1 Kòríntì ŋa 11

Ó ɖi, è náa rí mi tse ńǹrɔ́-kíbí èmi gbo ǹ wà rí Kírísítò tse#ɛ́.

Bí olí-Yèésù ŋa kpérí si, bí ó wà ní ɔnɔbɛ̃̀ɛ̃ ŋa òŋu ɔnɔkɛ̃̀ɛ̃ ŋa ká gbé gbà fáà?

2 Ǹ wà nyɛ̀ ŋɛ́ fú kíbí è tɔ́ wà tédzú-mi si ró#ɛ́. Ǹ wà nyɛ̀ ŋɛ́ ní ɛ̀kɔ́ yèé ŋa à tse fú mi, tsí èmi gbo ǹ ń tse fú ŋɛ́#ɛ́, è wà ń tsitsɛ́ tse. 3 Ó ɖi, ǹ wà wò ní e mà ní fee, Kírísítò ní kpeéwo fú ɔnɔkɛ̃̀ɛ̃#ɛ́, tsí ɔnɔkɛ̃̀ɛ̃ gbo kpeéwo fú ɔnɔbɛ̃̀ɛ̃, tsí Ɔ̀ɖáyé gbo kpeéwo fú Kírísítò.^* 4 Bí ɔnɔkɛ̃̀ɛ̃-kã̀ wà wúùre nàmí ó wà gbɔ́ afɔ̀-Ɔ̀ɖáyé fɔ̀ fúnɛ, tsí ó mú iŋɛ́-kã̀, tsí ń bo éwo si#ɛ́, Kírísítò, ɛnɛ yèé dzɛ́ oléwo fúu#ɛ́ ní ó wà mú dzɛ anɔ́ bɛ́ɛ̀#ɛ́. 5 Tsí bí ɔnɔbɛ̃̀ɛ̃-kã̀ gbo wà wúùre nàmí òŋu gbo wà gbɔ́ afɔ̀-Ɔ̀ɖáyé fɔ̀ fúnɛ, tsí kò mú iŋɛ́-kã̀, tsí ń bo éwo si#ɛ́, ɔnɔkɛ̃̀ɛ̃, ɛnɛ yèé dzɛ́ oléwo fúu#ɛ́ ní òŋu gbo wà mú dzɛ anɔ́#ɛ́. Tsí nákó wà kíbí ɛnɛ yèé fɔ̀ ní à wɔ́ kòóró fúu si bɛ́ ni. 6 Bí ɔnɔbɛ̃̀ɛ̃-kã̀ kò sì mú iŋɛ́-kã̀ bo éwo ná, ni kó fá irɔ̃‐ɛ̀ bɔ̀. Bí ó kó sì dzɛ́ anɔ́ fú ɔnɔbɛ̃̀ɛ̃#ɛ́ ní kó fá irɔ̃‐ɛ̀ bɔ̀ nàmí kó wɔ́ kòóró#ɛ́, ni kó mú iŋɛ́-kã̀ bo éwo. 7 Ó ɖi, kò wà ní ɔnɔkɛ̃̀ɛ̃ òŋu kó mú iŋɛ́-kã̀ bo éwo. Iŋɛ́ yèé tse#ɛ́, Ɔ̀ɖáyé ɖá ɔnɔkɛ̃̀ɛ̃, tsí ó kɛ́ ìwànwà-Ɔ̀ɖáyé òŋu ká‐ɛ̀, tsí iyì-Ɔ̀ɖáyé gbo wà ńǹtá‐ɛ̀ si. Tsí iyì-ɔnɔkɛ̃̀ɛ̃ gbo wà ńǹtá-ɔnɔbɛ̃̀ɛ̃ si. 8 Ó ɖi, kò tsi ńnɔ́-ɔnɔbɛ̃̀ɛ̃ ní Ɔ̀ɖáyé ɖá ɔnɔkɛ̃̀ɛ̃ ti#ɛ́. Kà kàa bɛ́ɛ̀, ńnɔ́-ɔnɔkɛ̃̀ɛ̃ ní Ɔ̀ɖáyé ɖá ɔnɔbɛ̃̀ɛ̃ òŋu ti#ɛ́. 9 Tsí Ɔ̀ɖáyé kò ɖá ɔnɔkɛ̃̀ɛ̃ fú ɔnɔbɛ̃̀ɛ̃. Ó ɖi, ɔnɔbɛ̃̀ɛ̃ ní Ɔ̀ɖáyé ɖá fú ɔnɔkɛ̃̀ɛ̃#ɛ́. 10 Kíbí ó dzɛ́ bɛ́ɛ̀#ɛ́, ó wà ní ɔnɔbɛ̃̀ɛ̃ kó wà mú iŋɛ́-kã̀ bo éwo náàtsùgbé-adzítsɛ́-ɔ̀rɔ̃† ŋa. Bí ɔnɔbɛ̃̀ɛ̃ wà tse bɛ́ɛ̀#ɛ́, à nákó rí ní ɔ̀nà wà fúu, tsí kó wúùre, tsí wà gbɔ́ afɔ̀-Ɔ̀ɖáyé gbo fɔ̀. 11 Tsí nódzú-Ɔlɔ́dzɔ́ òŋu#ɛ́, ɔnɔbɛ̃̀ɛ̃ kàkó nyáa gbé, tsí ɔnɔkɛ̃̀ɛ̃ kó máa wà gbèé. Tsí ɔnɔkɛ̃̀ɛ̃ gbo kàkó nyáa gbé, tsí ɔnɔbɛ̃̀ɛ̃ kó máa wà gbèé. 12 Fee, ńnɔ́-ɔnɔkɛ̃̀ɛ̃ ní Ɔ̀ɖáyé ɖá ɔnɔbɛ̃̀ɛ̃ ti#ɛ́. Ó ɖi, ɔnɔbɛ̃̀ɛ̃ ní náa sì bí ɔnɔkɛ̃̀ɛ̃#ɛ́, tsí àŋa méèdzì méèdzì#ɛ́ má nára-iŋɛ́ ɔ̀kã̀lɔ́ɔ̀kã̀ kpó#ɛ́, ńɖi-Ɔ̀ɖáyé ní à ti#ɛ́.

13 Ɛ̀ŋɛ ká-ŋɛ́ gìɖì è sérèé káyí. Ó sã̀ ní ɔnɔbɛ̃̀ɛ̃ kó wà wúùre fú Ɔ̀ɖáyé náàrì mú iŋɛ́-kã̀ bo éwoò? 14 Tsí kíbí iŋɛ́ ŋa#á ti wà náyé gbaŋgba#á si gbà#á, nákó dzɛ́ anɔ́ fú ɔnɔkɛ̃̀ɛ̃ gbo ní irɔ̃ gúgù kó wà néwo‐ɛ̀ si nɔ̀. 15 Ó ɖi ɔnɔbɛ̃̀ɛ̃ òŋu#ɛ́, iyì-kã̀ ní ó dzɛ́ fúu ní irɔ̃ gúgù kó wà néwo‐ɛ̀#ɛ́. Iŋɛ́ yèé tse#ɛ́, Ɔ̀ɖáyé ní tse irɔ̃-ìrɔ́-bɛ́ɛ̀ si néwo fúu, tsí kó bo éwo si fúu#ɛ́. 16 Bí ɔ̀nyà-kã̀ wà wo kó dzìnyà ti nára-afɔ̀ yèé bɛ́#ɛ́, àwa, àa kà tse iŋɛ́-òmírɛ̃̀ náànyì-nyɛ̀ŋɛ̀. Tsí ɛgbɛ́-Ɔ̀ɖáyé ŋa gbo kpó#ɛ́, àŋa gbo, à kà tse iŋɛ́-òmírɛ̃̀.

Ɛgbɛ́-Kírísítò ńKòríntì kò wà dzɛ dzídzɛ-Ɔlá-wa kíbí ó wà ní kó dzɛɛ́ gbà#á

17 Afɔ̀ yèé ǹ bòkó fɔ̀ fú ŋɛ́ báàyí#ɛ́, ǹ kò bòkó nyɛ̀ ŋɛ́. Òŋu ní wà dzɛ́ ní kíbí è náa wà kpérí#ɛ́, ìkpérí-ŋɛ́ ŋa#á, kà kàa kó wà tse ire fú ŋɛ́#ɛ́, ó wà bàdzɛ́ iŋɛ́ nára-ŋɛ́. 18 Náàtsɛ̃̀tsɛ̃̀#ɛ́, ǹ gbɔ́ ní bí è kpérí, tsí bòkó sɛ̃ Ɔ̀ɖáyé#ɛ́, è náa kpɛ̃́ ɛgbɛ́#ɛ́. Tsí ǹ karalé ní iŋɛ́ yèé ǹ gbɔ́ kpó#ɛ́, akpálà-kã̀ dzɛ́ òtítɔ́. 19 Tsí ó sì wà gbo ní ɛgbɛ́#ɛ́ kó kpɛ̃́, àtsùgbée ká nyáa ɖá ɛnɛ yèé ŋa wà tɛ̀ náànyì-Ɔlá-wa gìɖì gìɖì#ɛ́ mà. 20 Ńbɛ̀ɛ́, ńǹwèrè yèé è náa káà kpérí si bɛ́ɛ̀#ɛ́, kò tsi dzídzɛ-Ɔlá-wa ní è náa dzɛ#ɛ́. 21 Iŋɛ́ yèé tse#ɛ́, kṹnukṹ náa kɛ́ dzídzɛ tòŋu ká‐ɛ̀ gé, tsí kpée dzídzɛ nɔ́wɔ́ yíyá. Tsí ebi náa wà kpa ɔ̀nyà kã̀ŋa. Tsí olòmírɛ̃̀ ŋa òŋu náa sì wà mɔtí títí náa wà ŋɔ́ ŋa. 22 Kṹnukṹ nɛ́ kpáfɛ si, tsí kó nyáa dzɛ, tsí mɔ bɛ̀ nɔ̀. Nàmí ɛgbɛ́-Ɔ̀ɖáyé ní è wà wo e ń kpe kí ŋa ńnɛ̀ɛ́#ɛ́ɛ̀? Tsí ɛnɛ yèé iŋɛ́-kã̀ kò sí nɔ́wɔ́ tiŋa gbo#ɛ́ fe, è wà ɖánɔ́ mú àŋa gbo ńnɛ̀ɛ́ nɔ̀. Bí è wò ní n wíìnyɛ̀ fú ŋɛ́ fáà? Ǹ wà nyɛ̀ ŋɛ́ɛ̀? Láyé! Ǹ kàkó nyɛ̀ ŋɛ́ fú afɔ̀ yèé òŋu.

23 Ó ɖi, ɛ̀kɔ́-kã̀ wà, tsí Ɔlá-wa tse fú mi, tsí èmi gbo ǹ tseé fú ŋɛ́. Òŋu ní wà dzɛ́ ní nóoru-ɔdzɔ́ yèé à ta Yèésù Kírísítò Ɔlá-wa#á, ó kɛ́ kpɔ̃́nɔ́ banɛ́, 24 tsí ɖɔ́kpɛ́ fú Ɔ̀ɖáyé, tsí ó tsɛ́ɛ, tsí wà fɔ̀ fú ŋa ní: Ara-òŋu ni. Òŋu bàkó kɛ́ɛ, tsí ń sã́ã̀bi si nárũ-ŋa.^* Ó ɖi, ká gba dzɛ, tsí ká wà tseé bɛ́ɛ̀, tsí wà ń tédzú-òŋu. 25 Kíbí à dzɛŋɛ́ tã́#á, ó kɛ́ ɔtí gbo ńkɔ̃́ŋúkɔ̃́ŋú bɛ́ɛ̀ ké ró, tsí ń fú ŋa, tsí wà wí fú ŋa ní: Ɔtí yèé bɛ́ fee, ìmɔ̀lɛ̀ titɔ̃ yèé Ɔ̀ɖáyé wà tse bá ŋa#á ńnɛ̀ɛ́. Àmbara-òŋu ni, àmbara-ìmɔ̀lɛ̀#ɛ́ ni. Ká gbà mɔ, tsí àrìkã̀kã̀ yèé à nákó wà tseé bɛ́ɛ̀, tsí wà mɔɔ́ gé#ɛ́, ká wà ń tédzú-òŋu. 26 Iŋɛ́ yèé tse#ɛ́, àrìkã̀kã̀ yèé à nákó wà dzɛ kpɔ̃́nɔ́#ɛ́ bɛ́ɛ̀, tsí wà mɔtí#ɛ́ gbo bɛ́ɛ̀#ɛ́, à wà dzíkɔ̀-ikú-Ɔlá-wa títí káà fú nɔ́dzɔ́ yèé nákó wá#á ńnɛ̀ɛ́.^*

27 Ńbɛ̀ɛ́, bí ɔ̀nyà-kã̀ dzɛ kpɔ̃́nɔ́ nàmí ó mɔtí-Ɔlá-wa#á nɔ́ɔ̀nà kòdzɔkòdzɔ-kã̀, ɛnɛ nyɛ̀ŋɛ̀ dzàbi-ara òŋu àmbara-Ɔlá-wa ni. 28 Ó ɖi, kṹnukṹ kó kpa inɔ́-ara‐ɛ̀ wò nára-kíbí ó wà gbé gbà#á. Bí ó kpa inɔ́-ara‐ɛ̀ wò bɛ́ɛ̀ tã́ ná, kó dzɛ kpɔ̃́nɔ́#ɛ́, tsí mɔtí#ɛ́ gbo. 29 Iŋɛ́ yèé tse#ɛ́, bí ɔ̀nyà-kã̀ dzɛɛ́, tsí mɔɔ́ náàrì bu ìɖì si fú ara-Ɔlá-wa#á, ɛnɛ nyɛ̀ŋɛ̀ wà dzɛɛ́, tsí wà mɔɔ́ si nɔ́ɔ̀nà yèé Ɔ̀ɖáyé nákó kpɛdzɔ́ múu, tsí ɖáàbi fúu#ɛ́ ni. 30 Náàtsùgbée bɛ́ɛ̀ ní ɔ̀nyà kpíkpɔ̀ náàŋírĩ-ŋɛ́ ɖi àkɔ̃̀rɔ̃̀ si, tsí ara kò le ŋá si ró#ɛ́. Náàtsùgbée bɛ́ɛ̀ ké ní ɔ̀nyà kã̀ŋa gbo kú#ɛ́. 31 Àa má wà kpa inɔ́-ara-wa wò nára-kíbí àa wà gbé gbà#á, Ɔlá-wa kàá kpɛdzɔ́ mú wa. 32 Ó ɖi, Ɔlá-wa òŋu náa fɛtí fú wa, tsí tsɔ̀ wá ńkòtsã́, àtsùgbée kó máa kpɛdzɔ́ mú wa, tsí ɖáàbi fú wa má ɔ̀nyà-ayé yèé ŋa ni.

33 Ìnàbí-mi ŋa, kíbí ó dzɛ́ bɛ́ɛ̀#ɛ́, bí è kpérí, tsí è wà wo e dzɛ dzídzɛ-Ɔlá-wa#á, è náa ɖóro ɖe ara-ŋɛ́ ŋa. 34 Bí ebi wà kpa ɔ̀nyà-kã̀, ɛnɛ nyɛ̀ŋɛ̀ kó dzɛŋɛ́ ńlé. Ńbɛ̀ɛ́, è kàkó kpérí, tsí Ɔ̀ɖáyé kó kpɛdzɔ́ mú ŋɛ́ ró. Ó ɖi, ti nára-afɔ̀ yèélèé ŋa#á òŋu, bí ǹ wá, àa nákó fɔ̀ ŋá.