Mákò 14

À mú arũ ɖé si ńǹtá-Yèésù

(Màtéwò 26:1-5, Lúkà 22:1-2, Yòhánà 11:45-53)

Ńǹwèrè nyɛ̀ŋɛ̀#ɛ́, ó bɔ ɔdzɔ́ méèdzì, tsí ká dzɛ ɔɖɔ̃́-Àɖádzɔ̀ɔ́†. Tsí à nákó dzɛ ɔɖɔ̃́-Kpɔ̃́nɔ́-àrìkɛ́ fú ɔdzɔ́ mɛ́ɛdzɔ. Tsí onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa wà wo bí ká tse fáà, tsí ɖɔ́gbɔ̃́, tsí ká mú Yèésù, tsí ká sɔ́ɔ fú ikú#ɛ́. 2 Tsí à wà fɔ̀ ní: Àŋa kàkó nyáa múu ńǹwèrè yèé à wà dzɛ ɔɖɔ̃́#ɛ́. Bí kò tsi bɛ́ɛ̀#ɛ́, ìlú#ɛ́ nákó rò.

Ɔnɔbɛ̃̀ɛ̃-kã̀ kɛ́ àɖɛ̃́, tsí tseé ɖà néwo fú Yèésù

(Màtéwò 26:6-13, Yòhánà 12:1-8)

3 Ńǹwèrè nyɛ̀ŋɛ̀#ɛ́, Yèésù wà ńǹlú-Bètàní si, tsí ó lɔ ńkpáfɛ-ɔ̀nyà-kã̀, tsí kó káà dzɛŋɛ́. À náa kpe ɛnɛ nyɛ̀ŋɛ̀ ní Sìmɔ́nì, tsí ó ɖɔ́ɔ̀tɛ̀ wáa lɔ dzɔ̀ɔ́. Ńǹwèrè yèé à wà nóòkpì-dzídzɛ si#ɛ́, ɔnɔbɛ̃̀ɛ̃-kã̀ wáa tó, tsí ó banɛ́ àɖɛ̃́ rṹrũ̀ fĩ́rĩ́fĩ́rĩ́ nágbè-kã̀ si. Àɖɛ̃́#ɛ́ gbowó héŋú. Egi-kã̀ wà, tsí à náa kpèé ní náríɖò, òŋu sɔ̃́ŋú ní à ń tseé#ɛ́. Tsí agbè#ɛ́ gbo gbowó bɛ́ɛ̀ ké. Òkúta-ìrɔ́-kã̀ ní à ń gbɛ̃́ɛ̃#ɛ́, tsí à náa kpe òkúta#á ní àlàbásítà. Ńbɛ̀ɛ́, ó tsɛ́ ɔ̀gɔ̃̀rɔ̃̀-agbè#ɛ́, tsí ó tse àɖɛ̃́#ɛ́ ɖà néwo fú Yèésù. 4 Ńbɛ̀ɛ́, ɔ̀nyà kã̀ŋa náàŋírĩ-ŋa#á, à bínɔ́, tsí à wà fɔ̀ ní: Kí tse tsí ó wà bàdzɛ́ àɖɛ̃́#ɛ́ báàyí? 5 Ó ɖi, à má nyáa ta àɖɛ̃́#ɛ́ ìmarũ owó-itsɛ́-ɔdzɔ́ ɔgɔ́ɔrú lé ńgboó (300), tsí mú owó‐ɛ̀ kpɛ̃́ fú adzìyàkú ŋa nɔ̀. Tsí à wà rã́ã̀rã̀ báa kũkũ.

6 Tsí Yèésù ní: Ká kɔ̀ɔ́ dzɔ̀ɔ́, tsí kó míra. Kí tse tsí à wà ɖɔ́kpɔ fúu ná? Ó ɖi, iŋɛ́-ire ní ó tse fú òŋu#ɛ́. 7 Ó ɖi fee, adzìyàkú ŋa òŋu, à wà bá ŋa si nɔ́dzɔ́ kɔ́dzɔ́, tsí à nákó nyáa tse ore fú ŋa ńǹwèrè ɔ̀kã̀lɔ́ɔ̀kã̀. Ó ɖi, òŋu, òŋu kàkó wà bá ŋa si títí lɔ. 8 Àmí yèé ó nɛ́#ɛ́, iŋɛ́‐ɛ̀ ní ó tse#ɛ́. Ó mú àɖɛ̃́#ɛ́ kpã́ fú òŋu, tsí wà tɔ́tse ara-òŋu si fú rírì, tã́ná òŋu kó wáa kú ni. 9 Ó ɖi, òŋu wà wí fú ŋa ní fee, ńǹɖì ɔ̀kã̀lɔ́ɔ̀kã̀ kpó yèé à nákó dzíkɔ̀ ɖíɖɔ̃̀-òŋu náàdzàkáyé#ɛ́, à nákó kpɛ̀rɔ́-iŋɛ́ yèé ɔnɔbɛ̃̀ɛ̃ yèé tse#ɛ́, tsí wà ń tédzú‐ɛ̀.

Yúɖà ta Yèésù kpɔ̀rɔ̀ fú onùgbó-atsɛbɔ-Ɔ̀ɖáyé ŋa

(Màtéwò 26:14-16, Lúkà 22:3-6)

10 Yúɖà Sìkàrìyɔ́tì, òŋu gbo wà náàŋírĩ-ɔmatsɛ́-Yèésù† máàméèdzì ŋa#á. Tsí ó wáa ǹɖe, tsí káà rí onùgbó-atsɛbɔ-Ɔ̀ɖáyé† ŋa, tsí wà wí fú ŋa ní: Òŋu wà wo òŋu kó ta Yèésù fú ŋa. 11 Kíbí à gbɔ́ bɛ́ɛ̀#ɛ́, ó ɖɔ̃̀ fú ŋa títítí, tsí à tàlé fúu ní àŋa nákó fúu nówó. Ńbɛ̀ɛ́, ó wáa wo ìwèrè yèé nákó sã̀, tsí ká nyáa múu ńǹɖúkù#ɛ́.

Yèésù wà dzɛ dzídzɛ-ɔɖɔ̃́-Àɖádzɔ̀ɔ́ bá ɔmatsɛ́‐ɛ̀ ŋa

(Màtéwò 26:17-25, Lúkà 22:7-13, 21-23, Yòhánà 13:21-30)

12 Ɔdzɔ́-àtsɛ̃̀tsɛ̃̀-ɔɖɔ̃́-Kpɔ̃́nɔ́ àrìkɛ́† tó. Nɔ́dzɔ́#ɛ́ ní à náa kpa ɔma-àgbò† fú Ɔ̀ɖáyé#ɛ́. Ńbɛ̀ɛ́, ɔmatsɛ́-Yèésù† ŋa wà bèrèé ní: Ńbisí ó wà wò ní àŋa kó lɔ káà kpaɖí dzídzɛ-ɔɖɔ̃́-Àɖádzɔ̀ɔ́†#ɛ́ fúu?

13 Tsí Yèésù bɛ ɔmatsɛ́‐ɛ̀ méèdzì, tsí fɔ̀ fú ŋa ní: Ká wɔ̀ ńǹlú#ɛ́. À nákó kpàɖé ɔnɔkɛ̃̀ɛ̃-kã̀ bɛ̀, tsí nákó ru omi nóògé wáa làkóò. Ká tɛ̀ náànyì‐ɛ̀. 14 Tsí ńlé yèé nákó wɔ̀#ɛ́, ká wí fú olílé#ɛ́ ní: Akɔ́nɛ ní ká bèrèé ní ńnɔlé yèésí òŋu ɔmatsɛ́-òŋu ŋa, àŋa nákó gbé, tsí dzɛ ɔɖɔ̃́-Àɖádzɔ̀ɔ́#ɛ́ ná? 15 Tsí nákó ɖíre inɔlé lákṹ-kã̀ fú ŋa ńǹtá-ìsã́ŋú-kã̀, tsí à ti tɔ́tseé si, tsí iŋɛ́ ɔ̀kã̀lɔ́ɔ̀kã̀ kpó yèé kpã́dzú#ɛ́ gbo ti wà ńnɛ̀. Ńbɛ̀ ní à nákó kpaɖí dzídzɛ#ɛ́ si fú àŋa#á.

16 Tsí ɔmatsɛ́ ŋa#á dzì nɔ́ɔ̀nà, tsí à káà tó ńǹlú#ɛ́, tsí rí iŋɛ́ ŋa#á bɛ́ɛ̀ kpó, kíbí ó ti wíi fú ŋa#á, tsí à kpaɖí dzídzɛ-ɔɖɔ̃́-Àɖádzɔ̀ɔ́#ɛ́.

17 Kíbí alɛ́lɛ́ lɛ́ ńǹkɛ̀ɛ́, Yèésù wáa tó òŋu ɔmatsɛ́‐ɛ̀ máàméèdzì ŋa#á. 18 Ńǹwèrè yèé à dzokó si, tsí wà dzɛŋɛ́#ɛ́, Yèésù wà wí fú ŋa ní: Òŋu wà wí fú ŋa ní fee, ɛnɛ yèé bàkó ta òŋu#ɛ́, ó wà náàŋírĩ-ŋa bí, tsí wà dzɛŋɛ́ bá òŋu.

19 Ńbɛ̀ɛ́, àŋa kpó, ara kú ŋa, tsí ɛnɛ kṹnukṹ wà bèrèé ní: Kò tsi èmi ni nɛ́? Kò tsi èmi ni nɛ́?

20 Tsí ó wà wí fú ŋa ní: Ɔ̀nyà-kã̀ náàŋírĩ-àŋa máàméèdzì#ɛ́ ni, tsí ɛnɛ nyɛ̀ŋɛ̀ gbo wà mɔ́wɔ́ bɔ̀ náàwò ɔ̀kã̀ntso bá òŋu bí. 21 Ó ɖi òŋu, Ɛnɛ yèé ɔ̀nyà bí#ɛ́†, òŋu kɛ́ tòŋu làkóò, kíbí à ti kɔɔ́ si ti nára-òŋu#ɛ́. Ó ɖi, ɛnɛ yèé nákó ta òŋu, Ɛnɛ yèé ɔ̀nyà bí#ɛ́, èhée fú ɛnɛ nyɛ̀ŋɛ̀. À kàá bí ɛnɛ nyɛ̀ŋɛ̀ gìɖì, ó má sã̀ fúu lárè.

Yèésù wà dzɛ dzídzɛ-ìkã́ã̀nyì bá adzítsɛ́‐ɛ̀ ŋa

(Màtéwò 26:26-29, Mákò 14:22-25, Lúkà 22:14-20, 1 Kòríntì ŋa 11:23-25)

22 Kíbí à wà dzɛŋɛ́ làkóò#ɛ́, Yèésù kɛ́ kpɔ̃́nɔ́ banɛ́, tsí bere kùsɛ̀ɛ̀-Ɔ̀ɖáyé. Tsí ó tsɛ́ɛ, tsí ń bɔwɔ́-ŋa, tsí wà fɔ̀ fú ŋa ní: Ara-òŋu ni, ká gbà dzɛ.

23 Tsí ó tɔ́ kɛ́ ɔtí ńkɔ̃́ŋúkɔ̃́ŋú-kã̀ banɛ́, tsí ɖɔ́kpɛ́ fú Ɔ̀ɖáyé. Tsí ó kɛ́ɛ fú ŋa, tsí àŋa kpó, à mɔɔ́. 24 Tsí ó wà wí fú ŋa ní: Àmbara-òŋu ni. Àmbara yèé Ɔ̀ɖáyé ń tse ìmɔ̀lɛ̀ bá ŋa#á ńnɛ̀ɛ́. Àmbara#á ní ɖà ńlɛ̀, tsí à ń tsɛbɔ néwo-ɔ̀nyà ɛ̀gbɛ̀lɛ́ɛ̀gbɛ̀-kã̀#á. 25 Ó ɖi, òŋu wà wí òtítɔ́ fú ŋa ní fee, òŋu kàkó mɔ ɔtí láyé ró títí fú ɔdzɔ́ yèé Ɔ̀ɖáyé nákó dzoyè#ɛ́. Ńǹwèrè nyɛ̀ŋɛ̀ ní òŋu nákó sɛ̃̀ mɔ ɔtí titɔ̃#ɛ́.

Yèésù fɔ̀ ní Òkúta nákó sɛ̃́ ní òŋu kò ma òŋu

(Màtéwò 26:30-35, Lúkà 22:31-34, Yòhánà 13:36-38)

26 Tsí à kpé orĩ-ɔɖɔ̃́ ŋa kíkɔ̃. Kíbí à kɔ̃rĩ tã́#á, à fùɖá, tsí wáa lɔ nóòkè-Òlífì†.

27 Tsí Yèésù wà wí fú ŋa ní: Àŋa kpó, à nákó sá kɔ òŋu dzɔ̀ɔ́. Iŋɛ́ yèé tse#ɛ́, à kɔɔ́ si ńǸwé-Ɔ̀ɖáyé† ní: “Màa kpa aró-àgùɖã̀#á, tsí àgùɖã̀ ŋa nákó túùnkã́ wérí.”^*

28 Ó ɖi, bí òŋu sɛ̃̀ dzí ti náàŋírĩ-òkú ŋa wá náyé tã́, òŋu nákó tsúwádzú-ŋa lɔ nérè-Gàlìlé.

29 Tsí Òkúta fɔ̀ fú Yèésù ní: Bí ó dzɛ́ gìɖì ní ɛnɛ yèé bɔ̀ ŋa#á kpó sá kɔ̀ɔ́ dzɔ̀ɔ́, òŋu, òŋu kàkó tse bɛ́ɛ̀.

30 Tsí Yèésù fɔ̀ fúu ní: Òŋu wà wí fúu ní fee, nɔ́mbɛ́ yèé ilɛ̀ má si#ɛ́, tã́ná àkìkɔ kó kɔ gbà méèdzì nóoru yèé bɛ́ gìɖì, nákó sɛ̃́ gbà mɛ́ɛta ní láyé òŋu kò tì mà òŋu.

31 Tsí Òkúta tɔ́ wà le oŋù máa kũkũ ní: Bí òŋu nákó kú báa gìɖì gbo, òŋu kàkó sɛ̃́ láyé ní òŋu kò màá.

Tsí ɛnɛ yèé bɔ̀ ŋa#á gbo, à fɔ̀ bɛ́ɛ̀ kpó.

Yèésù lɔ káà wúùre ńGètsèmàné

(Màtéwò 26:36-46, Lúkà 22:39-46)

32 Kíbí à gu òkè-Òlífì†#ɛ́, à káà tó ńǹɖì-kã̀. À náa kpe ibɛ̀ ní Gètsèmàné. Tsí Yèésù wà wí fú ɔmatsɛ́‐ɛ̀ ŋa ní: Ká dzokó ńbɛ̀, tsí òŋu kó sɔ́ lɔ káà wúùre tã́ná. 33 Tsí ó kpe Òkúta òŋu Yàkúbù má nára-Yòhánà†, tsí à lɔ báa. Ńbɛ̀ɛ́, odzo kpée tsítse, tsi ó wà ɖíìhã̀ŋù gbo tó bɛ́ɛ̀. 34 Tsí ó wà fɔ̀ fú ŋa ní: Ara yèé wà kú òŋu bɛ́#ɛ́ bàkó kpa òŋu. Ó ɖi, ká gbé bí, tsí wà nódzúfò si bá òŋu.

35 Tsí ó sɔ́ lɔ ńwádzú oɖé, tsí káà kálɛ̀ gìrì, tsí kpé ìre wúwú, àtsùgbée bí ɔ̀nà wà, ni ìréré yèé bàa#á kó máa sɔ́má‐ɛ̀. 36 Ó ní: Óò, Boba-mi! Iŋɛ́-kã̀ kpókpó kò le lárèɛ́. Òfò ìrɔ́ yèé bàa#á, sɔ́ɔ lɔ fú mi ɖé. Ó ɖi, máa tse iŋɛ́ yèé ǹ wà wò#ɛ́, tse iŋɛ́ yèé ìwɔ òŋu, ò wà wò#ɛ́.

37 Kíbí ó wúùre tã́#á, ó sɛ̃̀ wá ńɖi-ɔmatsɛ́‐ɛ̀ ŋa#á, tsí ó wáa bá ŋa, tsí à sɔ̃rũ lɔ si. Tsí ó fɔ̀ fú Òkúta ní: Sìmɔ́nì, ò wà sɔ̃rũ niì? Ò kò nyáa gbé nódzúfò tó aŋgo ɔ̀kã̀ntso gìɖì gboò? 38 Ká gbé nódzúfò si, tsí wà wúùre, àtsùgbée ká máa dzì náàɖã́wò. Odzú wo ire kó tse, àmí ní kò tó#ɛ́.

39 Tsí ó sɛ̃̀ sɔ́ lɔ ńwádzú ró, tsí lɔ káà wúùre, tsí ó wà ɖɔ̃́ oŋù ɔ̀kã̀ntso#ɛ́ ké. 40 Tsí ó tɔ́ sɛ̃̀ wá ńɖi-ɔmatsɛ́‐ɛ̀ ŋa#á ró, tsí ó wáa bá ŋa, tsí à sɔ̃rũ lɔ si. Odzú-ŋa wówo si gbegbé, à kàkó nyáa gbé nódzúfò. Ńbɛ̀ɛ́, à kò ma afɔ̀ mɛ̀ɛ́ ká wí fúu.

41 Kíbí ó sɛ̃̀ wá nóláànkɛ́ɛta, tsí à sɔ̃rũ lɔ si ró#ɛ́, ó wí fú ŋa ní: Hũ̀ũ̀! Ká sɔ̃rũ rere, ká míra fú ara-ŋa! Ó ɖi, afɔ̀ tã́. Àsòkò tó, tsí ká mú òŋu, Ɛnɛ yèé ɔ̀nyà bí#ɛ́†, tsí ń bɔwɔ́-ɔ̀nyà-íbàɖí ŋa. 42 Ká ǹɖe, tsí àŋa kó lɔ. Ká rí gé! Ɛnɛ yèé wà tà òŋu#ɛ́ wáa tó.

À mú Yèésù

(Màtéwò 26:47-56, Lúkà 22:47-53, Yòhánà 18:3-11)

43 Ńǹɖì-bɛ̀ gbòkã́#á, oŋù-Yèésù kò tì dzilɛ̀ wòná, tsí Yúɖà wáa tó. Òŋu gbo wà náàŋírĩ-ɔmatsɛ́-Yèésù† máàméèdzì ŋa#á, tsí ó gbɛ̃́ ɔ̀nyà kpíkpɔ̀ tɛ̀ náànyì, tsí à banɛ́ tàsú ŋa òŋu ɔ̀kpá ŋa. Onùgbó-atsɛbɔ-Ɔ̀ɖáyé† ŋa òŋu akɔ́nɛ nɛ́kpa-Ɔ̀ɖáyé† ŋa má nára-onùgbó-ìlú#ɛ́ ŋa ní bɛ̀ ŋá tɛ̀ náànyì‐ɛ̀#ɛ́. 44 Atanɛ nyɛ̀ŋɛ̀#ɛ́, ó ti ɖíre iŋɛ́ yèé nákó tse, tsí à nákó nyáa ma Yèésù#ɛ́. Ó ní: Ɛnɛ yèé òŋu nákó rɔlɛ̀ kí#ɛ́ ní dzɛ́ ɛnɛ yèé à wà wò#ɛ́. Ó ɖi, ká múu, tsí ká ɖèé rere, tsí ká gbɛ̃́ɛ̃ lɔ.

45 Ńbɛ̀ɛ́, kíbí Yúɖà wáa tó gbòkã́#á, ó sɔ́ tìmá Yèésù, tsí fɔ̀ ní: Akɔ́nɛ.

Tsí ó rɔlɛ̀ kíi. 46 Ńbɛ̀ɛ́, ɛnɛ-àtíbɔ̀ ŋa tìmá Yèésù ńǹkɛ̀ɛ́, tsí dzìí, tsí múu. 47 Ńǹɖì-bɛ̀#ɛ́, ɔ̀nyà-kã̀ náàŋírĩ-ɛnɛ yèé wà bɛ̀ ŋa#á kpɔ tàsú‐ɛ̀ fùɖá, tsí ń tsá ɔ̀nyà-kã̀ náàŋírĩ-ŋa, tsí fá etí‐ɛ̀ ǹɖe. Ɛnɛ yèé à fa etí‐ɛ̀ nyɛ̀ŋɛ̀#ɛ́, arú-ɔ̀gã́-atsɛbɔ-Ɔ̀ɖáyé ŋa ní ó dzɛ́#ɛ́.

48-49 Tsí Yèésù nyí, tsí wà rɔ́ fú ɛnɛ yèé bòkó wáa múu ŋa#á ní: Nɔ́dzɔ́ kɔ́dzɔ́, òŋu wà bá ŋa si ńlé-Ɔ̀ɖáyé, tsí wà tsɛ̀kɔ́ fú ŋa, tsí à kò sì mú òŋu wòrí. Tsí ó ɖi nóoru yèé bɛ́, tsí à bàkó wáa mú òŋu, tsí à ɖì gìrìdzàà wáa tó, tàsú ŋa òŋu ɔ̀kpá ŋa nɔ́wɔ́ kíbí à bòkó wáa mú olè-íbàɖí bɛ́ yí. Ó ɖi, iŋɛ́ ŋa#á lɔ bɛ́ɛ̀, àtsùgbée iŋɛ́ yèé à kɔ si ńǸwé-Ɔ̀ɖáyé† ti nára-òŋu#ɛ́, iŋɛ́ ŋa#á kó tsɛ.

50 Tsí àŋa kpó, à sá kɔ̀ɔ́ dzɔ̀ɔ́ lɔ. 51 Ɔ̀nyà-kã̀ wà náàŋírĩ-ŋa, ɔmɔ̀tsɔ́ ní ó dzɛ́#ɛ́, tsí ó wà nátsɔ si, tsí tɛ̀ náànyì-Yèésù làkóò. Tsí à dzi atsɔ‐ɛ̀#ɛ́, tsí múu, 52 tsí ó gbã̀ ŋá, tsí kɔ atsɔ#ɛ́ dzɔ̀ɔ́ nɔ́wɔ́ fú ŋa, tsí sá lɔ néèwò néèwò.

À gbɛ̃́ Yèésù lɔ fú ɛgbɛ́-àkpɛ̀dzɔ́-ɔma-Ìyúɖà ŋa

(Màtéwò 26:57-68, Lúkà 22:54-5, 63-71, Yòhánà 18:13-14, 19-24)

53 Ńbɛ̀ɛ́, à gbɛ̃́ Yèésù lɔ ńlé-ɔ̀gã́-atsɛbɔ-Ɔ̀ɖáyé ŋa†. Tsí onùgbó-atsɛbɔ-Ɔ̀ɖáyé† ŋa òŋu onùgbó-ìlú ŋa má nára-akɔ́nɛ nɛ́kpa-Ɔ̀ɖáyé† ŋa, à wá kpó. Àŋa ní dzɛ́ ɔ̀nyà-ɛgbɛ́-àkpɛ̀dzɔ́-ɔma-Ìyúɖà ŋa†#á, tsí à kpérí ní àŋa kó kpɛdzɔ́ fúu. 54 Náàsòkò nyɛ̀ŋɛ̀#ɛ́, Òkúta tɛ̀ náànyì-Yèésù lɔ náàrìmáa sɔ́má-ŋa títí òŋu gbo wɔ̀ lɔ ńkpàtá-ɔ̀gã́-atsɛbɔ-Ɔ̀ɖáyé ŋa bá ŋa. Tsí ó káà dzokó bá àɖèlé-ilé#ɛ́ ŋa, tsí wà yɛ́ná.

55-56 Ńbɛ̀ɛ́, onùgbó-atsɛbɔ-Ɔ̀ɖáyé ŋa òŋu ɛgbɛ́-àkpɛ̀dzɔ́-ɔma-Ìyúɖà ŋa#á kpó wà wo ká bu òɖòbò-kã̀ má Yèésù, tsí ká nyáa ń kpaá nóòkú. Ɔ̀nyà kpíkpɔ̀ wà bu òɖòbò máa. Ó ɖi, afɔ̀-arũ-ŋa kò dzɛ́ ɔ̀kã̀ntso. Ńbɛ̀ɛ́, à kò rí afɔ̀ yèé ká nyáa ń ɖáàbi fúu#ɛ́. 57 Tsí ɔ̀nyà kã̀ŋa ǹɖe ńǹkɛ̀ɛ́, tsí wà bu òɖòbò máa, tsí wà fɔ̀ ní: 58 Ó fɔ̀, tsí àŋa gbɔ́ ní, òŋu nákó fɔ́ ilé-Ɔ̀ɖáyé† yèé ɔ̀nyà mɔ́wɔ́ ma#á, tsí òŋu nákó mú ɔdzɔ́ mɛ́ɛta, tsí ń ma òmírɛ̃̀ yèé kàkó dzɛ́ ní ɔ̀nyà ní mɔ́wɔ́ maá#á.

59 Náàyídzá-ŋa nyɛ̀ŋɛ̀ gìɖì gbo#ɛ́, arũ-ŋa kò ɖé ńnɛ̀.

60 Tsí ɔ̀gã́-atsɛbɔ-Ɔ̀ɖáyé ŋa ǹɖe ɖóro náàŋírĩ-ŋa, tsí wà bere Yèésù ní: Afɔ̀ yèé ɛnɛ nyɛ̀ŋɛ̀ ŋa wà fɔ̀ ti nára‐ɛ̀#ɛ́ fe, kò nɛ́ afɔ̀-kã̀ kpókpó, tsí kó fɔ̀ɔ̀?

61 Tsí Yèésù tsikó kpíríkpírí. Kò dzɔ́ŋù-kã̀ kpókpó fúu. Tsí ɔ̀gã́-atsɛbɔ-Ɔ̀ɖáyé ŋa sɛ̃̀ wà bèrèé ró ní: Òŋu ní dzɛ́ Kírísítò, Ɔma bíbí-Ɔ̀ɖáyé#ɛ́ɛ̀?

62 Tsí Yèésù ní: Ɛ̃ɛ̃, òŋu ni. Tsí àŋa kpó, à nákó rí òŋu, Ɛnɛ yèé ɔ̀nyà bí#ɛ́†, tsí òŋu nákó dzokó náàwóòtã́-Ɔ̀ɖáyé Olíkpá, tsí à nákó rí òŋu, tsí òŋu nákó bɔ́ ti ńǹgbèrí ńnɔ́-irì-kã̀ gbo wá.

63 Kíbí ó wí bɛ́ɛ̀#ɛ́, ó dza ɔ̀gã́-atsɛbɔ-Ɔ̀ɖáyé ŋa#á nára, tsí ó fa àwù-ara tòŋu ká‐ɛ̀ ya, tsí wà fɔ̀ ní: Ó tã́. Àyídzá-kã̀ kò lárè bɛ́ ró. 64 Ó ɖi, àŋa kpó, à gbɔ́ kíbí ó gbɛ̃ɛ̃́rĩ́ ɛ́kɔ-Ɔ̀ɖáyé#ɛ́ nɔ̀. Ó ɖi, bí à rí gbà fáà?

Tsí àŋa kpó, à ɖáàbi fúu, tsí ní ká kpaá nóòkú.

65 Ńbɛ̀ɛ́, ɔ̀nyà kã̀ŋa náàŋírĩ-ŋa ti wà titɔ́ ɖàbòó, tsí mú iŋɛ́-kã̀ ɖi odzú‐ɛ̀, tsí wà gúu náàkɔ̃́, tsí wà wí fúu ní: Ɛnɛ yèé kpaá#á kó màá, tsí fɔ̀ɔ́.

Tsí sɔ́dzà ŋa gbàá, tsí wà kpa ìgbètí fúu.

Òkúta wà sɛ̃́ ní òŋu kò ma Yèésù

(Màtéwò 26:69-75, Lúkà 22:55-62, Yòhánà 18:15-18, 25-27)

66 Ńǹwèrè nyɛ̀ŋɛ̀#ɛ́, Òkúta, òŋu wà ńǹsàlɛ̀ ńkpàtá#á si, tsí èkíɖã-kã̀ wáa tó. Òŋu gbo wà náàŋírĩ-àtsìtsɛ́-ɔ̀gã́-atsɛbɔ-Ɔ̀ɖáyé ŋa†#á ni. 67 Tsí ó rí Òkúta kíbí ó wà yɛ́ná#á. Ńbɛ̀ɛ́, ó wo odzú‐ɛ̀ rere, tsí wà wí fúu ní: Òŋu gbo wà bá Yèésù ti Nàsàrɛ́tì#ɛ́.

68 Tsí Òkúta sɛ̃́ ní: Òŋu kò ma afɔ̀-kã̀, tsí òŋu kò gbɔ́ òkpì-afɔ̀ yèé ó wà fɔ̀#ɛ́ gbo.

Tsí ó ǹɖe ńkpàtá#á, tsí lɔ nárũ-ɔgbà-kpàtá#á. Tsí àkìkɔ-kã̀ kɔ. 69 Tsí èkíɖã#á sɛ̃̀ ríi, tsí wà wí fú ɛnɛ yèé wà bɛ̀ ŋa#á ní: Ɛnɛ yèé bɛ́ gbo wà náàŋírĩ-ŋa náa.

70 Tsí ó tɔ́ sɛ̃́ ró. Títí kó bɔ oɖé#ɛ́, ɛnɛ yèé wà bɛ̀ ŋa#á, à wà wí fúu ró ní: Ìɖéǹɖè ni, òŋu gbo wà náàŋírĩ-ŋa. Ó ɖi, ɛnɛ-ɔwɔ́-Gàlìlé ŋa ní ó dzɛ́#ɛ́.

71 Tsí ó kpé fífɔ̀ ní: Òŋu ta iŋɛ́-kã̀ si ńǹtá‐ɛ̀ ní òŋu kò ma ɛnɛ yèé à wà fɔ̀#ɛ́ náa. Ó ɖi, èhée fú òŋu bí ó dzɛ́ ní òŋu wà tsòɖòbò.

72 Tsí ńǹɖì-bɛ̀ gbòkã́#á, àkìkɔ kɔ nóláànkéèdzì. Tsí Òkúta tédzú kíbí Yèésù fɔ̀ fúu ní: Àkìkɔ kàkó kɔ gbà méèdzì tã́ná nákó sɛ̃́ gbà mɛ́ɛta ní òŋu kò ma òŋu#ɛ́. Ńbɛ̀ɛ́, ó ɖi àbámà fúu, tsí ó wà sɔkṹ.