6
Nuqkeeq pi hhei laoqmyel hhaeq'ongq ongqzaeq e cholyaeq laoq, aeqyoyoq e hhaoqsongl laoq aeqchee mael taq vae eiq zunjinl biq mael zae'ae lye kei maoqhhae, aeqgael cholyaeq lye Momil e cholmil kaol geemyeq mael'ae xyelduq hhei maeqhe. 2 Hhaeq'ongq ongqzaeq e cholyaeqhael e hhaoqsonglhael laoq Yesu'ae xinlzaeq kaollaoq, yoqhhaeteel aqsseq aeqnil'ae lye kaol yoqhhaeteel'ae maeq fu'qiq'ongl yae lye maeq zongl biq hhaeq'ae, yoqhhaeteel'ae nyeq'ei hhael fuqsil biq maoqhhae, fuqsil e meeqyo'lael mael hhamul e cholyaeqhael laoq, Yesu'ae xinlzaeq e cholyaeq, kaol gaeq mael hhamul hhei biq e cholyaeqhael ngeelvae.Jaq e geemyeq mael kaol aeqdilmyel e zacongl mael
Nol silqinq xihael ochoq'ae geemyeq biq, kaol haelmeeqlye gee biq maoqhhae. 3 Aeqsul baeqjyelboq e geemyeq mael geegaeq mael laoq, aedeeteel e Hhaoqsongl Yesu Jidu e qiqgiq maeq gee keq yo e saeziq, kaol xinlyangq meeq e geemyeq mael laoqmyel maeq qiqsheel kaollaoq, 4 Yoqhhaeq laoq dilqeizaeq, qiqgiq maeq loq, geegae mael hhaol, geegae mael zhee onglzaeq, tyulkaol, xilnye gae'lye heiqcilnael, geegae, geekyuq, kaol maeqmeeq e neemae ae'lye huaiqyiq mael du'lal, 5 Kaol neemae ba hael, zhen'liq mael beiqgae e cholyaeq nyegael duqlye deiqgae, kaol xinlyangq meeq maellye dyuqbaq zonglzaeq e loqho geiqzaq. 6 Qiqshiq laoq, xinlyangq meeq mael kaol lo yaevae lye loq e za laol hhael meeqyo'lael kiq'ae.
7 Aedeeteel milcaeq taq'ae qiqgiq maeq heil laeq'ae,
tyulkaol, qiqgiq eiq maeq heilzaeq yil ongl'ae;
8 Fulchiq aelhongq za, zaeqzael eiq za laol,
aedeeteel laoq lo yaevae lye loq maoqhhae.
9 Ngeelfeiq, dyuqbaq zhee bi za lal goq e cholyaeq tyuhael laoq, cheeqmu, hhaezongl kaol haelnaeqmyel qiqgiq maeq loq e hail yo'lael kiq e zhee mulgoq onglci vae leeqdo hhei, kaol cholyaeq yaol bi ba yil, kaol myeyil e onglci'ae leeqdo hhei. 10 Dyuqbaq zhee mulgoq mael laoq gilzuqmyel maeqmeeqmyel zongl hael e aelcil'ae. Qiq miq laoq dyuqbaq zhee mulgoq gae'lye xiangxinl myel ae'lye deelsae hhei, kaol haelnaeqmyel nyuqsaeq maellye aeqyoyoq yaol co'nu zaq hhei.
Meeq e daqzhangldiq
11 Ngeelfeiq, nol Momil ae'lye lael e cholyaeq o, silqinq xihael'ae kihhaq zaq maoqhhae; ngeelfeiq, gongyil, xinlyangq meeq, xinlxin, neegaeqgaeq, renqnail kaol naoqyae'lye mael'ae zui'qiuq maoqhhae. 12 Nol xinlyangq gae'lye meeq e daqzhangldiq maoqhhae; kaol haeqfu eiq zadeel e aeqyil mael dyeong'lye eetyeq deelhhei maoqhhae, noq yaol saelpodu hhei laq mael laoq xilmael gae'lye hhae, kaol bael mol e haelnaeqmyel cholyaeq yiqsi ae'lye meeq e zoqzenl tyulmael zongl vae. 13 Ngael halza haelzholhael'ae aeqyil biq biq e Momil tyutaeq e yiqsi'ae, kaol Benqdiu Biqlado'ae meeq e zoqzenlkei gol biq e Jidu Yesu yiqsi ae'lye noq'ae moqheilheil laeqngeel: 14 Aedeeteel e Hhaoqsongl Yesu Jidu mol du'lal fu keellye, teel eiq maeq zongl su kaol qiqgiq geehhael maqza myel minllinl e xilmael zongl gaeyil maoqhhae. 15 Zae'li kiq e naohaeq keellael laol yoqhhaeq mol du'lal maoqlye hhae:
Yoqhhaeq laoq maeqdaeqhhaeq,
qiqhhaeq hhaeqli kaol laqtaq za e qiqhhaeq'ae,
yoqhhaeq laoq zongmaehael e Zongmae,
kaol hhaoqsonglhael e Hhaoqsongl'ae,
16 Maeq sil yilkiq mael laoq yoqhhaeq qiq hhaeq wae,
yoqhhaeq laoq cholyaeq maeq niqli ongl e aeqcael onglci vae zhol,
cholyaeq qiq hhaeq eiq yoqhhaeq'ae maeq mol gol,
kaol maeq hhae mol congl'ae.
Maduq zhee za mael kaol haeqfu eiq zadeel e laqtaq mael,
yoqhhaeq'ae biq biq lye nyuqlil. Amen!
17 Xi qiqyil'ae zacongl e cholyaeq tyuhael laoq, nol yoqhhaeteel'ae haeq dilqeizaeq, kaol maeq fuzaeq lael e dyuqbaq mael'ae haeq chifuzaeq, aedeeteel'ae halza haelzhol mael biq hhei laq kaol bi mul laq e Momil'ae chifuzaeq maoqhhae lye moqheilheil biq. 18 Kaol yoqhhaeteel'ae meeq mael zongl, meeq e silqinq mael taq'ae zacongl lael, heildu sheqhhaq, byel sheqhhaq maoqhhae lye moqheilheil biq, 19 Xilnye laol, aeqyoyoq'ae dyuqbaq taeqdeelzaeq hhei mael laoq, aeqgael meeq e zongl mael'ae paeqgaelsael meeq deelhhei, kaol yoqhhaeteel'ae aeqdilmyel e aeqyil tyulmael'ae dong'lye bi eetyeq ongl. 20 Tiqmoqtail o, noq'ae toqshiq hhei biq mael zongl gaeyil maoqhhae. Milcaeq taq e yilsi maqza myel gee mael, jaq e yo'liq mael kaol maq hoqga'li kiq e gee mael'ae hoqhhaq maoqhhae. 21 Qiq miq laoq aeqyoyoq yo'liq xilmael loq lil lye gee zaeq feiq xinlyangq taq ae'lye deelsae hhei vae. Enhuil mael noteel nyegael baelzhol biq lye nyuqlil!