu kàkó fúu nára-òŋu. Ó ɖi, bí ó dzɛ́ ní è wò ní àŋa kó kɛ́ ìwèrè ìmarũ-kã̀, tsí àŋa kó ń wúùre ná, ɛ̀ŋɛ méèdzì méèdzì#ɛ́ kpó, è nákó nyáa kpaá, tsí làá ní àŋa kàkó wà sũ̀ bá ara-àŋa. Bí ìwèrè nyɛ̀ŋɛ̀ tã́, è náa kpé sṹsũ̀. Bí kò tsi bɛ́ɛ̀, bóyá è kàkó nyáa mú ara-ŋɛ́ si làkóò làkóò, tsí Ètsù† nákó wáa ɖã́ ŋɛ́ wò. 6 Ó ɖi, afɔ̀ yèé ǹ wà fɔ̀#ɛ́, ǹ wà fú ŋɛ́ nɔ́ɔ̀nà ti nára-iŋɛ́ yèé è nákó tse#ɛ́ ni. Kò tsi ɛkpa ní ó dzɛ́, tsí ǹ wà ɖá fú ŋɛ́#ɛ́. 7 Fee, ǹ wò ní ɔ̀nyà kpó má gbé kíbí èmi ká-mi ǹ gbé si#ɛ́. Ó ɖi, Ɔ̀ɖáyé sì fúnɛ ńkpá ŋa ńǹrɔ́ǹrɔ́ kṹnukṹ òŋu tɛ̀ɛ̀. Ó fú ɔ̀nyà kã̀ŋa ní ká gbé náàkpã́. Ó ɖi, kò fú ɔ̀nyà kpó ní kó gbé bɛ́ɛ̀.

8 Ǹ wà fɔ̀ fú ɔnɔkɛ̃̀ɛ̃ yèé kò nɛ́ aya si ŋa#á òŋu ɔnɔbɛ̃̀ɛ̃ yèé ŋa dzɛ́ okpó si#ɛ́ ní fee, bí à gbé kíbí èmi gbo ǹ gbé si#ɛ́, nákó sã̀ fú ŋa. 9 Ó ɖi, bí ó dzɛ́ ní à kàkó nyáa mú ara-ŋa si làkóò làkóò#ɛ́, kṹnukṹ kó nɛ́ aya, tsí kṹnukṹ kó nɛ́ ɔkɔ. Iŋɛ́ yèé tse#ɛ́, bí à tse bɛ́ɛ̀, nákó sã̀ fú ŋa láre ká gbé bɛ́ɛ̀ si, tsí kó wà wù ŋá fùlùfùlù ní àŋa kó sũ̀ bá ɔnɔbɛ̃̀ɛ̃ nàmí àŋa kó sũ̀ ńɖi-ɔkɔ.

10 Ɛnɛ yèé dzɛ́ ɔkɔláya òŋu ayalɔ́kɔ si ŋa#á, ǹ wà ɖá ɛkpa-kã̀ fú àŋa gbo. Ó ɖi, ɛkpa#á kò ti ńɖɔ̀-mi, ńɖi-Ɔlá-wa ní ó ti#ɛ́. Ó ní: Aya kó máa kɔ ɔkɔ. 11 Ó ɖi, bí ó sì wáa dzɛ́ ní ó kɔ ɔkɔ#ɛ́, kó kí bɛ́ɛ̀ náàrì nɛ́ ɔkɔ ró nàmí kó sɛ̃̀ wáa tɔ́tse àŋírĩ-òŋu ɔkɔ#ɛ́, tsí ká sɛ̃̀ nɛ́ ara-ŋa. Tsí ɔkɔ gbo kó máa kɔ aya.

12 Ǹ wà wo n wíìnyɛ̀-kã̀ gbo fú ɛnɛ yèé ŋa nɛ́ aya si nàmí à nɛ́ ɔkɔ si, tsí aya-ŋa#á nàmí ɔkɔ-ŋa#á kò gba Yèésù gbɔ́ wòná#á. Èmi ní wà wí afɔ̀ yèé bɛ́#ɛ́, kò tsi Ɔlá-wa ni. Òŋu ní wà dzɛ́ ní fee, bí ó dzɛ́ ní ìnàbí olí-Yèésù-kã̀ wà, tsí aya‐ɛ̀ kò gba Yèésù gbɔ́ wòná, tsí aya#á gbà si ńǹtá‐ɛ̀ fúu ní òŋu nákó gbé náànkpã̀nàkũ̀‐ɛ̀ si#ɛ́, ɔkɔ#ɛ́ kó máa kɔ̀ɔ́. 13 Tsí bí ó dzɛ́ ní ìnàbí olí-Yèésù-kã̀ gbo wà, tsí ɔkɔ tɛ̀ɛ̀ gbo kò gba Yèésù gbɔ́ wòná, tsí ɔkɔ#ɛ́ gbo gbà si ńǹtá‐ɛ̀ ní aya#á kó wà náànkpã̀nàkũ̀-òŋu si#ɛ́, kò wà ní aya#á gbo kó kɔ ɔkɔ#ɛ́. 14 Ǹ fɔ̀ bɛ́ɛ̀, iŋɛ́ yèé tse#ɛ́, ɔkɔ yèé kò gba Yèésù gbɔ́#ɛ́ sɔ́má-Ɔ̀ɖáyé si náàtsùgbée kíbí ó tse ɔ̀kã̀ntso bá aya‐ɛ̀ si#ɛ́. Tsí aya yèé gbo kò gba Yèésù gbɔ́#ɛ́, òŋu gbo sɔ́má-Ɔ̀ɖáyé si náàtsùgbée kíbí òŋu gbo tse ɔ̀kã̀ntso bá ɔkɔ‐ɛ̀ si#ɛ́. Bí kò tsi bɛ́ɛ̀, à má fɔ̀ ní ɔma-ŋà ŋa kò dzɛ́ ti Ɔ̀ɖáyé. Ó ɖi, à sɔ́má-Ɔ̀ɖáyé si báàyí. 15 Tsí bí ó sì dzɛ́ ní ɔkɔ nàmí aya yèé kò gba Yèésù gbɔ́#ɛ́ wò ní òŋu kó kɔ olí-Yèésù#ɛ́ ná, ɔ̀nà wà fúu. Bí ó wáa lɔ bɛ́ɛ̀, okù-kã̀ kò so olí-Yèésù ŋa#á si ní ńbɛ̀ gé ní à nákó gbé si#ɛ́. Iŋɛ́ yèé tse#ɛ́, Ɔ̀ɖáyé kpè ŋɛ́ ní ɛ̀ŋɛ kó gbé ńtútùúrɔ̀ ni. 16 Ìwɔ aya yèé dzɛ́ olí-Yèésù#ɛ́, bóyá Ɔ̀ɖáyé nákó nyáa tse àtsùgbée tɛ̀ɛ, tsí gba ɔkɔ‐ɛ̀ɛ là báàyí ò kò mà? Tsí ìwɔ ɔkɔ yèé gbo dzɛ́ olí-Yèésù#ɛ́ fe, bóyá Ɔ̀ɖáyé nákó nyáa tse àtsùgbé-tɛ̀ɛ gbo, tsí gba aya-ɛ̀ɛ là báàyí ìwɔ gbo ò kò mà nɛ́.

17 Ńǹwèrè yèé Ɔ̀ɖáyé kpè wá ní àa kó dzɛ́ tòŋu#ɛ́, Ɔlá-wa ti kpɛ̃́ ńǹrɔ́-kíbí kṹnukṹ nákó gbé gbà#á, tsí ń bɔwɔ́‐ɛ̀. Ńbɛ̀ɛ́, kṹnukṹ kó gbé bɛ́ɛ̀. Afɔ̀ yèé bɛ́#ɛ́ dzɛ́ afɔ̀-kã̀, tsí ɛ̀kɔ́‐ɛ̀ ní mà wà tse fúnɛ nɛ́gbɛ́-Kírísítò ŋa gbo kpó#ɛ́. 18 Bí ɔ̀nyà-kã̀ wà, tsí à ti ɖákó† fúu tã́ná Ɔ̀ɖáyé kó kpèé ní kó dzɛ́ tòŋu, ó wà ní ɛnɛ nyɛ̀ŋɛ̀ kó kí bɛ́ɛ̀. Bí ɔ̀nyà-kã̀ gbo wà, tsí kò ɖákó tã́ná Ɔ̀ɖáyé kpèé ní kó dzɛ́ tòŋu#ɛ́, kò wà ní ɛnɛ nyɛ̀ŋɛ̀ gbo kó ɖákó ró. 19 À ɖákó fɛ́ɛɛ̀? À kò ɖákó fɛ́ɛɛ̀? Kò tsi òŋu ní kpã́dzú#ɛ́. Iŋɛ́ yèé kpã́dzú#ɛ́ gé ní dzɛ́ ní ká tse si nóŋù-Ɔ̀ɖáyé#ɛ́.

20 Ńǹrɔ́-kíbí kṹnukṹ ti wà si tã́ná Ɔ̀ɖáyé kó kpèé ní kó dzɛ́ tòŋu#ɛ́, kṹnukṹ kó gbé bɛ́ɛ̀. 21 Bí ó dzɛ́ ní arú ní ò dzɛ́ si tã́ná Ɔ̀ɖáyé kpèɛ́ ní ìwɔ kó dzɛ́ tòŋu#ɛ́, máa tsí arũ. Ó ɖi, bí ó wáa dzɛ́ ní ɔ̀nà-kã̀ tsí fɛ́ɛ, tsí olówó-ɛ̀ɛ kɔ̀ɛ́ dzɔ̀ɔ́, tsí ò kí nɔ́wɔ́-ara-ɛ̀ɛ ná, nà tse tsí kó nɛ́ èrè fɛ́ɛ. 22 Ó ɖi, bí arú-kã̀ wà, tsí Ɔlá-wa kpèé ní kó dzɛ́ tòŋu#ɛ́, ɛnɛ nyɛ̀ŋɛ̀ kò dzɛ́ arú si nódzú-Ɔlá-wa ró. Tsí bí ɔ̀nyà-kã̀ wà, tsí ɛnɛ nyɛ̀ŋɛ̀ òŋu kò dzɛ́ arú, tsí Kírísítò Ɔlá-wa kpèé ní kó dzɛ́ tòŋu#ɛ́, ɛnɛ nyɛ̀ŋɛ̀ òŋu ɖi arú fú Kírísítò ni. 23 Owó geregere ní Ɔ̀ɖáyé kɛ́, tsí ń rà ŋɛ́ ní ɛ̀ŋɛ kó dzɛ́ tòŋu#ɛ́. Kíbí ó dzɛ́ bɛ́ɛ̀#ɛ́, è máa ɖi arú fú ɔ̀nyà ŋa. 24 Ìnàbí-mi ŋa, ńǹrɔ́-kíbí è ti wà si ńǹwèrè yèé Ɔ̀ɖáyé kpè ŋɛ́ ní ɛ̀ŋɛ kó dzɛ́ tòŋu#ɛ́, è gbé bɛ́ɛ̀ si nódzú-Ɔ̀ɖáyé.

Kpɔ́lù wà wíìnyɛ̀ fú ɛnɛ yèé kò nɛ́ aya si ŋa#á òŋu ɛnɛ yèé kò nɛ́ ɔkɔ si ŋa#á

25 Ǹ bòkó wíìnyɛ̀-kã̀ fú ɛnɛ yèé kò nɛ́ aya si ŋa#á òŋu ɛnɛ yèé kò nɛ́ ɔkɔ si ŋa#á gbo. Ɔlá-wa kò ɖá ɛkpa-kã̀ si ti nára-afɔ̀ yèé bɛ́ gbo bɛ́, tsí n ń bɔwɔ́-ŋɛ́. Ó ɖi, kíbí ó rí ànyínɔ́ fú mi, tsí à nákó nyáa karalé si ńǹtá-mi#ɛ́, màa fú ŋɛ́ ńfɛ̀ɛ́nɔ́-kã̀.

26 Ti nára-bɛ́ɛ̀#ɛ́, ń tèmi òŋu, ɔ̀nyà kó gbé bɛ́ɛ̀ náàrì nɛ́ aya nàmí náàrì nɛ́ ɔkɔ#ɛ́, iŋɛ́-ire ni. Ǹ fɔ̀ bɛ́ɛ̀, àtsùgbé-òfò yèé wà si báàyí#ɛ́ ni. 27 Ńbɛ̀ɛ́, bí ò nɛ́ aya si ná, máa wò ní òŋu kó kɔ̀ɔ́. Tsí bí ò kò sì nɛ́ aya gbo si, máa wò ní òŋu kó nɛ́. 28 Ó ɖi, bí ò nɛ́ aya, ò kò dzàbi-Ɔ̀ɖáyé. Tsí bí èkíɖã-kã̀ gbo nɛ́ ɔkɔ#ɛ́, òŋu gbo kò dzàbi-Ɔ̀ɖáyé. Ó ɖi fee, òfò kpíkpɔ̀ nákó wá náyé-ɔkɔláya ŋa òŋu ayalɔ́kɔ ŋa. Èmi òŋu, ǹ wà wò ní e bɔ́ nɔ́wɔ́-òfò-ìrɔ́-bɛ́ɛ̀ ŋa gé ni.

29 Ìnàbí-mi ŋa, ìwèrè yèé bɔ̀#ɛ́ kò kpɔ̀ si ró. Ńbɛ̀ɛ́, ńnɔ́-ìwèrè yèé bɔ̀ si#ɛ́, ɛnɛ yèé nɛ́ aya si ŋa#á, ó wà ní ká gbé kíbí ɛnɛ yèé fɔ̀ ní à kò nɛ́ aya si bɛ́, 30 tsí ɛnɛ yèé wà sɔkṹ ŋa gbo#ɛ́, àŋa gbo ká gbé kíbí ɛnɛ yèé fɔ̀ ní à kò wà sɔkṹ bɛ́. Tsí ɛnɛ yèé wà ɖáàgbáàrĩ́ ŋa gbo#ɛ́, àŋa gbo ká gbé kíbí ɛnɛ yèé fɔ̀ ní iŋɛ́-àrĩ́-kã̀ kpókpó kò wà tse ŋá bɛ́. Tsí àràdzà ŋa gbo, àŋa gbo ká gbé kíbí ɛnɛ yèé fɔ̀ ní adzà yèé à wà rà#á kò dzɛ́ tiŋa bɛ́, 31 tsí ɛnɛ yèé ŋa gbo náa wà lo iŋɛ́-ayé yèé ŋa nyí#ɛ́, àŋa gbo ká gbé kíbí ɛnɛ yèé fɔ̀ ní à kò wà lo iŋɛ́ ŋa#á bɛ́. Iŋɛ́ yèé tse#ɛ́ fee, ayé ńbí àa wà si báàyí#ɛ́ kàkó wà si títí lɔ, nákó wáa tã́.

32 Tsí ǹ kò wà wò ní ìsérè kó lárè ŋɛ́ si. Ɛnɛ yèé kò nɛ́ aya si#ɛ́, itsɛ́-Ɔlá-wa tsítse náa kpã́ã nódzú si, tsí bí kó tse fáà, tsí kó dzɔdzú‐ɛ̀#ɛ́ gé ní náa wà wò#ɛ́. 33 Ó ɖi, ɛnɛ yèé nɛ́ aya si#ɛ́ òŋu, iŋɛ́-ayé yèé ŋa tsítse ní náa kpã́ã nódzú si#ɛ́, tsí bí kó tse fáà, tsí kó dzɔdzú-aya‐ɛ̀#ɛ́ ní òŋu gbo náa wà wò#ɛ́, 34 tsí ìsérè‐ɛ̀ gbo náa kpɛ̃́ méèdzì si. Bí ɔnɔbɛ̃̀ɛ̃-kã̀ wà nàmí èkíɖã-kã̀ gbo wà, tsí kò nɛ́ ɔkɔ si#ɛ́, itsɛ́-Ɔlá-wa tsítse ní náa kpã́ã nódzú si#ɛ́, tsí náa wò ní òŋu kó dzɛ́ tɛ̀ɛ̀ kpó akpá akpá, ɛsɛ̀ ɛsɛ̀. Ó ɖi, ɔnɔbɛ̃̀ɛ̃ yèé nɛ́ ɔkɔ si#ɛ́, iŋɛ́-ayé yèé ŋa tsítse ní náa kpã́ òŋu gbo nódzú si#ɛ́, tsí bí òŋu gbo kó tse fáà, tsí kó dzɔdzú ɔkɔ‐ɛ̀#ɛ́ ní náa wà wò#ɛ́. 35 Ǹ wà fɔ afɔ̀ yèé bɛ́, àtsùgbée kó dzɛ́ ire fú ɛ̀ŋɛ ká-ŋɛ́ ni. Kò tsi ní ǹ wà fɔ̀ bɛ́ɛ̀, tsí wà ń mú ŋɛ́ ńkpá ní bɛ́ɛ̀ gé ní ó wà ní e tse#ɛ́. Kà kàa bɛ́ɛ̀, ǹ wà wò ní e wà tse iŋɛ́ yèé sã̀#á, tsí e mú ara-ŋɛ́ bɔ̀ ńtsɛ́-Ɔlá-wa dzálɛ̀ kpó, tsí e tamá‐ɛ̀ si kpátíláá ni.

36 Ká fɔ̀ ní ɔ̀nyà-kã̀ wà ɖíìgbã̀nà-èkíɖã-kã̀. Tsí ɛnɛ nyɛ̀ŋɛ̀ rí ní bí òŋu kò yáa gbɛ̃́ɛ̃ náàbitɔ̃, ni íbàɖí ní òŋu wà tse nára‐ɛ̀#ɛ́, tsí ó rí gbo ní òŋu kàkó nyáa mú ara-òŋu si ró, tsí ó wà tsèsérè gbo ní ó wà ní òŋu kó nɛ́ɛ#ɛ́, ɛnɛ nyɛ̀ŋɛ̀ kó tse iŋɛ́ yèé sã̀ ní kó tse#ɛ́. Ó ɖi, kó nɛ́ɛ kíbí à náa nɛ́ aya gìɖì gìɖì#ɛ́. Bí ó tse bɛ́ɛ̀, kò dzàbi-Ɔ̀ɖáyé. 37 Ó ɖi, bí ó ɖé fú ɔnɔkɛ̃̀ɛ̃#ɛ́ òŋu ká‐ɛ̀, tsí kò dzɛ́ ní ɔ̀nyà-kã̀ ní sɔ́ɔ si ńnɛ̀#ɛ́, tsí bí ó tã́ ńnɔ́‐ɛ̀ gbo kpó ní òŋu kàkó nɛ́ èkíɖã#á, tsí òŋu ká‐ɛ̀ gbo ní wò ní òŋu kó máa ma èwò-ìgbã̀nà-òŋu#ɛ́, bí à kò nɛ́ ara-ŋa, ó tseé ire ni. 38 Ńbɛ̀ɛ́, bí ɔ̀nyà-kã̀ ɖíìgbã̀nà-èkíɖã-kã̀, tsí nɛ́ɛ#ɛ́, ɛnɛ nyɛ̀ŋɛ̀ tseé ire. Ó ɖi, bí ɔ̀nyà-kã̀ gbo kò nɛ́ɛ#ɛ́, ɛnɛ nyɛ̀ŋɛ̀ gbo tɔ́ tseé ire lárè ró.

39 Bí ɔnɔbɛ̃̀ɛ̃-kã̀ nɛ́ ɔkɔ si, ɛkpa yèé wà nára-aya nínɛ́#ɛ́ òŋu ɔkɔ nínɛ́#ɛ́ so òŋu ɔkɔ‐ɛ̀ méèdzì si ńǹwèrè yèé ɔkɔ#ɛ́ wà náàyɛ̀ si#ɛ́. Ó ɖi, bí ɔkɔ#ɛ́ wáa tsàrìsí#ɛ́, ɛkpa#á kò so ɔnɔbɛ̃̀ɛ̃#ɛ́ si ró. Ńbɛ̀ɛ́, ɔ̀nà wà fúu, tsí ɛnɛ yèé wùú ni kó nɛ́. Ó ɖi, ó wà ní ɛnɛ yèé nákó nɛ́#ɛ́ kó dzɛ́ olí-Yèésù. 40 Ó ɖi, ń tèmi òŋu fee, bí ó kí bɛ́ɛ̀ náàrì nɛ́ ɔkɔ ró#ɛ́, nákó wɛ éwo-ire gìɖì héŋú ni. Tsí èmi gbo ǹ karalé si ní Mímí-Ɔ̀ɖáyé† wà ńǹtá-mi si.