Fu'qyezaq e cholyaeq
3
"Aeqsul fu'qyezaq e cholyaeq geiq goq kaollaoq, yoqhhaeq laoq meeq e mulhhael mael'ae hhaol biq hhae", saeziq xilmael laoq xiangxinl hhaeq'ae. 2 Fu'qyezaq e cholyaeq laoq xilnye ngeel maoqhhae: Yoqhhaeq laoq qiqgiq geehhael maqza, haeqmiq qiq hhaeq e haqyo maoq maq geiq, zongltyeqzaeq hoq ongl, aeqyoyoq'ae songlqyezaq ongl, yiqzenlmyel maeq zongl, nilpu cholyaeq'ae sheeqcaq nae, zhee geemyeq kiq, 3 Zilbaeq maeq dolbu, cholyaeq'ae maeq tyel, naoqyae'lye hhae, deiq'oq maeq sael, dyuqbaq mael'ae neemae maeq cuqm, 4 Aeqyoyoq toq'ae haelmeeqlye sheeqmyeq kiq, kaol yaeqmiq yaqyohael'ae aeqchee mael taq vae eiq saeziq bi naelhaeq, kaol yiqzenlmyel maeq bi zongl. 5 Cholyaeq aeqyoyoq toq'ae haelmillye sheeqmyeq maoqlye maeq loq kaollaoq, haelmillyekaol Momil e jiaolhuil'ae sheeqmyeq kiq laeq? 6 Hhaoqsongl'ae zhoq xiangxinl lael hael, fu'qyezaq e cholyaeq maq hha geiq'ae, aeqgael yoqhhaeq dilqeizaeq laol, niqhaeq haeqmae shel e chenqfaq onglci vae leeqdo hhei maeqhe. 7 Fu'qyezaq e cholyaeq laoq jiaolhuil nildu vae miqyil meeq maoqhhae, aeqgael ochoq lye bi geekyuq hhei, kaol niqhaeq haeqmae e hhaezongl vae leeqdo hhei maeqhe.Zhiqsil geiq e cholyaeq
8 Qiqsheel ngeelvae, zhiqsil eiq yiqzenlmyel maeq zongl hhaeq'ae, zaqgiq maqgiq, zilbaeq maq zu, maeqmeeqmyel zonglzaeq laeq e dyuqbaq mael'ae neemae maeq cuqm; 9 Eelcuq laoqmyel geelxu'lye e liangqxin maellye xinlyangq e aolmiq mael'ae xiangxinl gaeyil maoqhhae. 10 Cholyaeq xihael'ae laefuqmyel kaoq fufu gol biq maoqhhae, qiqgiq geehhael maqza myel kaollaoq, yoqhhaeteel'ae zhiqsil bi geiq hhaeq vae. 11 Qiqsheel ngeelvae, haeqmiyaeq zhiqsil eiq yiqzenlmyel maeq zongl hhaeq'ae, doqca haq ca, zongltyeqzaeq hoq ongl, aeqchee mael taq vae eiq neemae xyelpu maqpu. 12 Zhiqsil laoq haeqmiq qiq hhaeq e haqyo maoq maq geiq, yaeqguqhael kaol aeqyoyoq toq'ae haelmeeqlye guanq meeq hhei maoqhhae. 13 Zhiqsil haelmeeqlye geiq hael laoq, aeqyoyoq eiq meeq e zholhhael hhamul, kaol qiqgiq maqguzaq myel Jidu Yesu onglci e xinlyangq mael'ae xiangxinl gaeyil kaol'ae.
xinlyangq meeq e aolmiq
14 Ngael nae'naemyel noq tyuqvae yil maoqlye xiwangl lil, tyulkaol, noq'ae laefuqmyel xihael cu biq; 15 Ngael dan'goq hhei kaollaoq, nol Momil e laoqhaol vae haelmillye zongl maoqhhae lye loq'ae. Laoqhaol xilmael laoq haeqfu eiq dyeqdeel e Momil e jiaolhuil, zhen'liq e haqlo sseeldongq kaol congqciq paeqhhael ngeelvae. 16 Aeqsul eiq xinlyangq meeq e aolmiq mael laoq weiqdal'ae lye gee gil hhae:
Momil cholyaeq peqlal kaol mol du'lal vae.
Yoqhhaeq yaol senllinq lye gongyil e cholyaeq'ae lye bi gul,
yoqhhaeq yaol mqmae yosongl lye bi molzaeq vae,
yoqhhaeq yaol baeqjyelboq minqcuq vae bi geegaeq duyil,
yoqhhaeq yaol milcaeq taq e cholyaeqhael lye bi xiangxinl,
yoqhhaeq yaol rongqyaol onglci vae bi sheeqcaq do'li.