Yaqgel Boqtellil'ae hoq keelli
35
Momil Yaqgel'ae gee biq: "Tullael, Boqtellil'ae da'li, kaol tyuqvae zholgae hhei; nol tyuqvae Momil'ae jiltanq qiq mal zongl deelhhei biq. Momil xitaeq laoq nol yilkaefu noq e algo Yiqsaoq'ae kihhaq fu, noq'ae bi mol laeq e tyutaeq ngeelvae." 2 Tyulkaol, Yaqgel yoqhhaetoq e cholyaeqhael, kaol gilzuqmyel yoqhhaeq nyegael qiqgael zhol e cholyaeqhael'ae gee biq: "Noteel laoq noteel onglci'ae baeqjyelboq minqcuq e cholyaeqhael ae'lye heil laeq e momil mael beiqgae maoqhhae, noteel aeqyoyoq zonglshol maoqhhae, kaol noteel e aelhongq mael dumpael maoqhhae. 3 Aedeeteel tullael kaol Boqtellil vae da'li gil maoq; ngael tyuqvae Momil'ae jiltanq qiq mal zongl biq maoq. Yoqhhaeq laoq, ngaeq'ae saeq fu ngael geezaeq biq mael toq laeq vae, kaol ngael deel e gaelmae vae ngaeq nyegael qiqgael baelzhol'ae." 4 Tyulkaol, yoqhhaeteel lye baeqjyelboq minqcuq e cholyaeqhael lye heil laeq e momil mael, kaol aeqyoteel e naeq'ongqhael gilzuqmyel Yaqgel'ae heilmoq hhei biq; Yaqgel lye xihael Shiljianl dongqpyeq e aeqpoq aelbol holhhaq'ae duq vuq hhei vae.5 Yoqhhaeteel deelsae hheikaol deel gil vae. Momil lye baeqjyelboq e milmae heeqmyel e cholyaeqhael'ae bi gu gil'ae, kaol yoqhhaeteel Yaqgel e yaqyohael'ae maeq lyeq biq vae. 6 Tyulkaol, Yaqgel kaol yoqhhaeq nyegael qiqgael zhol e cholyaeqhael, Ja'nanq milcaeq e Lulsi vae keelli, yaeqmeel Lulsi laoq Boqtellil lye gul biq hhae. 7 Yoqhhaeq aeqyoq e algo'ae kihhaq fu, Momil tyuqvae lye yoqhhaeq'ae bi molli gol hhae. Tyulkaol, yoqhhaeq tyuqvae Yi'lel Boqtellil lye gul biq hhae, kaol yoqhhaeq lye tyuqvae jiltanq qiq mal zongl deelhhei vae. 8 Lilbaiqja'ae aeqchil bi bael dol heeq laeq e aeqmae Diqbo'la sil hhei'laol, Boqtellil aq'oqboq e aeqpoq aelbol holhhaq vae baqduqm deelhhei biq, tyulkaol, aelbol tyu qiq bol'ae Yallunq Baguq lye mil biq hhae.
9 Yaqgel Badanl Yallanq ae'lye hoqlal aeqnaol, Momil yoqhhaeq'ae yol qiq pu bi molli, kaol yoqhhaeq'ae geeqlongq biq biq. 10 Momil yoqhhaeq'ae gee biq: "Noq e cholmil mael laefuq laoq Yaqgel lye hhae, ngeelfeiq, aeqgael laoq Yaqgel lye haeq gul oq, noq e cholmil mael laoq Yiqsellyel lye gul maoqhhae." Xilnye laol, Momil lye yoqhhaeq e cholmil mael Yiqsellyel lye milpael biq vae. 11 Momil yoqhhaeq'ae gee biq: "Ngael laoq hhael'onglzaeq zaeqli Momil lil, nol yaeqguq haelnaeqmyel bo maoqhhae, noq e houldailhael goqja qiq mal dyul maeqcilmyel haelnaeqmyel goqja peqlal maoqlye hhae, kaol yoqhhaeteel onglci'ae zongmae geiq maoqlye e cholyaeq zhol'ae. 12 Ngael laoq ngaeq lye Yalboqlahanl kaol Yiqsaq'ae biq hhei biq e milcaeq mael, nol kaol noq e houldailhael'ae biq biq maoq."
13 Momil laoq aeqyoq Yaqgel'ae saeziq gee biq e milcaeq vae Yaqgel zaellye mqmae vae da'li vae. 14 Yaqgel laoq Momil yoqhhaeq'ae saeziq gee biq e milcaeq vae, haqlo qiq siq baqtul hhei'ae; haqlo tyulmael vae Zilheel kaol zhoqcae cil beiqxeiq hhei biq hhae. 15 Yaqgel lye Momil yoqhhaeq'ae saeziq gee biq e milcaeq vae Boqtellil lye gul biq hhae.
Lajyeq yaeqguq maeq bo sael biq kaol sil vae
16 Yoqhhaeteel Boqtellil ae'lye deelsae hheikaol deel gil vae, Yiqfaqta vae keelli e gaelmae qiq qye za siq fu, Lajyeq yaeqguq bo e naohaeq keel vae, ngeelfeiq, yoqhhaeq yaeqguq maeq bo sael biq'ae. 17 Yoqhhaeq yaeqguq maeq bo sael biq fu, yaeqguq ciqdazaq e cholyaeq yoqhhaeq'ae gee biq: "Maq gu kael, nol yaqyo yol qiq hhaeq bo hhei vae." 18 Lajyeq sil li goqbiq vae, saeq'ol qye'li maoq fu, yoqhhaeq lye aeqyoq e yaqyo'ae cholmil mael Bianl Eqniq lye gul biq hhae, ngeelfeiq, yoqhhaeq e aeqdae laoq yoqhhaeq'ae Bianlyaqminq lye gul biq hhae. 19 Lajyeq sil hhei'laol, yoqhhaeteel lye yoqhhaeq yaol Yiqfaqta vae yil e gaelmae gaeljyel vae baqduqm deelhhei biq. Yiqfaqta laoq Boqlilhenq ngeelvae. 20 Yaqgel lye haqlo qiq siq maellye Lajyeq'ae fuq'ongl oheiq zongl hhei biq. Xilmael laoq yaeqnao keellye zadeel wae siq. 21 Yiqsellyel deelsae hheikaol deel vae, kaol Yiqdeq Haelcul tyuboq'ae haeqpael haelcul cu hhei'ae.
Yiqsellyel e yaqyohael
Dailshangl 2:1-2
22 Yiqsellyel tyuqvae milcaeq vae baelzhol fu, Liuqbenq yoqhhaeq e aeqdae e mae'nil Pilla nyegael ssuqza; Yiqsellyel vae eiq silqinq xilmael gaeq hhei biq vae.
Yaqgel e yaqyo qyelniq hhaeq zhol'ae. 23 Lilyal e yaqyohael laoq Yaqgel e fuqbo yaqyo Liuqbenq, kaol Ximianq, Lilveil, Yoqdal, Yiqsalja kaol Xibullunq'ae. 24 Lajyeq e yaqyohael laoq Yoqsel kaol Bianlyaqminq'ae. 25 Lajyeq e yaqhacheqzaq e haeqmiyaeq Pilla e yaqyohael laoq Danl kaol Naqfuqta'lil'ae. 26 Lilyal e yaqhacheqzaq e haeqmiyaeq Xipal e yaqyohael laoq Jadeq kaol Yalshel'ae. Xihael gilzuqmyel Yaqgel Badanl Yallanq milcaeq vae lye du'lal biq e yaqyohael'ae. 27 Yaqgel laoq Ji'lyel Yalba dongqpyeq e Manllil vae yoqhhaeq e aeqdae Yiqsaq zael'ae keellael. Ji'lyel Yalba laoq Yalboqlahanl kaol Yiqsaq baelzhol yo e Xiboqlunq'ae.
Yiqsaq sil vae