Yiqsaq haeqmiq sheeqtoq hhei vae
24
Yalboqlahanl yaeqmoqmoq wae, cholhoq li aeqwae, Yeheqhuaq aeqchee silqinq mael taq vae eiq yoqhhaeq'ae geeqlongq biq biq'ae. 2 Yalboqlahanl aeqyotoq vae halza haelzholhael'ae guanqliq e hhaelmoq moqli e guanqja'ae gee biq: "Noq e aqlaq mael ngaeq e paeqkaeq vae baqdeel hhei lael, 3 Kaol ngael noq yaol mqmae kaol milcaeq e Momil Yeheqhuaq'ae tyuq deelhhei kaol faqsil bi kei maoq, yaeqmeel ngael baelzhol e Ja'nanq milcaeq e yaeqmiyaeqhael onglci ae'lye, ngaeq e yaqyo'ae haeqmiq maeq hhae sheeqlaeq biq'ae. 4 Nol laoq ngael dyeqlal e milcaeq, ngaeq e qiqzonglyaeq e tyuqvae yil, kaol ngaeq e yaqyo Yiqsaq'ae haeqmiq bael naelhaeq yil biq." 5 Yaqhacheqzaq e cholyaeq Yalboqlahanl'ae naelhaeq biq: "Yaeqmiyaeq tyutaeq ngaeq nyegael saeqvae milcaeq vae maeq bael lael nae kaollaoq, ngael aeqdilmyel noq e yaqyo yaol nol dyeqlal e milcaeq vae sheeq hoqyil laeq?" 6 Yalboqlahanl yoqhhaeq'ae gee biq: "Nol aeqyae'lye kei maoqhhae, haelmillyekaol eiq ngaeq e yaqyo yaol tyuqvae haeq sheeq hoqyil. 7 Mqmae e Momil Yeheqhuaq, ngaeq yaol ngaedae toq kaol ngaeq e qiqzonglyaeq toq ae'lye sheeq duyi laeq qiq hhaeq ngeelvae, laefuq ngaeq'ae saeziq gee'naeq laeq'ae, ngaeq'ae faqsilkei laeq qiq hhaeq yol gee laeq, gee: 'Ngael milcaeq xilmael noq e houldailhael'ae biq biq maoq.' Yoqhhaeq noq e yiqsiboq ae'lye yoqhhaeq e mqmae yosongl yaol moqheilheil du hhei, kaol nol tyuqvae lye ngaeq e yaqyo'ae haeqmiq bael naelhaeq laeq biq. 8 Yaeqmiyaeq tyutaeq maeq bael lael nae kaollaoq, nol ngaeq'ae faqsilkei gol laq e saeziq mael noq'ae maeq guanqyo vae. Ngeelfeiq, nol ngaeq e yaqyo yaol haeq sheeq hoqyil." 9 Tyulkaol, yaqhacheqzaq e cholyaeq lye aqlaq mael yoqhhaeq e hhaoqsongl Yalboqlahanl e paeqkaeq vae baqdeel hhei biq, kaol silqinq xilmael gae'lye Yalboqlahanl'ae faqsilkei biq vae.10 Yaqhacheqzaq e cholyaeq lye, yoqhhaeq e hhaoqsongl e loltoqhael onglci ae'lye loltoq qyel yaeq saelpodu hhei, hhaoqsongl e maeq qiqsheel e zhee meeq gae'lael aeqmyel e moqgoq heil beq hhei, kaol lolbaeq niq mal e kaeqlaeq e Yallanqa vae yil, Naqhel zhol yo e milmae heeqmyel vae keelyil vae. 11 Kiqsulkiqxeiq fu, yaeqmiyaeqhael duyi kaol eelcuq baq yi fu, yaqhacheqzaq e cholyaeq tyutaeq lye loltoq mael milmae heeqmyel nildu e eelduq vae oqbaq bi baq deelhhei, 12 Kaol heeldoq gee: "Yeheqhuaq ngaeq e hhaoqsongl Yalboqlahanl e Momil o, ngael zongl maoqlye mael yaeqnao ae'lye bi peqlal laq lye geezaeq lil, kaol ngaeq e hhaoqsongl Yalboqlahanl'ae neemae maeqpaelmyel gaeq biq. 13 Ngael yaeqmeel eelduq dongqpyeq'ae haoqtul deelhhei, milmae heeqmyel vae zhol e cholyaeqhael e yaeqmiyaeqhael eelcuq baq yi gil goqbiq vae. 14 Ngael yaeqmiyaeq hae qiq hhaeq'ae gee biq: 'Noq e buqyaeq mael baqga hhei, kaol ngaeq'ae eelcuq teel bi dol laeq.' Yoqhhaeq xilnye geehoq laeq kaollaoq: 'Dol aeqmeel, ngael eiq noq e loltoqhael'ae bi dol hhaeq.' Yaeqmiyaeq tyutaeq laoq noq lye noq e yaqhacheqzaq e cholyaeq Yiqsaq'ae saelpodu hhei biq e haeqmiq geiq biq lye nyuqlil. Xilnye laol, ngael nol laoq ngaeq e hhaoqsongl'ae neemae maeqpaelmyel gaeq biq'ae lye loq wae." 15 Saeziq maeq gee byel siq fu, Lilbaiqja e baqtaq mael'ae buqyaeq baq hhei myel duyi. Lilbaiqja laoq Biqtuqlil e yaeqmiq'ae. Biqtuqlil laoq Naqhel kaol Milja e yaqyo'ae, Naqhel laoq Yalboqlahanl e aeqnil'ae. 16 Yaeqmiyaeq tyutaeq zhee zhigaq hhae, haqyoyaeq nyegael qiqgael maq ssuqza gol e yaeqmiyaeq wae siq. Yoqhhaeq eelduq vae gaeyil, buqyaeq mael'ae eelcuq kuq bong hhei'laol baqda hoq laq vae. 17 Yaqhacheqzaq e cholyaeq yoqhhaeq e yiqsiboq'ae ki yil, kaol gee: "Noq e buqyaeq onglci e eelcuq mael ngaeq'ae teel bi dol laeq." 18 Yaeqmiyaeq tyutaeq geehoq biq: "Ngaeq e hhaoqsongl, nol dol." Kaol nae'naemyel buqyaeq mael baqga hhei biq, aqlaq maellye baqtyeq deelhhei kaol yoqhhaeq'ae dol lye baqmoq hhei biq. 19 Yoqhhaeq doldye hhei'laol, yaeqmiyaeq gee: "Ngael eiq noq e loltoqhael eelcuq doldye fu keellye, loltoqhael'ae eelcuq baq yil biq hhaeq." 20 Tyulkaol, nae'naemyel eelcuq mael hoqloq mael'ae xyedo hhei, eelduq vae yol ki yil kaol eelcuq baq yil, kaol yoqhhaeq e gilzuqmyel loltoqhael'ae eelcuq baq laq biq. 21 Tyutaeq Lilbaiqja'ae chifu biq maoqlaol, saeziq qiq doq eiq maeq gee'ae, Yeheqhuaq lye yoqhhaeq e heeldoq mael gilzuqmyel bi peqlal maeqlye chifu deelhhei hhae. 22 Loltoqhael doldye hhei vae, kaol tyutaeq luq keq zoqlal maoqmyel pulsheel e naelbyu nael'ongq qiq mal heildu hhei, yoqhhaeq e naelbyu mael'ae doqda hhei biq, qiqhael qyel'yuq (114) keq zoq e pulsheel laqduq niq mal mael, yoqhhaeq e aqlaq mael'ae doqda hhei biq. 23 Tyulkaol, yoqhhaeq'ae naelhaeq biq: "Ngaeq'ae geedu laq, nol aeqsul e yaeqmiq lilmaeq? Nodae toq'ae ngaeteel e haqhhael za maeq?" 24 Yoqhhaeq geehoq biq: "Ngael laoq Milja lye Naqhel'ae bo hhei biq e yaqyo Biqtuqlil e yaeqmiq lil." 25 Yoqhhaeq yol gee: "Ngatoq'ae meqziq aelkongq, loltoq e zaeqzael kaol noteel haq e laoqhaol za'ae." 26 Tyutaeq vuqduqtongq gae hheikaol Yeheqhuaq'ae heel biq, 27 Gee: "Yeheqhuaq, ngaeq e hhaoqsongl Yalboqlahanl e Momil laoq, maqqyemyel ngaeq e hhaoqsongl'ae neemae maeqpaelmyel gaeq biq kaol haelmillye gee biq laol haelmillye zongl'ae, kaol ngaeq yaol ngaeq e hhaoqsongl e aeqnil toq'ae sheeq keellaeq laeq vae, tyulkaol, Yeheqhuaq laoq maeqdaeqhhaeq'ae."
28 Yaeqmiyaeq laoqhaol vae ki hoqli, xihael yoqhhaeq e aeqmae kaol yoqhhaetoq e cholyaeqhael'ae geegaeq gil biq. 29 Lilbaiqja'ae algo qiq hhaeq zhol'ae, cholmil mael Laban lye gul biq hhae. 30 Laban aeqyoq e dulmae e naelbyu nael'ongq kaol aqlaq mael e laqduq mael mol hhei biq, kaol aeqyoq e dulmae Lilbaiqja gee e cholyaeq tyutaeq yoqhhaeq'ae gee gol biq e saeziq mael gaeq hhei biq, kaol nildu'ae ki yil kaol eelduq dongqpyeq'ae zhol e tyutaeq'ae mol yil. Yoqhhaeq eelduq dongqpyeq'ae keellael fu, tyutaeq laoq eelduq dongqpyeq vae loltoqhael zhol myel vae haoqtul deelhhei wae siq. 31 Laban gee: "Nol Yeheqhuaq lye geeqlongq biq biq e qiq hhaeq, pusiq nildu'ae haeq haoqtul, ngatoq'ae bael lael, ngaeq lye haqhhael paeqgaelsael meeq deelhhei aeqwae, loltoqhael zhol e milcaeq eiq paeqgaelsael meeq deelhhei wae." 32 Kaol tyutaeq Laban toq'ae do'li vae. Laban lye loltoqhael'ae toq hhei e moqgoqhael bi baqga hhei, meqziq aelkongq kaol loltoq e zaeqzaelhael loltoqhael'ae baqmoq hhei biq, kaol eelcuq baq laq, tyutaeq'ae kaol aeqyoq nyegael qiqgael lael e cholyaeqhael'ae aeqkeel bi ciq. 33 Ciq du hhei'laol, yoqhhaeq e yiqsiboq'ae aelhoq baqdeel hhei biq, ngeelfeiq, tyutaeq gee: "Ngael laoq ngael gee maoqlye e silqinq mael gee byel hhei kaolmaoqlaol aelhoq maeq zaeq yil." Laban gee: "Gee aeqmeel." 34 Tyutaeq gee: "Ngael laoq Yalboqlahanl e yaqhacheqzaq e cholyaeq lil. 35 Yeheqhuaq ngaeq e hhaoqsongl'ae geeqlongq haelnaeqmyel biq biq, kaol yoqhhaeq yohaha tullaeq vae. Yeheqhuaq yoqhhaeq'ae aqciqhael, aeqnuqhael, pulziq pulsheel, yaqhacheqzaq e cholyaeqhael, yaqhacheqzaq e haeqmiyaeqhael, loltoqhael kaol mao'lyuhael biq hhei biq. 36 Ngaeq e hhaoqsongl e haeqmiq Saqla yaeqmoq fu, ngaeq e hhaoqsongl'ae yaqyo qiq hhaeq bo hhei biq. Ngaeq e hhaoqsongl lye yoqhhaeq'ae halzahael gilzuqmyel yaqyo xitaeq'ae biq hhei biq. 37 Ngaeq e hhaoqsongl ngaeq yaol bi faqsilkei laeq, gee: 'Nol ngael yaeqmeel baelzhol e Ja'nanq milcaeq vae, ngaeq e yaqyo'ae Ja'nanq milcaeq e yaeqmiyaeq yaol haeqmiq haeq sheeqlaeq biq. 38 Nol ngaedae toq'ae, kaol ngaeq e qiqzonglyaeq zael'ae yil, ngaeq e yaqyo'ae haeqmiq qiq hhaeq naelhaeq yil biq.' 39 Ngael ngaeq e hhaoqsongl'ae naelhaeq biq: 'Yaeqmiyaeq qiq hhaeq ngaeq nyegael maeq bael lael nae maeqhe?' 40 Yoqhhaeq geehoq laeq: 'Ngael heel e Yeheqhuaq aeqdilmyel yoqhhaeq e mqmae yosongl noq nyegael qiqgael bi bal yil'ae, kaol nol haelzongl maoqlye mael bi shunl laeq'ae, kaol nol ngaeq e qiqzonglyaeq kaol ngaedae toq ae'lye, ngaeq e yaqyo'ae haeqmiq qiq hhaeq naelhaeq laeq biq. 41 Nol ngaeq e qiqzonglyaeq zael'ae yil kaollaoq, ngael noq'ae faqsil bi kei mael noq'ae maeq guanqyo wae; yoqhhaeteel yaeqmiyaeq yaol noq'ae maeq bi sheeqhoqlaeq laeq kaollaoq, ngael noq'ae faqsil bi kei mael noq'ae maeq guanqyo wae.' 42 Ngael yaeqnao eelduq vae keellael laol, gee: 'Yeheqhuaq ngaeq e hhaoqsongl Yalboqlahanl e Momil o! Ngael haelzongl maoqlye mael bi peqlal laq lye nyuqlil, 43 Ngael yaeqmeel eelduq dongqpyeq vae haoqtul deelhhei maoq, yaeqmiyaeq qiq hhaeq duyi kaol eelcuq baq yi kaollaoq, ngael yoqhhaeq'ae xilnye gee biq maoq: "Noq e buqyaeq onglci e eelcuq mael ngaeq'ae teel bi dol laeq." 44 Yoqhhaeq ngaeq'ae "Nol dol aeqmeel, ngael noq e loltoqhael'ae eelcuq eiq baq yil biq hhaeq" lye geehoq laeq kaollaoq, yaeqmiq tyutaeq laoq Yeheqhuaq lye ngaeq e hhaoqsongl e yaqyo'ae saelpodu hhei biq e haeqmiq geiq biq lye nyuqlil.' 45 Ngaeq e neemae onglci'ae heeldoq maeq gee byel siq fu, Lilbaiqja laoq baqtaq mael'ae buqyaeq baq hheikaol eelduq vae eelcuq baq yi. Ngael yoqhhaeq'ae gee biq: 'Ngaeq'ae eelcuq bi dol laeq.' 46 Yoqhhaeq nae'naemyel baqtaq ae'lye buqyaeq mael baqga hhei, gee: 'Dol aeqmeel, ngael eiq noq e loltoqhael'ae eelcuq bi dol maoq siq.' Ngael dol hhei'laol, yoqhhaeq eiq ngaeq e loltoqhael'ae eelcuq baq laq biq vae. 47 Tyulkaol, ngael yoqhhaeq'ae naelhaeq biq: 'Nol aeqsul e yaeqmiq lilmaeq?' Yoqhhaeq geehoq laeq: 'Ngael laoq Milja lye Naqhel'ae bo hhei biq e yaqyo Biqtuqlil e yaeqmiq lil.' Kaol ngaeq lye naelbyu nael'ongq mael yoqhhaeq e naelbyu mael'ae doqda hhei biq, laqduq mael yoqhhaeq e aqlaq niqboq'ae doqda hhei biq. 48 Yeheqhuaq ngaeq'ae gaelmae sheeqmyeq laeq, kaol ngaeq'ae ngaeq e hhaoqsongl e aeqnil e yuqmae yaol bi deelpuq hhei laeq, kaol yoqhhaeq yaol sheeq hoqli, kaol ngaeq e hhaoqsongl e yaqyo e haeqmiq bi geiq maoqlye lil. Tyulkaol, ngael vuqduqtongq gae hheikaol Yeheqhuaq'ae heel biq, ngaeq e hhaoqsongl Yalboqlahanl e Momil'ae maeqdaeqhhaeq'ae lye gee biq. 49 Yaeqmeel noteel ngaeq e hhaoqsongl'ae neemae maeqpaelmyel gaeq biq, kaol zeqrenl ful biq kaollaoq, ngaeq'ae geedu laq. Maeq hhaeq'ae lye kaollaoq, ngaeq vae eiq geedu laq maoqhhae, tyulnye laol, ngael haelmillye zongl maoqhhae lye hhae loq vae."
50 Laban kaol Biqtuqlil yoqhhaeq'ae geehoq biq: "Saeziq xihael Yeheqhuaq ae'lye lael hhae, kaol ngaeteel qiqgiq lye maeq hhae gee yaevae. 51 Fu, Lilbaiqja noq e yiqsiboq'ae haoqtul deelhhei, nol yoqhhaeq yaol sheeqyil aeqmeel, Yeheqhuaq haelgee laoqmyel yoqhhaeq yaol noq e hhaoqsongl e yaqyo'ae haeqmiq bi geiq." 52 Yalboqlahanl e yaqhacheqzaq e cholyaeq laoq xihael gaeq hhei biq laol, milcaeq vae vuqduqtongq gae hheikaol Yeheqhuaq'ae heel biq. 53 Yaqhacheqzaq e cholyaeq tyutaeq pulsheel maellye zongldu hhei e moqgoq, pulziq maellye zongldu hhei e moqgoq kaol aelhongq heildu hhei, kaol Lilbaiqja'ae heilmoq hhei biq, zhee pyuq gae'lael aeqmyel moqgoq mael yoqhhaeq e algo kaol aeqmae'ae heil hhei biq. 54 Yaqhacheqzaq e cholyaeq, kaol yoqhhaeq nyegael qiqgael lael e cholyaeqhael aelhoq zaeq gil vae, kaol qiq mil haq vae. Yoqhhaeteel mqshoq'ae tullael, yaqhacheqzaq e cholyaeq gee: "Ngaeq yaol ngaeq e hhaoqsongl zael vae bi hoqli laq oq!" 55 Lilbaiqja e algo kaol aeqmae geehoq biq: "Yaeqmiyaeq xitaeq ngaeteel nyegael mee'nae nao bi baelzhol biq siq, qyel nao laellye zhol hhei'laol yoqhhaeq noteel nyegael bal yil biq oq." 56 Yaqhacheqzaq e cholyaeq geehoq biq: "Yeheqhuaq laoq ngael geezaeq laoqmyel bi peqlal laq vae. Noteel ngaeq'ae haeq bi zhol gil laeq oq, ngaeq yaol ngaeq e hhaoqsongl zael vae biq hoqli laq." 57 Yoqhhaeteel gee: "Ngaeteel Lilbaiqja yaol gul laeq hhaeq, kaol yoqhhaeq haelmillye nyuq lilmaeq lye naelhaeq biq maoq." 58 Yoqhhaeteel Lilbaiqja yaol gul laeq, kaol yoqhhaeq'ae naelhaeq biq: "Nol xitaeq nyegael bal yil hhaeq maeq?" Yoqhhaeq geehoq biq: "Ngael hhaeq lil." 59 Tyulkaol, yoqhhaeteel lye aeqyoteel e dulmae Lilbaiqja, yoqhhaeq'ae aeqchil bi bael dol heeq laeq e aeqmae, Yalboqlahanl e yaqhacheqzaq e cholyaeq kaol qiqgael lael gil e cholyaeqhael, gilzuqmyel deel gil oq lye gee biq. 60 Yoqhhaeteel Lilbaiqja'ae geeqlongq biq biq, kaol yoqhhaeq'ae gee biq:
"Ngaeteel e dulmae o!
Nol haeldyul dyulmae cholyaeqhael e aeqmae geiq biq lye nyuqlil;
noq e houldailhael lye diqrenq e milmae heeqmyel e oheiq mael zholchiqzaeq biq lye nyuqlil."
Yiqsaq Lilbaiqja yaol sheeqzaeq vae
61 Lilbaiqja kaol aeqyoq e yaqhacheqzaq e haeqmiyaeqhael loltoq mael'ae ziq da'li, kaol tyutaeq nyegael bael deel vae. Yaqhacheqzaq e cholyaeq tyutaeq lye Lilbaiqja yaol sheeq hheikaol deel vae. 62 Tyuqfu, Yiqsaq Biq'eq Lahaiq Laiq ae'lye zhoq hoqlal, yoqhhaeq laefuq laoq Neilgaelvuq vae zhol hhae. 63 Kiqsulkiqxeiq fu, Yiqsaq haeldye vae yul'ae deel laol yul'ae nyuq'ae. Yoqhhaeq vuqduq baqtul hhei'laol, loltoqhael hoqlal mol hhei biq! 64 Lilbaiqja vuqduq zhoq baqtul hhei'laol, Yiqsaq yaol mol hhei biq, kaol loltoq ae'lye gaeyi vae, 65 Kaol yaqhacheqzaq e cholyaeq'ae naelhaeq biq: "Haeldye vae aedeeteel'ae sheeqcaq yi laq qiq hhaeq aeqsul maeq?" Yaqhacheqzaq e cholyaeq geehoq biq: "Yoqhhaeq ngaeq e hhaoqsongl Yiqsaq'ae." Kaol Lilbaiqja sajin maellye maduq mael cheelchiq hhei vae. 66 Yaqhacheqzaq e cholyaeq lye aeqyoq haelzongl e silqinqhael, gilzuqmyel Yiqsaq'ae geegaeq byel biq vae. 67 Yiqsaq Lilbaiqja yaol aeqyoq e aeqmae Saqla e haeqpael haelcul'ae sheeq do'li biq, kaol yoqhhaeq yaol sheeqzaeq biq vae. Lilbaiqja laoq Yiqsaq e haeqmiq geiq vae. Yiqsaq Lilbaiqja'ae gaeq biq hhae. Yoqhhaeq e aeqmae sil biq myel lye aeqnaol laoq, yaeqmeel yaol caiq neemae maeq nyuqsaeq biq wae siq.