Yalboqlahanl e mae'nil e houldailhael
Dailshangl 1:32-33
25
Yalboqlahanl baeqjyelboq e haeqmiq qiq hhaeq sheeqtoqhoq hhei, cholmil mael Jituqla lye gul biq hhae. 2 Jituqla lye yoqhhaeq'ae Xin'lanq, Yoqsan, Miqdanl, Miqdianl, Yishiba kaol Shuyal yaol bo hhei biq. 3 Yoqsan'ae Shilba kaol Diqdanl du'lal biq, Diqdanl e houldailhael laoq Yalshu'lil cholyaeq'ae, Lildushil cholyaeq kaol Lilvumiq cholyaeq'ae. 4 Miqdianl e yaqyohael laoq Yiqfaq, Yiqfuq, Ha'nol, Yalbiqdal kaol Yiqleldal'ae. Xihael laoq gilzuqmyel Jituqla e houldailhael'ae. 5-6 Yalboqlahanl dyeqdeel siq fu, aeqyoq e mae'nil lye bo hhei biq e yaqyohael'ae jadanglhael teel byel hhei biq, kaol yoqhhaeteel yaol yoqhhaeq e yaqyo Yiqsaq zaellye deelsae hhei lye moqheilheil biq, kaol yoqhhaeteel yaol neeldu aelheiq boq'ae bi zhol yil. Yalboqlahanl aeqyoq sil hhei'laol, aeqyoq e halza haelzholhael gilzuqmyel Yiqsaq'ae heildeelsaeq biq maoqlye hhae.Yalboqlahanl sil vae
7 Yalboqlahanl qiqyil e aeqyil mael qiqhael siqqyel ngaeq (175) hoq'ae. 8 Yalboqlahanl yaeqmoq zhee moq wae, hael zhol maoqmyel zhol aeqwae, kaol saeq'ol qye'li vae, kaol yoqhhaeq e aeqpyuq aeqdaehael tyuqvae hoqli vae. 9 Yoqhhaeq e yaqyo Yiqsaq kaol Yiqshiqmaqlil lye yoqhhaeq yaol, Mailbiqla geeqzhoq gonglbyu vae baqduqm biq. Gonglbyu xilmael laoq Manllil e yiqsi e Hel cholyaeq Soqxaq e yaqyo Yiqfuqlunq e haeldye'ae, 10 Yalboqlahanl lye Hel cholyaeq tyuqvae lye vul hhei e haeldye mael ngeelvae. Yoqhhaeteel lye Yalboqlahanl yaol aeqyoq e haeqmiq Saqla tyuqvae bal baqduqm deelhhei biq. 11 Yalboqlahanl sil hhei aeqnaol'ae, Momil laoq yoqhhaeq e yaqyo Yiqsaq'ae geeqlongq biq biq. Tyuqfu, Yiqsaq Biq'eq Lahaiq Laiq e dongqpyeq vae zhol hhae.
Yiqshiqmaqlil e houldailhael
Dailshangl 1:28-31
12 Sa'oqboqhael laoq Saqla e yaqhacheqzaq e haeqmiyaeq Aijiq cholyaeq Xaljaq lye, Yalboqlahanl vae bo hhei biq e yaqyo Yiqshiqmaqlil e houldailhael'ae cuga deelhhei mael. 13 Yiqshiqmaqlil e yaqyohael, yoqhhaeteel e houldail e cholmil maellye cuga deelhhei e cholmil mael sa'oqboqhael'ae: Yiqshiqmaqlil e fuqbo yaqyo laoq Niqbailyoq, aeqnaol hael laoq Jidaq, Yaldeqbyeq, Miqbiqsan, 14 Miqshimaq, Dulmaq, Maqsaq, 15 Hadal, Tiqmaq, Yitu, Naqfeishi kaol Jidiqmaq. 16 Xihael gilzuqmyel Yiqshiqmaqlil e yaqyohael'ae. Yoqhhaeteel e pusiq kaol pusiq siqyaeq eiq yoqhhaeteel e cholmil maellye mil gaeyi hhae. Yoqhhaeteel qyelniq hhaeq laoq qyelniq minqcuq e yoheeq geiq vae. 17 Yiqshiqmaqlil qiqyil e aeqyil laoq, qiqhael suqqyel siq (137) hoq'ae. Yoqhhaeq saeq'ol qye'li vae, kaol yoqhhaeq e aeqpyuq aeqdaehael tyuqvae hoqli vae. 18 Yoqhhaeq e houldailhael laoq Yalsul vae yil e gaelmae vae, Hafei'la ae'lye mael Aijiq e neeldu aelheiq e Su'eq vae zhol gil hhae. Ngeelfeiq, Yiqshiqmaqlil laoq aeqyoq e aeqnilhael e neeldu aelheiq boq'ae zhol hhae.
Yiqsaq e houldailhael
19 Sa'oqboqhael laoq Yalboqlahanl e yaqyo Yiqsaq e houldailhael'ae cuga deelhhei mael. Yalboqlahanl laoq Yiqsaq e aeqdae'ae. 20 Yiqsaq Lilbaiqja yaol sheeq hhei fu laoq, yuqqyel hoq zoq vae. Lilbaiqja laoq Badanl Yallanq milcaeq e Yallanq cholyaeq Biqtuqlil e yaeqmiq'ae, kaol Yallanq cholyaeq e Laban e dulmae'ae. 21 Yiqsaq aeqyoq e haeqmiq yaeqguq maeq bo kiq biq, kaol yoqhhaeq gae'lye Yeheqhuaq'ae geezaeq biq, kaol Yeheqhuaq toq biq vae, kaol yoqhhaeq e haeqmiq Lilbaiqja'ae yaeqguqpi li biq vae. 22 Oqma onglci'ae haeqmoq qiqhhaeq qiqhhaeq'ae tongqgae, kaol yoqhhaeq gee: "Aeqcheekaol xilnye hhaemaeq?" Tyulkaol, Yoqhhaeq Yeheqhuaq'ae naelhaeq biq. 23 Yeheqhuaq yoqhhaeq'ae geehoq biq:
"Goqja niq mal laoq noq e oqma onglci'ae zoq,
Niq zonglyaeq laoq noq e aeqhhaol ae'lye du'lal.
Goqja xi qiq mal laoq yul qiq mal taq'ae hhael henq,
Hhael heeq e qiq hhaeq laoq hhael nil e qiq hhaeq'ae fuqsil maoqlye hhae."
24 Lilbaiqja yaeqguq bo vae, aeqdilmyel haeqmoq ngeel'ae. 25 Laefuq bo du hhei e qiq hhaeq laoq aeqhhaol qiqsiqmyel nyelcullye kaol caeqhum cuq hhae, caeqhum e aelhongq dum hhei laoqmyel hhae, tyulkaol, yoqhhaeteel yoqhhaeq'ae Yiqsaoq lye gul biq hhae. 26 Yoqhhaeq e aeqnil laoq Yiqsaoq e aeqkeel zaqneq mael'ae eetyeq deelhhei myel bo du hhei vae, tyulkaol, yoqhhaeteel yoqhhaeq'ae Yaqgel lye gul biq hhae. Lilbaiqja yaqyo niq nulhhaeq bogae hhei fu, Yiqsaq koqqyel hoq zoq vae.
Yiqsaoq fuqbo yaqyo e laqtaq mael ongqzaeq hhei vae
27 Yaeqguq niq nulhhaeq aeqyae aeqyae'lye heeq lael vae. Yiqsaoq laoq byeljyeq zhee bezaq kiq hhae, byelcongq'ae zhol mael zhee hhaol biq hhae. Yaqgel laoq saeziq maeq naeq'ae, duqlye haeqpael haelcul vae zhol hhae. 28 Yiqsaq laoq haeqfu eiq Yiqsaoq e byeljyeq mael hhae zaeq biq, tyulkaol, yoqhhaeq laoq Yiqsaoq'ae gaeq biq hhae; ngeelfeiq, Lilbaiqja laoq Yaqgel'ae gaeq biq hhae. 29 Qiqzael laoq, Yaqgel eelcael puq fu, Yiqsaoq byelcongq ae'lye hoqlal, oqma zhee myeq biq, hhaeqdyul eiq zhee dyul biq hhae. 30 Yiqsaoq Yaqgel'ae gee biq: "Noq e hobye bye'nyel eelcaela mael ngaeq'ae bi dol laeq, ngaeq'ae oqma zhee myeq yae, hhaeqdyul eiq zhee dyul kaol maeq hhaeq yaevae." Tyulkaol, Yiqsaoq e cholmil mael Yiqdongb lye gul biq hhae. 31 Yaqgel gee: "Nol laefuqmyel noq e fuqbo yaqyo e laqtaq mael, ngaeq'ae ongq hhei laeq." 32 Yiqsaoq gee: "Ngael sil lael oqyaevae, fuqbo yaqyo e laqtaq mael, ngaeq'ae aeqchee mulyo siq maeq?" 33 Yaqgel gee: "Nol ngaeq'ae faqsilkei laeq." Kaol Yiqsaoq yoqhhaeq'ae faqsilkei biq vae, kaol fuqbo yaqyo e laqtaq mael Yaqgel'ae ongq biq vae. 34 Tyulkaol, Yaqgel lye aqba kaol hobye bye'nyel e eelcael mael Yiqsaoq vae baq hhei biq. Yiqsaoq zaeqdye dol dye hhei'laol, tullael kaol deel vae. Yiqsaoq xilnye aeqyoq e fuqbo yaqyo e laqtaq mael maeq fuyo biq'ae.