Yaqgel laoq zaqgiq maellye geeqlongq giqzaq laq
27
Yiqsaq yaeqmoqmoq fu, ma'ne haeldyulmyel maeq mol congl biq vae, kaol moqgoqhael eiq maeq mol congl biq'ae; yoqhhaeq lye yoqhhaeq e fuqbo yaqyo Yiqsaoq yaol gul laeq, kaol yoqhhaeq'ae gee biq: "Ngaeq e yaqyo o!" Yiqsaoq yoqhhaeq'ae geehoq biq: "Ngael saeqvae zhol lil." 2 Yiqsaq gee: "Ngael yaeqmeel yaeqmoqmoq yaevae, haeqfu sil lael maeqhe. 3 Nol yaeqmeel noq e byeljyeq bezaq e gongjul hael heil hhei, moqgoqhael laoq, bedul kaol kamaq mael ngeelvae, kaol byelcongq vae ngaeq'ae byeljyeq saeqzil be yil laq. 4 Ngael zhee zaeq goq e zaeqmyel lael aeqmyel caq du hhei laq, baq laq kaol ngaeq'ae bi zaeq laeq; xilnye laol, ngael sil lael maoq laefuq'ae noq'ae geeqlongq biq laqngeel."5 Yiqsaq aeqyoq e yaqyo Yiqsaoq'ae saeziq gee biq fu, Lilbaiqja eiq gaeq vae. Yiqsaoq laoq byelcongq'ae duyil kaol byeljyeq be hoq laq maoqlye fu, 6 Lilbaiqja aeqyoq e yaqyo Yaqgel'ae gee biq: "Nodae noq e algo Yiqsaoq'ae gee biq e saeziq mael ngael gaeq wae. 7 Yoqhhaeq xilnye gee: 'Nol byeljyeq saeqzil be hoq laq kaol ngaeq'ae zaeqmyel lael aeqmyel caq du hhei laq, baq laq kaol ngaeq'ae bi zaeq laeq, ngael sil lael maoq laefuq'ae Yeheqhuaq e yiqsiboq ae'lye noq'ae geeqlongq biq laqngeel.' 8 Ngaeq e yaqyo o! Nol yaeqmeel ngaeq e saeziq mael naelhaeq maoqhhae, ngael noq'ae moqheilheil biq laoqmyel zongl yil. 9 Nol nae'naemyel aqciqhael zhol myel vae yil, ngaeq'ae culdyeqlye naoqgaeqlye aqciq ciqyaeq niq yaeq cheellaeq laeq, kaol ngael nodae zhee zaeq goq biq laoqmyel, yoqhhaeq'ae zaeqmyel lael aeqmyel caq du hhei biq maoq. 10 Nol baq li kaol nodae'ae bi zaeq hhei, tyulkaol, yoqhhaeq sil li maoq laefuq'ae noq'ae geeqlongq bi biq hhei." 11 Yaqgel yoqhhaeq e aeqmae Lilbaiqja'ae gee biq: "Ngeelfeiq, ngalgo Yiqsaoq'ae laoq aeqhhaol qiqsiqmyel caeqhum cuq hhae, ngaeq e aeqhhaol mael laoq zhisoqlye hhae. 12 Ngaedae ngaeq'ae so lal kaollaoq, ngael laoq zaqgiqgiqzaq e cholyaeq'ae lye kei biq wae, tyuqfu ngael laoq aeqdilmyel geeqlongq hhamul maeqngeel'ae, doqchiq hhae bi gee ngeelvae." 13 Yoqhhaeq e aeqmae yoqhhaeq'ae gee biq: "Ngaeq e yaqyo o, noq'ae doqchiq yo'lael kaollaoq, ngael pi hhaeq. Nol ngaeq e saeziq mael naelhaeq laol hhaeq vae, yil kaol aqciq mael ngaeq'ae cheellaeq laeq." 14 Yoqhhaeq yil laol aqciq ciqyaeqhael cheellaeq, kaol yoqhhaeq e aeqmae'ae cheelmoq hhei biq vae, kaol yoqhhaeq e aeqmae laoq aeqdae zhee zaeq goq biq laoqmyel, zaeqmyel lael aeqmyel caq du hhei biq vae. 15 Lilbaiqja laoq aeqyoq e fuqbo yaqyo Yiqsaoq lye laoqhaol vae heildeel hhei e hhaelmeeq meeqli e aelhongq mael, heil laeq kaol yoqhhaeq e hhael nil e yaqyo Yaqgel'ae bi dumda hhei'ae. 16 Lilbaiqja lye aqciq ciqyaeqhael e saeqgeel mael, Yaqgel e aqlaq kaol kongqlongl e zhisoqlye hhae deiqmaoq da hhei biq, 17 Kaol yoqhhaeq lye caq du hhei e zaeqmyel e saeqzil kaol aqbahael, yoqhhaeq e yaqyo Yaqgel e aqlaq'ae baqmoq hhei biq'ae.
18 Yaqgel yoqhhaeq e aeqdae tyuqvae keellael, gee: "Ngaeq e aeqdae o!" Yiqsaq gee: "Ngael naelhaeq deelhhei lil. Ngaeq e yaqyo, nol haetaeq lilmaeq?" 19 Yaqgel yoqhhaeq e aeqdae'ae gee biq: "Ngael laoq noq e fuqbo yaqyo Yiqsaoq lil, nol ngaeq'ae moqheilheil laeq mael ngael zongl yil wae. Tullael kaol ngaeq lye be laq e byeljyeq saeqzil mael zaeq hhei, kaol ngaeq'ae geeqlongq biq laq." 20 Yiqsaq aeqyoq e yaqyo'ae naelhaeq biq: "Ngaeq e yaqyo o, nol haelmillye qiqlaqlye byeljyeq saeqzil be laq lilmaeq?" Yaqgel geehoq biq: "Noq e Momil Yeheqhuaq lye ngaeq'ae naohaeq yomeeq bi deelpuq hhei laeq hhae." 21 Yiqsaq Yaqgel'ae gee biq: "Ngaeq e yaqyo, ngaeq e yiqsiboq'ae lael, kaol ngael noq'ae so fufu lil. Ngael laoq nol ngaeq e yaqyo Yiqsaoq ngeel maeq maeqngeel maeq lye loq maoq." 22 Yaqgel aeqyoq e aeqdae Yiqsaq zael'ae deel niqli vae. Yiqsaq yoqhhaeq'ae so fufu laol, gee: "Yotyel mael laoq Yaqgel e yotyel, aqlaq mael laoq Yiqsaoq e aqlaq yae." 23 Yoqhhaeq e aqlaq mael, aeqyoq e algo Yiqsaoq e aqlaq laoqmyel caeqhum cuq gongq, kaol Yiqsaq laoq yoqhhaeq Yaqgel'ae lye maeq loq biq'ae, tyulkaol, yoqhhaeq'ae geeqlongq biq biq vae. 24 Yiqsaq naelhaeq biq: "Nol aeqdilmyel ngaeq e yaqyo Yiqsaoq lilmaeq?" Yaqgel geehoq biq: "Ngael ngeel lil." 25 Yiqsaq gee: "Byeljyeq saeqzil mael ngaeq'ae heil hhei laeq, kaol ngael byeljyeq saeqzil mael zaeq hhei'laol, noq'ae geeqlongq biq laqngeel." Yaqgel lye saeqzil mael yoqhhaeq'ae baqmoq hhei biq, kaol yoqhhaeq zaeq vae; yoqhhaeq'ae zilbaeq baqmoq hhei biq, kaol yoqhhaeq dol vae. 26 Yoqhhaeq e aeqdae Yiqsaq yoqhhaeq'ae gee biq: "Ngaeq e yaqyo, ngaeq e yiqsiboq'ae lael, kaol ngaeq'ae myeqchilnuq lal." 27 Yaqgel laefuqboq'ae da'li kaol aeqdae'ae myeqchilnuq biq; yoqhhaeq e aeqdae yoqhhaeq e aelhongq mael'ae nulsael lael aeqmyel mael zhoq shi'nul yo hhei biq laol, yoqhhaeq'ae geeqlongq biq biq, gee:
"Naelhaeq, ngaeq e yaqyo e nulsael lael aeqmyel mael,
Yeheqhuaq geeqlongq biq biq e haeldye ae'lye du'lal e nulsael mael laoqmyel hhae.
28 Ngael Momil'ae heeldoq gee biq maoq,
kaol Momil lye mqmae taq e cheeqhaeq,
milcaeq taq e milmeeq kaol duqgongqgongq e zaelsiq,
kaol zilbaeq zilsheq mael noq'aea biq hhei biq lye nyuqlil.
29 Ngael Momil'ae heeldoq gee biq maoq,
haelzhol cholyaeqhael noq'ae fuqsil lael,
kaol minqcuqhael noq'ae vuqduq tongq lael biq lye nyuqlil;
nol noq e aqsseq aeqnilhael e hhaoqsongl geiq,
kaol noq e aeqmae e yaqyohael noq'ae vuqduq tongq lael biq lye nyuqlil;
noq'ae doqchiq gee laeq e qiq hhaeq'ae doqchiq yo'li biq lye nyuqlil;
noq'ae geeqlongq biq laq e qiq hhaeq'ae geeqlongq meeq li biq lye nyuqlil."
Yiqsaoq yoqhhaeq e aeqdae'ae geeqlongq biq laq lye geezaeq biq
30 Yiqsaq Yaqgel'ae geeqlongq biq biq e aeqnaol'ae, Yaqgel aeqyoq e aeqdae zaellye duyi fu, yoqhhaeq e algo Yiqsaoq byeljyeq saeqzil be hoqlaq vae. 31 Yoqhhaeq eiq zaeqmyel lael aeqmyel zaeqzael caq du hhei, kaol yoqhhaeq e aeqdae'ae baqmoq hhei biq. Yiqsaoq aeqyoq e aeqdae'ae gee biq: "Aeqdae, tullael kaol noq e yaqyo lye be hoq laq e byeljyeq saeqzil mael zaeq hhei, kaol ngaeq'ae geeqlongq biq laq." 32 Yoqhhaeq e aeqdae Yiqsaq yoqhhaeq'ae naelhaeq biq: "Nol haetaeq lilmaeq?" Yoqhhaeq geehoq biq: "Ngael noq e fuqbo yaqyo Yiqsaoq lil." 33 Yiqsaq aeqhhaol qiqsiqmyel saeqzuqzuq tullaeq biq, gee: "Aelmaol, nol maeq keellael siq fu, ngaeq'ae byeljyeq saeqzil baq laq kaol bi zaeq laeq e qiq hhaeq laoq aeqsul maeq? Nol maeq keellael siq fu, ngael zaeq aeqwae, kaol ngael yoqhhaeq'ae geeqlongq biq biq wae; yoqhhaeq aeqgael geeqlongq aeqdilmyel meeq wae." 34 Yiqsaoq yoqhhaeq e aeqdae gee e saeziq mael gaeq hhei'laol, zhee nyuqsaeq biq kaol yotyel haeqheemyel nyul'ae, kaol yoqhhaeq e aeqdae'ae gee biq: "Ngaeq e aeqdae, ngael eiq noq'ae geeqlongq biq laq lye geezaeq lil." 35 Yiqsaq gee: "Nonil lael vae, kaol zaqgiqgiq e loqho maellye noq e geeqlongq mael diqkoqzaeq yil vae." 36 Yiqsaoq gee: "Yoqhhaeq lye ngaeq yaol niq pu giqzaq laq wae. Laefuq yoqhhaeq lye ngaeq e fuqbo yaqyo e laqtaq mael diqkoqzaeq laeq, yaeqmeel yoqhhaeq lye ngaeq e geeqlongq mael eiq diqkoqzaeq yil laeq. Tyulkaol, yoqhhaeq e cholmil mael Yaqgel lye gul biq e zhee zae'li shevae." Yiqsaoq yol gee: "Nol ngaeq'ae biq laq e geeqlongq qiqgiq maeq byel deelhhei laeq lilmaeq?" 37 Yiqsaq Yiqsaoq'ae geehoq biq, gee: "Ngael Yaqgel'ae gee gol biq aeqwae, ngaeq lye yoqhhaeq yaol noq e hhaoqsongl bi geiq maoq, noq e houldailhael eiq yoqhhaeq e houldailhael'ae yaqhacheqzaq e cholyaeqhael bi geiq maoq, kaol Momil laoq zaelsiq kaol siqbaq zilbaeq mael yoqhhaeq'ae maqqyemyel heil biq lye gee biq wae. Tyulkaol, ngaeq e yaqyo, ngael noq'ae aeqchee baelzongl ongl siq maeq?" 38 Yiqsaoq yoqhhaeq e aeqdae'ae naelhaeq biq: "Ngaeq e aeqdae o! Noq'ae geeqlongq tyulmael maoqlaol maqza maeq? Ngaeq e aeqdae o! Ngael eiq noq'ae geeqlongq biq laq lye geezaeq lil." Kaol Yiqsaoq yotyel haeqheemyel nyul tullaeq. 39 Yoqhhaeq e aeqdae Yiqsaq yoqhhaeq'ae geehoq biq, gee:
"Naelhaeq deelhhei, nol zhol e milcaeq vae milmeeq maqza,
Momil laoq noq e milcaeq'ae cheeqhaeq eiq maeq bi gaeyi'ae.
40 Nol laoq ochoq nyegael diqgae diqgaemyel hhae zonglzhol ngeelvae,
nol laoq noq e aeqnil e yaqhacheqzaq e cholyaeq hha geiq ngeelvae;
ngeelfeiq, nol dongbeiqzaeq hhei fu,
yoqhhaeq noq'ae maeq zongltyeq ongl vae."
Yiqsaoq Yaqgel'ae holzaeq biq
41 Yiqsaoq aeqyoq e aeqdae Yaqgel'ae geeqlongq biq biq gae'lye Yaqgel'ae neemasu biq; Yiqsaoq neemae onglci'ae nyuq: "Ngaedae haeldyul maeqngeel laol sil wae, yoqhhaeq sil hhei'laol, ngael ngae'nil Yaqgel yaol xyeqsil maoq." 42 Cholyaeq lye Lilbaiqja e fuqbo yaqyo Yiqsaoq gee gol e saeziq mael Lilbaiqja'ae geegaeq hhei biq, kaol Lilbaiqja lye cholyaeq yaol aeqyoq e hhael nil e yaqyo Yaqgel yaol bi gul laeq, kaol yoqhhaeq'ae gee biq: "Noq e algo Yiqsaoq nol haelzongl gae'lye noq yaol xyeq hhei'laol neemae zholsael yae lye gee hhae. 43 Ngaeq e yaqyo o, yaeqmeel nol laoq ngaeq e saeziq mael naelhaeq: Waekei, Ha'lanq vae ngaeq e algo Laban zael'ae kihhaq yil, 44 Kaol yoqhhaeq nyegael qiqtongq baelzhol yil, noq e algo neema maq su zaq fu keellye tyuqvae zhol maoqhhae. 45 Noq e algo noq'ae neema maq su zaq, kaol nol yoqhhaeq'ae haelzongl biq e silqinq mael yelbael fu, ngael cholyaeq yaol moqheilheil du hheikaol noq yaol tyuqvae lye bi sheeqhoqlaeq laeqngeel. Ngael no niq nulhhaeq qiq nao ae'lye sil hhei mael gu yae."
46 Lilbaiqja Yiqsaq'ae gee biq: "Ngael Hel cholyaeq e yaeqmiyaeq xihael gae'lye kyuq kaol maeq hhaeq yaevae. Yaqgel eiq Yiqsaoq laoqmyel Hel cholyaeq e yaeqmiyaeq yaol haeqmiq sheeqzaeq kaollaoq, ngael eiq dyeq deelhhei kaol aeqchee yilsi za siq maeq?