30
Lajyeq aeqyoq lye Yaqgel'ae yaeqguq maeq bo hhei biq yae lye loq li biq, kaol yoqhhaeq e aelbae'ae heiqcilnael biq, kaol Yaqgel'ae gee biq: "Nol ngaeq'ae yaqyo biq laq, maq biq laq kaollaoq ngael sil maoq vae." 2 Yaqgel Lajyeq'ae hol biq, gee: "Noq'ae yaeqguq maeq bi bo kiq mael laoq Momil'ae, ngael Momil e vuqtu mael hha geiq maeq?" 3 Lajyeq gee: "Ngaeq e yaqhacheqzaq e haeqmiyaeq Pilla saeqvae zhol hhae, nol yoqhhaeq nyegael qiqgael ssuqza, kaol yoqhhaeq lye bo hhei e yaqyo laoq ngaeq hhae lye geiqzaq maoq, tyulnye laol, ngael laoq yoqhhaeq ae'lye yaeqguq hhae'lael vae." 4 Tyulkaol, Lajyeq lye yoqhhaeq e yaqhacheqzaq e haeqmiyaeq Pilla yaol Yaqgel'ae mae'nil bi geiq hhae, kaol Yaqgel yoqhhaeq nyegael qiqgael ssuqza vae. 5 Pilla'ae yaeqguqpi li biq vae, kaol Yaqgel'ae yaqyo qiq hhaeq bo hhei biq vae. 6 Lajyeq gee: "Momil ngaeq'ae bal gaiqjiq laeq vae, kaol ngaeq e yotyel mael eiq gaeq vae, kaol ngaeq'ae yaqyo qiq hhaeq biq hhei laq vae." Tyulkaol, yoqhhaeq yaeqguq e cholmil mael Danl lye gul biq hhae. 7 Lajyeq e yaqhacheqzaq e haeqmiyaeq Pilla yaeqguq yol qiq hhaeq pi'li biq vae, kaol Yaqgel'ae yaqyo dil'el gol bo hhei biq. 8 Lajyeq gee: "Ngael aelbae nyegael guaeq'ei zongltyeltoq lil, kaol ngael zonglyinq wae." Tyulkaol, yoqhhaeq yaeqguq e cholmil mael Naqfuqta'lil lye mil biq hhae.9 Lilyal aeqyoq yaeqguq maeq bo yaevae lye loq li biq, kaol yoqhhaeq e yaqhacheqzaq e haeqmiyaeq Xipal yaol Yaqgel'ae sheeqmoq hhei biq kaol mae'nil bi geiq hhae. 10 Lilyal e yaqhacheqzaq e haeqmiyaeq Xipal lye Yaqgel'ae yaqyo qiq hhaeq bo hhei biq. 11 Lilyal gee: "Ngaeq e aeqyil mael zhee meeq yae." Kaol yoqhhaeq e cholmil mael Jadeq lye mil biq hhae. 12 Lilyal e yaqhacheqzaq e haeqmiyaeq Xipal lye Yaqgel'ae yaqyo dil'el gol bo hhei biq. 13 Lilyal gee: "Ngael aeqdilmyel geeqlongq meeq yaevae, cholhae aeqmaehael laoq ngaeq'ae aeqdilmyel geeqlongq meeq'ae lye gee laeq." Tyulkaol, yoqhhaeq yaeqguq e cholmil mael Yalshel lye gul biq hhae.
14 Meqziq yeqzaeq hhaeq fu, Liuqbenq duyil laol haeldye vae lye feng'qyeqa mol hhei biq, kaol yoqhhaeq e aeqmae Lilyal'ae heilmoq hhei biq. Lajyeq Lilyal'ae gee biq: "Noq e yaqyo lye heilhoqlaeq e feng'qyeq mael ngaeq'ae teel byel hhei laeq." 15 Lilyal Lajyeq'ae geehoq biq: "Noq lye ngaeq e haqyo yaol diqkoqzaeq yil laeq vae, maeqbeeq'ae lye kei laeq hhaemaeq? Nol ngaeq e yaqyo lye heilhoqlaeq e feng'qyeq mael eiq diqkoqzaeq maoqlye lilmaeq?" Lajyeq gee: "Ngael noq e yaqyo e feng'qyeq tyulmael gae'lye, yaeqmil Yaqgel yaol noq nyegael qiqgael bi bael ssuqza lal hhaeq." 16 Kiqsulkiqxeiq keellael vae, Yaqgel haeldye ae'lye hoqlal fu, Lilyal duyil kaol yoqhhaeq'ae sheeq hoqyil biq, gee: "Ngael aeqdilmyel ngaeq e yaqyo e feng'qyeq maellye noq yaol vul laq wae, tyulkaol, nol ngaeq nyegael qiqgael bael ssuqza maoqhhae." Tyuqfu qiq mil, Yaqgel Lilyal nyegael qiqgael ssuqza vae. 17 Momil laoq Lilyal gee e heeldoq mael gaeq vae, kaol Lilyal'ae yaeqguqpi li biq vae, kaol Yaqgel'ae yaqyo dilvuq gol bo hhei biq. 18 Lilyal gee: "Ngaeq lye ngaeq e yaqhacheqzaq e haeqmiyaeq yaol ngaeq e haqyo'ae mae'nil bi geiq wae, Momil ngaeq'ae hhaeqpyuq heil laeq vae." Tyulkaol, yoqhhaeq yaeqguq e cholmil mael Yiqsalja lye mil biq hhae. 19 Lilyal yaeqguq yol pi'li biq, Yaqgel'ae yaqyo dilluq gol bo hhei biq vae. 20 Lilyal gee: "Momil lye ngaeq'ae meeq e liqvuq mael heil hhei laeq'ae, ngaeq lye yoqhhaeq'ae yaqyo koq hhaeq bo hhei biq, tyulkaol, yaeqmeel qiq pu laoq ngaeq e haqyo e neemae mael ngaeq boq'ae pol maoqlye wae." Kaol yoqhhaeq yaeqguq e cholmil mael Xibullunq lye mil biq hhae. 21 Xibullunq e aeqnaol'ae, Lilyal lye yaeqmiq qiq hhaeq bo hhei, kaol yoqhhaeq e cholmil mael Diqnaq lye mil biq hhae.
22 Momil Lajyeq'ae fupol biq kaol yoqhhaeq e heeldoq mael gaeq vae, kaol yoqhhaeq'ae yaeqguq bi pi'li kiq vae. 23 Lajyeq'ae yaeqguqpi li vae, kaol yaqyo qiq hhaeq bo hhei, gee: "Momil lye ngaeq e maduq maqza mael beiqgae laeq vae." 24 Tyulkaol, yoqhhaeq yaeqguq e cholmil mael Yoqsel lye mil biq hhae, gee: "Ngael Yeheqhuaq'ae heeldoq gee biq maoq, Yeheqhuaq ngaeq'ae yaqyo qiq hhaeq biq hhei laq siq lye nyuqlil."
Yaqgel Laban toq ae'lye yohaha lal vae
25 Lajyeq Yoqsel yaol bo hhei aeqnaol'ae, Yaqgel Laban'ae gee biq: "Nol ngaeq'ae bi deelsae laeq oq, ngael laoq ngael dyeqlal e milcaeq kaol ngatoq'ae hoqyil maoq. 26 Ngael noq'ae haelmillye mulhhael bal mul laq lye nol loq'ae, kaol ngael noq'ae fuqsil gae'lye hhae'lael e haeqmiq kaol yaeqguqhael gilzuqmyel ngaeq'ae biq hhei laq, kaol ngaeq'ae bi hoqli laq." 27 Laban yoqhhaeq'ae gee biq: "Nol ngaeq'ae zhee meeq kaollaoq, nol haeq deelsae, ngael moqpilpil yo aeqwae, Yeheqhuaq ngaeq'ae geeqlongq biq laq mael laoq noq gae'lye hhae." 28 Yoqhhaeq yol gee: "Nol ngaeq'ae geedu laq, nol mulhhael hhaeqpyuq haeldyul mulgoq laol ngael haeldyul heil laeqngeel." 29 Yaqgel Laban'ae gee biq: "Ngael noq'ae haelmillye fuqsil biq, kaol noq e aqciqhael ngaeq e aqlaq ae'lye haelmillye zheeqlael hhae lye nol loq'ae. 30 Ngael notoq'ae maeq lael fu, noq'ae aqciq haelnaeqmyel maeq zhol'ae, ngeelfeiq, yaeqmeel laoq haelnaeqmyel naeqlael wae; ngael noq e aqciqhael haeqvae hoqzaq kaol'eiq, Yeheqhuaq noq'ae geeqlongq biq biq'ae. Yaeqmeel, ngael laoq haeqfu ssuqhaoq hhae caqzaq tullaeq hhaemaeq?" 31 Laban yoqhhaeq'ae naelhaeq biq: "Ngael noq'ae aeqchee heil laeq maeq?" Yaqgel geehoq biq: "Nol ngaeq'ae qiqgiq eiq maeq heil laeq kael; nol xilnye hhaeq lil lye kaollaoq, ngael laoq laefuq laoqmyel noq'ae aqciqhael bal hoqzaq kaol bal fu'qye laqngeel siq. 32 Yaeqnao ngael noq e aqciqhael onglci'ae deeldyu byel maoq, gilzuqmyel aeqyol yolbaq, gilzuqmyel aeqyol yolna, kaol gilzuqmyel ciqbaq za e aqciq saelpodu hhei maoq, kaol ngaeq e mulhhael hhaeqpyuq geiqzaq maoq. 33 Aeqgael nol ngaeq e mulhhael hhaeqpyuq mael fu lael fu, nol laoq ngael zaqgiq maqgiq cholyaeq'ae lye loq'ae. Ngaeq e aqciqhael onglci'ae ciqbaq maqza e aqciq kaol bachi'lye aeqyol zoq kaollaoq, gilzuqmyel ngaeq lye haoqzaeq laeq ngeelvae." 34 Laban geehoq biq: "Hhaeq'ae, nol gee laoqmyel zongl yil aeqmeel." 35 Tyuqfu qiq nao, Laban lye caeqhum mael yil tiaoq yil tiaoq lye cuq e aqciq ciqpaeq kaol ciqbaq za e aqciq ciqpaeq, ciqbaq kaol bachi'lye caeqhum mael yil tiaoq yil tiaoq lye cuq e ciqmae, kaol gilzuqmyel aeqyol yolnahael, xihael gilzuqmyel saelpodu hheikaol aeqyoq e yaqyohael'ae eemoq hhei biq vae. 36 Tyulkaol, yoqhhaeteel aqciq tyuhael lyeq hheikaol deel vae, kaol Yaqgel nyegael gaelmae suq nao hhae deel dyul kaeq myel vae keelyil vae; Yaqgel laoq Laban e baeqjyelboq e aqciqhael hoqzaq deelsaeq hhae.
37 Yaqgel lye beqyangq aelbol, geilci aelbol kaol feng aelbol, aelbol xihael lye naoqgaeqlye allaq dega hhei, allaq e alho mael yoga hhei, kaol bachi'lye bi mol du'lal, 38 Kaol alho yoga e allaq tyuhael aqciqhael boq'ae polyil hhae, kaol eelko kaol hongdeel vae cotul deelhhei. Aqciqhael eelcuq dol lael fu, ciqpaeqhael ciqmaehael'ae pacheeqda biq. 39 Aqciqhael allaqhael cotul deelhhei myel'ae pacheeqda gil, kaol bogae hhei e ciqyaeqhael laoq caeqhum mael yil tiaoq yil tiaoq lye cuq e aqciq kaol ciqbaq za e aqciq'ae. 40 Yaqgel lye aeqyol yolyaeqhael byeldu hhei, kaol yoqhhaeteel yaol Laban e aqciqhael onglci e caeqhum mael yil tiaoq yil tiaoq lye cuq e aqciqhael kaol ciqnahael e yulboq'ae bi gazaq, aeqyoq e aqciqhael Laban e aqciqhael onglci'ae maeq bi baelzhol myel qiqjyelboq'ae bi zhol hhae. 41 Beiqsa'lye aqciq ciqmaehael ciqmumu fu, Yaqgel lye allaq mael eelko vae cotul deelhhei, kaol yoqhhaeteel allaqhael za myel vae bi pacheeqda gil'ae. 42 Ngeelfeiq, goheiqlye aqciqhael pacheeqda gil fu, Yaqgel laoq allaq maeq cotul'ae. Xilnye laol, goheiqlyehael laoq Laban hhae, culdyeqlye hael laoq Yaqgel hhae. 43 Tyulkaol, Yaqgel laoq yoha hamae peqlal vae. Yoqhhaeq'ae aqciq, yaqhacheqzaq e cholyaeq, yaqhacheqzaq e haeqmiyaeq, loltoq kaol mao'lyu haelnaeqmyel zhol vae.