Hongqhaiq vae guq yil
14
Yeheqhuaq Moxi'ae moqheilheil biq, gee: 2 "Nol Yiqsellyel cholyaeqhael'ae polhoqlael lye moqheilheil biq, kaol Biq Haxi'luq laefuq'ae, Mildoq kaol eeldeel deelmae e kaeqlaeq, Ba'lil Xiqfen e laefuq'ae haqhhael diqkaeq hhei gil. Noteel laoq Ba'lil Xiqfen yulboq e eeldeel deelmae deeljyel vae haqhhael diqkaeq hhei maoqhhae. 3 Yiqsellyel cholyaeq xilnye zongl laol Faqlaoq xilnye gee kiq'ae: 'Yoqhhaeteel saeqvae milcaeq ae'lye deelbael biq vae, diqsheelleeldye lye yoqhhaeteel yaol zongltyeq biq vae.' 4 Ngael Faqlaoq e neemae mael haelmillye ha goq laol haelmillye bi ha maoq, kaol yoqhhaeq yoqhhaeteel'ae lyeq yil maoqlye hhae. Ngael aeqdilmyel Faqlaoq kaol yoqhhaeteel e gilzuqmyel junduilhael taq'ae rongqyaol za maoq, xilnye laol, Aijiq cholyaeqhael ngael laoq Yeheqhuaq'ae lye loq wae." Tyulkaol, Yiqsellyel cholyaeqhael xilnye zongl vae.5 Cholyaeq lye Aijiq zongmae'ae geegaeq lael biq: "Yiqsellyel cholyaeqhael kisae vae! " Faqlaoq kaol yoqhhaeq e yaqhacheqzaq e cholyaeqhael laoq nyuqpael vae, kaol gee: "Aedeeteel haelmillyekaol Yiqsellyel cholyaeqhael yaol aedeeteel'ae maeq biq fuqsil myel bi deel e silqinq xilmael zongl laeq?" 6 Faqlaoq lye daqzhangldiq e cheziq paeqgaelsael meeq hhei, kaol yoqhhaeq e dangbinkei e cholyaeqhael yaol sheeq hheikaol qiqgael yil, 7 Yoqhhaeq lye saelpodu hhei e hhael meeq e daqzhangldiq e cheziq koqhael (600), kaol Aijiq'ae halza e daqzhangldiq e cheziqhael sheeq hhei, kaol cheziq hae qiq mal vae eiq daqzhangldiq e yoheeq zhol hhae. 8 Yeheqhuaq lye Aijiq zongmae Faqlaoq e neemae mael haelmillye ha goq laol haelmillye bi ha hhae, kaol yoqhhaeq Yiqsellyel cholyaeqhael'ae lyeq yil; ngeelfeiq, Yiqsellyel cholyaeqhael laoq vuqduq gullye duyil vae. 9 Aijiq cholyaeq yoqhhaeteel'ae lyeq li biq, Faqlaoq e haelzhol e aeqmaoq, daqzhangldiq e cheziq, daqzhangldiq e cheziq e yoheeq, kaol junduilhael eeldeel deeljyel vae zhol hhae, Biq Haxi'luq'ae niqli aeqmyel vae, Ba'lil Xiqfen e laefuq'ae, yoqhhaeteel haqhhael diqkaeq hhei e milcaeq vae lye lyeqmil li vae.
10 Faqlaoq niqlael fu, Yiqsellyel cholyaeqhael vuqduq baqtul hheikaol chifu, Aijiq cholyaeqhael lyeq laeq vae, kaol zhee gu gil biq, Yiqsellyel cholyaeqhael Yeheqhuaq'ae nyuqsaeq lael aeqmyel geezaeq biq. 11 Yoqhhaeteel Moxi'ae gee biq: "Aijiq milcaeq vae baqduqm e milcaeq maqza, kaol nol laoq ngaeteel yaol diqsheelleeldye vae sheeqlaeq laeq kaol bi sil maoqlye laeq? Nol aeqcheekaol ngaeteel'ae xilnye zongl laeq, kaol ngaeteel yaol Aijiq ae'lye sheeq duyi laq lilmaeq? 12 Ngaeteel laoq Aijiq'ae lye noq'ae, ngaeteel'ae haeq guanq laeq, kaol ngaeteel yaol Aijiq cholyaeqhael'ae bi zhaofu laeq lye gee gol laq maeqngeel maeq? Aijiq cholyaeqhael'ae fuqsil biq mael laoq, diqsheelleeldye vae sil mael taq'ae hhael meeq kaol'ae." 13 Moxi cholyaeqhael'ae gee biq: "Maq gu kael, haelmeeqlye haoqtul deelhhei, Yeheqhuaq yaeqnao noteel'ae jiul maoqlye zongl mael'ae chifu gil, noteel yaeqnao mol e Aijiq cholyaeqhael yaol aeqdilmyel qiqzael eiq maeq hhae mol vae kaol'ae. 14 Yeheqhuaq noteel'ae daqzhangl bael diq laeq'ae, noteel yotyel haq du gil!"
15 Yeheqhuaq Moxi'ae gee biq: "Nol aeqcheekaol ngaeq'ae nyuqsaeq lael aeqmyel geezaeq laeq lilmaeq? Nol Yiqsellyel cholyaeqhael'ae laefuqboq'ae deel lye moqheilheil biq. 16 Nol noq e zaeqngeeq mael baqqei hhei, kaol aqlaq mael eeldeel deelmae'ae tyuqdu hhei, kaol eelcuq mael zonglpa hhei. Yiqsellyel cholyaeq eeldeel deelmae vae gaeyil, kaol milgee taq'ae deel. 17 Fu hhei, ngael laoq Aijiq cholyaeq e neemae mael haelmillye ha goq laol haelmillye bi ha maoq, kaol yoqhhaeteel bael cho'lyeq gaeyil. Ngael laoq Faqlaoq kaol yoqhhaeq e gilzuqmyel junduil, daqzhangldiq e cheziq, kaol daqzhangldiq e cheziq e yoheeq e aeqhhaol taq ae'lye rongqyaol mul maoq. 18 Ngael laoq Faqlaoq, yoqhhaeq e daqzhangldiq e cheziq kaol daqzhangldiq e cheziq e yoheeq ae'lye rongqyaol za fu, Aijiq cholyaeqhael ngael laoq Yeheqhuaq'ae lye loq wae."
19 Yiqsellyel cholyaeqhael haqhhael diqkaeq hhei e yiqsiboq'ae deel e Momil e mqmae yosongl laoq yoqhhaeteel e aeqnaolboq'ae deelpol yil; mqdul sseeldongq mael eiq yoqhhaeteel e laefuqboq ae'lye yoqhhaeteel e aeqnaolboq'ae haoqtul deelyil. 20 Mqdul sseeldongq mael Aijiq cholyaeqhael kaol Yiqsellyel cholyaeqhael haqhhael diqkaeq hhei e kaeqlaeq'ae keellael: Qiqboq'ae laoq mqdul kaol nahongq mael za, baeqjyelboq e qiqboq'ae laoq mqdul mael mqkiq'ae cuqmol biq, kaol qiq mil myel qiq miq laoq qiq miq'ae maeq niqli ongl'ae.
21 Moxi e aqlaq mael eeldeel deelmae'ae tyuqdu hhei, Yeheqhuaq lye guaeq'ei heeq e neeldu aelheiq e zaeqxil maellye, eeldeel deelmae e eelcuq mael qiq mil ae'lye bi suqyil hhei, kaol eeldeel deelmae mael milgee peqyil vae; kaol eelcuq mael zonglpa hhei vae. 22 Yiqsellyel cholyaeq eeldeel deelmae onglci'ae gaeyil, kaol milgee taq'ae deel, eelcuq mael laoq yoqhhaeteel e laqsseq laeqbaelboq'ae congqciq laoqmyel peqlal vae. 23 Aijiq cholyaeq yoqhhaeteel'ae lyeq biq, kaol Faqlaoq e haelzhol e aeqmaoq, daqzhangldiq e cheziq kaol daqzhangldiq e cheziq e yoheeq gilzuqmyel eeldeel deelmae onglci'ae doyil. 24 Mqbaebae lael maoq fu, Yeheqhuaq laoq mqdul sseeldongq kaol aeqzaeq doq sseeldongq onglci ae'lye Aijiq e junduilhael'ae chifu gae hhei, kaol Aijiq e junduilhael yaol aeqvuqlaelvuqmyel bi zongl tullaeq. 25 Kaol yoqhhaeq lye yoqhhaeteel e cheziq e lunqziq mael bi leeqgae hhei, kaol laefuqboq'ae teel eiq maq du'li sael biq'ae, Aijiq cholyaeq gee: "Aedeeteel Yiqsellyel cholyaeq yiqsi ae'lye kisae gil o! Yeheqhuaq yoqhhaeteel gae'lye daqzhangldiq, kaol Aijiq'ae diq biq kaol'ae."
26 Yeheqhuaq Moxi'ae gee biq: "Nol aqlaq mael eeldeel deelmae'ae tyuqdu hhei, kaol eelcuq mael Aijiq cholyaeq, yoqhhaeteel e daqzhangldiq e cheziq kaol daqzhangldiq e cheziq e yoheeq e aeqhhaol'ae bi yul'eeqhoq yil." 27 Kaol Moxi aqlaq mael eeldeel deelmae'ae tyuqdu hhei, mqbaebae lael maoq fu, eeldeel deelmae mael laefuq laoqmyel peq hoq lal vae. Aijiq cholyaeqhael eelcuq mael'ae kihezaq maoqlye fu, Yeheqhuaq lye yoqhhaeteel yaol eeldeel deelmae onglci'ae deiqdo biq. 28 Eeldeel deelmae e eelcuq mael yul'eeqhoq laeq, kaol daqzhangldiq e cheziq, daqzhangldiq e cheziq e yoheeq kaol Yiqsellyel cholyaeq nyegael eeldeel deelmae onglci'ae bael gaeyil e Faqlaoq e junduilhael naqvuq byel biq vae, qiq hhaeq eiq maeq zholdeelsaeq'ae. 29 Ngeelfeiq, Yiqsellyel cholyaeqhael laoq eeldeel deelmae onglci e milgee vae deel gil hhae, eelcuq mael laoq yoqhhaeteel e laqsseq laeqbaelboq'ae congqciq laoqmyel peqlal vae.
30 Tyuqfu qiq nao, Yeheqhuaq lye Yiqsellyel cholyaeqhael yaol Aijiq cholyaeq e aqlaq ae'lye jiul duyi biq vae. Yiqsellyel cholyaeqhael laoq Aijiq cholyaeqhael eeldeel deeljyel vae sil deelhhei mol hhei biq. 31 Yiqsellyel cholyaeqhael laoq Yeheqhuaq Aijiq cholyaeqhael'ae maeqdaeqhhaeq myel zongl biq mael mol hhei biq, kaol cholyaeqhael Yeheqhuaq'ae zun eiq zunjinl gu eiq gu, kaol Yeheqhuaq'ae kaol yoqhhaeq e yaqhacheqzaq e cholyaeq Moxi'ae xiangxinl vae.