Yalboqlanq kaol Loqdeq qiq hhaeq qiqjyel'ae deelsae hhei vae
13
Yalboqlanq laoq haeqmiq, Loqdeq kaol haelzholhael sheeq hhei, kaol Aijiq ae'lye Neilgaelvuq vae da'li gil vae. 2 Yalboqlanq'ae laoqhaol jyeqyaeq zhee zhol, pulziq pulsheel zhee za. 3 Yoqhhaeq Neilgaelvuq ae'lye qiqgael qiqgael lye beqfang boq'ae hhaoqpolpol yil, Boqtellil vae keellael. Yoqhhaeq Boqtellil kaol Ail e kaeqlaeq'ae aeqyoq zhoqmyel fu haeqpael haelcul cu yo e milcaeq vae hoq keellael vae, 4 Tyuqvae milcaeq laoq yoqhhaeq laefuq fuqli qiqzael jiltanq zongl deelhhei e milcaeq'ae. Yalboqlanq tyuqvae Yeheqhuaq e cholmil mael'ae geezaeq biq hhae. 5 Yalboqlanq nyegael qiqgael hhaoqpol bael pol e Loqdeq vae eiq aqciqhael, aeqnuqhael zhol, kaol haeqpael haelcul za.6 Yoqhhaeteel e jadanglhael naeq li aeqkaol, tyuqvae milcaeq'ae hhaellaelmyel maeq zhol dyel vae. Tyulkaol, yoqhhaeteel qiqgael maeq hhae zhol gaeyil vae. 7 Yalboqlanq e laoqhaol jyeqyaeq hoqzaq e cholyaeqhael, kaol Loqdeq e laoqhaol jyeqyaeq hoqzaq e cholyaeqhael zonglgae gil. Tyuqfu, Ja'nanq cholyaeq kaol Biqlilxiq cholyaeq tyuqvae zhol gil wae siq. 8 Yalboqlanq Loqdeq'ae gee biq: "Aedeeteel laoq paeqyaeq'ae, kaol aedee niq nulhhaeq maeq zonglgae hhaeq'ae; noq e laoqhaol jyeqyaeq hoqzaq cholyaeq, kaol ngaeq e laoqhaol jyeqyaeq hoqzaq cholyaeq eiq maeq zonglgae hhaeq'ae. 9 Halza milcaeq noq e yiqsi'ae za maeqngeel maeq? Nol ngaeq'ae zaellye deelsae aeqkaovae! Nol laeqbaelboq'ae yil kaollaoq, ngael laqsseqboq'ae yil, nol laqsseqboq'ae yil kaollaoq, ngael laeqbaelboq'ae yil hhaeq." 10 Loqdeq vuqduq baqtul hhei'laol, Soq'eq vae keellye e Yoqdanl Lolbaeq e halza dyeongl longlmae vae eelcuq zhee za mol hhei biq; Yeheqhuaq Soqdomaq kaol Eqmoqla zonglmye laefuq'ae, Saeqvae laoq Yeheqhuaq e kilsaq laoqmyel hhae, Aijiq milcaeq laoqmyel eiq dul. 11 Tyulkaol, Loqdeq Yoqdanl Lolbaeq e halza dyeongl longlmae mael mul hhae, kaol neeldu aelheiq boq'ae yil vae, kaol yoqhhaeteel qiq hhaeq qiqjyel'ae deelsae hhei vae. 12 Yalboqlanq laoq Ja'nanq milcaeq vae zhol hhae; Loqdeq laoq dyeongl longlmae e milmae heeqmyel vae zhol hhae. Yoqhhaeq haeqpael haelcul mael heil hheikaol qiqgael qiqgael lye hhaoqpolpol, aeqnaol Soqdomaq vae pol deelli vae. 13 Yeheqhuaq'ae lye fu'li'laol, Soqdomaq cholyaeq laoq cholba bamae'ae.
Yalboqlanq Xiboqlunq vae hhaoqpolpol yil
14 Loqdeq Yalboqlanq zaellye deelsae hhei aeqnaol'ae, Yeheqhuaq Yalboqlanq'ae gee biq: "Nol vuqduq baqtul hhei, nol zhol myel vae lye beqfang, nanqfang, neeldu aelheiq kaol neelgae aelheiq vae chifu. 15 Nol haelmol e milcaeqhael, ngael aeqgael haeqfu keellye nol kaol noq e houldailhael'ae biq biq maoq. 16 Ngael noq e houldailhael milcaeq e milxul laoqmyel bi naeqlael laeqngeel. Nol milcaeq e milxulhael suqda ongl kaollaoq, noq e houldailhael haeldyul zhol'ae lye suqda ongl'ae." 17 Tullael, nol haelmol e milcaeq vae aqtaq aq'oq xiboq yulboq myel deeldyu byel maoqhhae, ngael milcaeq xilmael noq'ae biq laqngeel." 18 Tyulkaol, Yalboqlanq laoq Xiboqlunq milcaeq vae, Manllil e aeqpoq aelbolhael dongqpyeq vae hhaoqpolpol keellaeq, kaol tyuqvae bael zholgae hhei gil vae. Yoqhhaeq lye tyuqvae eiq Yeheqhuaq'ae jiltanq qiq mal zongl deelhhei biq.