Yalboqlahanl Yalbiqmiqlel'ae zaqgiqgiq biq
20
Yalboqlahanl tyuqvae lye Neilgaelvuq vae hhaoqpolpol li, Jadiqsi kaol Su'eq e kaeqlaeq vae baelzhol hhae. Yalboqlahanl Ji'la'eq vae baelzhol fu, 2 Yalboqlahanl aeqyoq e haeqmiq Saqla laoq 'ngaeq e dulmae'ae' lye gee gol hhae. Tyulkaol, Ji'la'eq e zongmae Yalbiqmiqlel lye cholyaeq yaol moqheilheil du hhei, kaol Saqla yaol sheeqzaeq yil vae. 3 Tyu qiq mil, Yalbiqmiqlel Momil yaol matutu li biq. Matu onglci'ae Momil yoqhhaeq'ae gee biq: "Nol sil goq laq hhaemaeq? Noq lye sheeqlaeq e haeqmiyaeq'ae haqyo zhol hhae." 4 Yalbiqmiqlel Saqla nyegael qiqgael maq ssuqza gol wae siq, kaol gee: "Ngaeq e Hhaoqsongl o! Nol gongyil e goqja mael eiq zonglmye maoqlye laeq? 5 Tyutaeq ngaeq'ae 'yoqhhaeq ngaeq e dulmae'ae' lye gee laeq maeqngeel maeq? Haeqmiyaeq tyutaeq aeqyoq eiq gee: 'Yoqhhaeq ngaeq e algo'ae.' Ngael zongl e silqinq xilmael laoq, ngaeq e neemae mael'ae nyuqfuhoq peq lil." 6 Momil matu onglci'ae lye yoqhhaeq'ae gee biq: "Ngael eiq loq lil, nol zongl e silqinq xilmael laoq neemae mael'ae nyuqfuhoq peq'ae, tyulkaol, ngael noq'ae diqqye lil, kaol noq yaol yoqhhaeq'ae maeq bi pa yil, aeqgael nol ngaeq'ae zonglzhil laeq maeqhe lye kaollil. 7 Yaeqmeel nol tyutaeq e haeqmiq yaol yoqhhaeq'ae sheeq hoqyil biq, yoqhhaeq laoq xianzhi'ae, yoqhhaeq noq'ae heeldoq bael gee laeq laol, nol maeq hhae sil vae. Nol yoqhhaeq'ae maeq sheeqhoq biq kaollaoq, nol kaol noq e holhhaq'ae zhol cholyaeqhael, gilzuqmyel hhae sil ngeelvae."8 Yalbiqmiqlel naqlye tullael, yoqhhaeq e haelzhol e zhiqmoqhael gul laeq, silqinq xihael gilzuqmyel yoqhhaeteel'ae geegaeq gil biq, kaol yoqhhaeteel gilzuqmyel zhee gu gil biq'ae. 9 Yalbiqmiqlel lye Yalboqlahanl yaol gul laeq, yoqhhaeq'ae gee biq: "Nol aeqcheekaol ngaeteel'ae xilnye zongl laeq lilmaeq? Ngael aeqchee silqinq mael taq'ae noq'ae zonglzhil laeq hhaemaeq, noq lye ngael kaol ngaeq e goqja vae xilnye golsiq siqmae bi pi laeq? Noq lye ngaeq'ae maeq zongl hhaeq e silqinq mael zongl hhei laeq vae." 10 Yalbiqmiqlel Yalboqlahanl'ae yol gee biq: "Nol aeqchee nyuqtongq deelhhei kaol xilnye silqinq zongl lilmaeq?" 11 Yalboqlahanl geehoq biq: "Ngael saeqvae milcaeq cholyaeqhael Momil'ae maq gu, kaol ngaeq e haeqmiq yaol sheeqzaeq goq biq gae'lye ngaeq yaol xyeq lal maeqhe lye nyuq lil. 12 Yoqhhaeq aeqdilmyel ngaeq e dulmae'ae, ngaeteel laoq aeqdae qiqdae aeqmae niqmae e yaeq lil, aeqnaol ngaeq e haeqmiq geiq lal hhae. 13 Momil ngaeq'ae ngaedae toq ae'lye deelsae hhei lye gee laeq, haeqvae lael'ee myel aeqyoyoq e zholhhael lye maqza myel zonglzhol fu, ngael yoqhhaeq'ae gee biq: 'Aedeeteel haeqvae milcaeq vae keelyil feiq, nol ochoq'ae gee biq: "Yoqhhaeq laoq ngaeq e algo'ae." Xilmael laoq nol ngaeq'ae neemae maeqpaelmyel gaeq laeq mael ngeelvae.'" 14 Yalbiqmiqlel lye aeqnuqhael, aqciqhael, yaqhacheqzaq e cholyaeqhael kaol yaqhacheqzaq e haeqmiyaeqhael, Yalboqlahanl'ae biq hhei biq, kaol Yalboqlahanl e haeqmiq Saqla yaol sheeqhoq hhei biq. 15 Yalbiqmiqlel gee: "Fu hhei, ngaeq e goqja e milcaeqhael gilzuqmyel noq e yiqsi'ae za, nol haeqvaehael'ae fuyo laol haeqvaehael'ae zhol aeqmeel."
16 Yoqhhaeq Saqla'ae gee biq: "Naelhaeq, ngaeq lye noq e algo vae pulziq qiqca (1000) heil hhei biq wae; xilnye zongl mael laoq, ochoq nol laoq qiqgiq maeq zonglba'ae lye loq vae." 17-18 Yalboqlahanl e haeqmiq Saqla gae'lye Yeheqhuaq lye, Yalbiqmiqlel toq e gilzuqmyel cholhae aeqmaehael'ae yaeqguq maeq bi pi'li kiq'ae. Ngeelfeiq, Yalboqlahanl Momil'ae heeldoq gee biq laol, Momil lye Yalbiqmiqlel yaol zonglmeeq biq, kaol yoqhhaeq e haeqmiq, kaol yoqhhaeq e yaqhacheqzaq e haeqmiyaeqhael yaol zonglmeeq biq vae, kaol yoqhhaeteel'ae yaeqguq bi pi'li kiq vae.