Momil Yalboqlahanl'ae shilfu biq
22
Aeqnaol, Momil Yalboqlahanl'ae xinlxin za maeqlye shilfu biq, kaol yoqhhaeq'ae gee biq: "Yalboqlahanl o!" Yoqhhaeq geehoq biq: "Ngael naelhaeq deelhhei lil." 2 Momil gee: ''Noq e yaqyo laoq Yiqsaq qiq hhaeq maoqlaol maeq zhol'ae, kaol nol yoqhhaeq'ae zhee gaeq biq'ae. Ngeelfeiq, yoqhhaeq yaol sheeq hheikaol Moqlilyaq milcaeq vae yil, geeqzhoqhael onglci'ae ngael noq'ae tyuqmyeq biq e geeqzhoq qiq zhoq vae, yoqhhaeq yaol Pebyel Zaelheel geiqzaq kaol heelda hhei laq." 3 Aeqnaol qiq nao mqshoq Yalboqlahanl naqlye tullael, aeqyoq e mao'lyu mael'ae anziq baqda hhei biq, yaqhacheqzaq e cholyaeq niq nulhhaeq kaol aeqyoq e yaqyo Yiqsaq yaol sheeq hhei, Pebyel Zaelheel mael pe maoqlye aeqzaeq eiq de meeq vae, deelsae hheikaol Momil yoqhhaeq'ae tyuqmyeq biq e milcaeq vae yil vae. 4 Dilsan tian, Yalboqlahanl gaelmaolsae'lye milcaeq tyulmael mol hhei biq. 5 Yalboqlahanl yoqhhaeq e yaqhacheqzaq e cholyaeqhael'ae gee biq: "Ngael kaol yaeqguq yulboq'ae heel yil maoq, noteel kaol mao'lyu ngaeteel hoqlal fu keellye saeqvae doq deelhhei gil." 6 Yalboqlahanl lye Pebyel Zaelheel mael pe maoqlye aeqzaeq mael, yoqhhaeq e yaqyo Yiqsaq e baqtaq mael'ae baqda hhei biq, aeqyoq e aqlaq mael'ae miqdiq mael, kaol maejyel heil hhei. Yoqhhae niq nulhhaeq qiqgael deel fu, 7 Yiqsaq yoqhhaeq e aeqdae Yalboqlahanl'ae gee biq: "Aeqdae!" Yalboqlahanl gee: "Ngaeq e yaqyo! Ngael naelhaeq deelhhei lil." Yiqsaq gee: "Nol fu, miqdiq kaol aeqzaeq za vae, ngeelfeiq, Pebyel Zaelheel heel maoqlye aeqyol yolyaeq haeqvae zhol hhaemaeq?" 8 Yalboqlahanl geehoq biq: "Ngaeq e yaqyo, Momil aeqyoq laefuqmyel Pebyel Zaelheel heel maoqlye aeqyol yolyaeq mael paeqgaelsael meeq deelhhei maoqlye hhae." Tyulkaol, yoqhhae niq nulhhaeq laefuqboq'ae qiqgael deel gil.9 Yoqhhaeteel Momil tyuqmyeq biq e geeqzhoq vae keellael, Yalboqlahanl tyuqvae jiltanq zongl deelhhei, kaol aeqzaeq mael hozheq taq'ae baqda hhei, aeqyoq e yaqyo Yiqsaq yaol kaltoq biq, kaol yoqhhaeq yaol jiltanq taq e aeqzaeq taq'ae baqda biq. 10 Yalboqlahanl aqlaq mael'ae maejyel heil hhei, aeqyoq e yaqyo yaol xyeq maoqlye zongl fu, 11 Yeheqhuaq e mqmae yosongl mqmae ae'lye Yalboqlahanl'ae gul biq, gee: "Yalboqlahanl, Yalboqlahanl!" Yalboqlahanl geehoq biq: "Ngael naelhaeq deelhhei lil." 12 Mqmae yosongl gee: "Yaeqguq xitaeq'ae haq xyeq biq, teel eiq maeq hhae zonglnael biq'ae. Yaeqmeel ngael loq lil vae, nol laoq Momil'ae gu hhae, noq e yaqyo qiq hhaeq mael eiq maeq bi zholdeelsaeq myel ngaeq'ae biq hhei laq kaol'ae." 13 Yalboqlahanl vuqduq baqtul hheikaol chifu, kaol aeqyol yolpaeq qiq yaeq e vuqkyul niq mal, aelbol bolyaeq cheelnaqlye vae kualtyeq deelhhei mol hhei biq. Yalboqlahanl lye aeqyol yolpaeq tyu qiq yaeq cheellaeq, kaol aeqyol yolpaeq mael aeqyoq e yaqyo vuqtu geiqzaq, kaol Pebyel Zaelheel'ae lye heelda hhei. 14 Yalboqlahanl tyuqvae milcaeq vae "Yeheqhuaq Yiqlela" lye gul biq. Yaeqmeel keellye, cholyaeqhael gee gil siq: "Yeheqhuaq aeqyoq e geeqzhoq vae cholyaeqhael'ae mulyo mael heil biq'ae." 15 Yeheqhuaq e mqmae yosongl mqmae ae'lye Yalboqlahanl'ae dil'el cil gul biq, gee: 16 "Yeheqhuaq xilnye gee: 'Nol ngaeq e saeziq mael naelhaeq, noq e yaqyo qiq hhaeq mael eiq ngaeq'ae maq biq sheqhhaq yae lye maeq zongl'ae, kaol ngael aeqyoyoq'ae tyuq deelhhei kaol faqsilkei peq lil, 17 Kaol ngael noq'ae aeqdilmyel geeqlongq biq laqngeel, noq e houldailhael mqmae e aeqgeel, kaol eeldeel deelmae deeljyel e sa'la laoqmyel haelnaeqmyel bi naeqlael laeqngeel. Aeqgael noq e houldailhael e diqrenq e milmae heeqmyel e oheiq mael zholchiqzaeq yil. 18 Milcaeq e halza e goqja noq e houldail gae'lye geeqlongq meeq vae, nol ngaeq e saeziq mael naelhaeq kaol'ae." 19 Yalboqlahanl yoqhhaeq e yaqhacheqzaq e cholyaeqhael e tyuqvae hoq keelli. Yoqhhaeteel deelsae hheikaol deel vae, hhaellaelmyel Byeqshilba vae yil gil; Yalboqlahanl laoq Byeqshilba vae zhol hhae.
Naqhel e houldailhael
20 Zhee mee'nae hoq aeqnaol, cholyaeq Yalboqlahanl'ae gee biq: "Milja lye noq e aeqnil Naqhel'ae yaqyo heiq hhaeq bo hhei biq vae, 21-22 Yoqhhaeteel laoq fuqbo yaqyo Vusi, yoqhhaeq e aeqnil Bulsi, Yallanq e aeqdae Jimqlil, Jixo, Hasoq, Bildaq, Yilla kaol Biqtuqlil'ae." 23 Lilbaiqja e aeqdae laoq Biqtuqlil'ae. Xi heiq hhaeq laoq gilzuqmyel Milja lye Yalboqlahanl e aeqnil Naqhel'ae bo hhei biq e yaqyohael'ae. 24 Naqhel e mae'nil'ae laoq Liuqmaq lye gul biq hhae. Yoqhhaeq eiq Naqhel'ae Tiqba, Jahanq, Taxaq kaol Maqja bo hhei biq.