Momil lye Yalboqlanq yaol gul laeq
12
Yeheqhuaq Yalboqlanq'ae gee biq:"Nol noq e milcaeq, noq e qiqzonglyaeq,
kaol noq e aeqdae toq ae'lye deelsae hhei,
ngael noq'ae tyuqmyeq biq e milcaeq vae yil.
2 Ngael noq e houldailhael goqja jamae bi peqlal maoq,
kaol noq'ae geeqlongq biq laqngeel,
kaol noq e cholmil mael aeqsul eiq bi loq maoq,
tyulkaol, nol eiq ochoq'ae geeqlongq biq biq maoqhhae.
3 Noq'ae geeqlongq biq biq e cholyaeq laoq,
ngael yoqhhaeq'ae geeqlongq biq biq maoq;
noq'ae doqchiq gee e cholyaeq laoq,
ngael yoqhhaeq'ae doqchiq gee biq maoq.
Milcaeq taq e gilzuqmyel cholhaoqhael,
noq gae'lye geeqlongq meeq vae."
4 Yalboqlanq laoq Yeheqhuaq yoqhhaeq'ae moqheilheil biq laoqmyel yil vae, Loqdeq eiq yoqhhaeq nyegael qiqgael bal yil. Yalboqlanq Ha'lanq milcaeq ae'lye deelsae fu, siqqyel ngaeq hoq zoq wae. 5 Yalboqlanq aeqyoq e haeqmiq Saqlaiq kaol dulmpaeq Loqdeq, kaol yoqhhaeteel Ha'lanq milcaeq ae'lye taeqdeelzaeq hhei e jadanglhael, kaol hhae'lael biq e cholyaeqhael, qiqgael duyi kaol Ja'nanq milcaeq vae yil maoqlye hhae. Kaol yoqhhaeteel Ja'nanq milcaeq vae keellael vae. 6 Yalboqlanq tyuqvae milcaeq vae deelpol duyil, Shiljianl e Moqlil milcaeq e aeqpoq aelbol tyuqvae keellael. Tyuqfu, Ja'nanq cholyaeq tyuqvae milcaeq vae zhol gil hhae. 7 Yeheqhuaq Yalboqlanq vae bi molli, gee: "Ngael milcaeq xilmael noq e houldailhael'ae biq biq maoq." Kaol Yalboqlanq tyuqvae yoqhhaeq'ae bi molli e Yeheqhuaq'ae jiltanq qiq mal zongl deelhhei biq. 8 Aeqnaol yoqhhaeq tyuqvae lye Boqtellil e neeldu aelheiq boq e milcaeq vae hhaoqpolpol yil, haeqpael haelcul cu hhei. Neelgae aelheiq boq laoq Boqtellil milcaeq'ae, neeldu aelheiq boq laoq Ail milcaeq'ae; yoqhhaeq eiq tyuqvae Yeheqhuaq'ae jiltanq qiq mal zongl deelhhei biq, kaol Yeheqhuaq e cholmil mael'ae geezaeq biq hhae. 9 Yalboqlanq hhaoqpol yol pol, aeqyae aeqyae'lye Neilgaelvuq vae polyil.
Yalboqlanq Aijiq vae gaeyil
10 Tyuqfu, tyuqvae milcaeq vae hoqlaq maeqmeeq qiqgiq zaeq eiq maqza; hoqlaq mael teel eiq maeqmeeq qiqgiq zaeq teel eiq maqza, tyulkaol, Yalboqlanq Aijiq vae gaeyil, tyuqvae qiqtongq baelzhol gil maoqlye hhae. 11 Aijiq vae keellael goqbiq fu, Yalboqlanq yoqhhaeq e haeqmiq Saqlaiq'ae gee biq: "Naelhaeq, ngael laoq nol zhee zhigaq e haeqmiyaeq'ae lye loq lil. 12 Aijiq cholyaeq noq yaol mol hhei fu, aeqdilmyel xilnye gee: 'Xitaeq laoq yoqhhaeq e haeqmiq'ae', kaol yoqhhaeteel ngaeq'ae xyeq lal, ngeelfeiq, noq yaol bi dyeqdeel. 13 Nol ngaeq e dulmae lil lye gee lye geezaeq lil, kaol ngaeq yaol noq gae'lye maeqpaeq maeqnaelmyel bi ngeel laeq, kaol ngaeq e aeqyil mael eiq noq gae'lye hha dyeqdeel'ae." 14 Aeqdilmyel, Yalboqlanq Aijiq vae doyil fu, Aijiq cholyaeqhael haeqmiyaeq xitaeq zhee zhigaq she lye mol hhei biq. 15 Faqlaoq a e zhiqmoqhael Saqlaiq yaol mol hhei biq, kaol Faqlaoq e yiqsi ae'lye Saqlaiq zhee zhigaq ae'lye gee biq. Tyulkaol, haeqmiyaeq tyutaeq yaol Faqlaoq toq'ae sheeq do'li biq. 16 Haeqmiyaeq xitaeq gae'lye Faqlaoq Yalboqlanq'ae haelmeeqlye meeq biq, aeqnuq, aqciq, mao'lyu lyupaeq, mao'lyu lyumae, loltoq, kaol hhaeq'ongq ongqzaeq e cholyaeq haelnaeqmyel biq hhei biq. 17 Ngeelfeiq, Yeheqhuaq Yalboqlanq e haeqmiq Saqlaiq gae'lye, Faqlaoq kaol yoqhhaetoq e cholyaeqhael'ae naelgol golmae bi yo'li. 18 Tyulkaol, Faqlaoq lye Yalboqlanq yaol gul laeq, yoqhhaeq vae gee biq: "Nol ngaeq'ae aeqcheekaol xilnye silqinq zongl laeq lilmaeq? Nol aeqcheekaol ngaeq'ae yoqhhaeq noq e haeqmiq'ae lye maeq geedu laq lilmaeq? 19 Nol aeqcheekaol yoqhhaeq noq e dulmae'ae lye gee, tyulkaol, ngael yoqhhaeq yaol sheeqtoq hheikaol haeqmiq bi mul laq lilmaeq? Noq e haeqmiq saeqvae zhol hhae, yoqhhaeq yaol wae sheeqsae yil!" 20 Faqlaoq Yalboqlanq gae'lye cholyaeqhael'ae moqheilheil biq. Tyulkaol, yoqhhaeteel lye Yalboqlanq kaol yoqhhaeq e haeqmiq yaol lyeqsae biq vae, kaol Yalboqlanq e halzahael bi heil yil vae.