Yaqgel Laban toq ae'lye yotyel maqdumyel kisae vae
31
41 Yaqgel laoq Laban e yaeqguqhael gee e saeziq mael gaeq hhei biq, gee: "Yaqgel lye aedeeteel e aeqdae e halzahael gilzuqmyel heilzaeq yil vae, yoqhhaeq e halzahael gilzuqmyel aedeeteel e aeqdae ae'lye hhae'lael biq hhae." 2 Yaqgel laoq Laban yoqhhaeq'ae gee mael kaol zongl mael laefuq laoqmyel maeq dul yaevae lye loq li biq. 3 Tyuqfu, Yeheqhuaq Yaqgel'ae gee biq: "Nol noq e aeqpyuq aeqdae zhol yo e milcaeq vae, kaol noq e paeqyaeq tyuqvae hoqli, ngael aeqdilmyel noq nyegael qiqgael baelzhol lil." 4 Yaqgel lye cholyaeq yaol moqheilheil du hhei, Lajyeq kaol Lilyal'ae haeldye vae zhol e aqciqhael tyuqvae yi lye bi gul yil'ae, 5 Yaqgel yoqhhaeteel'ae gee biq: "Ngael noteel e aeqdae ngaeq'ae gee mael kaol zongl mael laefuq laoqmyel maeq dul yaevae lye loq wae. Ngeelfeiq, ngaedae e Momil ngaeq nyegael qiqgael baelzhol'ae. 6 Ngael laoq ngael hael zonglkeel ongl maellye noteel e aeqdae'ae fuqsil biq, xilmael laoq noteel loq'ae. 7 Noteel e aeqdae laoq ngaeq'ae zaqgiqgiq laq, ngaeq e mulhhael hhaeqpyuq mael qyel pu zonglpael laeq; ngeelfeiq, Momil laoq yoqhhaeq yaol ngaeq'ae maeq bi zonglkyuq laeq'ae. 8 Yoqhhaeq 'ciqbaq za e aqciqhael laoq noq e mulhhael hhaeqpyuq ngeelvae' lye gee kaollaoq, aqciqhael lye bo hhei hael gilzuqmyel ciqbaq za hhae; yoqhhaeq 'galko laoqmyel caeqhum cuq e aqciqhael noq e mulhhael hhaeqpyuq ngeelvae' lye gee kaollaoq, aqciqhael lye bo hhei hael gilzuqmyel caeqhum mael yil tiaoq yil tiaoq lye cuq hhae. 9 Xilnye laol, Momil lye noteel aeqdae e laoqhaol jyeqyaeqhael lyeq laeq kaol ngaeq'ae biq hhei laq. 10 Aqciqhael ciqmumu naohaeq keellael fu, qiqzael laoq, ngaeq e matu onglci'ae xilnye mol lil: Ciqmaehael'ae pacheeqda deelhhei e ciqpaeqhael onglci'ae, caeqhum mael yil tiaoq yil tiaoq lye cuq e aqciq zoq, ciqbaq za e aqciq zoq, baqlaqbaqci myel eiq zoq. 11 Momil e mqmae yosongl matu onglci'ae lye ngaeq'ae gee laeq: 'Yaqgel.' Ngael gee: 'Ngael saeqvae zhol lil.' 12 Yoqhhaeq gee: 'Laban noq'ae haelzongl biq hael, ngael gilzuqmyel mol aeqwae. Nol vuqduq baqtul hheikaol fu, haelzhol ciqmaehael'ae pacheeqda deelhhei e ciqpaeqhael onglci'ae, caeqhum mael yil tiaoq yil tiaoq lye cuq e aqciq zoq, ciqbaq za e aqciq zoq, baqlaqbaqci myel eiq zoq. 13 Ngael laoq Boqtellil e Momil lil, nol yilkaefu Boqtellil vae haqlo qiq siq baqtul hheikaol zhoqcae cil soda hhei, kaol ngaeq'ae xuqyuanlkei gol laq vae. Tyulkaol, nol yaeqmeel saeqvae milcaeq ae'lye deelsae hhei, kaol nol dyeqlal milcaeq vae hoqyil.'" 14 Lajyeq kaol Lilyal laoq Yaqgel'ae geehoq biq, gee: "Ngaeteel e aeqdae toq vae, ngaeteel'ae byel laeq maoq e zaeqdye halngeiq za siq maeq? 15 Yoqhhaeq ngaeteel'ae qiq haoq cholyaeq'ae lye maeq fu laeq maeqngeel maeq? Yoqhhaeq lye ngaeteel yaol ongqzaeq laeq vae, kaol ngaeteel e hhaeqpyuq eiq zaeqneq hhei. 16 Momil lye ngaeteel e aeqdae ae'lye diqkoq laeq e gilzuqmyel jadanglhael laoq, ngaeteel kaol ngaeteel e yaeqguqhael hhae. Yaeqmeel, Momil noq'ae moqheil haelmillye heil laeq laol nol haelmillye zongl aeqmeel."17 Tyulkaol, Yaqgel aeqyoq e yaeqguqhael kaol haeqmiqhael gilzuqmyel nae'naemyel loltoq mael'ae bi ziq da'li gil'ae. 18 Yoqhhaeq laoq Badanl Yallanq vae hael hhae'lael biq e jyeqyaeqhael lyeq hhei, gilzuqmyel jadanglhael heil hhei, kaol yoqhhaeq e aeqdae Yiqsaq zhol e Ja'nanq milcaeq'ae yil maoqlye hhae. 19 Tyuqfu Laban laoq aqciqhael e caeqhum no yil hhae, Lajyeq lye yoqhhaeq e aeqdae e cholyaeq lye zongldu hhei e momilhael haoqzaeq biq. 20 Yaqgel laoq Yallanq cholyaeq Laban'ae zaqgiqgiq biq vae. Yoqhhaeq Laban'ae qiqgiq lye maeq gee biq myel kisae vae. 21 Tyulkaol, Yaqgel aeqyoq e halzahael heil hheikaol kisae hhei vae. Yoqhhaeq deelsae hheikaol deel vae, kaol Yolfa'ladiq Lolbaeq vae guq yil vae, kaol Ji'lyel Geeqzhoqhael boq'ae deel yil vae.
22 Dilsan tian'ae, ochoq Laban'ae Yaqgel kisae vae lye geegaeq biq. 23 Laban aeqyoq e paeqyaeqhael yaol sheeq hheikaol Yaqgel'ae lyeq yil, siq nao lyeq hhei'laol Ji'lyel Geeqzhoq vae lye yoqhhaeteel yaol lyeq puq hhei vae. 24 Tyuqfu qiq mil, Momil matu onglci'ae lye Yallanq cholyaeq Laban zael'ae keellael, yoqhhaeq'ae gee biq: "Nol aeqyae'lye kei maoqhhae, Yaqgel'ae maeq hhae zonglnael biq'ae, meeq eiq maeq hhae gee biq, dyul eiq maeq hhae gee biq'ae." 25 Laban Yaqgel'ae lyeq puq hhei vae. Tyuqfu, Yaqgel laoq geeqzhoq vae haeqpael haelcul cu hhei wae; Laban kaol aeqyoq e paeqyaeqhael eiq Ji'lyel Geeqzhoq vae haeqpael haelcul cu hhei gil vae. 26 Laban Yaqgel'ae gee biq: "Nol aeqcheekaol xilnye zongl lilmaeq? Nol ngaeq'ae maeq bi loq laeq myel, ngaeq e yaeqmiqhael yaol daqzhangldiq fu eezaeq yil e cholyaeqhael laoqmyel eezaeq yil laeq. 27 Nol aeqcheekaol yotyel maqdumyel ngaeq'ae maeq biq loq laeq myel kisae hhei lilmaeq? Nol ngaeq'ae geegaeq laeq kaollaoq, ngael hhaol gae'lael aeqmyel changlgo changl, heeqdeeq diq, dilhongq diq hhei myel noq'ae sheeqsae biq. 28 Nol laoq yaeqzhoqzhoq biq she! Nol laoq ngaeq yaol yuqpaeq yuqnyulhael kaol yaeqmiqhael'ae myeqchil maeq bi nuq laq. 29 Ngael noq'ae zonglnael ongl e aqha za lil, ngeelfeiq, milkiq, noteel e aeqdae e Momil ngaeq'ae gee laeq: 'Nol aeqyae'lye kei maoqhhae, Yaqgel'ae maeq hhae zonglnael biq'ae, meeq eiq maeq hhae gee biq, dyul eiq maeq hhae gee biq'ae.' 30 Nol yaeqmeel nodae'ae zhee nyuqdu biq'ae, kaol aeqdilmyel hoqyil aeqmeel, ngeelfeiq, aeqcheekaol ngaeq e cholyaeq lye zongldu hhei e momilhael haoqzaeq laeq lilmaeq?" 31 Yaqgel Laban'ae geehoq biq: "Ngael kisae mael laoq, noq lye noq e yaeqmiqhael yaol ngaeq e saeqvae lye diqkoqzaeq hoqyil laeq maeqhe lye gu laq kaol'ae. 32 Noq e cholyaeq lye zongldu hhei e momilhael, nol aeqsul ae'lye saelpodu hhei'laol, tyutaeq laoq hhae sil ngeelvae; nol ngaeteel e paeqyaeqhael yiqsiboq ae'lye saelpo fufu, saeqvae noq e moqgoq zoq kaollaoq, nol heil yil aeqmeel." Tyuqfu, Yaqgel laoq Lajyeq lye aeqyoq aeqdae e cholyaeq lye zongldu hhei e momilhael haoqzaeq hhae lye maeq loq biq wae siq.
33 Laban Yaqgel e haeqpael haelcul, Lilyal e haeqpael haelcul kaol yaqhacheqzaq e haeqmiyaeq niq nulhhaeq e haeqpael haelcul'ae saelpo li vae, ngeelfeiq, qiqgiq maeq saelpodu hhei'ae. Laban Lilyal e haeqpael haelcul ae'lye duyi laol, Lajyeq e haeqpael haelcul'ae do'li vae. 34 Lajyeq lye aeqyoq e aeqdae e cholyaeq lye zongldu hhei e momilhael loltoq e anziq holhhaq'ae heildeel hhei hhae, kaol aeqyoq laoq holtaqboq'ae zhol da deelhhei'ae. Laban haeqpael haelculhael'ae saelpo dyu byel vae, ngeelfeiq, qiqgiq maeq saelpodu hhei hhae. 35 Lajyeq yoqhhaeq e aeqdae'ae gee biq: "Ngaeq e hhaoqsongl haeq holzaeq lye geezaeq lil, ngaeq'ae siqza laq hhae, kaol ngael noq e yiqsi ae'lye maeq tullael sael yae." Xilnye laol, Laban haelmillye saelpo feiq cholyaeq lye zongldu hhei e momil tyuhael yaol maeq saelpopuq hhei ongl biq'ae.
36 Yaqgel faqhoqkei tullaeq, kaol Laban'ae gaezaeq biq. Yaqgel Laban'ae vuq biq, gee: "Ngael aeqdilmyel aeqchee zonglzhil, aeqchee golsiq za, kaol nol laoq ngaeq'ae nae'naemyel xilnye lyeq lael laeq lilmaeq? 37 Nol ngaeq e halza e moqgoqhael saelpo dyu byel hhei, nol notoq e moqgoq mael saelpopuq hhei wae maeq? Saelpo hhei kaollaoq, ngaeq e paeqyaeqhael yiqsiboq'ae baqdu hhei, kaol yoqhhaeteel yaol nol kaol ngael aeqsul zongl mael hoq maeq lye bi bael gee gil maoq. 38 Xi niqqyel hoq, ngael noq nyegael qiqgael baelzhol; noq e aeqyol yolmaehael kaol aqciq ciqmaehael ciqyaeq pi hhei fu, qiqzael eiq maeq leeqgae yo'ae, kaol noq e aqciqhael onglci'ae aeqyol yolpaeq e saeqzil eiq ngael maeq zaeq yo yil. 39 Byeljyeq lye ee'nu e aqciqhael laoq, ngael noq'ae maeq heilhoqlaeq biq yil, gilzuqmyel ngaeq lye peiqhoq hhei lil. Mqkiq haoq, mqnao haoq cholyaeq lye haoqzaeq yil hael, nol gilzuqmyel ngaeq'ae saelhoq laeq. 40 Ngael mqnao laoq aeqcael honglbo'lye pe, mqkiq cheeqhaeq haeqdaeqdaeq, kaol maeq yuqxul li kiq, ngael haeqfu eiq xilnye lil. 41 Ngael xi niqqyel hoq notoq'ae baelzhol, noq e yaeqmiq niq nulhhaeq gae'lye noq'ae qyel'yuq hoq fuqsil biq; noq e aqciqhael vae eiq koq hoq bal hoqzaq biq; noq lye ngaeq e mulhhael hhaeqpyuq mael qyel pu zonglpael laeq. 42 Ngaedae Yiqsaq kaol ngaebol Yalboqlahanl heel e Momil, ngaeq nyegael qiqgael maeq baelzhol kaollaoq, nol yaeqmeel ngaeq'ae aqlaq alngeiqmyel bi hoqli laq ngeelvae. Ngeelfeiq, Momil ngaeq e saeq mael kaol aqlaq e mulhhael mael mol vae, kaol Momil milkiq noq'ae gaezaeq hhae."
Yaqgel kaol Laban geemeeq deelhhei gil
43 Laban Yaqgel'ae geehoq biq: "Yaeqmiyaeq xihael laoq ngaeq e yaeqmiq'ae; yaeqguq xihael laoq ngaeq e yaeqguq'ae; aqciq xihael eiq ngaeq e aqciq ngeelvae. Noq e yiqsi'ae haelmol laelkiq hael gilzuqmyel ngaeq hhae. Ngaeq e yaeqmiqhael kaol yoqhhaeteel lye hael bo hhei e yaeqguqhael'ae, ngael yoqhhaeteel yaol noq nyegael maeq bi bal yil lye zongl kiq maeq? 44 Lael, yaeqmeel ngael kaol nol geemeeq deelhhei gil maoq, geemeeq deelhhei e xilmael laoq aedee niq nulhhaeq e zenljul ngeelvae." 45 Yaqgel haqlo qiq siq baq laq, baqtul hheikaol geemeeq deelhhei e jilhaol geiq hhae. 46 Yaqgel aeqyoq e paeqyaeqhael'ae gee biq: "Noteel haqlo baqgongq deelhhei gil." Tyulkaol, yoqhhaeteel haqlo baq laq kaol qiqgael baqgongq deelhhei. Yoqhhaeteel hogongq e dongqpyeq'ae zaeq dol gil hhae. 47 Laban hogongq tyulmael'ae Yija'eq Saqhadulta lye gul biq hhae, Yaqgel laoq hogongq tyulmael'ae Ja'leildeq lye gul biq hhae. 48 Laban gee: "Yaeqnao hogongq xilmael laoq nol kaol ngaeq e zenljul ngeelvae." Tyulkaol, Ja'leildeq lye gul biq hhae, 49-50 Laban gee: "Aedeeteel qiq hhaeq qiqjyel'ae deelsae aeqnaol, Yeheqhuaq aedeeteel zongl mael chifu maoqlye hhae. Nol ngaeq e yaeqmiq'ae maeqmeeq biq, paelsilmyel baeqjyelboq e haeqmiq sheeqzaeq, ngaeteel saeqvae cholyaeqhael maeq loq feiq, Momil laoq nol kaol ngaeq e onglci'ae zoqzenl biq lye nyuqlil." Tyulkaol, hogongq tyulmael Miqsiba lye eiq gul biq hhae. 51 Laban Yaqgel'ae yol gee biq: "Nol hogongq xilmael'ae fu, ngael kaol noq e onglci'ae haqlo jilhaol baqtul deelhhei mael'ae chifu. 52 Hogongq xilmael laoq zenljul'ae, haqlo jilhaol mael eiq zenljul'ae, ngael aeqdilmyel haqlo xihael ae'lye maeq deelpol duyil, nol eiq aeqdilmyel hogongq kaol haqlo jilhaol saeqvae lye maeq hhae deelpol du'laq'ae, kaol ngaeq'ae maeq hhae zonglnael lael laeq'ae. 53 Nobol Yalboqlahanl kaol ngaebol Naqhel heel e Momil, aedeeteel onglci'ae panlduanl biq lye nyuqlil." Kaol Yaqgel laoq aeqyoq e aeqdae Yiqsaq heel e Momil'ae tyuq deelhhei kaol faqsilkei vae. 54 Yaqgel geeqzhoq vae Momil'ae zaelheel baqheel biq, aeqyoq e paeqyaeqhael'ae aelhoq zaeq lael lye gul biq. Yoqhhaeteel aelhoq zaeqdye hhei'laol, geeqzhoq vae haq gil hhae. 55 Laban mqshoq naqlye tullael laol, yoqhhaeq e yuqpaeq yuqnyulhael kaol yaeqmiqhael'ae myeqchilnuq gil biq'ae, kaol yoqhhaeteel'ae geeqlongq biq biq. Aeqnaol laoq Laban tyuqvae lye deelsae hheikaol aeqyoq e milcaeq vae hoqli vae.