Yalboqlahanl maeqdaeqhhaeq myel cholyaeq suq nulhhaeq'ae sheeqcaq biq
18
Qiq nao e aeqcael hhaelhongl honglli fu, Yalboqlahanl laoq haeqpael haelcul e oheiq vae zhol deelhhei, Yeheqhuaq Manllil e aeqpoq aelbolhael e tyuqvae lye Yalboqlahanl vae bi molli. 2 Yoqhhaeq vuqduq baqtul hheikaol chifu, qiqlaqmyel cholyaeq suq nulhhaeq aeqyoq e yiqsi yulboq'ae haoqtul deelhhei mol hhei biq, kaol oheiq ae'lye ki yil kaol yoqhhaeteel'ae sheeqcaq yil biq, kaol milcaeq vae vuqduqtongq gae deelhhei, 3 Kaol gee: "Ngaeq e Hhaoqsongl o! Ngael noq e ma'ne yiqsi ae'lye endianq hhamul kaollaoq, noq e yaqhacheqzaq e cholyaeq'ae haeq deelsae laeq. 4 Ngael eelcuq teel baq yil lil, noteel aeqkeel ciq gil, kaol aelbol holhhaq vae hhaeqnaeqnaeq gil. 5 Noteel yaqhacheqzaq e cholyaeq zael'ae keellael vae, tyulkaol, ngael noteel'ae aqba teel heil hoqyil laeqngeel, tyulnye laol, noteel e aqha mael bi bo hoqlael kaol deel gil aeqmeel." Yoqhhaeteel gee: "Nol gee laoqmyel zongl aeqmeel." 6 Yalboqlahanl nae'naemyel haeqpael haelcul'ae do'li, Saqla zael'ae li kaol gee biq: "Nol nae'naemyel meqziq hhaeqxul san douq nyel hheikaol aqba zongl hhei. 7 Yalboqlahanl nuqku'ae yol ki'li, naoqgaeqlye culdyeqlye lalbu buyaeq qiq keel cheellaeq, yaqhacheqzaq e cholyaeq'ae cheelmoq hhei biq, kaol yaqhacheqzaq e cholyaeq nae'naemyel xyeq yil kaol caq meeq vae. 8 Yalboqlahanl lye aqciq e aeqchil maellye zonglgee hhei e qiqsheel, kaol aeqchil kaol paeqgaelsael meeq deelhhei e lalbu buyaeq e saeqzil mael baq laq, yoqhhaeteel e yiqsiboq'ae baqdeel hhei biq. Yoqhhaeteel zaeq gil fu, Yalboqlahanl laoq aelbol holhhaqboq'ae yoqhhaeteel'ae zhaofu biq hhae.Momil laoq Saqla yaqyo bo hhei'ae lye gee'ae
9 Yoqhhaeteel Yalboqlahanl'ae naelhaeq biq: "Noq e haeqmiq Saqla haeqvae zhol hhaemaeq?" Yoqhhaeq geehoq biq: "Haeqpael haelcul vae zhol hhae." 10 Baeqjyelboq e qiq hhaeq gee: "Naqhoq e yaeqmeel fu, ngael noq e saeqvae hoqlal maoq. Tyuqfu, noq e haeqmiq Saqla yaqyo qiq hhaeq bo hhei maoqlye hhae." Saqla cholyaeq tyutaeq e aeqnaolboq e haeqpael haelcul e oheiq vae zhol hhae, saeziq xilmael eiq bael gaeq vae. 11 Tyuqfu, Yalboqlahanl kaol Saqla yaeqmoq wae, cholhoq eiq li aeqwae, Saqla'ae siqza biq mael qiqzael eiq maqza myel qye'li biq aeqwae. 12 Kaol Saqla e neemae onglci'ae eelxul biq, gee: "Ngael yaeqmeel yaeqmoqmoq, ngaeq e hhaoqsongl eiq yaeqmoqmoq, ngael qiqgael ssuqza mael hhaol siq maeq?"
13 Yeheqhuaq Yalboqlahanl'ae gee biq: "Saqla aeqcheekaol eel hhaemaeq, kaol xilnye nyuq: 'Ngael yaeqmoqmoq oqyil vae, aeqdilmyel yaeqguq bo kiq siq maeq?' 14 Yeheqhuaq laoq maeq zonglkeel ongl myel e silqinq maeqhael za? Naqhoq e yaeqmeel fu, ngael noq e saeqvae hoqlal maoq, tyuqfu, Saqla yaqyo qiq hhaeq bo hhei wae." 15 Saqla gu tullaeq biq, kaol maeqngeel yil lye gee: "Ngael maq eel yil." Ngeelfeiq, yultaeq gee: "Maeqngeel'ae, nol aeqdilmyel eel vae."
16 Tyu suq nulhhaeq tyuqvae lye deelsae hheikaol deel maoqlye fu, Soqdomaq boq'ae chifu gil. Yalboqlahanl yoqhhaeteel'ae qiq qye bael sheeq duhoq yil biq maoqlyekaol yoqhhaeteel nyegael bael deel'ae. 17 Yeheqhuaq gee: "Ngael haelzongl maoqlye e silqinq mael Yalboqlahanl'ae geedu biq maoq. 18 Yalboqlahanl e houldailhael haeqheemyel goqja bi peqlal maoq, milcaeq taq'ae halza e goqjahael laoq yoqhhaeq gae'lye geeqlongq meeq vae. 19 Ngaeq lye Yalboqlahanl yaol saelpodu hhei mael laoq, yoqhhaeq yaol aeqyoyoq e yaeqguqhael kaol houldailhael'ae, aeqchee mael taq vae eiq saeqsaeldye kaol gongyil gae'lael aeqmyel zongl maoqhhae, kaol Yeheqhuaq e gaelmae mael deel maoqhhae lye bi minllinl maoqlye lil. Xilnye laol, Yeheqhuaq Yalboqlahanl'ae biq laqngeel lye gee biq e saeziqhael gilzuqmyel peqlal kiq hhae."
Yalboqlahanl Soqdomaq gae'lye Momil'ae geezaeq biq
20 Yeheqhuaq gee: "Soqdomaq kaol Eqmoqla e cholyaeqhael e golsiq mael zhee naeq hhae, kaol yoqhhaeteel'ae konglgaol biq e yotyel mael zhee heeq hhae. 21 Ngael yaeqmeel gaeyil kaol yoqhhaeteel haelzonglhael, gilzuqmyel ngaeq'ae gaeqlael laoqmyel hhaemaeq lye fu yil maoq; tyulnye maeqngeel kaol'eiq, ngael hhae loq'ae."
22 Suq nulhhaeq onglci e niq nulhhaeq tyuqvae lye deelsae vae, kaol Soqdomaq vae deel yil, Yalboqlahanl laoq Yeheqhuaq e yiqsiboq'ae haoqtul deelhhei wae siq. 23 Yalboqlahanl laefuq'ae deel da'li kaol gee: "Nol aeqdilmyel gongyil e cholyaeqhael kaol cholbahael gilzuqmyel qiqgael zonglmye maoqlye lilmaeq? 24 Milmae heeqmyel tyuqvae gongyil e cholyaeq ngaeqqyel hhaeq zhol kaollaoq, nol aeqdilmyel tyu milcaeq e cholyaeqhael zonglmye maoqlye lilmaeq? Milmae heeqmyel'ae gongyil e cholyaeq ngaeqqyel hhaeq gae'lye tyu milcaeq e cholyaeqhael yaol haeq zonglmye biq maeq hhaeq maeq? 25 Nol aeqdilmyel xilnye silqinq maeq zongl'ae: Gongyil e cholyaeqhael kaol cholbahael qiqgael xyeqsil hhei, gongyil e cholyaeqhael kaol xinqlalmyel e cholyaeqhael qiqsheel fupeq hhei, nol aeqdilmyel xilnye maeq zongl kiq'ae! Milcaeq taq hael'ae shenqpanl e Hhaoqsongl haelmillyekaol eiq saeqsaeldye'lye ngeel maoq maeqngeel maeq?"
26 Yeheqhuaq gee: "Ngael Soqdomaq milmae heeqmyel vae gongyil e cholyaeq ngaeqqyel hhaeq saelpopuq hhei kaollaoq, ngael yoqhhaeteel gae'lye tyuqvae halza milcaeq e cholyaeqhael maeq zonglmye biq hhaeq." 27 Yalboqlahanl geehoq biq: "Ngael milcaeq e haeqlyel laoqmyel feiq, teel eiq maq gu myel ngaeq e Hhaoqsongl'ae saeziq gee'naeq maoq. 28 Gongyil e cholyaeq xi ngaeqqyel hhaeq onglci'ae ngaeq hhaeq maq lo vae kaollaoq, nol gongyil e cholyaeq xi ngaeq hhaeq maq lo gae'lye milmae heeqmyel mael zonglmye maoq maeq?" Yoqhhaeq gee: "Ngael tyuqvae lye yuqqyel ngaeq hhaeq saelpopuq hhei kaollaoq, ngael eiq milmae heeqmyel xilmael maeq zonglmye yil." 29 Yalboqlahanl yoqhhaeq'ae yol naelhaeq biq: "Tyuqvae lye yuqqyel hhaeq saelpopuq hhei kaollaoq, nol eiq zonglmye maoq siq maeq?" Yoqhhaeq geehoq biq: "Ngael xi yuqqyel hhaeq gae'lye, tyulnye maeq zongl hhaeq." 30 Yalboqlahanl gee: "Ngaeq e Hhaoqsongl o, haeq holzaeq laeq, ngaeq'ae bi naelhaeq laeq siq: 'Tyuqvae suqqyel hhaeq saelpopuq hhei kaollaoq, nol zonglmye maoq siq maeq?'" Yoqhhaeq geehoq biq: "Ngael tyuqvae lye suqqyel hhaeq saelpopuq hhei kaollaoq, tyulnye eiq maeq zongl hhaeq." 31 Yalboqlahanl gee: "Ngael teel eiq maq gu myel ngaeq e Hhaoqsongl'ae gee maoq siq, tyuqvae lye niqqyel hhaeq saelpopuq hhei kaollaoq, nol zonglmye maoq siq maeq?" Yoqhhaeq geehoq biq: "Ngael xi niqqyel hhaeq gae'lye tyuqvae maeq zonglmye hhaeq." 32 Yalboqlahanl gee: "Ngaeq e Hhaoqsongl haeq holzaeq laeq, ngaeq'ae aeqnaol naolli qiq pu bi naelhaeq laeq siq, tyuqvae qyel hhaeq saelpopuq hhei kaollaoq, nol haelmillye zongl maoq maeq?" Yoqhhaeq geehoq biq: "Ngael xi qyel hhaeq gae'lye tyuqvae maeq zonglmye hhaeq." 33 Yeheqhuaq Yalboqlahanl nyegael saeziq gee byel hhei'laol deelsae hhei vae. Yalboqlahanl eiq aeqyoq zhol myel milcaeq vae hoqli vae.