Yaqgel Badanl Yallanq vae keelyil vae
29
Yaqgel deelsae hheikaol deel vae, kaol neeldu aelheiq boq'ae zhol e minqcuqhael e milcaeq vae keelli vae. 2 Qiq nao laoq, yoqhhaeq haeldye e eelduq vae keellael, kaol aqciq hoqzaq e cholyaeqhael aqciqhael'ae eelcuq bi dol maoqlye mol hhei biq. Eelduq dongqpyeq vae aqciqhael oqbaq suq gael baq deelhhei hhae. Eelduq mael laoq haqlo haeqheemyel qiq siq baqkaeq deelhhei hhae. 3 Aqciqhael gilzuqmyel eelduq vae deel'eeq laeq laol, aqciq hoqzaq e cholyaeq lye baqkaeq deelhhei e haqlo mael moqtael hhei, kaol eelcuq pyeq da hheikaol aqciqhael'ae bi dol gil'ae, aeqnaol laoq haqlo mael moqchiq hoq hhei vae. 4 Yaqgel aqciq hoqzaq e cholyaeq xihael'ae naelhaeq biq: "Yelchoqhael o, noteel laoq haeqvae lye lael gil lilmaeq?" Yoqhhaeteel geehoq biq: "Ngaeteel laoq Ha'lanq milcaeq ae'lye lael aeqlil." 5 Yoqhhaeq yoqhhaeteel'ae naelhaeq biq: "Noteel Naqhel e yuqpaeq Laban yaol loq gil lilmaeq?" Yoqhhaeteel geehoq biq: "Ngaeteel loq lil." 6 Yaqgel yoqhhaeteel'ae yol naelhaeq biq: "Yoqhhaeq'ae zholsael biq maeq?" Yoqhhaeteel geehoq biq: "Zholsael biq'ae. Nol fu, yoqhhaeq e yaeqmiq Lajyeq aqciqhael lyeq hheikaol lael vae." 7 Yaqgel gee: "Yaeqmeel neelmae haeqgaomyel za wae siq, aqciqhael deel'eeq fu maeq keel'ae siq; noteel eelcuq kuqda hheikaol aqciqhael'ae bi dol gil, kaol hoqzaq yil gil siq." 8 Yoqhhaeteel geehoq biq: "Ngaeteel xilnye maeq hhae zongl'ae, aeqdilmyel aqciqhael gilzuqmyel deel'eeq laeq fu doqkeel, kaol cholyaeq lye eelduq vae baqkaeq deelhhei e haqlo mael moqtael hheikaol, ngaeteel aqciqhael'ae eelcuq kuqda hheikaol bi dol." 9 Yaqgel yoqhhaeteel nyegael saeziq gee siq fu, Lajyeq yoqhhaeq e aeqdae e aqciqhael lyeq laeq. Lajyeq laoq aqciq hoqzaq e yaeqmiyaeq'ae. 10 Yaqgel yoqhhaeq e aeqhhao Laban e yaeqmiq Lajyeq, kaol aeqhhao Laban e aqciqhael mol hhei biq, kaol laefuqboq'ae deel da'li, kaol eelduq e haqlo mael moqtael hhei'ae, eelcuq kuqda hheikaol yoqhhaeq e aeqhhao Laban e aqciqhael'ae bi dol'ae. 11 Yaqgel Lajyeq'ae myeqchilnuq hhei biq, kaol nyul tullaeq. 12 Yaqgel Lajyeq'ae geegaeq biq: "Ngael laoq nodae e yaq'yul lil, Lilbaiqja e yaqyo lil." Lajyeq ki yil kaol yoqhhaeq e aeqdae'ae geegaeq yil biq.13 Laban yoqhhaeq e yaq'yul Yaqgel lael e gaeq hhei biq laol, ki yil kaol yoqhhaeq'ae sheeqcaq yil biq'ae, kaol yoqhhaeq'ae baqcongq biq, yoqhhaeq'ae myeqchilnuq biq, kaol yoqhhaeq yaol aeqyotoq'ae sheeq hoqli vae. Yaqgel lye gilzuqmyel silqinqhael Laban'ae geegaeq hhei biq. 14 Laban Yaqgel'ae gee biq: "Nol laoq ngatoq e qiqbeeqleel cholyaeq'ae." Yaqgel Laban toq'ae baehae qiq siq baelzhol vae.
Yaqgel Laban e yaeqmiq niq nulhhaeq yaol haeqmiq sheeqzaeq
15 Laban Yaqgel'ae gee biq: "Nol laoq ngaeq e paeqyaeq'ae, alngeiqmyel ngaeq'ae fuqsil laeq maq hoq'ae. Nol ngaeq'ae geedu laq, ngael noq'ae mulhhael hhaeqpyuq haeldyul heil laeq maeq?" 16 Laban'ae yaeqmiq niq nulhhaeq zhol'ae: Hhael heeq e qiq hhaeq e cholmil mael Lilyal lye gul biq hhae, hhael nil e qiq hhaeq Lajyeq lye gul biq hhae. 17 Lilyal e ma'ne mael aelgaeqgaeq lael aeqmyel hhae, ngeelfeiq, Lajyeq laoq zhigaq gaqda aeqmyel hhae. 18 Yaqgel laoq Lajyeq'ae gaeq biq, tyulkaol, Laban'ae gee biq: "Ngael noq e hhael nil yaeqmiq Lajyeq gae'lye noq'ae siq hoq fuqsil laeqngeel." 19 Laban gee: "Ochoq'ae bi mulzaeq yil mael taq'ae laoq, noq'ae bi mulzaeq mael hhael hhaeq'ae, tyulkaol, nol ngatoq'ae baelzhol aeqmeel." 20 Tyulkaol, Yaqgel Lajyeq gae'lye Laban'ae siq hoq fuqsil biq vae; yoqhhaeq Lajyeq'ae gaeq biq kaol xi siq hoq laoq qiqniq nao laoqmyel dul biq hhae.
21 Yaqgel Laban'ae gee biq: "Ngael noq'ae mulhhael siq hoq bal mul bong aeqwae, noq e yaeqmiq yaol ngaeq'ae bi mul laq oq, kaol ngael yoqhhaeq nyegael qiqgael zhol maoq." 22 Laban baqwanq baqdeel hhei, kaol tyuqvae milcaeq vae haelzhol cholyaeqhael'ae aelhoq gulzaeq gil biq. 23 Mqkiq keellael laol, Laban lye yoqhhaeq e yaeqmiq Lilyal yaol Yaqgel'ae sheeqmoq li biq, kaol Yaqgel yoqhhaeq nyegael ssuqza vae. 24 Laban lye yoqhhaeq e yaqhacheqzaq e haeqmiyaeq Xipal yaol aeqyoq e yaeqmiq Lilyal'ae yaqhacheqzaq e haeqmiyaeq bi geiq hhae. 25 Mqshoq keellael laol, Yaqgel yoqhhaeq nyegael ssuqza qiq hhaeq Lilyal'ae lye mol hhei biq, kaol Laban'ae gee biq: "Nol aeqcheekaol ngaeq'ae xilnye zongl laeq lilmaeq? Ngael Lajyeq gae'lye noq'ae fuqsil biq maeqngeel maeq? Nol aeqcheekaol ngaeq'ae zaqgiqgiq laq lilmaeq?" 26 Laban geehoq biq: "Hhael heeq yaeqmiq maeq mulzaeq myel, hhael nil yaeqmiq yaol laefuqmyel bi mulzaeq, ngaeteel saeqvae xilnye beideelhhei e maqza. 27 Nol kaol ngaeq e hhael heeq yaeqmiq yulyaeq mulzaeq e naohaeq siq nao gol hhei'laol, ngaeteel hhael nil yaeqmiq qiq hhaeq eiq noq'ae biq laqngeel, ngeelfeiq, nol ngaeq'ae siq hoq fuqsil laeq maoq wae siq." 28 Tyulkaol, Yaqgel laoq xilnye zongl vae. Yoqhhaeq kaol Lilyal e yulyaeq mulzaeq e naohaeq siq nao gol hhei'laol, Laban lye aeqyoq e yaeqmiq Lajyeq yaol Yaqgel'ae biq hhei biq kaol haeqmiq bi mul hhae. 29 Laban lye yoqhhaeq e yaqhacheqzaq e haeqmiyaeq Pilla yaol yaeqmiq Lajyeq vae yaqhacheqzaq e haeqmiyaeq bi geiq hhae. 30 Yaqgel Lajyeq nyegael qiqgael ssuqza vae, Yaqgel laoq Lilyal taq'ae laoq Lajyeq'ae hhaelgaeq biq'ae; tyulkaol, yoqhhaeq Laban'ae siq hoq yol fuqsil biq vae.
Yaqgel e yaeqguqhael
31 Yeheqhuaq laoq Yaqgel Lilyal'ae maeq hhaelgaeq biq'ae lye mol hhei biq, kaol yoqhhaeq'ae yaeqguq bi pi'li vae, ngeelfeiq, Lajyeq laoq maeq pi'li kiq biq'ae. 32 Lilyal'ae yaeqguqpi li kaol yaqyo qiq hhaeq bogae hhei'ae, kaol cholmil mael Liuqbenq lye mil hhei biq, yoqhhaeq gee: "Yeheqhuaq ngaeq e saeq mael mol vae, kaol yaeqmeel ngaeq e haqyo ngaeq'ae aeqdilmyel gaeq laeq wae." 33 Yoqhhaeq'ae yaeqguq yol pi'li biq, kaol yaqyo qiq hhaeq bogae hhei, gee: "Yeheqhuaq laoq ngaeq e haqyo ngaeq'ae maeq gaeq laeq'ae lye mael gaeq hheikaol, ngaeq'ae yaeqguq xitaeq biq hhei laq hhae." Tyulkaol, yoqhhaeq yaeqguq'ae Ximianq lye gul biq hhae. 34 Yoqhhaeq'ae yaeqguq yol pi'li biq, yaqyo qiq hhaeq bogae hhei, kaol gee: "Ngaeq lye ngaeq e haqyo'ae yaqyo suq nulhhaeq bo hhei biq, kaol yaeqmeel qiq pu laoq, ngaeq e haqyo ngaeq'ae aeqdilmyel gaeq laeq maoqlye hhae." Tyulkaol, yoqhhaeq yaeqguq e cholmil mael Lilveil lye gul biq hhae. 35 Yoqhhaeq yaeqguq yol pi'li, yaqyo qiq hhaeq bo hhei, kaol gee: "Yaeqmeel qiq pu laoq, ngael Yeheqhuaq'ae meeqyaevae lye laqma deiqqei biq maoq." Tyulkaol, yoqhhaeq yaeqguq e cholmil mael Yoqdal lye gul biq hhae. Tyuq ae'lye aeqnaol laoq, yoqhhaeq yaeqguq maeq bo vae.