Yiqsaq lye Yaqgel yaol Laban zael'ae yil lye moqheilheil du hhei
28
Yiqsaq lye Yaqgel yaol gul laeq, yoqhhaeq'ae geeqlongq biq hhei biq, kaol yoqhhaeq'ae moqheilheil biq, gee: "Nol Ja'nanq milcaeq e yaeqmiyaeq maeq hhae sheeqtoq'ae. 2 Waekei, nol Badanl Yallanq vae nomae e aeqdae Biqtuqlil toq'ae yil, tyuqvae noq e aeqhhao Laban e yaeqmiq qiq hhaeq yaol haeqmiq sheeqzaeq yil. 3 Ngael heeldoq gee maoq, hhael'onglzaeq zaeqli Momil noq'ae geeqlongq biq biq lye nyuqlil, kaol noq e houldail haelnaeqmyel bi naeqlael, kaol haelnaeqmyel e minqcuq peqlal biq lye nyuqlil. 4 Momil laoq aeqyoq lye Yalboqlahanl'ae biq hhei biq e geeqlongq mael, nol kaol noq e houldailhael'ae bi biq hhei, kaol Momil lye Yalboqlahanl'ae biq hhei biq e nol baelzhol e milcaeq tyulmael, nol hhae zhol gaeyil e milcaeq bi geiq." 5 Tyulkaol, Yiqsaq Yaqgel'ae yil lye gee biq. Kaol Yaqgel Badanl Yallanq'ae yil vae, kaol Yallanq cholyaeq Biqtuqlil e yaqyo Laban tyuqvae keelli. Laban laoq Yaqgel kaol Yiqsaoq e aeqmae Lilbaiqja e algo'ae. 6 Yiqsaoq laoq Yiqsaq Yaqgel'ae geeqlongq biq biq, kaol yoqhhaeq'ae Badanl Yallanq vae haeqmiq sheeqzaeq yil lye gee biq mael gaeq hhei biq; Yiqsaq Yaqgel'ae geeqlongq biq biq fu yoqhhaeq'ae "Nol Ja'nanq milcaeq e yaeqmiyaeq maeq hhae sheeqzaeq" lye moqheilheil biq mael eiq gaeq hhei biq; 7 Yaqgel aeqyoq e aeqdae aeqmae e saeziq mael naelhaeq, kaol Badanl Yallanq'ae yil vae lye yol gaeq hhei biq; 8 Yiqsaoq laoq yoqhhaeq e aeqdae Yiqsaq Ja'nanq milcaeq e yaeqmiyaeq'ae maeq fuyo biq'ae lye fuduzaq hhei'ae. 9 Tyulkaol, Yiqsaoq Yiqshiqmaqlil zhol e milcaeq vae yil, yoqhhaeq e haeqmiq niq nulhhaeq dyul maeqcilmyel, baeqjyelboq e haeqmiq qiq hhaeq sheeqtoq hhei, yoqhhaeq laoq Maqha'la lye gul biq hhae. Maqha'la laoq Yalboqlahanl e yaqyo Yiqshiqmaqlil e yaeqmiq, Niqbailyoq e dulmae'ae.Yaqgel Boqtellil vae maeqdaeqhhaeq myel matutu li biq
10 Yaqgel Byeqshilba ae'lye deelsae hheikaol Ha'lanq'ae yil vae. 11 Yoqhhaeq milcaeq qiqgael vae keelyil fu, neelmae leeqdo vae, tyulkaol, yoqhhaeq tyuqvae haq maoqlye zongl hhae. Yoqhhaeq tyuqvae milcaeq e haqlo qiq siq baq hheikaol, vuq'ongq'ongq kaol tyuqvae yuqxul vae. 12 Yoqhhaeq'ae matu qiq mal tu li biq. Yoqhhaeq matu onglci'ae baqtul deelhhei e dazul qiq mal mol hhei biq, kaol dazul tyulmael e vuqduq mael mqmae'ae maol da keelli vae. Momil e mqmae yosonglhael laoq dazul taq'ae deel da deel gae myel deel gil'ae. 13 Yeheqhuaq yoqhhaeq e dongqpyeq'ae haoqtul deelhhei, gee: "Ngael laoq Yeheqhuaq, nobol Yalboqlahanl e Momil kaol nodae Yiqsaq e Momil lil. Ngael yaeqmeel nol ssuqza e Ja'nanq milcaeq mael nol kaol noq e houldailhael'ae biq biq maoq. 14 Ngael noq e houldailhael milcaeq e milxul laoqmyel bi naeqlael maoq; nol neeldu aelheiq, kaol neelgae aelheiq, kaol nanqfang, kaol beqfang vae zhol zheeq du beq yil; milcaeq holtaq'ae aeqsul toq eiq, nol kaol noq e houldailhael gae'lye geeqlongq meeq vae. 15 Ngael noq nyegael qiqgael baelzhol lil, nol haeqvae yil feiq, ngael noq'ae fupol lil; ngael noq yaol sheeq hheikaol saeqvae sheeqhoq keellaeq maoq, kaol ngael noq'ae haelgee biq e saeziqhael peqlal fu keellye noq'ae maeq deelsae laeqngeel." 16 Yaqgel nyuq lael laol, gee: "Yeheqhuaq aeqdilmyel saeqvae zhol ngeel'ae, ngeelfeiq, ngael laoq maeq loq yil!" 17 Yoqhhaeq gu tullaeq biq, gee: "Saeqvae milcaeq laoq maeqdaeqhhaeq'ae, saeqvae laoq Momil e heelhaol'ae, kaol saeqvae laoq mqmae e oheiq laoqmyel hhae."
Yaqgel Momil'ae xuqyuanlkei biq
18 Yaqgel naqlye tullael laol, yoqhhaeq laefuq ssuqza fu vuq'ongq mul e haqlo tyulmael, baqtul hheikaol jilhaol geiq'ae, kaol zhoqcae cil mael haqlo tyulmael taq'ae beiqxeiq da hhei biq. 19 Yoqhhaeq lye tyuqvae milcaeq mael Boqtellil lye mil hhei biq'ae, ngeelfeiq, milmae heeqmyel tyulmael laefuq laoq Lulsi lye gul hhae. 20 Tyulkaol, Yaqgel Momil'ae xuqyuanlkei biq, gee: "Momil ngaeq nyegael qiqgael baelzhol, ngael hael deel e gaelmae vae ngaeq'ae fupol laeq, ngaeq'ae zaeqzael heilmoq laeq, aelhongq bi dum laeq, 21 Kaol ngaeq'ae maeqpaeq maeqnaelmyel ngaedae toq'ae bi hoq keelli laeq kaollaoq, ngael aeqdilmyel Yeheqhuaq laoq ngaeq e Momil bi geiq maoq. 22 Ngaeq lye baqtul deelhhei e haqlo xi qiq siq za myel e milcaeq laoq, Momil e heelhaol peqlal maoqlye hhae; noq lye ngaeq'ae hal biqlaqhael, ngael qyel mael onglci e qiq mal laoq noq'ae heelda hhei maoq."