Aeqgael cholyaeq qiq miq laoq xinlyangq mael beiqgae maoqlye hhae
4
Senllinq loqdaeqlye gee, aeqnaol e naohaeq'ae, cholyaeq qiq miq laoq xinlyangq ae'lye deelsae hhei, kaol cholyaeq'ae cheeqmu e yohael, kaol niqhaeq haeqmae e geemyeq mael'ae naelhaeq yil hhei. 2 Geemyeq e xihael laoq gee kaol zongl mael maeq qiqsheel e zaqgiqgiq e tyutaeq ae'lye lael hhae; cholyaeq xihael e liangqxin mael honglqye'lye sulmba maellye baq pe biq laoqmyel hhae. 3 Yoqhhaeteel laoq ochoq'ae haeqmiq maeq bi sheeq, mul eiq maeq bi mulzaeq, kaol aeqchee zaeqzael myel maeq bi zaeq, ngeelfeiq, maeq bi zaeq e zaeqzael tyuhael eiq Momil lye zongldu hhei hhae, Hhaoqsongl'ae xiangxinl hael kaol zhen'liq loq e cholyaeqhael meeqyaevae lye gee hhei'laol zaeq hhaeq'ae. 4 Momil lye hael zongldu hhei e mael laoq aeqchee mael eiq meeq hhae, meeqyaevae lye za kiq e neemae maellye zaeq kaollaoq, maeq zaeq hhaeq e qiqgiq maqza'ae, 5 Momil e saeziq kaol cholyaeq e heeldoq maellye, zaeqzaelhael gilzuqmyel shol hhae lye zonglqyel du hhei vae kaol'ae.Jidu Yesu e meeq e zhiqsil
6 Nol xihael aqsseq aeqnilhael'ae geetae biq laol, Jidu Yesu e meeq e zhiqsil ngeelvae, kaol xinlyangq e saeziq kaol nol haeqfu eiq fuqcongq e hoq e geemyeq taq ae'lye xoqdozaq hhei. 7 Kaol milcaeq taq ae'lye lael e saeziq kaol cholhoq heeq e cholhae aeqmae gee e maeq zenlminq du ongl e saeziq mael haeq naelhaeq. Xinlyangq meeq mael taq'ae duanllianl maoqhhae: 8 Aeqhhaol duanllianl mael laoq aelheel maoq maeq meeqyo'lael kiq'ae; ngeelfeiq, xinlyangq meeq mael laoq aeqchee mael taq vae eiq meeqyo'lael dyul maeqcilmyel xi qiqyil kaol aeqgael qiqyil e biq laqngeel lye gee mael za hhae. 9 Saeziq xilmael laoq xiangxinl hhaeq kael'ae, gilzuqmyel jyeqshel hhaeq'ae. 10 Aedeeteel duqhee'lye mulzaq, kaol hael zonglkeel ongl myel zongl mael laoq xilmael gae'lye ngeelvae, aedeeteel e chifu deelzaeq hhei mael laoq haeqfu eiq dyeqdeel e Momil'ae. Yoqhhaeq laoq haelzhol cholyaeq e jiulzuq'ae, Yesu'ae xinlzaeq e cholyaeqhael e jiulzuq hhael ngeel hhae. 11 Nol xihael haelmeeqlye moqheilheil biq kaol geemyeq gil biq maoqhhae. 12 Ochoq lye nol laoq cholhoq nil wae siq, kaol noq'ae maeq fu'qiq'ongl yae lye haeq bi zongl, duqlye gee mael, zongl mael, neegaeqgaeq, xinlxin kaol qin'qin beqbeq myel mael taq'ae, Yesu'ae xinlzaeq e cholyaeqhael'ae zonglmyeq du hhei biq maoqhhae. 13 Ngael lael fu keellye, nol Momil e Suqhhaq mael duq, kaol cholyaeqhael'ae haelmeeqlye gee gil biq, kaol geemyeq gil biq. 14 Noq'ae hhamul hhei biq e encil mael'ae maeq nyuqtongq myel haeq zongl, encil xilmael laoq, yilkaefu peqlal maoqlye mael geedu hhei ae'lye, zhangqlaoqhael noq'ae aqlaq baqcheeq da hhei biq fu, noq'ae biq hhei biq mael ngeelvae. 15 Silqinq xihael nol laqheiqqyel lye zongl yil maoqhhae, kaol xihael taq'ae neemae qiqsiqmyel zongl, kaol cholyaeqhael'ae nol hhal kiq lal shevae lye bi fudu hhei. 16 Nol aeqyoyoq'ae kaol aeqyoyoq e geemyeq mael'ae aeqyae'lye kei maoqhhae, kaol xihael taq'ae zongl gaeyil maoqhhae, xilnye zongl laol, aeqyoyoq yaol jiul ongl, noq e saeziq mael naelhaeq hael yaol eiq jiul ongl kaol'ae.