Yalboqlanq lye Loqdeq yaol jiul hoqlaeq vae
14
Tyuqfu naohaeq, Anllafei laoq Shilnaq milcaeq vae zongmae geiq, Yallyul laoq Yiqlasaq milcaeq vae zongmae geiq, Jidallaoqma laoq Yiqlanq milcaeq vae zongmae geiq, Tiqdaq laoq Geyinl milcaeq vae zongmae geiq, 2 Zongmae xi yuq hhaeq aeqyoteel e dangbinkei e cholyaeqhael sheeq hheikaol, baeqjyelboq e zongmae ngaeq hhaeq nyegael daqzhangldiq yil. Zongmae tyu ngaeq hhaeq laoq, Soqdomaq milcaeq e zongmae Biqla, Eqmoqla milcaeq e zongmae Biqsa, Yamaq milcaeq e zongmae Shilnaq, Xiqbianq milcaeq e zongmae Shanlyiqbyeq, kaol Biqla milcaeq e zongmae'ae. Biqla milcaeq laoq Soq'eq e milcaeq'ae. 3 Zongmae xi ngaeq hhaeq Xidinl Longlkaeq vae deel'eeq gil. Xidinl Longlkaeq laoq Caqdeq Eeldeel'aea. 4 Yoqhhaeteel Jidallaoqma e laqtaq holhhaqboq'ae qyelniq hoq zhol aeqwae, aeqnaol qiq hoq laoq yoqhhaeq'ae neemae xyelpupu byel yil biq vae. 5 Qyel'yuq hoq fu Jidallaoqma kaol aeqyoq boq'ae pol e zongmaehael gilzuqmyel lael vae. Yoqhhaeteel lye Yaltellyul Ja'ninq milcaeq vae Lilfaqyin cholyaeq yaol diq yinq biq, Hamail milcaeq vae Suxi cholyaeq yaol diq yinq biq, Savei Ji'lyeltinq milcaeq ae'lye Yiqmiq cholyaeq yaol diq yinq biq, 6 Heqlil cholyaeq e Xi'eq Geeqzhoq vae Heqlil cholyaeq yaol diq yinq biq, kaol Yi'lel Ba'lanq e diqsheelleeldye vae niqli maoqmyel vae lyeqkeel biq. 7 Aeqnaol laoq yoqhhaeteel deelpol hoqlaeq, kaol Jadiqsi lye gul e An Milba vae keellael, kaol Yalmaqlil cholyaeq e halza milcaeqhael zholchiqzaeq biq, kaol Haxiqxunl Tamaq vae zhol e Yalmoqlil cholyaeq yaol eiq diq yinq biq. 8 Tyulkaol, Soqdomaq e zongmae, Eqmoqla e zongmae, Yamaq e zongmae, Xiqbianq e zongmae kaol Biqla e zongmae (Biqla laoq Soq'eq ngeelvae) gilzuqmyel duyi, kaol Xidinl Longlkaeq vae deel'eeq gil, kaol daqzhangldiq maoq vae lye zonglmeeq deelhhei wae. 9 Zongmae ngaeq hhaeq tyuqvae milcaeq vae, Yiqlanq e zongmae Jidallaoqma, Geyinl e zongmae Tiqdaq, Shilnaq e zongmae Anllafei kaol Yiqlasaq e zongmae Yallyul nyegael diq tullaeq vae; xilmael laoq zongmae yuq hhaeq kaol zongmae ngaeq hhaeq daqzhangldiq mael'ae. 10 Xidinl Longlkaeq vae beqyoq e duqhongq zhee za. Soqdomaq e zongmae kaol Eqmoqla e zongmae kihhaq fu, duqhongqhael vae jyedo gil biq, baeqjyelboq e cholyaeqhael laoq gilzuqmyel geeqzhoq vae ki da byel li. 11 Diq yinq e zongmae yuq hhaeq lye Soqdomaq kaol Eqmoqla e halza e jadanglhael kaol halza e zaelsiqhael diqkoqzaeq byel yil vae. 12 Tyuqfu, Yalboqlanq e dulmpaeq Loqdeq Soqdomaq vae zhol hhae. Tyuteel lye Loqdeq kaol yoqhhaeq e jadanglhael diqkoqzaeq yil biq vae.13 Kihezaq e cholyaeq qiq hhaeq, ki'laq kaol Xiboqlaiq cholyaeq Yalboqlanq'ae geegaeq lael biq. Tyuqfu, Yalboqlanq laoq Manllil lye gul e Yalmoqlil cholyaeq e aeqpoq aelbolhael dongqpyeq vae zhol hhae. Manllil, Yiqshiqgel, kaol Yalnaiq laoq paeqyaeq'ae. Yoqhhaeteel laoq Yalboqlanq nyegael sil kaol'eiq hhaeq e yelchoq'ae. 14 Yalboqlanq'ae yoqhhaeq e dulmpaeq Loqdeq yaol cholyaeq lye eezaeq yil vae lye zhoq gaeq laol, yoqhhaetoq'ae dyeqlal e daqzhangldiq kiq e cholyaeq suqhael qyelheiq (318) hhaeq gul'eeq hheikaol tyuteel'ae lyeq yil, kaol Danl milcaeq vae lyeqkeel yil vae.
15 Mqkiq vae, Yalboqlanq kaol yoqhhaeq e yaqhacheqzaq e cholyaeqhael byelpa hheikaol yoqhhaeteel'ae diq yil biq, kaol yoqhhaeteel yaol diq yinq biq vae, Dalmaqshilgeq e beqbian boq e Heqbaq vae yol lyeqkeel biq. 16 Yoqhhaeq lye ochoq lye diqkoqzaeq yil biq e halza e jadanglhael gilzuqmyel diqkoq hoqlaeq vae, yoqhhaeq e dulmpaeq Loqdeq kaol Loqdeq e jadanglhael, kaol cholhae aeqmaehael kaol qiqzonglyaeq e cholyaeqhael, gilzuqmyel diqkoq hoqlaeq vae.
Mailjixiqdeq jilsi laoq Yalboqlanq'ae geeqlongq biq biq
17 Yalboqlanq lye Jidallaoqma kaol Jidallaoqma boq'ae pol e zongmaehael yaol diq yinq kaol hoqlal fu, Soqdomaq e zongmae duyi, Savei Longlkaeq vae sheeqcaq yil biq. Savei Longlkaeq laoq Zongmae Longlkaeq lye eiq gul hhae. 18 Tyuqfu, Sa'lenqb e zongmae Mailjixiqdeqc aqba kaol zilbaeq heil hheikaol Yalboqlanq'ae sheeqcaq yi biq. Yoqhhaeq laoq hhaelgao gao'li Momil e jilsi'ae. 19 Yoqhhaeq Yalboqlanq'ae geeqlongq biq biq, gee:
"Mqdongq milbeibei e qiq hhaeq,
Hhaelgao gao'li Momil Yalboqlanq'ae geeqlongq biq biq lye nyuqlil.
20 Hhaelgao gao'li Momil lye diqrenq yaol noq e aqlaq'ae eemoq biq hhae,
tyulkaol, yoqhhaeq'ae maeqdaeqhhaeq'ae lye gee biq maoqhhae!"
Kaol Yalboqlanq diqkoq laeq hael onglci'ae qyel mael onglci e qiq mal heildu hhei, kaol Mailjixiqdeq'ae heil biq. 21 Soqdomaq e zongmae Yalboqlanq'ae gee biq: "Nol cholyaeqhael ngaeq'ae bi mul laq, jadanglhael nol heilzaeq yil aeqmeel." 22 Yalboqlanq Soqdomaq e zongmae'ae gee biq: "Ngael mqdongq milbeibei e qiq hhaeq, hhaelgao gao'li Momil Yeheqhuaq'ae tyuq deelhhei kaol faqsilkei hhaeq, 23 Noq e gilzuqmyel moqgoqhael laoq, keelpongq qiq ke, paqno alca qiq ca, ngael eiq maeq heilzaeq yil, aeqgael nol xilnye gee lael maeqhe, gee: 'Ngaeq lye Yalboqlanq'ae yoha bi ha lal lil.' 24 Yaqhacheqzaq e cholyaeqhael lye zaeq gil e mael maoqlaol, ngael qiqgiq eiq maq mul yil, ngeelfeiq, ngaeq nyegael hhaellaelmyel deel e Yalnaiq, Yiqshiqgel, Manllil hhamul hael laoq, yoqhhaeteel heilzaeq yil biq."