Lúkà 17

Yèésù wà tsɛ̀kɔ́ ŋa ńǹrɔ́ǹrɔ́ fú ɔmatsɛ́‐ɛ̀ ŋa

Ó ɖi nɔ́dzɔ́-kã̀, tsí Yèésù wà wí fú ɔmatsɛ́‐ɛ̀ ŋa ní: Bí à tsɛ́ɛ wíríwírí maá, òkúta-àkɔ̀sɛ̀ kàkó kɔ àrìmáa wà láyé. Nákó wà, tsí wà bá tsútsubú-ɔ̀nyà ŋa wá gé ni. Ó ɖi, ɛnɛ yèé nákó ɖi òkúta-àkɔ̀sɛ̀ fúnɛ#ɛ́, ɛnɛ nyɛ̀ŋɛ̀ kú ɛ̀rá. 2 Bí à mú ɔlɔ lákṹ rìgìɖìì-kã̀, tsí ń so nɔ́ɔ̀gɔ̃̀rɔ̃̀-ɛnɛ nyɛ̀ŋɛ̀, tsí kɛ́ɛ káà sɔ nóɖò, nákó sã̀ fúu láre kó wà si, tsí ɖi òkúta-àkɔ̀sɛ̀ fú ɔ̀kã̀-maɖé nyɛ̀ŋɛ̀ ŋa. 3 Ó ɖi, ká tsɔ́ éwo-ara-ŋa rere.

Bí ìnàbí-ɛ̀ɛ-kã̀ gbo tse íbàɖí nára-ɛ̀ɛ, nà báa fɔ̀, tsí kɔ̀ɔ́ fúu. Tsí bí ó gbɔ́ɔ fɛ́ɛ, tsí nyíìlò kpaɖà, nà ń tɔrɛ fúu. 4 Tsí bí ó dzɛ́ gbà méedze ńnɔ́-ɔdzɔ́ ɔ̀kã̀ntso gìɖì ní ó tse íbàɖí nára-ɛ̀ɛ#ɛ́, tsí àrìkã̀kã̀ yèé náa wà tseé#ɛ́, ni náa sɛ̃̀ wáa tsìkálɛ̀ fɛ́ɛ ní òŋu kàkó tse bɛ́ɛ̀ ró, nà ń tɔrɛ fúu.

5 Tsí adzítsɛ́-Yèésù† ŋa wà bere Ɔlá-wa ní: Kó tse tsí àkaralé-àŋa kó wɔlɛ̀ máa.

6 Tsí Ɔlá-wa fɔ̀ fú ŋa ní: À má nɛ́ àkaralé, tsí ó tó kíbí ɔma-ayɔ́yɔ́ gìɖì bɛ́ gé, à má nyáa wí fú egi lákṹ yèé bɛ́ ní: Kó wú ǹɖe bɛ̀, tsí kó lɔ káà dzì náàhũ. Tsí ó má tsɛ bɛ́ɛ̀ ìɖéǹɖè.

7 Tsí ó ní: Òŋu kó bèrè ŋá náfɔ̀-kã̀ fòò. Bí ɔ̀nyà-kã̀ wà náàŋírĩ-ŋa, tsí arú-kã̀ wà nɔ́wɔ́‐ɛ̀, tsí arú#ɛ́ lɔ káà fáko nàmí ó lɔ káà ró ɛrã ŋa fúu. Bí arú#ɛ́ bɔ̀ ti nóko bàa, tsí ó ríi fee, nákó wí fúu gbòkã́ ní: Kóyá, kó wá nóòkpì-dzídzɛɛ̀? Kàkó wí fúu bɛ́ɛ̀ nɛ́. 8 Kà kàa bɛ́ɛ̀, nákó wí fúu ní: Kó se dzídzɛ fú òŋu, tsí kó kparɔ àwù‐ɛ̀, tsí kó kɛ́ dzídzɛ#ɛ́ wá fú òŋu, tsí òŋu kó dzɛ ni. Tsí bí òŋu dzɛ tã́, ni òŋu gbo kó wáa kɛ́ tɛ̀ɛ̀, tsí kó dzɛ. 9 Kò bèrè ní kó tsɔ̀yà fú arú‐ɛ̀ ní iŋɛ́ yèé òŋu ɖá fúu ŋa#á, ni ó tse ŋá. 10 Ó ɖi, àŋa gbo, bɛ́ɛ̀ ké ní ó wà fú ŋa#á. Bí à tse iŋɛ́ kpó yèé Ɔ̀ɖáyé ní ká tse ŋa#á, ká fɔ̀ ní: Arú nákpo ní àŋa dzɛ́#ɛ́, tsí iŋɛ́ yèé wà ní àŋa kó tse#ɛ́ ní àŋa tse#ɛ́.

Yèésù bɔ aɖɔ́ɔ̀tɛ̀ maá

11 Náànyì-bɛ́ɛ̀#ɛ́, Yèésù làkóò ńYèrúsàlɛ́mì, tsí ó gbà náàŋírĩ-erè-Sàmàríyà† òŋu erè-Gàlìlé. 12 Tsí kíbí ó wà wɔ̀ ńnɔ́-ìlú-kã̀ làkóò#ɛ́, aɖɔ́ɔ̀tɛ̀† maá kã̀ŋa bòkó kpàɖé‐ɛ̀. Tsí à ɖóro nóòtèrè si, 13 tsí wà ɖúgbe ti bɛ̀ wá fúu ní: Yèésù! Ɔ̀gá! Rí ànyínɔ́ fú wa ɖé ooò!

14 Kíbí ó rí ŋa bɛ́ɛ̀#ɛ́, ó wí fú ŋa ní: Ká lɔ káà mú ara-ŋa ɖíre fú atsɛbɔ-Ɔ̀ɖáyé† ŋa ní àrɔ̃̀#ɛ́ tã́ fú àŋa.

Tsí à ǹɖe, tsí dzì nɔ́ɔ̀nà. Kíbí à wà nɔ́ɔ̀nà làkóò#ɛ́, à lɔ káà rí gbòkã́ ní ara-àŋa sɛ̃̀ ɖi rere si ńǹɖì‐ɛ̀ kpó.

15 Tsí ɔ̀nyà-kã̀ náàŋírĩ-ŋa, kíbí ó rí ní àrɔ̃̀#ɛ́ tu òŋu#ɛ́, ó sɛ̃̀ nyí gbòkã́ nɛ́sɛ̀ nɛ́sɛ̀, tsí wà nyɛ Ɔ̀ɖáyé ɖúgbe bàa ńɖi-Yèésù. 16 Kíbí ó tó ńɖi-Yèésù#ɛ́, ó kálɛ̀ nábɛ́‐ɛ̀ gìrìbà, tsí mú erí kãlɛ̀ fúu, tsí wà ɖɔ́kpɛ́ fúu. Ɛnɛ nyɛ̀ŋɛ̀ òŋu kò dzɛ́ ɔma-Ìyúɖà ŋa gìɖì. Ó ti nérè-Sàmàríyà ni.

17 Tsí Yèésù wà bèrèé ní: Àŋa maá#á kpó fee, àrɔ̃̀#ɛ́ tù ŋá kpó nɔ̀, tsí ɔ̀nyà mɛ́ɛsã́ àtíbɔ̀ ŋa#á fáà? 18 Ó ɖi, náàŋírĩ-ŋa ni ɔ̀nyà-kã̀ kpókpó kò nyáa tsèsérè, ní òŋu kó sɛ̃ ànyì wáa ɖɔ́kpɛ́ fú Ɔ̀ɖáyé láre àledzò yèéè? 19 Tsí ó wí fúu ní: Kó ǹɖe, tsí kó lɔ. Ó ɖi, àrɔ̃̀#ɛ́ tùú.^* Iŋɛ́ yèé tse#ɛ́, ó nɛ́ àkaralé si ńǹtá-òŋu.

Ɔdzɔ́ yèé Yèésù nákó wáa dzoyè#ɛ́

(Màtéwò 24:23-28, 37-41)

20 Náànyì-bɛ́ɛ̀ ró#ɛ́, ɔma-ɛgbɛ́-Fàrísì† ŋa wà bere Yèésù ní: Ńǹwèrè yèésí Ɔ̀ɖáyé nákó wáa dzoyè ná?

Tsí ó dzɔ́ŋù fú ŋa ní: Bí Ɔ̀ɖáyé wà dzoyè#ɛ́, à kàkó nyáa ríi òŋu odzú. 21 À kàkó nyáa fɔ̀ ní: Ká rí gé! Ɔ̀ɖáyé wà dzoyè ńbí nàmí ó wà dzoyè ńbɛ̀. Ó ɖi, Ɔ̀ɖáyé ti wà dzoyè‐ɛ̀ náàŋírĩ-ŋa ná.

22 Tsí ó nyí, tsí wà wí fú ɔmatsɛ́‐ɛ̀ ŋa ní: Òŋu, Ɛnɛ yèé ɔ̀nyà bí#ɛ́†, ìwèrè-kã̀ bàa, tsí òŋu nákó wá. Ó ɖi, tã́ná òŋu kó wá#á, nákó wù ŋá ní àŋa má rí ɔdzɔ́-kã̀ náàŋírĩ-ɔdzɔ́ yèé ŋa gé, tsí à kàkó nyáa ríi ró. 23 Tsí à nákó wà wí fú ŋa ní: Ká rí gé! Òŋu wà ńbí nàmí òŋu wà ńbɛ̀. Ó ɖi, bí à wà wí fú ŋa bɛ́ɛ̀#ɛ́, ká máa lɔ bɛ̀. Ká máa yáré tɛ̀ náànyì-ŋa gbo. 24 Ó ɖi, nɔ́dzɔ́ yèé òŋu, Ɛnɛ yèé ɔ̀nyà bí#ɛ́, òŋu nákó wá#á, nɔ́dzɔ́ nyɛ̀ŋɛ̀#ɛ́, ayé gbaŋgba#á kpó nákó rí òŋu náàrìkã̀ntso. Nákó wà kíbí màmà náa bù ńǹgbèrí, tsí náa má ti nákpálà-kã̀ wáa lɔ káà kpa nákpálà-èkéèdzì#ɛ́ ni. 25 Ńbɛ̀ɛ́, tã́ná òŋu kó wá#á, ó wà ní òŋu kó réré kpíkpɔ̀, tsí ɔma-ìsɛ̃̀ɛ̃́ ŋa ká kɔ òŋu.

26 Ó ɖi, òŋu, Ɛnɛ yèé ɔ̀nyà bí#ɛ́, nɔ́dzɔ́ yèé òŋu nákó wá#á, ɔdzɔ́ nyɛ̀ŋɛ̀ nákó wà kíbí ìwèrè-Nòwá† gbo bɛ́ ni. 27 Ńǹwèrè yèé Nòwá gbé#ɛ́, ɔ̀nyà ŋa wà dzɛ, tsí wà mɔ. À wà náya, tsí à wà mú ɔma gbo fú ɔkɔ títí fú ɔdzɔ́ yèé Nòwá ǹɖe, tsí wɔ̀ nɔ́kɔ̃̀-odzómi#ɛ́. Tsí òdzò lákṹ-kã̀ rɔ̀ títí omi kɔ̃́ ìtalɛ̀#ɛ́ kpó rɔ̃gbɔ̃gbɔ̃ɔ̃, tsí ɛnɛ yèé bɔ̀ ńǹtalɛ̀ ŋa#á tsɛ̀rá kpó.

28 Ɔdzɔ́ nyɛ̀ŋɛ̀#ɛ́ nákó wà kíbí ɔdzɔ́-Lɔ́tì gbo bɛ́ ké ni. Ńǹwèrè-Lɔ́tì gbo#ɛ́, ɔ̀nyà ŋa wà dzɛ, tsí wà mɔ. À wà rà, tsí wà tà, tsí wà tsoko gbo, tsí wà malé gbo. À wà tse iŋɛ́ nyɛ̀ŋɛ̀ ŋa kpó náàrìmáa nyí wo ànyì. 29 Ó ɖi, nɔ́dzɔ́ yèé Lɔ́tì ǹɖe fùɖá ńǹlú-Sòɖómì#ɛ́, òdzò-iná òŋu òkúta-iná wà rɔ̀ ɖà ńǹlú#ɛ́, tsí ìlú#ɛ́ ra kpó. 30 Ó ɖi, nɔ́dzɔ́ yèé òŋu, Ɛnɛ yèé ɔ̀nyà bí#ɛ́, òŋu nákó nya ara-òŋu ŋà#á, bɛ́ɛ̀ ké ní ɔ̀nyà ŋa gbo nákó wà tse#ɛ́ ńnɛ̀ɛ́.

31 Nɔ́dzɔ́-ɔdzɔ́ nyɛ̀ŋɛ̀#ɛ́, ɛnɛ yèé wà ńkpàtá si#ɛ́ kó máa wɔ̀ ńnɔlé lɔ, tsí kó káà kɛ́ arù‐ɛ̀ ŋa. Tsí ɛnɛ yèé gbo wà nóko si#ɛ́, òŋu gbo kó máa bɔ̀ wá ńlé ró. 32 Ó ɖi, ká tédzú iŋɛ́ yèé bá aya-Lɔ́tì kíbí à ǹɖe ńǹlú#ɛ́ wáa làkóò, tsí ó nyíwo ànyì#ɛ́. 33 Ó ɖi, ɛnɛ yèé nákó wò ní òŋu kó ɖũ àyɛ̀‐ɛ̀#ɛ́, nákó tsɛ̀rá. Tsí ɛnɛ yèé nákó mú ikú‐ɛ̀ tà náàtsùgbé-òŋu#ɛ́, nákó rí ɔlà.

34 Tsí ó ní: Òŋu wà wí fú ŋa ní fee, nóoru-ɔdzɔ́ nyɛ̀ŋɛ̀#ɛ́, bí ɔ̀nyà méèdzì sũ̀ nání ɔ̀kã̀ntso si, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́. 35 Bí ɔnɔbɛ̃̀ɛ̃ méèdzì kpérí, tsí wà lɔ ɔkà nɔ́lɔ, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́. [ 36 Bí ɔ̀nyà méèdzì wà nóko si, Ɔ̀ɖáyé nákó kɛ́ ɔ̀nyà-kã̀ lɔ, tsí kɔ enìkéèdzì‐ɛ̀ dzɔ̀ɔ́.]

37 Ńbɛ̀ɛ́, à wà bèrèé ní: Ɔ̀gá, ńbisí iŋɛ́ ŋa#á nákó tse?

Tsí ó wà dzɔ́ŋù fú ŋa ní: Ńbí òkú-iŋɛ́-kã̀ náa wà#á, ńbɛ̀ ní igú ŋa gbo náa kpérí si#ɛ́.