Yaqgel Yiqsaoq'ae mol yil maoqlye nyuqmeeq wae
32
Yaqgel laefuqboq'ae yol deel, Momil e mqmae yosonglhael yoqhhaeq yaol deelpuq hhei biq. 2 Yaqgel yoqhhaeteel yaol mol hhei biq, kaol gee: "Xihael laoq Momil e junduil'ae." Tyulkaol, yoqhhaeq tyuqvae milcaeq mael Maqha'nianl lye gul biq hhae.3 Yaqgel laefuqmyel cholyaeqhael yaol Yiqdong milcaeq e Xi'eq e geeqzhoqhael vae, yoqhhaeq e algo Yiqsaoq zael'ae moqheilheil duyil vae, 4 Kaol yoqhhaeteel'ae moqheilheil gil biq: "Noteel ngaeq e hhaoqsongl Yiqsaoq'ae xilnye gee biq: 'Noq e yaqhacheqzaq e cholyaeq Yaqgel xilnye gee: Ngael yaeqmeel keellye Laban tyuqvae baelzhol lil. 5 Ngaeq'ae aeqnuqhael, mao'lyuhael, aqciqhael, yaqhacheqzaq e cholyaeqhael zhol lil, kaol ngael yaeqmeel cholyaeq yaol moqheilheil du hheikaol ngaeq e hhaoqsongl'ae geegaeq yi biq, xilnye zongl mael laoq, ngaeq yaol noq e ma'ne yiqsi ae'lye endianq mul maoqlye kaollil."' 6 Moqheilheil duyil e tyuhael Yaqgel tyuqvae hoq keellael laol, gee: "Ngaeteel noq e algo Yiqsaoq zael'ae keelli wae, yoqhhaeq cholyaeq yuqhael (400) hhaeq sheeq hheikaol, noq yaol mol yi maoqlye xiboq'ae lael gil vae." 7 Yaqgel neemae zhollihhael maeqsael myel zongl biq, kaol gusil maoqmyel gu biq hhae, kaol yoqhhaeq'ae bael cho'lyeq e cholyaeqhael, aqciqhael, aeqnuqhael kaol loltoqhael liangq changq byeldu hhei, 8 Kaol neemae onglci'ae nyuq: "Yiqsaoq xi qiq miq'ae diq lael kaollaoq, baeqjyelboq e qiq miq laoq hha kihezaq'ae." 9 Yaqgel gee: "Yeheqhuaq, ngaeq e aeqbol Yalboqlahanl kaol ngaedae Yiqsaq e Momil o, nol ngaeq'ae laefuq gee gol laq: 'Nol dyeqlal e milcaeq vae hoqyil, kaol noq e paeqyaeqhael zael'ae hoq keelyil, ngael aeqdilmyel noq'ae zhee meeq laeqngeel.' 10 Noq lye noq e yaqhacheqzaq e cholyaeq'ae neemae maeqpaelmyel gaeq laeq kaol haelmillye gee laeq laol haelmillye zongl laeq, ngael aeqdilmyel maeq zae yae. Yilkaefu ngael laoq ngaeq e zaeqngeeq mael maoqlaol maeq heil hhei myel Yoqdanl Lolbaeq xilmael'ae guq li; yaeqmeel laoq ngaeq'ae cholyaeqhael kaol jyeqyaeqhael liangq changq zhol lil vae. 11 Ngael yoqhhaeq lye ngaeq yaol xyeq lal mael gu yae, kaol aeqmaehael ae'lye mael yaeqguqhael keellye gilzuqmyel xyeq hhei maeqhe. Tyulkaol, ngaeq yaol ngaeq e algo Yiqsaoq e aqlaq'ae haeq bi leeqdo laq lye noq'ae geezaeq lil. 12 Nol laefuq gee gol: 'Ngael aeqdilmyel noq'ae meeq laeqngeel, noq e houldailhael eeldeel deelmae e sa'la laoqmyel, naeq kaol maeq suqda ongl'ae."'
13 Tyuqfu qiq mil, Yaqgel tyuqvae haq hhae. Aeqnaol qiq nao, yoqhhaeq jyeqyaeqhael onglci ae'lye yil changq byelpa du hhei, kaol yoqhhaeq e algo Yiqsaoq'ae heil biq e liqvuq geiqzaq hhae. 14 Liqvuq tyuhael laoq, aqciq ciqmae niqhael (200) yaeq, aqciq ciqpaeq niqqyel yaeq, aeqyol yolmae niqhael (200) yaeq, kaol aeqyol yolpaeq niqqyel yaeq'ae, 15 Aeqchil maq che myel loltoq toqyaeq sheeq hhei e loltoq aeqmae suqqyel keel, aeqnuq nyelmae yuqqyel keel, aeqnuq nuqpaeq qyel keel, mao'lyu lyumae niqqyel yaeq, kaol mao'lyu lyupaeq qyel yaeq'ae. 16 Yaqgel lye xihael gilzuqmyel yil changq yil changq lye byelpa du hhei, kaol yaqhacheqzaq e cholyaeqhael e aqlaq'ae cheelmoq hhei biq, yaqhacheqzaq e cholyaeqhael'ae gee biq: "Noteel laefuqboq'ae deel gil, yil changq kaol yil changq e kaeqlaeq'ae qiq qye bi kaeq maoqhhae." 17 Yoqhhaeq laefuq fuqli'ae deel e yaqhacheqzaq e cholyaeq qiq hhaeq'ae moqheilheil biq, gee: "Ngaeq e algo Yiqsaoq noq yaol deelpuq hhei fu, yoqhhaeq xilnye naelhaeq lael maeqhe: 'Noq e hhaoqsongl aeqsul maeq? Nol haeqvae yil maoqlye lilmaeq? Noq e yiqsiboq'ae zhol e jyeqyaeq xihael aeqsul hhaemaeq?' Yoqhhaeq noq'ae xilnye naelhaeq lael kaollaoq, 18 Nol laoq yoqhhaeq'ae xilnye geehoq biq: 'Noq e yaqhacheqzaq e cholyaeq Yaqgel hhae, ngaeq e hhaoqsongl Yiqsaoq'ae heil biq e liqvuq'ae, yoqhhaeq eiq ngaeteel aeqnaolboq'ae lael vae."' 19 Yoqhhaeq aeqnaolboq'ae jyeqyaeq fu'qyezaq e dil'el gol, dilsan gol kaol baeqjyelboq e jyeqyaeq fu'qye e cholyaeqhael'ae moqheilheil biq: "Noteel Yiqsaoq yaol deelpuq hhei fu, gilzuqmyel yoqhhaeq'ae xilnye gee biq maoqhhae. 20 Noteel aeqdilmyel xilnye gee maoq wae siq: 'Noq e yaqhacheqzaq e cholyaeq Yaqgel ngaeteel e aeqnaolboq'ae lael vae.'" Yoqhhaeq neemae onglci'ae nyuq: "Ngael laoq ngaeq lye laefuqmyel heil yil biq e liqvuq ae'lye yoqhhaeq nyegael haelmeeqlye maoqhoqli maoq, yoqhhaeq nyegael mol yil, kaol yoqhhaeq ngaeq'ae yuanqliangl laeq maeqhe." 21 Tyulkaol, Yaqgel e yaqhacheqzaq e cholyaeqhael liqvuq geiq e jyeqyaeqhael laefuqmyel lyeq li biq; tyu qiq mil Yaqgel haeqpael haelcul tyuqvae haq hhae.
22 Tyuqfu qiq mil Yaqgel tullael, yoqhhaeq e haeqmiq niq nulhhaeq, yaqhacheqzaq e haeqmiyaeq niq nulhhaeq kaol yaqyo qyelqiq hhaeq yaol sheeq hheikaol, gilzuqmyel Yaqboq Lolbaeq guqheiq ae'lye guq yil gil hhei vae.
Yaqgel kaol mqmae yosongl laqbaq laq'oq zuqgae
23 Yoqhhaeq laoq yoqhhaeteel yaol sheeq hheikaol, yoqhhaeteel yaol lolbaeq vae laefuq bi guq li gil vae, aeqnaol yoqhhaeq e halzahael gilzuqmyel yol bi guq li gil vae. 24 Yaqgel aeqyoq qiq hhaeq maoqlaol maeq zholdeelsaeq'ae, cholyaeq qiq hhaeq lael kaol yoqhhaeq nyegael mqbaebae lael maoq fu keellye laqbaq laq'oq zuqgae hhae. 25 Tyutaeq aeqyoq laoq yoqhhaeq'ae maeq zuq yinq ongl yae lye mol hhei biq, kaol Yaqgel e aeqpaeq paeqheiq mael'ae qiq pu so hhei biq. Tyulkaol, Yaqgel yoqhhaeq nyegael zuqgae fu aeqpaeq paeqheiq mael gaheiq biq vae. 26 Tyutaeq gee: "Mqbaebae lael goqbiq vae, ngaeq'ae bi deel laeq oq." Yaqgel gee: "Nol ngaeq'ae geeqlongq maq biq laq kaollaoq, ngael noq yaol maeq bi deel yil."
27 Tyutaeq Yaqgel'ae naelhaeq biq: "Noq'ae aeqchee lye gul laeq hhaemaeq?" Yoqhhaeq geehoq biq: "Ngaeq'ae Yaqgel lye gul laeq hhae." 28 Tyutaeq gee: "Nol Momil kaol cholyaeq nyegael zuqgae feiq zuq yinq hhei vae, kaol noq e cholmil mael Yaqgel lye haeq gul oq, Yiqsellyel lye gul maoqhhae." 29 Yaqgel yoqhhaeq'ae gee biq: "Noq e cholmil mael ngaeq'ae geedu laq." Tyutaeq geehoq biq: "Aeqcheekaol ngaeq e cholmil mael naelhaeq lilmaeq?" Kaol yoqhhaeq tyuqvae lye Yaqgel'ae geeqlongq biq biq. 30 Tyulkaol, Yaqgel laoq tyuqvae milcaeq'ae Piqnuqyi'lel lye gul biq hhae, Piqnuqyi'lel e yilsi laoq: "Ngaeq e ma'ne mael Momil yaol mol aeqwae, ngeelfeiq, ngael laoq hha dyeqdeel yae siq." 31 Yaqgel Piqnuqyi'lel ae'lye deelsae fu, neelmae byuqdu lal vae. Yoqhhaeq e aeqpaeq paeqheiq nael biq gae'lye dyeq'oq dyeq'oqlye deel hhae. 32 Tyutaeq lye Yaqgel e aeqpaeq paeqheiq e saeqguq mael'ae qiq pu so hhei biq, tyulkaol, Yiqsellyel cholyaeqhael yaeqmeel keellye jyeqyaeq e aeqpaeq paeqheiq e saeqguq mael maeq zaeq gil'ae.