Yaqgel kaol Yiqsaoq maoqhoqli gil vae
33
Yaqgel vuqduq baqtul hheikaol chifu, Yiqsaoq cholyaeq yuqhael (400) hhaeq sheeq hhei myel lael mol hhei biq; kaol yoqhhaeq e yaeqguqhael suq miq byelpa hhei, kaol Lilyal, Lajyeq kaol yaqhacheqzaq e haeqmiyaeq niq nulhhaeq'ae sheeqmoq hhei gil biq'ae. 2 Yoqhhaeq lye yaqhacheqzaq e haeqmiyaeq niq nulhhaeq kaol yoqhhaeteel e yaeqguqhael yaol laefuqboq'ae deel gil lye gee gil biq hhae, Lilyal kaol yoqhhaeq e yaeqguqhael aeqnaolboq'ae cho'lyeq deelhhei, Lajyeq kaol Yoqsel laoq aeqnaol naolli vae deel gil hhae. 3 Yaqgel laoq yoqhhaeteel e laefuqboq'ae deel hhae, kaol yoqhhaeq e algo e yiqsiboq'ae maeq keelli laefuq'ae, yoqhhaeq milcaeq vae vuqduq siq pu tongqgae hhei vae. 4 Yiqsaoq ki'laq kaol yoqhhaeq'ae sheeqcaq yi biq, yoqhhaeq'ae baqcongq biq, kaol yoqhhaeq e kongqlongl mael'ae siqtyeq deelhhei kaol myeqchilnuq biq, kaol niq nulhhaeq myel nyul gil'ae. 5 Yiqsaoq vuqduq baqtul hheikaol chifu, cholhae aeqmaehael kaol yaeqguqhael yaol mol hhei biq, kaol naelhaeq biq: "Noq nyegael qiqgael lael e cholyaeq xihael aeqsul maeq?" Yaqgel geehoq biq: "Yaeqguq xihael laoq Momil noq e yaqhacheqzaq e cholyaeq'ae neemae maeqpaelmyel gaeq laeq kaol biq hhei laq hhae." 6 Tyulkaol, yaqhacheqzaq e haeqmiyaeq niq nulhhaeq kaol yoqhhaeteel e yaeqguqhael laefuqboq'ae vuqduqtongq gae deelhhei lael gil'ae. 7 Lilyal kaol yoqhhaeq e yaeqguqhael laefuqboq'ae vuqduqtongq gae deelhhei lael gil'ae, aeqnaol, Yoqsel kaol Lajyeq eiq laefuqboq'ae vuqduqtongq gae deelhhei lael gil'ae. 8 Yiqsaoq yol naelhaeq biq: "Nol ngaeq'ae jyeqyaeqhael aeqcheekaol lyeqmoq laeq laeq lilmaeq?" Yaqgel geehoq biq: "Xilnye zongl mael laoq, ngaeq e hhaoqsongl e ma'ne yiqsi ae'lye endianq mul maoqlye kaollil." 9 Yiqsaoq gee: "Aeqnil o, ngael yohaha lal wae, noq hael laoq nol mul aeqmeel." 10 Yaqgel gee: "Maeqngeel'ae, ngael noq e ma'ne yiqsi ae'lye endianq hhamul kaollaoq, ngaeq e aqlaq ae'lye liqvuq xihael mul maoqhhae; nol aeqdilmyel ngaeq'ae yuanqliangl laeq vae, kaol ngael noq yaol mol hhei'laol Momil yaol mol hhei laoqmyel yae. 11 Momil ngaeq'ae zhee meeq laeq'ae, kaol ngaeq'ae aeqchee eiq za vae. Tyulkaol, nol ngaeq lye heil biq e liqvuq mael mul maoqhhae." Yaqgel hae'nae pu myel yoqhhaeq'ae gee biq, kaol yoqhhaeq mul vae. 12 Yiqsaoq gee: "Aedeeteel deel gil oq, ngael noq nyegael qiqgael deel maoq." 13 Yaqgel yoqhhaeq'ae gee biq: "Ngaeq e hhaoqsongl, nol ngaeq e yaeqguqhael laoq cholhoq nil wae siq lye loq'ae, kaol ngael yaeqmeel aeqchil dol e aeqnuqhael kaol aqciqhael'ae zhaofu biq maoq, yoqhhaeteel'ae qiq nao myel gaelmae bi deel kaollaoq, jyeqyaeqhael gilzuqmyel sil byel hhei maeqhe. 14 Ngaeq e hhaoqsongl, nol laefuqmyel deel. Ngael ngaeq e jyeqyaeqhael kaol yaeqguqhael gaelmae hael deel ongl dyul lye, maeqyae maeqyae'lye deel maoq, kaol Yiqdong milcaeq e Xi'eq vae noq yaol mol lael hhaeq." 15 Yiqsaoq gee: "Ngaeq'ae cho'lyeq e cholyaeq mee'nae hhaeq yaol noq e saeqvae bi zholdeelsaeq hhaeq." Yaqgel gee: "Xilnye maeq kei kael vae, ngaeq e hhaoqsongl e ma'ne yiqsi ae'lye endianq hhamul hhei laq laol hhaeq vae." 16 Tyulkaol, tyuqfu qiq nao Yiqsaoq deelsae hheikaol deel vae, kaol Xi'eq vae hoqli vae. 17 Ngeelfeiq, Yaqgel laoq Shuge vae keelli vae, tyuqvae aeqyoq'ae laoqhaol qiq ssul cu zaq hhei'ae, jyeqyaeqhael vae eiq haeqyiq haelcul cu beq hhei biq, tyulkaol, tyuqvae milcaeq vae Shuge lye gul biq hhae.Yaqgel Shiljianl vae hhaoqpolpol yil
18 Yaqgel Badanl Yallanq ae'lye hoqlal fu, maeqpaeq maeqnaelmyel Ja'nanq milcaeq e Shiljianl milmae heeqmyel vae keelli, milmae heeqmyel yulboq'ae haeqpael haelcul cu hhei vae. 19 Yoqhhaeq haeqpael haelcul cu deelhhei e aeqhael tyu qiq koq laoq, yoqhhaeq lye pulziq qiqhael (100) maellye Shiljianl e aeqdae Hamoq e yaqyohael ae'lye vulpol hhei hhae. 20 Yaqgel lye tyuqvae jiltanq qiq mal zongl hhei, kaol Yi'lil Yi'loqyi Yiqsellyela lye gul biq hhae.