Yoqdanl Lolbaeq e neelgae aelheiq e milcaeqhael byelzaeq
14
Xilmael laoq Yiqsellyel cholyaeq Ja'nanq milcaeq vae hhamul hhei biq e zaeqdye halngeiq mael'ae, zaeqdye halngeiq xihael laoq, jilsi Yiqlilyalsaq, kaol Nenl e yaqyo Yoshuyal, kaol Yiqsellyel cholyaeq e hae yiq gol zhipail eiq aeqdae boq ae'lye chogaeyi e yoheeqhael lye yoqhhaeteel'ae byel hhei biq mael ngeelvae. 2 Yoqhhaeteel laoq Yeheqhuaq Moxi ae'lye yoqhhaeteel'ae moqheil hael heil biq laoqmyel, suqhhaq o kaol zaeqdye halngeiq mael hhaoq zhipail kaol Maqnaqxi e qiq pa cholyaeq'ae byel hhei biq. 3 Moxi lye Yoqdanl Lolbaeq e neeldu aelheiq vae lye, baeqjyelboq e liangq gol zhipail kaol Maqnaqxi zhipail baeqjyelboq e qiq pa cholyaeq'ae zaeqdye halngeiq byel hhei biq vae. Ngeelfeiq, yoqhhaeq laoq yoqhhaeteel onglci'ae lye zaeqdye halngeiq mael Lilveil cholyaeq'ae maeq byel hhei biq'ae. 4 Yoqsel e houldailhael liangq gol zhipail peqlal vae kaol'ae, Maqnaqxi kaol Yiqfaqlianq ngeelvae. Yoqhhaeteel Lilveil cholyaeq'ae milcaeq maeq byel hhei biq'ae, ngeelfeiq, Lilveil cholyaeq'ae milmae heeqmyel mael byel hhei biq kaol bi zhol'ae, kaol yoqhhaeteel'ae milmae heeqmyel e jyeqyaeq hoqzaq e milcaeq vae jyeqyaeq bi cuzaeq, kaol jadanglhael bi heildeelzaeq. 5 Yeheqhuaq Moxi'ae haelmillye moqheilheil biq laol, Yiqsellyel cholyaeqhael tyulnye zongl, kaol milcaeq mael byelzaeq vae.Ja'lel'ae byel hhei biq e milcaeq
6 Yoqdal cholyaeq laoq Jiqjaq vae zhol e Yoshuyal tyuqvae keellael, Ji'niqxiq cholyaeq Yefuqniq e yaqyo Ja'lel Yoshuyal'ae gee biq: "Nol laoq Yeheqhuaq Jadiqsi Ba'niqyal vae, ngael kaol noq e silqinq mael'ae gee keelli fu, Momil e cholyaeq Moxi vae gee gol biq e saeziq mael loq'ae. 7 Yeheqhuaq e yaqhacheqzaq e cholyaeq Moxi Jadiqsi Ba'niqyal ae'lye ngaeq yaol, milcaeq xilmael'ae haoqchifu yi lye moqheilheil du hhei laq fu, ngael yuqqyel hoq zhoq bong oqyilsiq. Ngael neemae onglci e saeziq mael yoqhhaeq'ae geedu hhei biq. 8 Ngaeq nyegael bal da'lal e algo aeqnilhael lye cholyaeqhael'ae saeqzuq gu zuq aeqmyel bi gu feiq, ngael laoq neemae qiqsiqmyel ngaeq e Momil Yeheqhuaq'ae cho'lyeq oqyilsiq. 9 Tyuqfu qiq nao, Moxi faqsilkei: 'Noq e aeqkeel hal nuq da e milcaeq mael, nol kaol noq e houldailhael'ae bi mul laqngeel kaol haeqfu keellye zaeqdye halngeiq bi geiq laqngeel, nol neemae qiqsiqmyel ngaeq e Momil Yeheqhuaq'ae cho'lyeq kaol'ae.' 10 Yaeqmeel, fu hhei, Yeheqhuaq yoqhhaeq haelgee laoqmyel ngaeq'ae xi yuqqyel ngaeq hoq bi dyeq laq vae. Yiqsellyel cholyaeqhael diqsheelleeldye vae aeqyoyoq e zholhhael lye maqza myel zhol fu, Yeheqhuaq Moxi'ae saeziq xilmael gee gol biq'ae. Yaeqmeel, fu hhei, ngael heiqqyel ngaeq hoq zoq wae. 11 Yaeqnao ngael aqhabo oqyilsiq, Moxi lye ngaeq yaol moqheilheil duyil laq e tyuqfu qiq nao laoqmyel hhae; daqzhangldiq haoq, duyil do'lal haoq, yaeqmeel ngaeq e aqha kaol tyuqfu e aqha mael qiqsheel'ae. 12 Nol ngaeq'ae Yeheqhuaq tyuqfu qiq nao haelgee e geeqzhoq naeq e milcaeq xilmael byel laeq lye geezaeq lil. Tyuqfu qiq nao nol eiq gaeq gol vae, saeqvae Yalnal cholyaeq zhol'ae, kaol haeqheemyel maeq diq do'li sael e milmae heeqmyel mael za'ae, Yeheqhuaq yoqhhaeq haelgee laoqmyel ngaeq nyegael baelzhol laeq maeqhe, kaol ngaeq lye yoqhhaeteel yaol lyeqdu hhei."
13 Tyulkaol, Yoshuyal Yefuqniq e yaqyo Ja'lel'ae geeqlongq biq biq, kaol Xiboqlunq milcaeq mael yoqhhaeq'ae byel hhei biq kaol zaeqdye halngeiq bi geiq. 14 Tyulkaol, yaeqnao keellye Xiboqlunq milcaeq laoq Ji'niqxiq cholyaeq Yefuqniq e yaqyo Ja'lel e zaeqdye halngeiq wae, yoqhhaeq neemae qiqsiqmyel Yiqsellyel e Momil Yeheqhuaq'ae cho'lyeq kaol'ae. 15 Yilkaefu, Xiboqlunq laoq Ji'lyel Yalba lye gul hhae; Yalba laoq Yalnal cholyaeq onglci'ae maeqdaeqhhaeq e qiq hhaeq'ae. Tyulkaol, goqja hoqpinq vae, daqzhangl maeq diq vae.