Maqnaq kaol haeqmq
16
Yiqsellyel huilzhongl cholyaeqhael Yiqlinq ae'lye deelsae hheikaol deel gil, Aijiq ae'lye duyi e aeqnaol dil'el gol yeq e qyelngaeq nao fu, Yiqlinq kaol Xi'nail kaeqlaeq e Xunl e diqsheelleeldye vae keellael gil vae. 2 Yiqsellyel e huilzhongl cholyaeqhael diqsheelleeldye vae lye Moxi kaol Yallunq'ae meel gil biq. 3 Yiqsellyel cholyaeqhael yoqhhaeteel'ae gee biq: "Ngaeteel Aijiq milcaeq vae lye Yeheqhuaq e aqlaq'ae sil kaol'eiq hhaeq lil! Tyuqfu, ngaeteel saeqzil puq e loqgo dongqpyeq vae zholgae deelhhei, aqba hhae zaeqdye. Ngeelfeiq, noteel lye ngaeteel yaol sheeq duyi laq, kaol diqsheelleeldye saeqvae keellael, kaol huilzhongl cholyaeqhael yaol bi myeqsil maoqlye laeq!"4 Yeheqhuaq Moxi'ae gee biq: "Ngael mqmae ae'lye noteel'ae zaeqzael yelgae hhei laeqngeel. Cholyaeqhael duyil, kaol haeqfu qiq nao eiq tyu qiq nao zaeq loq dyul heil'eeqzaeq yil. Xilnye laol, ngael yoqhhaeteel'ae ngael tyuqmyeq mael laoqmyel zongl yil maeq lye hhae shilfu wae. 5 Dilluq tian'ae, yoqhhaeteel zaeqzael paeqgaelsael meeq gil hhae, xi qiq nao heil'eeq mael laoq naochomyel heil'eeq hael taq'ae qiq pa hhael naeq maoqhhae." 6 Moxi kaol Yallunq Yiqsellyel cholyaeqhael'ae gee biq: "Mqkiq keellael laol, noteel laoq Yeheqhuaq lye noteel yaol Aijiq milcaeq ae'lye sheeq duyi laq hhae lye loq wae. 7 Mqshoq, noteel Yeheqhuaq e rongqyaol mael hhae mol'ae, Yeheqhuaq noteel yoqhhaeq'ae meel biq mael gaeq vae kaol'ae. Ngaeteel aeqchee cholyaeq kaollaeq, kaol noteel ngaeteel'ae meel gil laeq lilmaeq?" 8 Moxi yol gee: "Mqkiq'ae Yeheqhuaq aeqdilmyel noteel'ae saeqzil bi zaeq laeq'ae, mqshoq'ae aeqdilmyel noteel'ae zaeqzael bi zaeqdye laq'ae, Yeheqhuaq noteel yoqhhaeq'ae meel biq mael gaeq vae kaol'ae. Ngaeteel aeqchee cholyaeq kaollaeq? Noteel meel mael ngaeteel'ae meel maeqngeel'ae, Yeheqhuaq'ae meel biq hhae."
9 Moxi Yallunq'ae gee biq: "Nol Yiqsellyel huilzhongl cholyaeqhael'ae gee biq: 'Noteel Yeheqhuaq e yiqsi'ae keellael, yoqhhaeq noteel meel mael gaeq vae kaol'ae.'" 10 Yallunq Yiqsellyel huilzhongl cholyaeqhael'ae saeziq gee biq fu, yoqhhaeteel diqsheelleeldye boq'ae zipol yil, fu hhei, Yeheqhuaq e rongqyaol mael mqdul onglci'ae mol du'lal. 11 Yeheqhuaq Moxi'ae moqheilheil biq: 12 "Ngael Yiqsellyel cholyaeqhael meel mael gaeq wae. Nol yoqhhaeteel'ae gee biq maoqhhae: 'Kiqsulkiqxeiq fu, noteel saeqzil hhae zaeq'ae, mqshoq eiq zaeqzael hhae zaeqdye'ae. Xilnye laol, noteel ngael laoq Yeheqhuaq noteel e Momil'ae lye loq vae.'"
13 Mqkiq keellael laol, haeqmq da'lal, kaol haqhhael diqkaeq hhei e milcaeq'ae zhol bong hhei; mqshoq, haqhhael diqkaeq hhei e milcaeq e dongqpyeq dongqjyel vae cheeqhaeq yilcenq za'ae. 14 Cheeqhaeq tyu yilcenq shoqyil hhei'laol, fu hhei, diqsheelleeldye e milcaeq taq'ae lyeheqlye qiqsheel mol lael'ae, milcaeq taq e baeqsaellye haeqnyel laoqmyel hhae. 15 Yiqsellyel cholyaeqhael mol hhei'laol, aeqchee'ae lye maeq loq gil biq'ae, kaol hhaellaelmyel gee: "Xilmael laoq aeqchee maeq?" Moxi yoqhhaeteel'ae gee biq: 'Xilmael laoq Yeheqhuaq noteel'ae bi zaeq laeq e zaeqzael'ae.' 16 Yeheqhuaq moqheilheil mael laoq xilnye hhae: 'Noteel aeqsul eiq aeqyoq hael zaeq ongl dyul heilzaeq, kaol aeqsul eiq haeqpael haelcul onglci e cholyaeqhael'ae bael heil'eeq hhei biq, kaol cholyaeqhael haeldyul zoq laol, hae qiq hhaeq eiq yil eqmeiq'eqa heil'eeq hhei.'" 17 Kaol Yiqsellyel cholyaeqhael xilnye zongl vae; naeq e heil hhei zoq, aelheellye heil eiq zoq'ae. 18 Kaol eqmeiq'eq maellye hhaoq fufu, naeq myel heil'eeq hael maeq naeq du'lal, aelheellye heil'eeq hael eiq maq lo yae lye maqza'ae; kaol haetaeq eiq aeqyoyoq zaeq ongl dyul heil'eeqzaeq. 19 Moxi yoqhhaeteel'ae gee biq: "Aeqsul eiq heil'eeqzaeq hhei hael mqshoq'ae maeq hhae taeq keel'ae." 20 Ngeelfeiq, yoqhhaeteel onglci e qiq miq laoq Moxi e saeziq mael'ae maeq naelhaeq, kaol zaeqzael mael mqshoq'ae taeq keel, kaol zaeqzael mael nulyil hheikaol haello du'lal. Kaol Moxi yoqhhaeteel'ae gulzhee biq. 21 Yoqhhaeteel haeqfu qiq shoq eiq aeqsul haeldyul zaeq ongl laol haeldyul heil'eeqzaeq hhae; aeqcael zhoq hongl tullaeq laol, zaeqzael mael haeqgae hhei wae.
22 Dilluq tian'ae, yoqhhaeteel laefuq taq'ae niq pa hhael naeq myel e zaeqzael heil'eeq hhei, kaol hae qiq hhaeq eiq liangq eqmeiq'eq heil'eeq hhei. Huilzhongl e yoheeq Moxi'ae geegaeq lael biq, 23 Kaol Moxi yoqhhaeteel'ae gee biq: "Yeheqhuaq moqheilheil: 'Naeshoq laoq anxiqriq'ae, kaol Yeheqhuaq gae'lye gol e senljyeq anxiqriq'ae. Noteel aeqzaeq maellye ol maoq ol, caqzaq maoq caqzaq gil, kaol zadeel siq hael laoq mqshoq'ae taeq keel gil.'" 24 Kaol yoqhhaeteel Moxi moqheilheil laoqmyel zadeel siq hael mqshoq vae taeq keel, zaeqzael xihael nul eiq maeq nul yil, onglci vae eiq haello maeq du'lal'ae. 25 Moxi gee: "Noteel yaeqnao laoq xihael zaeq gil oq! Yaeqnao laoq Yeheqhuaq gae'lye gol e anxiqriq kaol'ae, kaol noteel diqsheelleeldye ae'lye zaeqzael maeq saelpopuq hhei ongl'ae. 26 Koq nao laoq hhae heil'eeq'ae, dilqiq tian laoq anxiqriq'ae, kaol xi qiq nao laoq qiqgiq maqza'ae."
27 Dilqiq tian'ae, cholyaeqhael onglci e qiq miq laoq heil'eeq yil'ae, ngeelfeiq, qiqgiq maeq saelpopuq hhei'ae. 28 Yeheqhuaq Moxi'ae gee biq: "Noteel ngaeq e moqheilheil mael, kaol geemyeq mael maeq zongl gaeyil myel zongl mael haeqfu'ae keel maoqlye laeq? 29 Noteel fu, Yeheqhuaq anxiqriq mael noteel'ae biq biq, tyulkaol, dilluq tian'ae laoq yoqhhaeq noteel'ae niq nao e zaeqzael biq laq, dilqiq tian'ae haetaeq eiq aeqyoq zhol myel vae zhol maoqhhae, kaol aeqyoyoq zhol myel ae'lye maq hha duyil'ae." 30 Tyulkaol, cholyaeqhael dilqiq tian'ae hhaeqnaeqnaeq gil vae.
31 Yiqsellyel toq lye zaeqzael xilmael'ae maqnaqb lye mil biq hhae, maqnaq e molkol mael laoq yinqxil e alne laoqmyel hhae, bachi'lye hhae, zaeq li laol baq'eel nyelkeq hhei e baeqsaellye aqba laoqmyel hhae. 32 Moxi gee: "Yeheqhuaq moqheil hael heil mael laoq xilnye hhae: 'Maqnaq mael yil eqmeiq'eq heilbong hheikaol noteel e houldailhael'ae taeq deelhhei biq maoqhhae, xilnye zongl mael laoq, yoqhhaeteel'ae ngaeq lye noteel yaol Aijiq ae'lye sheeq duyi biq fu, diqsheelleeldye ae'lye noteel'ae bi zaeq e zaeqzael'ae lye hhae mol wae.'" 33 Moxi Yallunq'ae gee biq: "Nol buqyaeq qiq mal heil laeq, kaol maqnaq yil eqmeiq'eq heilbong hhei, kaol Yeheqhuaq e yiqsi'ae taeq deelhhei, kaol noteel e houldailhael'ae taeq deelhhei biq." 34 Yeheqhuaq Moxi'ae moqheil haelmillye heil biq laol, Yallunq tyulnye zongl vae, maqnaq mael taeq deelhhei kaol zoqzenl bongqke e yiqsiboq'ae heildeel hhei. 35 Yiqsellyel cholyaeqhael cholhaoq zhol myel e milcaeq vae do'li fu keellye, maqnaq zaeq mael yuqqyel hoq zoq vae; yoqhhaeteel Ja'nanq milcaeq e bian'gail vae keelli fu keellye maqnaq zaeq hhae. 36 Qyel eqmeiq'eq laoq yil yifaqc ngeelvae.