Momil Yalboqlanq nyegael geemeeq deelhhei biq e jilhaol mael laoq yeqgae gui'liq'ae
17
Yalboqlanq hhaoqqyel hhaoq hoq fu, Yeheqhuaq yoqhhaeq'ae bi molli, yoqhhaeq'ae gee biq:"Ngael laoq hhael'onglzaeq zaeqli Momil lil,
nol ngaeq nyegael guanxil zhee meeq maoqhhae,
kaol qiqgiq geehhael maqza myel e cholyaeq geiq maoqhhae.
2 Ngael noq nyegael geemeeq deelhhei mael laoq aeqdilmyel hhae,
kaol noq e houldailhael haelnaeq naeqmaemyel bi naeqlael maoq."
3 Tyulkaol, Yalboqlanq naeqdeel mael milcaeq'ae tongqmaoq yil aeqmyel tongq deelhhei; Momil yoqhhaeq'ae yol gee biq:
4 "Naelhaeq, xilmael laoq ngael noq nyegael geemeeq deelhhei mael'ae:
Nol haeldyul dyulmae e goqjahael e aeqpyuq aeqdae geiq maoqlye hhae.
5 Ngael laoq noq yaol haeldyul dyulmae,
goqjahael e aeqpyuq aeqdae bi geiq aeqwae,
tyulkaol, noq e cholmil mael Yalboqlanq lye haeq gul oq,
Yalboqlahanl lye gul maoqhhae.
6 Ngael noq e houldail haelnaeq naeqmaemyel bi naeqlael maoq, yoqhhaeteel goqja haelnaeqmyel bi peqlal maoq, yoqhhaeteel qiq miq laoq zongmae bi geiq maoq. 7 Ngael nol kaol noq e houldailhael nyegael hae qiqyil keellye geemeeq deelhhei maoq, ngaeq e geemeeq deelhhei e xilmael laoq haeqfu eiq zadeel keel hhae, ngael laoq nol kaol noq e houldailhael e Momil geiq maoq. 8 Ngael laoq nol yaeqmeel baelzhol e Ja'nanq e halza milcaeq mael, nol kaol noq e houldailhael'ae biq biq maoq, kaol yoqhhaeteel haeqfu eiq hhamul gayil maoqlye hhae, ngael eiq yoqhhaeteel e Momil geiq maoq."
9 Momil Yalboqlahanl'ae gee biq: "Nol kaol noq e hae qiqyil e houldailhael ngaeq lye geemeeq deelhhei mael zongl gaeyil maoqhhae. 10 Xilmael laoq ngael nol kaol noq e houldailhael aeqdilmyel zongl gaeyil maoq e geemeeq deelhhei mael'ae: Noteel onglci e haqyoyaeqhael haetaeq eiq yeqgae gui'liq zongl maoqhhae. 11 Noteel e aeqhhaol e ael'yuq e saeqgeel mael teel yeqgae maoqhhae, xilmael laoq ngael noteel nyegael geemeeq deelhhei e jilhaol mael ngeelvae. 12 Noteel e hae qiqyil e haqyoyaeqhael onglci'ae, laoqhaol ae'lye bo hhei hael haoq, noq e houldail maeqngeel myel baeqjyelboq minqcuq ae'lye dyuqbaq maellye vul laq e cholyaeqhael haoq, bogae hhei e yaqyoyaeq'ae heiq nao fu yeqgae gui'liq zongl biq maoqhhae. 13 Notoq ae'lye bo hhei hael haoq, noq lye dyuqbaq maellye vul laq hael haoq, aeqsul vae eiq yeqgae gui'liq zongl biq maoqhhae. Tyulnye laol, ngaeq e haeqfu eiq zadeel e geemeeq deelhhei mael, noteel e aeqhhaol taq'ae jilhaol bi geiq maoq. 14 Ngeelfeiq, yeqgae gui'liq maeq zongl e haqyoyaeq laoq, aeqyoq e aeqhhaol e ael'yuq e saeqgeel mael teel maeq yeqgae e haqyoyaeq ngeelvae, tyutaeq yaol aeqyoq e qiqzonglyaeq ae'lye jyeqdael lye noga biq laoqmyel noga biq maoqhhae, yoqhhaeq ngaeq lye geemeeq deelhhei laoqmyel maeq zongl kaol'ae."
15 Momil Yalboqlahanl'ae gee biq: "Noq e haeqmiq Saqlaiq, yoqhhaeq e cholmil mael Saqlaiq lye haeq gul biq oq, Saqla lye gul biq maoqhhae. 16 Ngael yoqhhaeq'ae geeqlongq biq biq maoq, yoqhhaeq lye noq'ae yaqyo qiq hhaeq bo hhei biq maoqlye hhae. Ngael yoqhhaeq'ae geeqlongq biq biq maoq, yoqhhaeq haeldyul dyulmae e goqja e aeqpyuq aeqmae geiq maoqlye hhae, haelnaeqmyel e goqja e zongmaehael yoqhhaeq ae'lye du beq lal maoqlye hhae." 17 Kaol Yalboqlahanl naeqdeel mael milcaeq'ae tongqmaoq yil aeqmyel eel tullaeq, neemae mael'ae nyuq: "Qiqhael (100) hoq zoq e cholyaeq yaeqguq zhol laelkiq siq maeq? Saqla hhaoqqyel hoq zoq wae, yaeqguq bo kiq siq maeq?" 18 Yalboqlahanl Momil'ae gee biq: "Yiqshiqmaqlil noq e yiqsiboq'ae geeqlongq meeq biq lye nyuqlil!"
19 Momil gee: "Noq e haeqmiq Saqla, aeqdilmyel noq'ae yaqyo qiq hhaeq bo hhei laeq'ae, nol yoqhhaeq'ae cholmil mael Yiqsaq lye gul biq maoqhhae, ngael yoqhhaeq nyegael geemeeq deelhhei maoq, kaol yoqhhaeq e houldailhael'ae, ngaeq lye geemeeq deelhhei mael aeqgael haeqfu eiq za gayil'ae. 20 Yiqshiqmaqlil'aea laoq ngael eiq nol geezaeq laoqmyel bi peqlal laqngeel. Naelhaeq, ngael yoqhhaeq'ae geeqlongq biq biq maoq, yoqhhaeq yaol bi henq lael, kaol houldail haelnaeqmyel bi naeqlael maoq; yoqhhaeq ae'lye minqcuq e yoheeq qyelniq hhaeq du'lal, xi qyelniq hhaeq laoq qyelniq minqcuq e yoheeq'ae, ngael eiq yoqhhaeq'ae haeqheemyel goqja bi peqlal maoq. 21 Naqhoq e yaeqmeel fu, ngael laoq Saqla lye noq'ae bo hhei biq e Yiqsaq nyegael geemeeq deelhhei mael haeqfu eiq zadeel keel maoqlye hhae."
22 Momil Yalboqlahanl nyegael saeziq gee byel hhei'laol, yoqhhaeq zaellye deelsae hheikaol mqmae vae da hoqli vae. 23 Tyuqfu qiq nao, Yalboqlahanl Momil moqheilheil biq laoqmyel, yoqhhaeq e yaqyo Yiqshiqmaqlil'ae, kaol yoqhhaetoq'ae haelzhol e (laoqhaol ae'lye bo hhei hael kaol dyuqbaq maellye vul laq hael) yaqyohael gilzuqmyel yeqgae gui'liq zongl gil vae. 24 Yalboqlahanl hhaoqqyel hhaoq hoq fu, aeqhhaol e ael'yuq e saeqgeel mael teel bi yeqgae vae. 25 Yoqhhaeq e yaqyo Yiqshiqmaqlil qyelsuq hoq fu, aeqhhaol e ael'yuq e saeqgeel mael teel bi yeqgae vae. 26 Tyuqfu qiq nao, Yalboqlahanl kaol yoqhhaeq e yaqyo Yiqshiqmaqlil yeqgae gui'liq qiqgael zongl gil vae. 27 Yalboqlahanl toq e gilzuqmyel haqyoyaeqhael, laoqhaol ae'lye bo hhei hael kaol baeqjyelboq minqcuq ae'lye dyuqbaq maellye vul laq hael, gilzuqmyel yoqhhaeq nyegael qiqgael yeqgae gui'liq zongl gil vae.