Momil Yalboqlanq nyegael geemeeq deelhhei
15
Silqinq xihael aeqnaol'ae, Yeheqhuaq e saeziq mael yilxiangl onglci'ae lye Yalboqlanq'ae yo'li biq:"Yalboqlanq, maq gu kael,
ngael laoq noq e daqzhangldiq fu ocongq e qiq hhaeq lil;
noq'ae duqgongqgongqlye shangqcil laeqngeel."
2 Yalboqlanq gee: "Hhaoqsongl Yeheqhuaq o! Ngael yaeqguq maeq zhol myel hhae sil oqnaol yaevae, nol ngaeq'ae aeqchee biq laqngeel siq maeq? Ngaeq e halza haelzholhael kaol laqtaq hhamul gayil e cholyaeq laoq, Dalmaqshilgeq ae'lye lael e cholyaeq Yiqlilyiqxyel'ae." 3 Yalboqlanq yol gee: "Nol ngaeq'ae houldail maq biq laq, tyulkaol, ngatoq e yaqhacheqzaq e cholyaeq tyutaeq laoq, ngaeq e halza haelzholhael hhamul gayil e laqtaq za e cholyaeq ngeelvae." 4 Yeheqhuaq e saeziq mael Yalboqlanq vae yo'li biq, gee: "Xitaeq noq e halza haelzholhael hhamul gayil e laqtaq za e cholyaeq maq peqlal kiq'ae; noq ae'lye du'lal e cholyaeq laoq noq e halza haelzholhael hhamul gayil e laqtaq za e cholyaeq'ae." 5 Tyulkaol, Yeheqhuaq lye Yalboqlanq yaol nilduboq'ae sheeq duyil biq, gee: "Nol mqmae'ae chifu da hhei, aeqgeel mael haeldyul zoq maeq lye suqda fufu; nol aeqgeelhael suqda byel ongl lilmaeq? Noq e houldailhael aeqgael xilnye naeqlael ngeelvae." 6 Yalboqlanq Yeheqhuaq e saeziq mael xiangxinl vae, kaol Yeheqhuaq yoqhhaeq'ae gongyil e cholyaeq'ae lye suanl biq hhae.
7 Yeheqhuaq Yalboqlanq'ae yol gee biq: "Ngael laoq Yeheqhuaq lil, noq yaol Ja'leldiq e Vuq'eq ae'lye sheeq duyi biq mael laoq, milcaeq xihael noq'ae biq hhei biq kaol zaeqdye halngeiq bi geiq maoqlye kaollil." 8 Yalboqlanq gee: "Hhaoqsongl Yeheqhuaq o! Ngael haelmillyekaol milcaeq xihael zaeqdye halngeiq hhamul'ae lye loq laeq?" 9 Yeheqhuaq yoqhhaeq'ae gee biq: "Nol ngaeq'ae sul hoq e nyelhael haelyaeq qiq keel, sul hoq e ciqmae maeyaeq qiq yaeq, sul hoq e aeqyol yolpaeq aelyaeq qiq yaeq cheellaeq, nulzhol haoqhaoq qiq yaeq, kaol haoqhaoq aelyaeq qiq yaeq niq laq." 10 Kaol Yalboqlanq xihael gilzuqmyel heil laeq vae, hae qiqsheel mael eiq ongllongl onglci ae'lye depa hhei, kaol qiqboq'ae qiq pa qiq pa lye baqdeel hhei, ngeelfeiq, haeqzil mael laoq maq depa'ae. 11 Haeqjyelhael beel gaeyi, kaol saeqzil xihael vae beelcheeq da hhei yi, kaol Yalboqlanq lye haeqjyelhael lyeqsae biq vae.
12 Neelmae leeqdo fu, Yalboqlanq yuqxulteeq hhae, qiqlaqmyel gu lal aeqmyel nahongq hongqmae yoqhhaeq'ae loq dayi biq. 13 Yeheqhuaq Yalboqlanq'ae gee biq: "Nol aeqdilmyel loq maoqhhae, noq e houldailhael ochoq e milcaeq vae hhae baelzhol hhae, tyuqvae milcaeq e cholyaeqhael e aqlaq holhhaq vae hhae zhol hhae, tyuqvae milcaeq e cholyaeqhael lye yoqhhaeteel'ae yuqhael (400) hoq hhae bi zonglkyuq ngeelvae. 14 Yoqhhaeteel yaol hhaeq'ongq bi ongqzaeq e goqja tyulmael, ngael ngaeq e aqlaq maellye chenqfaq biq maoq. Aeqnaol yoqhhaeteel laoq haelnaeqmyel e jadanglhael heil hheikaol tyuqvae lye duyi maoqlye hhae. 15 Nol aeqyil maol lye hhae zhol'ae, kaol cholyaeq lye bi baqduqm hhei, neesaelhhae'lye noq e aeqpyuq aeqdaehael tyuqvae hoqli maoqlye hhae. 16 Yalmoqlil cholyaeq xinqlalmyel zongl hhae, ngeelfeiq, sildyel maeq keel'ae siq, tyulkaol, yuqhael (400) hoq aeqnaol'ae, yoqhhaeteel saeqvae hoqlal maoqlye hhae." 17 Neelmae leeqdo hhei'laol mqkiqkiq gayi fu, qiqlaqmyel aeqhaoqdyu e heqzi heil do e jyelpeeq kaol aeqzaeq doq e aldoq, saeqzil tyuhael e kaeqlaeq ae'lye deelpol duyil. 18 Tyuqfu qiqlaq'ae, Yeheqhuaq Yalboqlanq nyegael geemeeq deelhhei, gee:
"Ngaeq lye milcaeq xihael noq e houldailhael'ae biq biq wae.
Milcaeq xihael laoq Aijiq Lolbaeq ae'lye mael lolbaeq baeqmae Yolfa'ladiq Lolbaeq vae keellye hhae.