Babyeqtaq
11
Tyuqfu, milcaeq taq'ae saeziq qiqsheel maoq maqza'ae, cholyaeqhael saeziq qiqsheel gee gil hhae. 2 Yoqhhaeteel neeldu aelheiq boq'ae hhaoqpolpol fu, Shilnaq milcaeq vae dyeongl longlmae qiqgael deelpuq hhei biq, kaol tyuqvae zholgae hhei gil vae. 3 Yoqhhaeteel qiqhhaeq qiqhhaeq'ae geegaeq gil: "Lael gil, aedeeteel nalgaq xye gil maoq, nalgaq mael pe ongl hhei gil maoq!" Yoqhhaeteel nalgaq mael haqlo geiqzaq, beqyoq mael milpye geiqzaq. 4 Yoqhhaeteel yol gee: "Lael gil, aedeeteel milmae heeqmyel qiqgael cu du hhei gil maoq, kaol milmae heeqmyel vae taq qiq ssul cu du hhei gil maoq, taq e honglbyu mael mqmae vae maol da keelli aeqmyel. Aedeeteel laoq aeqyoyoq e cholmil mael aeqsul eiq bi loq maoqhhae, aeqgael aedeeteel laoq milcaeq taq'ae haeqvae lael'ee myel zholsanq deel yil maeqhe." 5 Yeheqhuaq gaeyi, cholyaeqhael lye zongl hhei e milmae heeqmyel mael kaol taq cu du hhei mael'ae chifu yi. 6 Yeheqhuaq gee: "Yoqhhaeteel laoq qiqsheel minqcuq'ae, qiqsheel e saeziq za, zhoqmyel fu ae'lye xilnye silqinq zongl gil kaollaoq, aeqgael yoqhhaeteel maeq zonglkeel ongl myel maqza vae. 7 Lael, aedeeteel gaeyil gil maoq, tyuqvae yil kaol yoqhhaeteel e saeziq mael zonglbeeq byel yil gil biq maoq, kaol yoqhhaeteel qiq hhaeq gee e saeziq mael qiq hhaeq maeq bi naelhaeq kiq vae." 8 Tyulkaol, Yeheqhuaq lye yoqhhaeteel yaol milcaeq taq'ae haeqvae lael'ee myel bi zholsanq deel yil vae. Tyulnye laol, yoqhhaeteel milmae heeqmyel mael maq cu myel zhol deel vae. 9 Yeheqhuaq lye milcaeq taq'ae haelzhol cholyaeqhael e saeziq mael tyuqvae lye zonglbeeq byel biq vae, kaol yoqhhaeteel yaol milcaeq taq'ae bi zholsanq deel yil vae. Tyulkaol, tyuqvae milmae heeqmyel mael Babyeqa lye gul hhae.Sanq e houldailhael
Dailshangl 1:24-27
10 Sa'oqboqhael laoq Sanq e houldailhael'ae cuga deelhhei mael. Sanq qiqhael (100) hoq fu, Yalfaqsa du'lal biq. Tyuqfu laoq haqmeq eeldeel deelmae mael gee yil e aeqnaol niq hoq'ae. 11 Sanq'ae Yalfaqsa du'lal biq aeqnaol'ae, ngaeqhael (500) hoq yol dyeq hhei vae, kaol yaqyohael kaol yaeqmiqhael eiq du'lal biq'ae siq.
12 Yalfaqsa suqqyel ngaeq hoq fu, Sa'la du'lal biq. 13 Yalfaqsa vae Sa'la du'lal biq aeqnaol'ae, yuqhael suq (403) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
14 Sa'la suqqyel hoq fu, Xiboq du'lal biq. 15 Sa'la vae Xiboq du'lal biq aeqnaol'ae, yuqhael suq (403) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
16 Xiboq suqqyel yuq hoq fu, Faqlel du'lal biq. 17 Xiboq vae Faqlel du'lal biq aeqnaol'ae, yuqhael suqqyel (430) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
18 Faqlel suqqyel hoq fu, Lavuq du'lal biq. 19 Faqlel vae Lavuq du'lal biq aeqnaol'ae, niqhael hhaoq (209) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
20 Lavuq suqqyel niq hoq fu, Xi'lul du'lal biq. 21 Lavuq vae Xi'lul du'lal biq aeqnaol'ae, niqhael siq (207) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
22 Xi'lul suqqyel hoq fu, Naqhel du'lal biq. 23 Xi'lul vae Naqhel du'lal biq aeqnaol'ae, niqhael (200) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
24 Naqhel niqqyel hhaoq hoq fu, Ta'la du'lal biq. 25 Naqhel vae Ta'la du'lal biq aeqnaol'ae, qiqhael qyelhhaoq (119) hoq yol dyeq vae, kaol yaqyohael kaol yaeqmiqhael eiq du'lal biq'ae siq.
26 Ta'la siqqyel hoq fu aeqdae geiq vae, yoqhhaeq laoq Yalboqlanq, Naqhel kaol Ha'lanq e aeqdae ngeelvae.
Ta'la e houldailhael
27 Sa'oqboqhael laoq Ta'la e houldailhael'ae cuga deelhhei mael'ae: Ta'la'ae Yalboqlanq, Naqhel kaol Ha'lanq du'lal biq; Ha'lanq'ae Loqdeq du'lal biq. 28 Ha'lanq laoq aeqyoq e aeqdae Ta'la laefuq'ae, yoqhhaeq dyeqlal e Ja'leldiq milcaeq e Vuq'eq vae sil vae. 29 Yalboqlanq kaol Naqhel niq nulhhaeq myel haeqmiq sheeqtoq hhei vae. Yalboqlanq e haeqmiq e cholmil mael Saqlaiq lye gul biq hhae, Naqhel e haeqmiq e cholmil mael Milja lye gul biq hhae. Yoqhhaeq laoq Ha'lanq e yaeqmiq'ae, Ha'lanq laoq Milja kaol Yilja e aeqdae'ae. 30 Saqlaiq yaeqguq maeq bo kiq biq kaol yaeqguq maeq zhol biq'ae. 31 Ta'la laoq aeqyoq e yaqyo Yalboqlanq, aeqyoq e yuqpaeq (Ha'lanq e yaqyo) Loqdeq, kaol aeqyoq e keeqmae, (Yalboqlanq e haeqmiq) Saqlaiq yaol sheeq hheikaol, Ja'leldiq milcaeq e Vuq'eq ae'lye Ja'nanq milcaeq vae keelyil maoqlye hhae. Ngeelfeiq, yoqhhaeteel Ha'lanq milcaeq vae keellael laol, tyuqvae zholgae hhei gil vae. 32 Ta'la niqhael ngaeq (205) hoq dyeq hhei'laol, Ha'lanq milcaeq vae sil vae.