Shiqtuq e laqtaq
9
Ngael laoq zilyoq maeqngeel maeq? Ngael laoq shiqtuq maeqngeel maeq? Ngael laoq aedeeteel e Hhaoqsongl Yesu yaol mol gol maeqngeel maeq? Noteel laoq ngaeq lye Hhaoqsongl onglci e mulhhael mul du hhei e aelsiq maeqngeel maeq? 2 Baeqjyelboq e cholyaeq'ae lye gee'li'laol, ngael shiqtuq maeqngeel kaol feiq, noteel'ae lye gee'li'laol, ngael laoq haeqfu eiq shiqtuq'ae; noteel Hhaoqsongl onglci vae ngael laoq shiqtuq'ae lye zenlminq kaol'ae. 3 Ngaeq'ae heqnaelhaeq cholyaeq tyuhael'ae, ngael geehoq biq mael laoq xihael ngeelvae. 4 Ngaeteel laoq fuqyin geegaeq mael'ae kaolzaeq kaol zaeq dol e laqtaq maqza maeq? 5 Ngaeteel laoq Hhaoqsongl'ae xiangxinl e haeqmiq yaol sheeq hheikaol, qiqgael yil kaol lael e laqtaq maqza maeq, kaol baeqjyelboq e shiqtuqhael, Hhaoqsongl e aqsseq aeqnilhael kaol Jifaq laoqmyel qiqsheel maeqngeel maeq? 6 Ngael kaol Ba'naqba laoq mulhhael maq mul myel zonglzhol e laqtaq za maeqngeel maeq? 7 Dangbinkei e cholyaeq aeqsul aeqyoyoq zaeqzael paeqgaelsael meeq zaeq laeq? Aeqsul siqbaq kae laol aeqhael onglci e aelsiq mael maeq zaeq laeq? Aeqsul aqciq hoqzaq laol aqciq e aeqchil mael maeq dol laeq? 8 Ngael saeziq xihael gee mael laoq cholyaeq yilsi ae'lye gee hhaemaeq? Lilfaq mael eiq xilnye gee maeqngeel maeq? 9 Moxi e lilfaq mael taq'ae cu deelhhei laoqmyel: "Aeqnuq mael'ae qyelsiq bi nuq gae fu, yoqhhaeq e myeqbongq mael maeq hhae taoltyeq biq'ae." Momil fuchoq mael laoq aeqnuq mael maeqhael ngeel? 10 Yoqhhaeq gee mael laoq gilzuqmyel aedeeteel gae'lye maeqngeel maeq? Aeqdilmyel aedeeteel gae'lye gee hhae! Zaelsiq kaezaeq hael laoq hhae zaeq lael biq lye chifu deelzaeq hhei aeqmyel kaezaeq yil kaol'ae; heil'eeqzaeq hael eiq zaelsiq mael ochoq'ae byel biq maoqlye nyuqtongq deelhhei aeqmyel heil'eeqzaeq yil hhae. 11 Ngaeteel lye yohael hhae lye e ael'yuq mael noteel onglci'ae xeiq deelhhei, kaol ngaeteel noteel e tyuqvae lye mulyo mael heilzaeq kaollaoq, xilmael laoq heeq e silqinq suanl hhaemaeq? 12 Baeqjyelboq e cholyaeq noteel e aeqhhaol taq'ae dyel'eiq laqtaq xilmael za kaollaoq, ngaeteel laoq nyeq'ei hhal za maeqngeel maeq? Ngeelfeiq, ngaeteel laoq laqtaq xilmael maq mulyo gol yil, daoldaolmyel aeqchee mael taq vae eiq renqnail, aeqgael Jidu e fuqyin mael zonglchiq hhei maeqhe lye lil. 13 Noteel sholhaol vae mulhhael mul e cholyaeq laoq sholhaol onglci e zaeqzael mael zaeq hhae lye maeq loq gil laeq hhaemaeq? Jiltanq vae fuqsil e cholyaeq laoq jiltanq vae heelda hhei e liqvuq mael, byelzaeq hhae lye maeq loq gil laeq hhaemaeq? 14 Hhaoqsongl eiq xilnye minllinl hhae, fuqyin geegaeq e cholyaeq laoq, fuqyin mael'ae kaolzaeq kaol zonglzhol maoqhhae. 15 Ngeelfeiq, laqtaq xilmael ngael laoq qiqzael eiq maq mul gol yil. Ngael saeziq xihael cu mael laoq, noteel yaol ngaeq'ae xilnye za laq maoqhhae lye maeqngeel yil, ngael laoq sil kaol'eiq ngael hoda mael'ae cholyaeq lye yilsi maqza'ae lye maeq bi gee yil. 16 Ngael fuqyin geegaeq mael laoq qiqgiq hodazaq hhael maqza'ae, ngael maeq zongl maeq hhaeq laeq kaol'ae, ngael fuqyin maeq geegaeq kaollaoq zaihuol za wae. 17 Ngael aeqyoyoq zongl goq aeqmyel xilmael zongl kaollaoq, shangqcil za vae; ngael maeq zongl goq maeq zaeq myel kaol feiq, zeqrenl mael laoq ngaeq'ae toqshiq hhei laeq wae. 18 Xilnye laol, ngaeq e shangqcil mael laoq aeqchee maeq? Biq laq mael laoq, ngael fuqyin geegaeq fu, cholyaeq'ae dyuqbaq maq du kael myel fuqyin bi mul mael, kaol aeqgael ngaeq lye fuqyin geegaeq e laqtaq mael mul byel hhei maeqhe lye mael ngeelvae.19 Ngael laoq zilyoq lil, kaol cholyaeq lye maeq bi guanqtyeq yil, ngeelfeiq, ngael aeqyoyoq laoq cholyaeqhael e yaqhacheqzaq e cholyaeq geiq nae mael laoq, hhael naeq myel cholyaeq yaol bi hhae'lael maoqlye kaollil. 20 Yoqtail cholyaeq nyegael baelzhol laol, ngael Yoqtail cholyaeq bal geiq lil, xilnyel zongl mael laoq, Yoqtail cholyaeq yaol bi hhae'lael maoqlye kaollil; lilfaq holhhaq vae zhol e cholyaeqhael nyegael baelzhol laol, ngael lilfaq holhhaq vae zhol e cholyaeq maeqngeel feiq, lilfaq holhhaq vae zhol e cholyaeq bal geiq lil, xilnyel zongl mael laoq, lilfaq holhhaq vae zhol e cholyaeq yaol bi hhae'lael maoqlye kaollil. 21 Lilfaq maqza e cholyaeq nyegael baelzhol laol, ngael lilfaq maqza e cholyaeq bal geiq lil, xilnyel zongl mael laoq, lilfaq maqza e cholyaeq yaol bi hhae'lael maoqlye kaollil; qiqshiq laoq, ngael Momil e yiqsi'ae lilfaq maqza maeqngeel yil, Jidu e lilfaq holhhaq vae zhol lil. 22 Ruanqroq biq e cholyaeq nyegael bal zhol laol, ngael ruanqroq e cholyaeq bal geiq lil, xilnye zongl mael laoq, ruanqroq e cholyaeq yaol bi hhae'lael maoqlye kaollil. Haelmillye cholyaeq nyegael baelzhol laol, ngael haelmillye cholyaeq bal geiq lil. Haelmillyekaol eiq ngael cholyaeq yaol teel bi deqjiul maoq yae. 23 Ngael haelzonglhael laoq, gilzuqmyel fuqyin gae'lye lil, xilnyel zongl mael laoq, cholyaeq nyegael fuqyin xilmael taq'ae hhaellaelmyel qiqgael bi meeqyo'lael maoqlye kaollil.
24 Noteel kibobo myel vae ki e cholyaeqhael laoq, aeqsul eiq ki, ngeelfeiq, jiangqshangq mael laoq qiq hhaeq maoq maq hhamul'ae lye maeq loq gil laeq hhaemaeq? Noteel eiq xilnye ki maoqhhae, xilnye laol, noteel jiangqshangq mael hhamul wae. 25 Bal ki e cholyaeqhael laoq, aeqchee mael taq vae eiq zongltyeqzaeq ongl maoqhhae, yoqhhaeteel laoq buq yilkiq e zongmae vuqcongq mael mul maoqlye hhae; ngeelfeiq, aedeeteel laoq maq buq yilkiq e zongmae vuqcongq mael mul maoqlye hhae. 26 Tyulkaol, ngael ki mael laoq, haeqvae ki yil maoqlye maeq loq myel ki maeqngeel yil; ngael laqtu maellye diqgae mael laoq, kong'qil mael'ae diq laoqmyel maeqngeel yil. 27 Ngael aeqyoyoq e aeqhhaol mael zongltyeq, kaol aeqhhaol mael ngael haelmillye zongl maoqlye laol haelmillye bi naelhaeq, aeqgael ngael ochoq'ae fuqyin geegaeq biq, aeqyoyoq laoq qiqgiq boq'ae maeqyo myel peqyil hhei maeqhe.