Loqdeq mqmae yosongl niq nulhhaeq'ae sheeqcaq biq
19
Kiqsulkiqxeiq fu, mqmae yosongl tyu niq nulhhaeq Soqdomaq vae keellael, tyuqfu Loqdeq Soqdomaq e milmae heeqmyel e oheiq vae zhol deelhhei hhae. Loqdeq yoqhhaeteel yaol zhoq mol hhei biq laol, tullael kaol yoqhhaeteel'ae sheeqcaq yi biq, kaol milcaeq vae vuqduqtongq gae deelhhei. 2 Gee: "Ngaeq e Hhaoqsongl o! Noteel laoq noteel e yaqhacheqzaq e cholyaeq toq'ae bael lael gil, aeqkeel ciq hheikaol qiq mil bal haq gil, kaol naeshoq mqshoq naqlye gaelmae zail deel gil." Yoqhhaeteel geehoq biq: "Maeq hhaeq'ae, ngaeteel nildu vae haq maoq." 3 Ngeelfeiq, Loqdeq hae'nae pu myel geezaeq biq gae'lye yoqhhaeteel yoqhhaeq nyegael bael li vae, kaol yoqhhaetoq'ae do'li. Loqdeq yoqhhaeteel'ae baqwanq baqdeel hhei biq, paofenq maqzoq e aqba pe hhei biq, kaol yoqhhaeteel zaeq vae.Soqdomaq cholyaeqhael e golsiq mael
4 Yoqhhaeteel maq ssuqza ga hhei siq, Soqdomaq e milmae heeqmyel e haqyoyaeqhael, yaqyoyaeq ae'lye mael aeqbol yaeqmoq keellye, gilzuqmyel haeqvae lael'ee myel hhae lye lael, kaol Loqdeq e laoqhaol mael ongtyeq biq. 5 Yoqhhaeteel Loqdeq'ae gul biq, yoqhhaeq'ae gee biq: "Yaeqmil noq saeqvae lael e haqyoyaeq niq nulhhaeq haeqvae zhol hhaemaeq? Yoqhhaeteel yaol saeqvae sheeq duyi, ngaeteel yoqhhaeteel nyegael ssuqza maoq." 6 Loqdeq duyil fu oheiq mael eepiq deelsaeq, kaol oheiq nildu e cholyaeqhael zael'ae keellael, 7 Gee: "Aedee cholyaeqhael o, xinqlalmyel silqinq haeq zongl gil. 8 Naelhaeq gil, ngaeq'ae yaeqmiq niq nulhhaeq zhol lil, haqyoyaeq nyegael qiqgael maq ssuqza gol wae siq, ngael yoqhhaeteel yaol sheeq duyi hhaeq, noteel yoqhhaeteel'ae haelmillye hhaol gae'lael aeqmyel zongl goq laol haelmillye zongl biq aeqmeel! Ngeelfeiq, xi niq nulhhaeq laoq ngatoq e daeqxi'ae, kaol noteel yoqhhaeteel'ae xilnye silqinq haeq zongl gil biq." 9 Cholyaeqhael gee: "Deeltael!" Yol gee: "Saeqvae milcaeq vae baelzhol lael e cholyaeq, ngaeteel e shenqpanl e zhiqmoq geiq lal; yaeqmeel ngaeteel noq'ae zonglkyuq mael, yoqhhaeteel'ae zongl biq mael taq'ae hhael zonglkyuq maoq." Kaol cholyaeqhael Loqdeq'ae aqhatiqlye byuq biq, yoqhhaeteel laefuqboq'ae da'li kaol oheiq mael diqba maoqlye zongl hhae. 10 Tyu niq nulhhaeq lye aqlaq tyuqdu hheikaol, Loqdeq yaol laoqhaol vae ee dohoq laq biq, kaol oheiq mael piqtyeq hhei vae, 11 Kaol oheiq e nildu vae zhol e cholyaeqhael'ae neelzheel bi zheelli, yaqyoyaeq ae'lye mael aeqbol yaeqmoqhael keellye, gilzuqmyel ma'ne yillil eeqleeq myel bi peqyil vae, kaol oheiq mael haeqvae za hhae lye maeq saelpopuq hhei ongl biq'ae.
12 Tyu niq nulhhaeq Loqdeq'ae gee biq: "Milmae heeqmyel saeqvae notoq e cholyaeq zhol siq maeq? Noq e yaeqmiq aeqsongq geiq maoqlye hael haoq, yaeqmiq yaqyo haoq, milmae heeqmyel vae zhol e noq e paeqyaeqhael haoq, yoqhhaeteel yaol gilzuqmyel saeqvae milcaeq ae'lye sheeq duyil. 13 Milmae heeqmyel e cholyaeqhael'ae konglgaol e yotyel mael Yeheqhuaq e yiqsi vae zhee heeq hhae, kaol Yeheqhuaq lye ngaeteel yaol saeqvae milcaeq e cholyaeqhael yaol zonglmye hhei lye moqheilheil du hhei laq hhae, tyulkaol, ngaeteel laoq saeqvae milcaeq e cholyaeqhael yaol zonglmye maoqlye lil." 14 Tyulkaol, Loqdeq duyil, yoqhhaeq e yaeqmiq yaol biqzaq deelhhei e yaqyohael'ae gee biq: "Yeheqhuaq saeqvae milcaeq e cholyaeqhael zonglmye maoqlye wae. Noteel saeqvae milcaeq ae'lye wae deelsae hhei." Ngeelfeiq, yoqhhaeq e yaeqmiq aeqsongq geiq maoqlye hael laoq, yoqhhaeq gee'nyelhhae hhae lye kei biq hhae.
Mqmae yosonglhael lye Loqdeq yaol Soqdomaq ae'lye jiul duyil biq
15 Mqbaebae lael goqbiq fu, mqmae yosongl niq nulhhaeq Loqdeq'ae nae'naekei lye gee biq: "Waekei, noq e haeqmiq kaol saeqvae zhol e yaeqmiq niq nulhhaeq yaol sheeq duyil. Aeqgael noq yaol milmae heeqmyel xilmael e hhae bi chenqfaq e golsiq gae'lye qiqgael bael zonglmye laqngeel." 16 Loqdeq haelmillye zongl maoqlye maeq loq biq. Yeheqhuaq laoq Loqdeq'ae hhaoqsaeqsaeq biq, tyulkaol, tyu niq nulhhaeq lye Loqdeq, yoqhhaeq e haeqmiq kaol yaeqmiq niq nulhhaeq e aqlaq mael'ae ee hheikaol, yoqhhaeteel yaol sheeq duyi biq vae, kaol milmae heeqmyel nilduboq'ae bi zhol gil. 17 Yoqhhae niq nulhhaeq lye yoqhhaeteel yaol sheeq duyi aeqnaol'ae, niq nulhhaeq onglci e qiq hhaeq gee: "Aeqyil maeq bi zonglsil lye laol wae ki gil! Aeqnaolboq'ae haeq chifu hoq, dyeongl longlmae vae eiq haeq haoqtul deelhhei gil, geeqzhoq vae kisae li, nol xilnye maeq zongl kaollaoq, noq yaol bal pe sil hhei ngeelvae." 18 Loqdeq yoqhhaeteel'ae gee biq: ''Ngaeq e Hhaoqsongl o! Xilnye haeq zongl. 19 Naelhaeq, noq e yaqhacheqzaq e cholyaeq laoq noq e ma'ne yiqsi ae'lye endianq hhamul hhei laeq, kaol nol ngaeq'ae xuldyulmyel maqqyemyel yol gaeq laeq, ngaeq e aeqyil mael jiul laeq. Ngeelfeiq, ngael geeqzhoq vae maeq ki da keelli fu ae'lye zaihuol mael ngaeq'ae cho'lyeq keellaeq, ngael laoq hhae sil wae. 20 Fu hhei, milmae nilmyel yulmael zhee niq'ae, ngaeteel'ae tyuqvae bi ki yil laq. Tyuqvae laoq milmae nilmyel qiqgael maeqngeel maeq? Ngael tyuqvae ki yil kaollaoq, hha dyeqdeel'ae." 21 Baeqjyelboq e mqmae yosongl qiq hhaeq gee: "Silqinq xilmael ngael eiq hhaeq lil, nol gee e milmae nilmyel tyulmael ngael maeq zonglmye biq hhaeq. 22 Nol nae'naemyel tyuqvae milmae nilmyel vae ki yil, nol tyuqvae maeq keelyil laefuq'ae ngael qiqgiq maeq zongl lael yae." Tyulkaol, milmae nilmyel tyulmael laoq Soq'eq lye gul hhae.
Momil lye Soqdomaq kaol Eqmoqla milmae heeqmyel mael zonglmye vae
23 Loqdeq Soq'eq vae keelli fu, neelmae byuqdu laq vae. 24 Tyuqfu, Yeheqhuaq lye liuqhuangq kaol aeqzaeq doq mael, mqmae taq'ae Yeheqhuaq tyuqvae lye Soqdomaq kaol Eqmoqla milmae heeqmyel vae bi leeqgae yi. 25 Milmae heeqmyel tyuhael kaol halza e dyeongl longlmae, milmae heeqmyel vae haelzhol cholyaeqhael, kaol milcaeq vae dyeq hael, gilzuqmyel bi zonglmye byel vae. 26 Loqdeq e haeqmiq yoqhhaeq e aeqnaolboq'ae chifu hoqyil laol, caqdeq e sseeldongq peqyil vae.
27 Yalboqlahanl mqshoq tullael laol, laefuq yoqhhaeq Yeheqhuaq e yiqsiboq'ae haoqtul deelhhei e milcaeq vae keellael, 28 Soqdomaq kaol Eqmoqla kaol dyeongl longlmae e halza milcaeq'ae gaelmaolsae'lye chifu fu, tyuqvae milcaeq vae aeqhaoqhaoq da mol hhei biq, aeqhaoq mael laoq aeqzaeq zaeqmae doq myel vae da'lal e aeqhaoq laoqmyel hhae. 29 Momil lye dyeongl longlmae e halza e milmae heeqmyelhael zonglmye vae. Momil Loqdeq zhol e milmae heeqmyel mael zonglmye maoqlye fu, Yalboqlahanl yaol nyuq tullaeq biq, kaol Loqdeq yaol zai'nanl vae lye jiul duyi biq.
Moqya cholyaeq kaol Yalmenq cholyaeq e aeqpyuq aeqdae
30 Loqdeq Soq'eq vae maeq zhol peq biq, kaol yoqhhaeq e yaeqmiq niq nulhhaeq nyegael Soq'eq vae lye deelsae hhei vae, kaol geeqzhoq vae da'li hhei, kaol tyuqvae zhol li gil. Yoqhhaeq kaol yaeqmiq niq nulhhaeq geeqzhoq gonglbyu qiq byu'ae zhol gil hhae. 31 Hhael heeq e yaeqmiq hhael nil e yaeqmiq'ae gee biq: "Saeqvae dongqpyeq dongqjyel vae milcaeq taq'ae beideelhhei laoqmyel, aedeeteel'ae sheeqzaeq lael e haqyoyaeq maeq zhol'ae, aedeeteel e aeqdae eiq yaeqmoqmoq vae. 32 Lael, aedeeteel aeqdae'ae zilbaeq neiqbu gil biq maoq, kaol yoqhhaeq nyegael qiqgael ssuqza, xilnye laol, aedeeteel aeqdae ae'lye houldail bi zhol gaeyil." 33 Tyu qiq mil, yoqhhaeteel lye aeqdae yaol zilbaeq neiqbu biq vae. Hhael heeq e yaeqmiq do'li kaol aeqdae nyegael qiqgael ssuqza, yoqhhaeq haeqfu ssuqza ga hhei, haeqfu tullael, yoqhhaeq e aeqdae laoq maeq loq'ae. 34 Aeqnaol qiq nao, hhael heeq e yaeqmiq hhael nil e yaeqmiq'ae gee biq: "Milkiq ngael aeqdae nyegael qiqgael ssuqza aeqwae, yaeqmil aedeeteel aeqdae'ae zilbaeq neiqbu gil biq maoq siq, nol do'li kaol yoqhhaeq nyegael qiqgael ssuqza li, xilnye laol, aedeeteel aeqdae ae'lye houldail bi zhol gaeyil." 35 Tyu qiq mil, yoqhhaeteel lye aeqdae yaol zilbaeq yol neiqbu biq vae, hhael nil e yaeqmiq do'li kaol aeqdae nyegael qiqgael ssuqza. Yoqhhaeq haeqfu ssuqza ga hhei, hhaeqfu tullael, yoqhhaeq e aeqdae laoq maeq loq'ae. 36 Xilnye laol, Loqdeq e yaeqmiq niq nulhhaeq, aeqyoteel e aeqdae ae'lye yaeqguqpi li vae. 37 Hhael heeq e yaeqmiq lye yaqyo qiq hhaeq bo hhei, yoqhhaeq'ae cholmil mael Moqyaa lye gul biq hhae, yaeqmeel e Moqya cholyaeq e aeqpyuq aeqdae ngeelvae. 38 Hhael nil e yaeqmiq eiq yaqyo qiq hhaeq bo hhei, yoqhhaeq'ae cholmil mael Bianl Yalmiqb lye gul biq hhae, yaeqmeel e Yalmenq cholyaeq e aeqpyuq aeqdae ngeelvae.