Ochoq'ae meeqlaellye za biq maoq mael
5
Yaeqmoqhael'ae haeq gulzhee biq, yoqhhaeq'ae haelmeeqlye gee biq mael aeqdae vae haelmeeqlye gee biq laoqmyel ngeel maoqhhae. Yaqyoyaeqhael'ae laoq algo aeqnil'ae laoqmyel za biq maoqhhae, 2 Cholhoq li e cholhae aeqmae vae laoq aeqmae'ae laoqmyel za biq maoqhhae. Nol cholhoq maeq heeq e cholhae aeqmaehael'ae qin'qin beqbeq myel aelbae aeqnil'ae laoqmyel za biq maoqhhae. 3 Qiqgael'ae fuzaeq yil hhael maqza e miqchiqhael'ae zunjinl biq kaol baelzongl biq maoqhhae. 4 Miqchiq'ae yaeqmiq, yaqyo, paelsilmyel yuqpaeq yuqnyul zhol kaollaoq, yaeqmiq yaqyo kaol yuqpaeq yuqnyulhael'ae aeqyoyoq toq vae lye cholhae'ae xiaolshunl biq mael bi xoqxiq, kaol cholhae'ae cu heeq hhei laeq yae lye bi meeqhoq kiq maoqhhae, Momil laoq xilnye zongl e cholyaeq'ae hhaol biq kaol'ae. 5 Qiq hhaeq lye zhol e qiqgael'ae fuzaeq yil hhael maqza e aeqdilmyel e miqchiq laoq, Momil'ae maoqlaol maeq chifuzaeq'ae, mqkiq mqnao myel maqqyemyel geezaeq kaol heeldoq gee hhae. 6 Ngeelfeiq, zaeq dol nyelhhae mael'ae hhaol biq e miqchiq laoq, dyeqdeel feiq sil e laoqmyel ngeelvae. 7 Xihael nol yoqhhaeteel'ae moqheilheil biq maoqhhae, kaol yoqhhaeteel'ae qiqgiq geehhael maqza myel bi ngeel. 8 Aeqsul laoq paeqyaeq'ae maeq zhaofu biq, aeqyoyoq toq e cholyaeqhael'ae dyel'eiq maeq zhaofu bi kaollaoq, xinlyangq mael beiqgae wae, kaol maeq xiangxinl e cholyaeqhael vae eiq maeq mil'ae. 9 Dengjil da maoq e miqchiqhael laoq, cholhoq mael koqqyel hoq ongqjyeq ngeel maoqhhae, haqyo qiq hhaeq maoq maeq zhol gol, 10 Kaol meeq e zongl hhae lye miqyil yol za, meeq e zongl hhae lye hael laoq xihael laoqmyel hael ngeelvae: Yaeqguq cu, nilpu cholyaeq'ae sheeqcaq biq, senltuqhael'ae aeqkeel ciq biq, saeqlael puqli biq e cholyaeq'ae mulyo mael heil biq, kaol maeq qiqsheel e meeq e silqinq mael, hael zonglkeel ongl myel zongl e cholyaeqhael ngeelvae. 11 Cholhoq nil siq e miqchiq laoq, nol haeq dengjil da biq, yoqhhaeteel saqdol lal aeqmyel tyulmael mulgoq biq laol, Jidu ae'lye deelsae hhei fu, mulzaeq goq biq wae siq, 12 Yoqhhaeteel laefuq xuqyuanlkei gol mael beiqgae vae, kaol golsiq za'ae lye hhae bi gee wae. 13 Zail laoq, yoqhhaeteel qiqgiq maeq mulzaeqnaol mael yol xoqdozaq hhei, duqlye qiq haoq'ae qiq haoq'ae lye hhaqbilzuq; qiqgiq maeq mulzaeqnaol dyul maeqcil, yulnye xilnye lye gee, yoqhhaeq'ae maeq guanqyo mael guanq, kaol maeq gee hhaeq e saeziq eiq gee hhae. 14 Tyulkaol, ngael laoq cholhoq nil siq e miqchiq laoq mulzaeq hhaeq'ae siq, yaeqguq cu, laoqhaol haolmoq guanqliq, kaol diqrenq lye bi vuq e laqtaq haeq bi za lye xiwangl lil, 15 Qiq miq laoq polyil kaol Saqdanl'ae cho'lyeq yil vae kaol'ae. 16 Hhaoqsongl'ae xiangxinl e cholhae aeqmae e paeqyaeq onglci'ae miqchiq zhol kaollaoq, yoqhhaeteel'ae mulyo mael heil biq maoqhhae, aeq'yel mael jiaolhuil vae haeq bi baq, xilnye laol, jiaolhuil laoq aeqdilmyel qiqgael'ae fuzaeq yil hhael maqza e miqchiq'ae hhae baelzongl biq wae. 17 Jiaolhuil'ae sheeqmyeq kiq e zhangqlaoqhael onglci'ae duqhee'lye Momil e saeziq geegaeq, kaol cholyaeqhael'ae geemyeq biq e tyuhael'ae ongljyeq hhael heil biq maoqhhae. 18 Momil e Suqhhaq taq'ae xilnye gee kaol'ae: "Aeqnuq mael'ae zaelsiq bi nuqhael gae fu, yoqhhaeq e myeqbongq mael haeq deiqchiq biq"; Yol gee: "Aeqhael mulyaeq mulhhael hhaeqpyuq mul mael laoq hoq'ae." 19 Zhangqlaoq'ae konglgaol gil biq e silqinq za laol, zoqzenl cholyaeq niq suq nulhhaeq maeq zhol kaollaoq haeq guanq. 20 Golsiq zail zonglpizaeq e cholyaeqhael laoq, cholyaeqhael e yiqsi ae'lye yoqhhaeq'ae gaezaeq biq, kaol baeqjyelboq e cholyaeq vae eiq bi gu li. 21 Ngael Momil, Jidu Yesu kaol saelpodu hhei e mqmae yosongl e yiqsi ae'lye, noq'ae saeziq xihael zongl gaeyil maoqhhae lye moqheilheil lil, aeqyoyoq nyuq laoqmyel ochoq'ae maeqmeeq'ae lye haeq gee, aeqchee zongl feiq, qiqboq'ae maoq maeq pol myel maeq zongl hhaeq'ae. 22 Cholyaeq'ae aqlaq baqcheeq e gui'liq zongl mael, nae'naemyel haeq zongl; ochoq e golsiq onglci'ae noq e vuqtu haeq bi bal zoq, aeqyoyoq laoq qin'qin beqbeq myel ngeel maoqhhae. 23 Noq e byelmae maeqmeeq, kaol nael eiq duqlye nael gae'lye, nol eelcuq maoq maeq dol myel haeq zongl, zilbaeq meelzillye teel dol maoqhhae. 24 Qiq miq lael miq e golsiq mael laoq fudu ongl'ae, kaol laefuqmyel hhae bi shenqpanl hhae; qiqmiq laelmiq e golsiq mael laoq aeqnaol caiq fudu ongl hhae. 25 Qiqsheel ngeelvae, meeq e zongl mael eiq fudu ongl'ae, maeq fudu ongl myel mael eiq maeq zonglhhaq ongl'ae.