Cholyaeq lye zongldu hhei e momilhael'ae maeq hhae heel'ae lye diqqye biq mael
10
Aqsseq aeqnilhael, ngael noteel'ae bi loq goq yae, aedeeteel e aeqpyuq aeqdaehael laefuq gilzuqmyel mqdul holhhaq vae zhol, kaol gilzuqmyel Hongqhaiq onglci ae'lye deelpol duyil, 2 Gilzuqmyel mqdul onglci'ae, kaol eeldeel deelmae onglci'ae lye shelxiq hheikaol Moxi'ae cho'lyeq li vae, 3 Kaol gilzuqmyel qiqsheel e yohael e zaeqzael mael zaeq vae, 4 Kaol qiqsheel e yohael e eelcuq mael dol vae, hael dol e eelcuq mael laoq yoqhhaeteel nyegael baelzhol e yohael e haqlo loongl ae'lye yul duyi hhae; haqlo loongl tyulmael laoq Jidu ngeelvae. 5 Ngeelfeiq, yoqhhaeteel onglci'ae Momil maeq hhaol biq e cholyaeq zhee naeq'ae, tyulkaol, diqsheelleeldye vae lye sil vae. 6 Peqlal e silqinq xihael laoq, aedeeteel'ae jinqgaol laeq hhae, aedeeteel'ae yoqhhaeteel duqlaq e silqinq mael'ae zhee hhaol biq laoqmyel, silqinq xilmael'ae haeq hhaol gil lye hhae. 7 Noteel eiq yoqhhaeteel onglci e qiq miq'ae, cholyaeq lye zongldu hhei e momilhael'ae heel gol laoqmyel tyulnye haeq heel gil. Momil e Suqhhaq taq'ae cu deelhhei laoqmyel: "Cholyaeqhael zholgae hheikaol zaeq dol gil, tullael kaol nyelhhae gil." 8 Yoqhhaeteel onglci e qiq miq ochoq nyegael neemaeba gae'lye qiq nao ae'lye niqtongl suqca (23000) hhaeq sil vae, tyulkaol, aedeeteel laoq yoqhhaeteel ochoq nyegael neemaeba laoqmyel maeq bael zongl hhaeq'ae. 9 Yoqhhaeteel onglci e qiq miq Hhaoqsongl'ae shilfu gae'lye oqhol lye tu sil biq, tyulkaol, aedeeteel yoqhhaeteel laoqmyel maeq zongl hhaeq'ae. 10 Yoqhhaeteel onglci e qiq miq buqzaq gae'lye zonglmye qiq hhaeq lye zonglmye biq vae, tyulkaol, noteel yoqhhaeteel laoqmyel maeq zongl hhaeq'ae. 11 Yoqhhaeteel e aeqhhaol taq'ae peqlal e xihael laoq jinqgaol hhae, cuga deelhhei kaol aedeeteel aeqnaol naolli naohaeq e cholyaeqhael'ae jinqgaol laeq hhae. 12 Tyulkaol, aeqyoyoq haoqtul deel ongl lil lye cholyaeq laoq aeqdilmyel aeqyae'lye kei maoqhhae, aeqgael jye'leeq hhei maeqhe. 13 Noteel'ae hael shilfu mael laoq cholyaeq pityeq ongl aeqmyel hhae. Momil'ae laoq xiangxinl hhaeq kael'ae, kaol yoqhhaeq noteel'ae maeq pityeq ongl myel maeq shilfu laeq'ae, noteel'ae shilfu laeq fu, noteel'ae haelmillyekaol eiq gaelmae qiq keel bi dongl laeq'ae, kaol noteel'ae bi renq ongl laeq'ae.14 Tyulkaol, ngael gaeq hael o, noteel cholyaeq lye zongldu hhei e momilhael'ae heel biq mael'ae hoqhhaq maoqhhae. 15 Ngael laoq kyul e cholyaeq'ae gee biq lil, noteel ngaeq e saeziq mael panlduanl maoqhhae. 16 Aedeeteel meeqyaevae lye gee e beiziq onglci'ae deeq mael laoq Jidu e siq mael'ae dailbiaoq hhae, kaol aedeeteel hhaellaelmyel dol vae maeqngeel maeq? Aedeeteel lye heiqpa hhei e aqba mael laoq Jidu e aeqhhaol mael'ae dailbiaoq hhae, kaol aedeeteel hhaellaelmyel zaeq vae maeqngeel maeq? 17 Aqba laoq qiq ba wae, aedeeteel cholyaeq naeq feiq, aeqhhaol laoq qiq siq'ae, kaol aedeeteel hhaellaelmyel aqba qiq ba zaeq kaol'ae. 18 Noteel fu, ruqtiq'ae lye gee'li'laol Yiqsellyel cholyaeq geiq hael laoq, zaelheel mael zaeq gol e cholyaeq tyuhael laoq jiltanq vae Momil'ae heel biq maeqngeel maeq? 19 Aelmaol, ngael gee mael aeqchee yilsi maeq? Cholyaeq lye zongldu hhei e momilhael'ae heel gol e zaeqzael mael laoq aeqchee suanl hhaeq laeq? Paelsilmyel cholyaeq lye zongldu hhei e momil eiq aeqchee suanl hhaeq laeq? 20 Maeqngeel'ae, ngael gee mael laoq, yoqhhaeteel hael heel e zaelheel mael laoq niqhaeq'ae heel biq hhae, Momil'ae heel biq maeqngeel'ae; ngael noteel yaol niqhaeq nyegael guanxil maeq bi za goq yae. 21 Noteel Hhaoqsongl e beiziq mael dol, niqhaeq e beiziq mael eiq dol aeqmyel maeq zongl hhaeq'ae; Hhaoqsongl e baqwanq mael zaeq, niqhaeq e baqwanq mael eiq zaeq aeqmyel maeq zongl hhaeq'ae. 22 Aedeeteel Hhaoqsongl'ae heiqcil bi nael laeq? Aedeeteel yoqhhaeq taq'ae hhael henq hhaemaeq?
Aeqchee silqinq zongl mael eiq Momil'ae rongqyaol bi za maoqhhae
23 Aeqchee silqinq eiq zongl hhaeq'ae, ngeelfeiq, aeqchee myel meeqyo'lael kiq maeqngeel'ae. Aeqchee silqinq eiq zongl hhaeq'ae, ngeelfeiq, aeqchee myel cholyaeq'ae aqha bi bo'lael kiq maeqngeel'ae. 24 Haelmillye cholyaeq haoq, aeqyoyoq'ae meeqyo'lael biq lye haeq geezaeq, ochoq'ae meeqyo'li biq lye geezaeq maoqhhae. 25 Gaiziq vae hael ongqhael laoq, noteel zaeq gil aeqmeel, liangqxin gae'lye qiqgiq haeq naelhaeq gil, 26 "Milcaeq kaol milcaeq taq'ae bong'lye halza haelzholhael laoq gilzuqmyel Hhaoqsongl hhae lye kaol'ae". 27 Yesu'ae maeq xinlzaeq e cholyaeq qiq hhaeq noteel'ae aelhoq gulzaeq laeq, noteel eiq yil goq kaollaoq, noteel yiqsi'ae hal baqdeel hhei hael laoq zaeq gil aeqmeel, liangqxin gae'lye qiqgiq haeq naelhaeq gil. 28 Cholyaeq noteel'ae "xilmael laoq heel gol e zaeqzael'ae" lye gee laeq kaollaoq, aelmaol, noteel laoq noteel'ae geegaeq laeq e cholyaeq tyutaeq gae'lye, kaol liangqxin gae'lye haeq zaeq gil. 29 Ngael gee e liangqxin laoq noq e maeqngeel'ae, yoqhhaeq hhae. Ngaeq e zilyoq mael aeqcheekaol ochoq e liangqxin gae'lye bi panlduanl laeq? 30 Ngael meeqyaevae lye gee hheikaol zaeq kaollaoq, aeqcheekaol ngael meeqyaevae lye gee gol e zaeqzael gae'lye ochoq lye bi geekyuq laeq? 31 Tyulkaol, noteel zaeq paelsilmyel dol, aeqchee zongl haoq, gilzuqmyel Momil'ae rongqyaol biq maoq gae'lye zongl maoqhhae. 32 Noteel laoq Yoqtail cholyaeq, Xi'lal cholyaeq, paelsilmyel Momil e jiaolhuil e cholyaeq yaol haeq bi jye'leeq hhei; 33 Ngael laoqmyel ngeel maoqhhae, aeqchee silqinq zongl mael eiq cholyaeqhael'ae bi hhaol, aeqyoyoq'ae bi meeqyo'lael maoqlye haeq geezaeq, cholyaeqhael'ae bi meeqyo'li maoqlye geezaeq maoqhhae, kaol yoqhhaeteel yaol bi deqjiul.