Yiqsaq dyeqlal vae
21
Yeheqhuaq aeqyoq gee gol laoqmyel, Saqla'ae fupol biq; Yeheqhuaq aeqyoq haelgee laoqmyel zongl vae. 2 Yalboqlahanl yaeqmoq fu, Saqla'ae yaeqguqpi li biq vae. Momil gee gol e naohaeq keellael laol, Yalboqlahanl'ae yaqyo qiq hhaeq bo hhei biq vae. 3 Yalboqlahanl laoq Saqla lye yoqhhaeq'ae bo hhei biq e yaqyo'ae, cholmil mael Yiqsaqa lye gul biq hhae. 4 Yiqsaq dyeqlal e heiq nao'ae, Yalboqlahanl Momil yoqhhaeq'ae moqheilheil biq laoqmyel, Yiqsaq'ae yeqgae gui'liq zongl biq vae. 5 Yoqhhaeq e yaqyo Yiqsaq zhoq dyeqlal fu, Yalboqlahanl qiqhael (100) hoq zoq wae. 6 Saqla gee: "Momil ngaeq'ae bi hhaol laeq kaol eel lil, hael bael gaeq e cholyaeqhael eiq ngaeq nyegael bael hhaol biq kaol eel gil'ae." 7 Yoqhhaeq yol gee: "Aeqsul Yalboqlahanl'ae Saqla albye vae aeqchil bi dol kaol cu heeq biq'ae lye gee biq laeq. Ngeelfeiq, Yoqhhaeq yaeqmoq fu, ngaeq lye yoqhhaeq'ae yaqyo qiq hhaeq bo hhei biq wae."Yalboqlahanl lye Xaljaq kaol Yiqshiqmaqlil yaol lyeqsae biq
8 Yaeqguq aeqyae aeqyae'lye heeqda lal laol, aeqchilche biq vae. Yiqsaq'ae aeqchilche biq e tyu qiq nao, Yalboqlahanl cholyaeqhael'ae baqwanq wanqmae baq deel gil biq hhae. 9 Saqla laoq Aijiq cholyaeq Xaljaq lye Yalboqlahanl'ae bo hhei biq e Yiqshiqmaqlil Yiqsaq'ae eel biq mol hhei biq, 10 Kaol Yalboqlahanl'ae gee biq: "Yaqhacheqzaq e haeqmiyaeq e yaqyo xitaeq ngaeq e yaqyo Yiqsaq e laqtaq kaol hhamul gayil e zaeqdye halngeiq mael maeq hhae bael byelzaeq'ae, tyulkaol, nol yoqhhae niq maeyaeq yaol lyeqdu biq maoqhhae." 11 Yalboqlahanl yoqhhaeq e yaqyo Yiqshiqmaqlil gae'lye zhee nyuqsaeq biq'ae. 12 Momil Yalboqlahanl'ae gee biq: "Yaeqguq xitaeq kaol noq e yaqhacheqzaq e haeqmiyaeq gae'lye haeq nyuqsaeq. Yiqsaq ae'lye du'lal hael maoqlaol, noq e houldail'ae lye maeq hhae gul biq'ae, tyulkaol, nol Saqla e saeziq mael naelhaeq maoqhhae. 13 Yaqhacheqzaq e haeqmiyaeq xitaeq e yaqyo eiq noq e houldail'ae, tyulkaol, ngael eiq yoqhhaeq ae'lye goqja qiq mal bi tullael maoq."
14 Yalboqlahanl naqlye tullael, saeqgeel palbye maellye eelcuq qiq palbye, kaol aqbahael eiq Xaljaq'ae heilmoq hhei biq, yoqhhaeq e baqtaq vae baqda hhei biq, kaol yaeqguq yaol yoqhhaeq'ae sheeqmoq hhei biq laol, yoqhhaeq yaol lyeqsae biq vae. Xaljaq deelsae vae, Byeqshilba e diqsheelleeldye vae lye deelbael biq. 15 Yoqhhaeteel lye saeqgeel palbye e eelcuq mael dol byel vae, Xaljaq lye yaqyo yaol aelbol bolyaeqhael e holhhaq vae bi zholdeelsaeq. 16 Kaol yoqhhaeq deeltael hhei vae, kamaq qiq pu bedu keelyil ongl dyul deelmaol yil, kaol yaeqguq e yiqsi yulboq'ae zholgae hhei, gee: "Ngael yaeqguq sil hhei maeq fu gaeyil hhaeq yae." Tyulkaol, yoqhhaeq yaeqguq e yiqsi yulboq'ae zhol deelhhei kaol yotyel haeqheemyel nyul tullaeq vae." 17 Momil yaeqguq xitaeq e yotyel mael gaeq hhei biq, Momil e mqmae yosongl mqmae ae'lye Xaljaq'ae gul biq, yoqhhaeq'ae gee biq: "Xaljaq o! Aeqchee peqlal laq hhaemaeq? Maq gu kael, yaeqguq nyul mael Momil gaeq vae. 18 Ngael yoqhhaeq yaol haeqheemyel goqja bi peqlal maoq. Tyulnye laol, nae'naemyel tullael kaol yaeqguq yaol cheeltul hhei, yoqhhaeq'ae haeq nyuqsaeq lye gee biq." 19 Momil lye Xaljaq'ae eelduq qiq mal bi molli. Tyulkaol, yoqhhaeq saeqgeel palbye mael'ae eelcuq kuq bong do hhei yil, kaol yaeqguq'ae bi dol. 20 Momil yaeqguq nyegael qiqgael baelzhol, yoqhhaeq aeqyae aeqyae'lye heeq lael, Ba'lanq milcaeq e diqsheelleeldye vae zhol hhae, kaol kamaq be e laqkiq peqlal vae. 21 Yoqhhaeq Ba'lanq e diqsheelleeldye vae zhol fu, yoqhhaeq e aeqmae lye Aijiq milcaeq ae'lye haeqmiq qiq hhaeq sheeqtoq hhei biq.
Yalboqlahanl kaol Yalbiqmiqlel hhaellaelmyel geemeeq deelhhei
22 Tyuqfu, Yalbiqmiqlel kaol aeqyoq e dangbinkei e cholyaeqhael e zhiqmoq Feigel Yalboqlahanl'ae gee biq: "Nol haelzongl e silqinq mael taq'ae, Momil noq nyegael qiqgael baelzhol'ae. 23 Ngael yaeqmeel nol laoq Momil'ae tyuq deelhhei kaol ngaeq'ae faqsilkei laeq, ngaeq'ae kaol ngaeq e yuqpaeq yuqnyul kaol houldailhael'ae zaqgiq haq giq biq lye nyuqlil. Ngael noq'ae haelmillye neemae maeqpaelmyel gaeq biq laol, nol eiq ngael kaol nol baelzhol e milcaeq e cholyaeqhael'ae tyulnye zongl laeq maoqhhae." 24 Yalboqlahanl geehoq biq: "Ngael faqsilkei hhaeq." 25 Yalboqlahanl laoq Yalbiqmiqlel e yaqhacheqzaq e cholyaeq lye eelduq qiq mal diqkoqzaeq biq gae'lye, Yalbiqmiqlel'ae buqzaq biq. 26 Yalbiqmiqlel gee: "Ngael yaeqmeel zhoq gaeq oqyilsiq, silqinq xilmael aeqsul lye zongl hhae lye ngael eiq maeq loq yae, nol eiq ngaeq'ae maeq geedu laq."
27 Yalboqlahanl lye aeqnuqhael kaol aeqyolhael cheellaeq, Yalbiqmiqlel'ae ee'laeq biq, kaol yoqhhaeteel qiqhhaeq qiqhhaeq'ae maeq zonglgae vae lye geemeeq deelhhei gil vae. 28 Yalboqlahanl lye aeqyolhael onglci e aeqyol yolmae maeyaeq siqb yaeq qiqjyelboq'ae cheel deelhhei. 29 Yalbiqmiqlel Yalboqlahanl'ae naelhaeq biq: "Nol aeqyol yolmae maeyaeq xi siq yaeq qiqjyelboq'ae cheel deelhhei mael laoq, nol aeqchee zongl maoqlye lilmaeq?" 30 Yalboqlahanl geehoq biq: "Noq lye ngaeq e aqlaq ae'lye aeqyol yolmae maeyaeq xi siq yaeq mul hhei kaollaoq, eelduq xilmael aeqdilmyel ngaeq lye duq hhei hhae lye zenljul geiqzaq maoq." 31 Tyulkaol, tyuqvae milcaeq vae Byeqshilba lye gul hhae, yoqhhae niq nulhhaeq tyuqvae hhaellaelmyel faqsilkei gil kaol'ae. 32 Yoqhhaeteel Byeqshilba vae hhaellaelmyel geemeeq deelhhei aeqnaol'ae, Yalbiqmiqlel kaol dangbinkei e cholyaeqhael e zhiqmoq Feigel, Fei'lilshil milcaeq vae hoqli vae. 33 Yalboqlahanl Byeqshilba vae onglmq qiq bol til deelhhei, kaol tyuqvae lye haeqfu eiq dyeqdeel e Momil Yeheqhuaq e cholmil mael'ae geezaeq biq hhae. 34 Yalboqlahanl Fei'lilshil cholyaeq e milcaeq vae haeldyul dyulmae baelzhol aeqwae.