Shiljianl lye Diqnaq yaol maeqnaelhaeq maeqzaeqmyel zuqzaeq biq vae
34
Lilyal lye Yaqgel'ae bo hhei biq e yaeqmiq Diqnaq duyil, kaol tyuqvae milcaeq e yaeqmiyaeq yaol chifu yil. 2 Tyuqvae milcaeq minqcuq e yoheeq, Xiveil cholyaeq Hamoq e yaqyo Shiljianl, yoqhhaeq yaol mol hhei biq laol, yoqhhaeq yaol eetyeq biq, kaol maeqnaelhaeq maeqzaeqmyel zuqzaeq biq vae. 3 Shiljianl e neemae mael Yaqgel e yaeqmiq Diqnaq'ae cho'lyeq yil aeqwae, yoqhhaeq yaeqmiyaeq xitaeq'ae zhee gaeq biq hhae, kaol chilzu'lye saeziq maellye yoqhhaeq'ae haeq nyuqsaeq lye gee biq. 4 Shiljianl yoqhhaeq e aeqdae Hamoq'ae gee biq: "Nol ngaeq'ae yaeqmiyaeq xitaeq yaol bael naelhaeq yil laeq, kaol ngael yoqhhaeq yaol haeqmiq mul maoq." 5 Yaqgel laoq Shiljianl lye yoqhhaeq e yaeqmiq Diqnaq yaol maeqshol myel zonglpeq biq'ae lye gaeq hhei biq; ngeelfeiq, tyuqfu yoqhhaeq e yaqyohael haeldye'ae jyeqyaeq hoqzaq hhae, tyulkaol, yoqhhaeq yotyel maqdumyel yoqhhaeteel hoq keellael fu keellye doq deelhhei.Yaqgel e yaqyohael Diqnaq gae'lye cholyaeq xyeq
6 Shiljianl e aeqdae Hamoq Yaqgel'ae mol yil, kaol yoqhhaeq nyegael geedazaq maoqlye hhae. 7 Yaqgel e yaqyohael silqinq xilmael gaeq hhei gil biq laol haeldye vae lye hoqlal, kaol aeqsul eiq zhee nyuqsaeq kaol neezi zhee zi gil biq. Shiljianl lye Yaqgel e yaeqmiq yaol maeqnaelhaeq maeqzaeqmyel zuqzaeq biq mael, Yiqsellyel cholyaeqhael onglci'ae xilnye xinqlalmyel e silqinq mael qiq hhaeq eiq maeq hhae zongl'ae. 8 Hamoq yoqhhaeteel nyegael geedazaq: "Ngaeq e yaqyo Shiljianl e neemae mael notoq e yaeqmiq'ae cho'lyeq yi aeqwae, kaol noteel yoqhhaeq yaol ngaeq e yaqyo'ae bi mulzaeq. 9 Noteel kaol ngaeteel qiqhhaeq laoq qiqhhaeq e paeqyaeq geiq gil maoq, noteel e yaeqmiyaeqhael ngaeteel e yaqyoyaeqhael'ae bi mulzaeq lael, ngaeteel e yaeqmiyaeqhael eiq noteel sheeqzaeq aeqmeel. 10 Xilnye laol, noteel ngaeteel nyegael baelzhol aeqmeel. Milcaeq xihael laoq noteel e yiqsiboq'ae za hhae, noteel haeqvae zhol goq laol haeqvae zhol gil, senyil mulzaeq gil, kaol zaeqdye halngeiq zhilzaeq gil aeqmeel." 11 Shiljianl Diqnaq e aeqdae kaol yoqhhaeq e algohael kaol aeqnil'ae gee biq: "Noteel ngaeq'ae zhee meeq laeq lye nyuqlil, noteel Diqnaq gae'lye hal mulgoq mael ngael noteel'ae heil gil laeqngeel. 12 Noteel yaeqmiq xitaeq yaol ngaeq'ae haeqmiq bi geiq laq kaollaoq, noteel ngaeq'ae haeldyul miqjyeq kaol zhee heeq e liqvuq saelzaeq feiq, ngael laoq noteel haelgee laoqmyel aeqdilmyel heil gil laeqngeel." 13 Yaqgel e yaqyohael, Shiljianl lye yoqhhaeteel e dulmae Diqnaq yaol maeqnaelhaeq maeqzaeqmyel zuqzaeq biq gae'lye, Shiljianl yoqhhaeq e aeqdae Hamoq'ae zaqgiqgiq biq, 14 Kaol yoqhhaeteel'ae gee biq: "Ngaeteel laoq ngaeteel e dulmae yaol yeqgae gui'liq maeq zongl yo e cholyaeq'ae maeq hhae bi mulzaeq'ae, bi mulzaeq kaollaoq, ngaeteel laoq maduq maqza wae. 15 Loqho qiq mal za'ae: Noteel onglci e haqyoyaeqhael gilzuqmyel ngaeteel laoqmyel yeqgae gui'liq zongl kaollaoq, 16 Ngaeteel laoq yaeqmiq yaol noteel'ae bi mulzaeq laeqngeel, kaol ngaeteel noteel e yaeqmiq eiq sheeqzaeq kael'ae; ngaeteel noteel nyegael qiqgael hhae zhol, kaol aedeeteel gilzuqmyel qiqsheel minqcuq peqlal wae. 17 Ngeelfeiq, noteel ngaeteel gee e saeziq mael maeq naelhaeq kaol yeqgae gui'liq maeq zongl kaollaoq, ngaeteel laoq ngaeteel e aeqnil yaol sheeqsae yil maoq vae."
18 Hamoq kaol yoqhhaeq e yaqyo Shiljianl yoqhhaeteel haelgee mael meeq yae lye kei gil biq. 19 Hamoq toq e cholyaeqhael onglci'ae cholyaeqhael zunjinl gil biq e yaqyoyaeq tyutaeq laoq, nae'naemyel silqinq tyulmael zongl yil vae, yoqhhaeq laoq Yaqgel e yaeqmiq'ae zhee gaeq biq kaol'ae. 20 Hamoq kaol yoqhhaeq e yaqyo Shiljianl aeqyoteel e milmae heeqmyel oheiq'ae keellael, kaol milmae heeqmyel onglci e cholyaeqhael'ae gee biq: 21 "Cholyaeq xihael aedeeteel nyegael haelmeeqlye qiqgael baelzhol, tyulnye laol, yoqhhaeteel yaol saeqvae bi bael zholgae hhei, kaol senyil bi mulzaeq. Aedeeteel e milcaeq zhee heeq'ae, yoqhhaeteel bael zholdyel'ae. Aedeeteel yoqhhaeteel e yaeqmiq yaol haeqmiq hhae sheeqzaeq'ae, kaol aedeeteel e yaeqmiq laoq yoqhhaeteel'ae hhae bi mulzaeq. 22 Ngeelfeiq, aedeeteel onglci'ae haelzhol e haqyoyaeqhael gilzuqmyel yoqhhaeteel laoqmyel yeqgae gui'liq zongl kaolmaoqlaol, cholyaeq xihael aedeeteel nyegael qiqgael maeq baelzhol nae, kaol qiqsheel minqcuq maq peqlal kiq wae. 23 Xilnye kaollaoq, yoqhhaeteel e aqciqhael, jadanglhael kaol jyeqyaeqhael, aeqgael laoq gilzuqmyel aedeeteel e ngeelvae. Aedeeteel laoq yoqhhaeteel'ae hhaeq'ae lye gee biq laol, yoqhhaeteel aedeeteel nyegael qiqgael baelzhol maoqlye hhae." 24 Milmae heeqmyel e oheiq ae'lye hal duyi e cholyaeqhael, Hamoq kaol yoqhhaeq e yaqyo Shiljianl e saeziq mael'ae naelhaeq gil'ae. Tyulkaol, milmae heeqmyel e oheiq ae'lye hal duyi e yaqyohael gilzuqmyel yeqgae gui'liq zongl gil vae. 25 Dilsan tian'ae, yoqhhaeteel nael biq siq fu, Yaqgel e yaqyo niq nulhhaeq, Diqnaq e algo Ximianq kaol Lilveil maejyel baq hheikaol yoqhhaeteel maeq nyuqkeel ongl fu, tyu milmae heeqmyel'ae do'li, kaol haelzhol e haqyoyaeqhael xyeqsil byel biq vae. 26 Yoqhhaeteel maejyel maellye Hamoq kaol yoqhhaeq e yaqyo Shiljianl yaol eiq xyeqsil biq, kaol Shiljianl toq ae'lye Diqnaq yaol sheeq hoqli vae. 27 Yaqgel e baeqjyelboq e yaqyohael Shiljianl ae'lye yoqhhaeteel e dulmae yaol maeqshol myel zonglpeq biq gae'lye, Ximianq kaol Lilveil lye cholyaeqhael xyeq gil biq e tyuqvae keellael, kaol milmae heeqmyel tyulmael diqkoqzaeq biq, 28 Kaol yoqhhaeteel e aqciqhael, aeqnuqhael, mao'lyuhael, milmae heeqmyel kaol haeldye vae halzahael diqkoqzaeq biq, 29 Kaol yoqhhaeteel e gilzuqmyel jadanglhael, yaeqguqhael, cholhae aeqmaehael gilzuqmyel eezaeq byel yil biq, kaol laoqhaol halza e moqgoqhael gilzuqmyel diqkoqzaeq byel biq vae. 30 Yaqgel Ximianq kaol Lilveil'ae gee biq: "Noteel lye ngaeq yaol zonglbeeq yaevae, ngael Ja'nanq kaol Biqlilxiq cholyaeqhael onglci'ae maduq teel eiq maqza yaevae. Aedeeteel cholyaeq maeq naeq, yoqhhaeteel gilzuqmyel qiqboq cholyaeq laoqmyel aedeeteel'ae diq lael kaollaoq, ngael kaol aedeetoq e cholyaeqhael zonglmye hhei wae." 31 Yoqhhaeteel geehoq biq: "Yoqhhaeq haelmillyekaol jilnyuq'ae zongl biq laoqmyel, ngaeteel e dulmae'ae zongl biq hhaemaeq?"