Yalboqlahanl aeqhael vul hheikaol Saqla yaol baqduqm biq
23
Saqla qiqhael niqqyel siq (127) hoq dyeq vae. 2 Saqla laoq Ja'nanq milcaeq vae Ji'lyel Yalba lye gul e Xiboqlunq milmae nilmyel vae sil hhae. Yalboqlahanl Saqla gae'lye zhee nyul'ae. 3 Yalboqlahanl sil e haeqmiq e yiqsi ae'lye tullael, kaol milmae nilmyel oheiq vae Hel cholyaeq e zhangqlaoqhael'ae gee yil biq, gee: 4 "Ngael laoq noteel onglci'ae baelzhol lael e baeqjyelboq minqcuq e cholyaeq lil, ngaeq e haeqmiq sil laeq vae, ngaeq'ae ngaeq hhae lye aeqhael qiq koq eiq maqza laq'ae, kaol ngaeq'ae cholsil baqduqm e aeqhael qiq koq ongq hhei laeq, kaol ngatoq e cholsil yaol baqduqm maoq yae. 5 Hel cholyaeq Yalboqlahanl'ae geehoq biq: 6 "Ngaeq e hhaoqsongl, naelhaeq deelhhei! Nol ngaeteel saeqvae laoq noteel e minqcuq e hhaelheeq heeqli qiq hhaeq'ae, nol ngaeteel e hhaelmeeq meeqli e aeqhael vae notoq e cholsil yaol baqduqm aeqmeel, ngaeteel onglci'ae qiq hhaeq eiq aeqyoq e aeqhael vae, notoq e cholsil yaol maeq bi baqduqm lye maeq diqqye yil." 7 Tyulkaol, Yalboqlahanl tullael, kaol tyuqvae milcaeq e Hel cholyaeq'ae vuqduqtongq biq, 8 Kaol yoqhhaeteel'ae gee biq: "Noteel ngatoq e cholsil yaol bi baqduqm laeq, yoqhhaeq yaol ngaeq e yiqsiboq'ae maeq bi mol lye kaollaoq, ngaeq e saeziq mael naelhaeq gil, Soqxaq e yaqyo Yiqfuqlunq'ae bael gee biq laeq, 9 Yoqhhaeq e haeldye dyevuq e Mailbiqla e geeqzhoq gonglbyu mael ngaeq'ae ongq hhei laeq. Haeldye tyulmael haeldyul pyuq laol haeldyul noteel yiqsi ae'lye ngaeq'ae ongq hhei laeq, kaol ngael noteel onglci'ae ngaeq e fuq'ongl aeqhael lye bi za maoq." 10 Tyuqfu, Yiqfuqlunq laoq Hel cholyaeqhael onglci'ae zhol deelhhei'ae. Tyulkaol, Hel cholyaeq Yiqfuqlunq Yalboqlahanl'ae geehoq biq, haelzhol e milmae nilmyel oheiq vae baelzhol e cholyaeqhael gilzuqmyel yoqhhaeq gee mael gaeq vae, gee: 11 "Ngaeq e hhaoqsongl o, xilnye maeq kei kael, ngael gee mael naelhaeq, aeqhael xilmael kaol geeqzhoq gonglbyu mael ngael noq'ae heil laeqngeel. Ngael ngaeq e minqcuq yiqsi ae'lye noq'ae biq laqngeel, nol notoq e cholsil yaol baqduqm aeqmeel." 12 Kaol Yalboqlahanl tyuqvae milcaeq e cholyaeqhael e yiqsi'ae vuqduqtongq gae hhei biq, 13 Kaol tyuqvae milcaeq e cholyaeqhael e yiqsi ae'lye Yiqfuqlunq'ae gee biq: "Ngael gee mael naelhaeq, nol hhaeq lil lye kaollaoq, ngael aeqhael e hhaeqpyuq mael noq'ae heil laeqngeel, nol heilzaeq maoqhhae, ngael tyuqvae milcaeq vae ngatoq e cholsil yaol baqduqm maoq." 14 Yiqfuqlunq Yalboqlahanl'ae geehoq biq, kaol yoqhhaeq'ae gee biq: 15 "Ngaeq e hhaoqsongl, ngael gee mael naelhaeq, pulziq yuqhael (400)a pyuq e aeqhael qiq koq, aedee niq nulhhaeq e onglci'ae aeqchee gee kael siq maeq? Nol notoq e cholsil yaol baqduqm yil oq." 16 Yalboqlahanl Yiqfuqlunq gee e hhaeqpyuq mael hhaeq'ae lye hhae, kaol yoqhhaeq Hel cholyaeq e yiqsi'ae gee gol e saeziq laoqmyel, tyuqfu naohaeq'ae senyil mulzaeq e cholyaeqhael mul gil e pulziq maellye, Yiqfuqlunq'ae yuqhael (400) heil hhei biq vae.17 Tyulkaol, Yiqfuqlunq Mailbiqla vae, Manllil e neeldu aelheiq boq e aeqhael tyu qiq koq kaol geeqzhoq gonglbyu, haeldye onglcihael kaol dongqpyeq dongqjyel e gilzuqmyel aelbolhael, 18 Gilzuqmyel Hel cholyaeq yiqsiboq'ae, milmae nilmyel e oheiq'ae haelzhol e Hel cholyaeqhael e yiqsiboq ae'lye, Yalboqlahanl e zaeqdye halngeiq wae lye ongq hhei biq. 19 Aeqhael vul hhei aeqnaol'ae, Yalboqlahanl lye aeqyoq e haeqmiq Saqla yaol Ja'nanq milcaeq e Manllil yiqsi Mailbiqla haeldye e geeqzhoq gonglbyu vae baqduqm biq vae. Manllil laoq Xiboqlunq ngeelvae. 20 Xilnye laol, haeldye tyu qiq koq kaol haeldye e geeqzhoq gonglbyu mael, tyuq ae'lye aeqnaol laoq, Hel cholyaeq lye Yalboqlahanl'ae heil hhei biq kaol cholsil baqduqm e aeqhael bi mul.