Yiqsaq kaol Yalbiqmiqlel
26
Yalboqlahanl e naohaeq fu, hoqlaq maeqmeeq qiqgiq zaeq eiq maqza myel qiqzael yo'lael aeqwae. Yaeqmeel tyuqvae milcaeq vae hoqlaq maeqmeeq qiqgiq zaeq eiq maqza myel yol peqlal. Yiqsaq laoq Ji'la'eq milcaeq vae yil kaol Fei'lilshil cholyaeq e zongmae Yalbiqmiqlel tyuqvae keelyil vae. 2 Yeheqhuaq Yiqsaq'ae bi molli, gee: "Nol Aijiq vae haeq gaeyil, ngael noq'ae tyuqmyeq biq milcaeq vae zholgae hhei maoqhhae. 3 Ngael laoq milcaeq xihael gilzuqmyel nol kaol noq e houldailhael'ae biq biq maoqlye lil, ngael nodae Yalboqlahanl'ae faqsilkei gol biq mael zongl maoqlye lil. Tyulkaol, nol laoq saeqvae milcaeq vae baelzhol maoqhhae, ngael noq nyegael qiqgael baelzhol maoqlye lil, kaol noq'ae geeqlongq biq laqngeel. 4 Ngael laoq noq e houldailhael haelnaeqmyel bi zheeqlael maoqlye lil, kaol mqmae taq e aeqgeel tyuhael laoqmyel bi naeqlael laeqngeel; ngael milcaeq xihael gilzuqmyel noq e houldailhael'ae biq biq maoq; kaol milcaeq taq e halza e goqjahael gilzuqmyel noq e houldailhael gae'lye geeqlongq meeq vae. 5 Yalboqlahanl ngaeq e saeziq mael naelhaeq vae, ngaeq e moqheilheil mael, ngaeq e minllinl mael, ngaeq e tiaoqlil mael kaol ngaeq e geemyeq mael gilzuqmyel zongl gaeyil vae." 6 Tyulkaol, Yiqsaq laoq Ji'la'eq milcaeq vae zholgae hhei vae. 7 Tyuqvae milcaeq e cholyaeqhael Yiqsaq vae haeqmiyaeq xitaeq aeqsul maeq lye naelhaeq biq. Yiqsaq "Yoqhhaeq laoq ngaeq e haeqmiq'ae" lye maeq gee peq biq, tyulkaol, xilnye geehoq biq: "Yoqhhaeq laoq ngaeq e dulmae'ae." Yoqhhaeq neemae mael'ae nyuq: "Saeqvae milcaeq e cholyaeqhael zhigaqlye yaeqmiq Lilbaiqja gae'lye ngaeq yaol xyeqsil lael maeqhe." 8 Yiqsaq tyuqvae zhol mael maolgael vae. Qiq nao laoq, Fei'lilshil cholyaeqhael e zongmae Yalbiqmiqlel maekael gonglbyu ae'lye nilduboq'ae chifu laol, Yiqsaq laoq yoqhhaeq e haeqmiq Lilbaiqja'ae gaeq yae lye so biq mol hhei biq. 9 Tyulkaol, Yalbiqmiqlel lye Yiqsaq yaol gul laeq, kaol yoqhhaeq'ae gee biq: "Yoqhhaeq laoq aeqdilmyel noq e haeqmiq'ae. Nol aeqcheekaol yoqhhaeq laoq noq e dulmae'ae lye gee lilmaeq?" Yiqsaq yoqhhaeq'ae geehoq biq: "Ngaeq e neemae mael'ae nyuq: 'Ngael yoqhhaeq gae'lye hhae sil maeqhe.'" 10 Yalbiqmiqlel gee: "Nol ngaeteel'ae aeqcheekaol xilnye zongl laeq lilmaeq? Cholyaeqhael onglci e cholyaeq qiq hhaeq noq e haeqmiq nyegael qiqgael ssuqza kaollaoq, noq lye ngaeteel yaol golsiq za myel vae bi leeqdo laq vae." 11 Tyulkaol, Yalbiqmiqlel yoqhhaeq e goqja e cholyaeqhael'ae minllinl gil biq, gee: "Aeqsul cholyaeq xitaeq kaol yoqhhaeq e haeqmiq'ae zonglkyuq biq kaollaoq, aeqdilmyel hhae bi zonglsil ngeelvae."12 Yiqsaq tyuqvae aeqhael mulzaeq. Yeheqhuaq yoqhhaeq'ae geeqlongq biq biq, tyulkaol, tyuqfu qiq hoq zaelsiq haelnaeqmyel hhae'lael biq. 13 Kaol yoqhhaeq qiq nao qiq nao lye henq da'lal, nyeq'ei ta nyeq'ei hhal za lal vae, kaol yoha hamae peqlal vae. 14 Yoqhhaeq'ae aqciqhael, aeqnuqhael kaol yaqhacheqzaq e cholyaeqhael haelnaeqmyel zhol'ae. Tyulkaol, Fei'lilshil cholyaeqhael yoqhhaeq'ae heiqcilnael gil biq. 15 Yoqhhaeq e aeqdae Yalboqlahanl dyeq siq fu, yoqhhaeq e aeqdae e yaqhacheqzaq e cholyaeqhael lye duq hhei e eelduqhael, Fei'lilshil cholyaeqhael lye milcaeq maellye baqbong byel biq vae. 16 Yalbiqmiqlel Yiqsaq'ae gee biq: "Nol ngaeteel taq'ae hhael henq'ae, tyulkaol, ngaeteel zaellye deelsae hhei." 17 Tyulkaol, Yiqsaq tyuqvae lye deelsae hhei vae, Ji'la'eq Longlkaeq vae haeqpael haelcul cu hheikaol tyuqvae zholgae hhei.
18 Yoqhhaeq e aeqdae Yalboqlahanl dyeq siq fu, Yalboqlahanl e yaqhacheqzaq e cholyaeqhael lye duq hhei e eelduqhael, Yalboqlahanl sil e aeqnaol laoq Fei'lilshil cholyaeqhael lye milcaeq maellye gilzuqmyel baqbong byel biq vae. Yiqsaq lye eelduq xihael yaol yol qiq pu duq duhoq hhei, kaol yoqhhaeq e aeqdae mil deelsaeq laoqmyel eelduq xihael'ae tyulnye gul biq wae siq. 19 Yiqsaq e yaqhacheqzaq e cholyaeqhael longlkaeq vae eelduq duqzaeq gil'ae, tyuqvae eelbi qiqgael duq puq hhei biq'ae. 20 Ji'la'eq e aqciq hoqzaq e cholyaeqhael kaol Yiqsaq e aqciq hoqzaq e cholyaeqhael deiqgae tullaeq, gee: "Eelduq xilmael laoq ngaeteel hhae." Yoqhhaeteel Yiqsaq nyegael eelcuq xilmael gae'lye deiqgaezaeq gol hhae, tyulkaol, Yiqsaq eelduq tyulmael'ae Aisel lye gul biq hhae. 21 Yiqsaq e yaqhacheqzaq e cholyaeqhael lye baeqjyelboq e eelduq yol qiq mal duq du hhei vae, ngeelfeiq, yoqhhaeteel eiq eelduq xilmael gae'lye deiqgae tullaeq vae. Tyulkaol, Yiqsaq lye eelduq tyulmael'ae Xitiqnaq lye gul biq hhae. 22 Yiqsaq tyuqvae lye deelsae hhei, baeqjyelboq e eelduq qiq mal duq du hhei vae; yoqhhaeteel eelduq xilmael vae maeq bael deiqgaezaeq vae, kaol Yiqsaq xilnye gee: "Yaeqmeel Yeheqhuaq lye aedeeteel'ae maeq fumil ongl myel e milcaeq biq hhei laq, kaol aedeeteel saeqvae lye yohaha da'lal maoqlye hhae." Tyulkaol, yoqhhaeq lye eelduq tyulmael vae Lilheqboq lye mil hhei biq'ae.
"Ngael laoq noq e aeqdae Yalboqlahanl e Momil lil;
ngael noq nyegael qiqgael baelzhol lil,
tyulkaol, nol maq gu kael;
ngaeq e yaqhacheqzaq e cholyaeq Yalboqlahanl gae'lye,
ngael noq'ae geeqlongq biq laqngeel,
kaol noq e houldailhael haelnaeqmyel bi naeqlael maoq."
25 Yiqsaq lye tyuqvae jiltanq qiq mal zongl hhei, kaol Yeheqhuaq e cholmil mael'ae geezaeq biq hhae; tyuqvae haeqpael haelcul qiq ssul cu hhei; Yiqsaq e yaqhacheqzaq e cholyaeqhael lye tyuqvae eiq eelduq qiq mal duq du hhei vae.
Yiqsaq kaol Yalbiqmiqlel geemeeq deelhhei vae
26 Yalbiqmiqlel kaol yoqhhaeq e yelchoq Yalhulsaq, kaol yoqhhaeq e junduil'ae sheeqmyeqzaeq e yoheeq Feigel, Ji'la'eq vae lye Yiqsaq tyuqvae keellael vae. 27 Yiqsaq yoqhhaeteel'ae naelhaeq biq: "Noteel ngaeq'ae neemasu zaq laq, kaol ngaeq yaol noteel onglci ae'lye lyeqdu laq, aeqcheekaol ngaeq e saeqvae yol lael gil lilmaeq?" 28 Yoqhhaeteel geehoq biq: "Ngaeteel Yeheqhuaq noq nyegael qiqgael baelzhol lye aeqdilmyel mol gil aeqwae, tyulkaol, ngaeteel xilnye gee: 'Aedeeteel maeq zonglgae vae lye qiqhhaeq qiqhhaeq'ae faqsilkei mael hhael meeq'ae.' Tyulkaol, ngaeteel noq nyegael geemeeq deelhhei maoq. 29 Ngaeteel noq'ae qiqzael eiq maeq zonglnael gol biq, noq'ae haelmeeqlye za biq, kaol noq'ae neesaelhhae'lye bi deelsae hhei laoqmyel, nol eiq ngaeteel'ae maeq zonglnael gil laeqngeel lye faqsilkei laeq maoqhhae. Yaeqmeel nol laoq Yeheqhuaq lye geeqlongq biq biq e cholyaeq wae." 30 Yiqsaq yoqhhaeteel'ae baqwanq baqdeel hhei gil biq, kaol yoqhhaeteel qiqgael zaeq dol gil vae. 31 Yoqhhaeteel mqshoq tullael, qiqhhaeq qiqhhaeq'ae faqsilkei gil vae, kaol Yiqsaq yoqhhaeteel'ae bael sheeq duyil gil biq, kaol yoqhhaeteel neesaelhhae'lye yoqhhaeq zaellye deelsae hhei vae. 32 Tyuqfu qiq nao, Yiqsaq e yaqhacheqzaq e cholyaeqhael lael laol, yoqhhaeteel lye eelduq duq du hhei e silqinq mael yoqhhaeq'ae geegaeq biq, gee: "Ngaeteel eelcuq saelpopuq hhei wae." 33 Yiqsaq eelduq tyulmael'ae Shilba lye mil hhei biq hhae, tyulkaol, yaeqmeel keellye, milmae heeqmyel tyulmael e cholmil mael Byeqshilba lye gul hhae.
Yiqsaoq laoq haeqmiq niq nulhhaeq sheeqtoq hhei vae