Haelzhol cholyaeqhael'ae heeldoq bael gee biq maoqhhae
2
Tyulkaol, ngael noq'ae haelmeeqlye gee laeqngeel, laefuq fuqli zongl maoq mael laoq, haelzhol cholyaeqhael gae'lye Momil'ae geezaeq biq, heeldoq bael gee biq, bael geezaeq biq kaol meeqyaevae lye gee biq; 2 Kaol nol zongmaehael'ae, hhael gao myel vae zhol da'li e hael vae eiq, xilnye bael geezaeq biq maoqhhae, xilnye laol, aedeeteel Momil'ae haelmeeqlye xinlzaeq, yiqzenlmyel maeq zongl, saelza'lye neesaelhhae'lye hhae zonglzhol wae. 3 Xilmael laoq meeq hhae, aedeeteel e jiulzuq Momil laoq aedeeteel xilnye zongl mael hhaol biq hhae. 4 Yoqhhaeq laoq haelzhol cholyaeqhael hha deqjiul biq, kaol zhen'liq mael hhae siqcongl biq lye nyuq biq hhae.
5 Momil laoq qiq hhaeq wae,
Momil kaol cholyaeq onglci vae danbaoq e cholyaeq qiq hhaeq maoq maeq zhol'ae,
yoqhhaeq laoq cholyaeq peqlal e Yesu Jidu ngeelvae.
6 Yoqhhaeq aeqyoyoq yaol heelda hhei,
kaol haelzhol cholyaeqhael yaol suq duhoq e hhaeqpyuq geiq;
kaol zae'li kiq e naohaeq'ae xilmael zenlminq du hhei vae kaol'ae.
7 Kaol ngael xilmael gae'lye fuqyin geegaeq e cholyaeq geiq, shiqtuq geiq, xinlyangq taq'ae kaol zhen'liq taq'ae baeqjyelboq minqcuq e laoqsi geiq. Ngael gee e saeziq mael laoq aeqdilmyel hhae, zaqgiqgiq maeqngeel yil. 8 Ngael laoq haqyoyaeqhael senljyeq e aqlaq baqqei hheikaol haeqvae eiq heeldoq gee, faqhoq maeq kei, maeq geegae myel ngeel biq lye xiwangl lil. 9 Ngael laoq haeqmiyaeqhael eiq xilnye ngeel biq lye xiwangl yae: Yiqzenlmyel maeq zongl, aeqyoyoq'ae zongltyeqzaeq hoq ongl, kaol saeqzil maeq leeqdu myel e fulchiq aelhongq maellye aeqyoyoq yaol zonglzhizaeq, ngeelfeiq, culmpyeq haq pyeq, pulsheel, zhenzhu kaol zhee pyuq e aelhongq maellye haeq zonglzhizaeq. 10 Meeq e zongl mael za maoqhhae, xilnye laol, aeqyoyoq laoq Momil'ae zun eiq zunjinl gu eiq gu e haeqmiyaeq lil lye gee zaeq mael'ae caiq zae'li ongl hhae. 11 Haeqmiyaeqhael yotyel maqdumyel xoqxiq, kaol aeqchee mael taq vae eiq saeziq naelhaeq maoqhhae. 12 Ngael haeqmiyaeqhael laoq maeq hhae geemyeq, kaol yoqhhaeq haqyoyaeq'ae maeq hhae guanq'ae lye gee lil, yotyel maqdumyel zhol laol hhaeq vae. 13 Laefuq zongldu hhei e qiq hhaeq laoq Yaldang'ae, aeqnaol laoq Xalwaq kaol'ae; 14 Yaldang'ae zaqgiq bi giq e maeqngeel'ae, haeqmiyaeq'ae zaqgiq bi giq hhae, kaol golsiq onglci vae leeqdo biq hhae. 15 Ngeelfeiq, haeqmiyaeqhael xinlxin za, neegaeqgaeq, senljyeq, kaol aeqyoyoq'ae zongltyeqzaeq hoq ongl, xihael duqlye zongl gaeyil kaollaoq, yaeqguq bo e silqinq taq ae'lye hha deqjiul'ae.